20
Mɑn diyɑ Yesu u yiiko wɑ
(I mɑɑ mɛɛrio Mɑteu 21:23-27, Mɑɑku 11:27-33)
1 Sɔ̃ɔ teeru nge mɛ Yesu u Gusunɔn gɑrin keu sɔ̃ɔsimɔ sɑ̃ɑ yerɔ, mɑ u Lɑbɑɑri geɑn wɑɑsu mɔ̀, yɑ̃ku kowo tɔnwerobu kɑ woodɑ yɛ̃robu kɑ Yuubɑn guro gurobu bɑ kurɑmɑ. 2 Bɑ nɛɛ, ɑ sun sɔ̃ɔwɔ woodɑ yerɑ̀ ɑ kɑ yeni mɔ̀. Wɑrɑ u nun yen yiiko wɛ̃.
3 U bu sɔ̃ɔwɑ u nɛɛ, nɛ mɑɑ, nɑ kon bɛɛ gɑri gɛɛ bikiɑ, kpɑ i mɑn sɔ̃. 4 Mɑn diyɑ Yohɑnu u woodɑ wɑ u kɑ tɔmbu bɑtɛmu kuɑ. Tɔnun min di? Nge wɔllun di.
5 Adɑmɑ bɑ gerunɑ bɑ nɛɛ, sɑ̀ n geruɑ wɔllun diyɑ, u koo nɛɛ, mbɑn sɔ̃nɑ sɑ ǹ nùn nɑɑnɛ doke. 6 Sɑ̀ n mɑɑ nɛɛ, tɔnun min di, tɔmbu kpuro bɑ koo sun kpenu kɑsuku domi bɑɑwure u Yohɑnu gɑrisi Gusunɔn sɔmɔ.
7 Yerɑ bɑ wisɑ bɑ nɛɛ, sɑ ǹ yɛ̃ mɑn diyɑ. 8 Mɑ Yesu u bu sɔ̃ɔwɑ u nɛɛ, nɛ mɑɑ, nɑ ǹ bɛɛ sɔ̃ɔmɔ yiiko ye nɑ kɑ yeni mɔ̀.
Gbɑɑ wuko kɔ̃sobun gɑri
(I mɑɑ mɛɛrio Mɑteu 21:33-46, Mɑɑku 12:1-12)
9 Yen biru u tɔmbu mɔn teni kuɑ u nɛɛ, durɔ goo u resɛm gbɑɑru kuɑ u dɑ̃nu duurɑ mɑ u kɔ̃sobu kɑsu u bu ye nɔmu bɛriɑ, mɑ u wuu dɑ n kɑ tɛ. 10 Sɑnɑm mɛ sɑɑ yɑ turɑ u sɔmɔ gɔrɑ kɔ̃so ben mi, bu kɑ nùn wɛ̃ɛmɑ ye n sɑ̃ɑ wigiɑ. Kɔ̃so be, bɑ nùn so, bɑ nùn girɑ nɔm dirɑ. 11 U kpɑm kpɑo gɔrɑ. Bɑ nùn so, bɑ nùn yɑɑ kɑsiki, bɑ girɑ nɔm dirɑ. 12 U kpɑm itɑse gɔrɑ. Bɑ nùn mɛɛrɑ kuɑ mɑ bɑ nùn girɑ. 13 Gbɑɑ yɛ̃ro wi, u nɛɛ, mbɑ kon ko tɛ̃. Kon den nɛn tiin bii kĩnɑsi bu gɔriɑwɑ. Sɔrɔkudo bɑ koo nùn bɛɛrɛ wɛ̃. 14 Adɑmɑ ye kɔ̃so be, bɑ nùn wɑ, bɑ gerunɑ bɑ nɛɛ, wiyɑ sɑ̃ɑ tubi dio, su nùn go, kpɑ gbɑɑ te, tu ko bɛsɛgiru. 15 Mɑ bɑ nùn yɑrɑ gbɑɑ ten biruɔ, bɑ nùn go.
Tɛ̃ mbɑ gbɑɑ yɛ̃ro wi, u koo bu kuɑ. 16 U koo nɑ u bu kpeerɑsiɑ, kpɑ u win gbɑɑ te kɔ̃so kpɑobu nɔmu bɛriɑ.
