19
Yesu kɑ Sɑkeu
1 Yesu u duɑ wuu ge bɑ mɔ̀ Yerikoɔ, u gu bukiɑnɛ. 2 Miyɑ durɔ gobigii goo u wɑ̃ɑ wi bɑ mɔ̀ Sɑkeu wi u sɑ̃ɑ gbere mwɑɔbun wirugii. 3 U kĩ u Yesu wɑ, ɑdɑmɑ u ǹ kpĩɑ tɔn wɔrun sɔ̃ yèn sɔ̃ wi, tɔn kpiribuwɑ. 4 Yerɑ u dukɑ dɑ wuswɑɑɔ mɑ u yɔɔwɑ dɑ̃ɑ te bɑ mɔ̀ sikɑmɔren wɔllɔ u kɑ nùn wɑn sɔ̃, domi u yɛ̃ mɑ miyɑ u koo kɑ doonɑ. 5 Sɑɑ ye Yesu u turɑ yɑm mi, u nɔni seeyɑ mɑ u nùn sɔ̃ɔwɑ u nɛɛ, Sɑkeu ɑ sɑrɑmɑ kpɑɑkɑ, domi wunɛn yɛnuɔrɑ nɑ kon sɔbiɑ gisɔ.
6 Sɑkeu sɑrɑmɑ kɑ sɛndɑru mɑ u Yesu dɑm koosiɑ kɑ nuku dobu. 7 Ye tɔmbɑ ye wɑ, be kpuro bɑ wɔki bɑ nɛɛ, u dɑ u sɔbiɑ kɔ̃sɑn kowon yɛnuɔ.
8 Sɑkeu u seewɑ u yɔ̃rɑ Yinnin wuswɑɑɔ u nɛɛ, n wee Yinni nɑ nɛn dukiɑn bɔnu sɑ̃ɑrobu wɛ̃ɛmɔ. Nɑ̀ n mɑɑ goo gɑ̃ɑnu wɔrɑri kɑ tɑki nɑ nùn yen nɔn nnɛ wesiɑmɔ.
9 Yesu u nùn sɔ̃ɔwɑ u nɛɛ, gisɔ fɑɑbɑ duɑ yɛnu ge sɔɔ yèn sɔ̃ winin tii mɑɑ sɑ̃ɑ Aburɑhɑmun bweseru. 10 Domi Tɔnun Bii u nɑwɑ u kɑ kɑsu be bɑ kɔ̃ɔrɑ u bu fɑɑbɑ ko.
Nge mɛ sɔm kowobɑ kɑ gobi
mɛro kuɑ
(I mɑɑ mɛɛrio Mɑteu 25:14-30)
11 Sɑnɑm mɛ tɔmbɑ yeni swɑɑ dɑki, u kpɑm mɔndu kuɑ yèn sɔ̃ u Yerusɑlɛmu turuku kuɑ mɑ bɑ tɑmɑɑ Gusunɔ u koo bɑndu swĩiwɑ yɑnde. 12 Yerɑ u nɛɛ, sinɑ bii goo u bɑndu dibu dɑ n tomɑ tem gɑm giɑ, kpɑ u wurɑmɑ yen biru. 13 U sere doonɑ u wɔkuru sokɑ win yobu sɔɔ, mɑ u ben bɑɑwure gobi bɛkɛ gɛɛ wɛ̃ u nɛɛ, bu de gobi yi, yi mɑ sere u kɑ wurɑmɑ. 14 Win temgibu bɑ nùn tusɑ mɑ bɑ nɔɔ tiɑ kuɑ bɑ tɔmbu gɔrɑ bu nɛɛ, bɑ ǹ kĩ durɔ wi, u bɑndu di ben temɔ.
15 Sɑnɑm mɛ u wumɑ ye u bɑn te diimɑ, u yoo be sokɑ win mi be u rɑɑ gobi wɛ̃, kpɑ u kɑ wɑ nge mɛ bɑɑwuren gobi nùn mɑruɑ. 16 Gbiikoo nɑ u nɛɛ, yinni wunɛn gobi yi, yi mɑrɑ wɔkuru. 17 U nùn sɔ̃ɔwɑ u nɛɛ, yɑ wɑ̃ yoo geo. Yèn sɔ̃ ɑ kuɑ nɑɑnɛgii gɑ̃ɑ piiminu sɔɔ, nɑ nun kuɑ wuu mɑrosu wɔkurun wirugii