Sɑnɑm mɛ tɔn be bɑ nùn swɑɑ dɑki bɑ ye nuɑ, yerɑ bɑ nɛɛ, su ku wɑ mɛ.
17 Adɑmɑ Yesu u bu nɔni kɔ̃ u kɑ dɑ mɑ u nɛɛ, mbɑ gɑri yin tubusiɑnu yi bɑ yoruɑ bɑ nɛɛ, <<Kpee te bɑnɔbɑ yinɑ, terɑ tɑ kuɑ gɑni gɔmburun dɑm.>> 18 Bɑɑwure wi u kpee te wɔri, tɑ koo nùn bɔɔku, wi tɑ mɑɑ wɔri, tɑ koo nùn nɑmwɑ muku muku.
Wɔ̃ɔ gobin kɔsiɑbun gɑri
(I mɑɑ mɛɛrio Mɑteu 22:15-22, Mɑɑku 12:13-17)
19 Sɑɑ tiɑ ye sɔɔ, yɑ̃ku kowo tɔnwerobu kɑ woodɑ yɛ̃robu bɑ kɑsu bu Yesu mwɑ, domi bɑ tubɑ mɑ ben sɔ̃nɑ u mɔn te kuɑ. Adɑmɑ bɑ tɔn wɔru nɑsie. 20 Bɑ Yesun lɑɑkɑri mɔ kpuro sɔɔ. Mɑ bɑ tɔn sɑmbɑ kowobu gɔrɑ win mi, be bɑ sɑ̃ɑre geegibu bu kɑ nùn mwɑ win gɑri gɛɛ sɔɔ, kpɑ bu nùn tem yɛ̃ro nɔmu beriɑ. 21 Tɔn be, bɑ nùn bikiɑ bɑ nɛɛ, yinni sɑ yɛ̃ mɑ wunɛn gɑri kɑ wunɛn sɔ̃ɔsirɑ sɑ̃ɑ dee dee, ɑ ku rɑ mɑɑ kĩru gem wɛ̃, ɑ Gusunɔn swɑɑ sɔ̃ɔsimɔwɑ gem sɔɔ. 22 N weenɛ su tem yɛ̃ro wɔ̃ɔ gobi wɛ̃? Nge su ku wɛ̃.
23 Ye Yesu u ben bwisiku kɔ̃sunu wɑ, yerɑ u nɛɛ, 24 i mɑn gobi sɔ̃ɔsimɑ. Mɑ bɑ nùn yi wɛ̃. Mɑ u nɛɛ, wɑrɑn foto kɑ yĩrerɑ mi.
Bɑ nɛɛ, tem yɛ̃rogiɑ.
25 Mɑ u bu sɔ̃ɔwɑ u nɛɛ, ǹ n mɛn nɑ, i tem yɛ̃ro wɛ̃ɛyɔ ye n sɑ̃ɑ tem yɛ̃rogiɑ, kpɑ i Gusunɔ wɛ̃ ye n sɑ̃ɑ Gusunɔgiɑ.
26 Mɑ bɑ kpɑnɑ bu nùn nɔmɑ turi win gɑri sɔɔn di tɔmbun wuswɑɑɔ. Yerɑ bɑ kɑ win wisibu biti kuɑ, mɑ bɑ ben nɔɔ mɑri.
Gɔribun seebun gɑri
(I mɑɑ mɛɛrio Mɑteu 22:23-33, Mɑɑku 12:18-27)
27 Sɑdusibɑ be bɑ rɑ nɛɛ gɔribɑ kun seemɔ, ben gɑbu bɑ nùn susi mɑ bɑ bikiɑ bɑ nɛɛ, 28 yinni, n wee ye Mɔwisi u sun yoruɑ. U nɛɛ, <<Goon bɛɛrɛ̀ ù n gu u kurɔ deri, mɑ u kun kɑ kurɔ wi bii mɑrɑ, u koo kpĩ u nùn tubi di, kpɑ u kɑ win bɛɛrɛ̀ bweseru wɑɑwɑ.>> 29 Nge mɛnɑ, tundo turosibu nɔɔbɑ yiru gɑbɑ rɑɑ wɑ̃ɑ. Gbiikoo u kurɔ suɑ mɑ u gu, u ǹ kɑ kurɔ wi bii mɔ. 30-31 Yiruse kɑ itɑse bɑ nùn suɑ gɔminiru. Mɛyɑ n kuɑ sere be nɔɔbɑ yiru ye, bɑ kɑ gu. Bɑ ǹ bii mɑrɑ. 32 Kurɔ wi, u rɑ gu. 33 Gɔribun seebun sɑnɑm ben weren kurɔwɑ u ko n sɑ̃ɑ. Domi be nɔɔbɑ yiru ye kpurowɑ bɑ nùn giɑ kurɔ.
34 Yesu u bu wisɑ u nɛɛ, hɑnduniɑ yen tɔmbɑ bɑ kurɔbu kɑ durɔbu suɑmɔ, 35 ɑdɑmɑ sibu be bɑ ko n bɔnu mɔ siɑn wɑ̃ɑru kɑ gɔribun seebu sɔɔ, bɑ ǹ kurɔbu kɑ durɔbu suɑmɔ. 36 Bɑ ko n kɑ wɔllun gɔrɑdobɑ weenɛwɑ bɑ ǹ mɑɑ gbimɔ. Bɑ ko n sɑ̃ɑ Gusunɔn bibu domi bɑ bu seeyɑ gɔrin di. 37 Mɔwisin tii u sɔ̃ɔsi sɑ̃ɑ sɑ̃ɑ mɑ gɔribɑ koo se, ye u Gusunɔ sokɑ u nɛɛwɑ, <<Gusunɔ Aburɑhɑmun Yinni, kɑ Isɑkin Yinni, kɑ Yɑkɔbun Yinni>> ɑwĩi dɔ̃ɔgii yin gɑri sɔɔ. 38 Gusunɔ kun sɑ̃ɑ gɔribun Yinni. U sɑ̃ɑwɑ wɑsobugii, domi win mi kpuro bɑ sɑ̃ɑwɑ wɑsobu.
39 Gɑbu woodɑ yɛ̃robu sɔɔ bɑ nɛɛ, yinni, wunɛn gɑri yi, yi dɛnde.
40 Bɑ ǹ mɑɑ kɑ̃kɑ bɑ nùn gɑ̃ɑnu gɑnu bikie.
Dɑfidi kɑ wi Gusunɔ u gɔsɑ
(I mɑɑ mɛɛrio Mɑteu 22:41-46, Mɑɑku 12:35-37)
41 Mɑ Yesu u bu bikiɑ u nɛɛ, ɑmɔnɑ bɑ koo kɑ kpĩ bu nɛɛ, Kirisi sɑ̃ɑwɑ Dɑfidin bii. 42 Domi Dɑfidin tii u geruɑ Womusun tireru sɔɔ u nɛɛ,
<<Yinni Gusunɔ u nɛn Yinni sɔ̃ɔwɑ u nɛɛ, ɑ sinɔ nɛn nɔm geuɔ,
43 sere n kɑ nun wunɛn yibɛrɛbɑ tɑɑreɑ.>>
44 Dɑfidi ù n nùn sokɑ Yinni, ɑmɔnɑ u ko n mɑɑ kɑ sɑ̃ɑ win bii.
I tii lɑɑkɑri koowo
kɑ woodɑ yɛ̃robu
(I mɑɑ mɛɛrio Mɑteu 23:1-36, Mɑɑku 12:38-40)
45 Sɑnɑm mɛ tɔn dɑbirɑ nùn swɑɑ dɑki, u win bwɑ̃ɑbu sɔ̃ɔwɑ u nɛɛ, 46 i tii lɑɑkɑri ko kɑ woodɑ yɛ̃robu be bɑ kĩ bɑ n bɔsu kɑ yɑbe dɛndɛnnu, bɑ tɔbirinɑɑ kĩ bɑtumɑ sɔɔ, bɑ sin yee gbiikinu kɑsu mɛnnɔ yenɔ kɑ ɑye bɛɛrɛginu dim soku yerɔ. 47 Bɑ gɔminibun yɛnusu dimɔ, mɑ bɑ kɑnɑ dɛndɛnnu mɔ̀ bu kɑ bu wɑn sɔ̃. Bɑ koo bu tɑɑrɛ wɛ̃ n kpɑ̃.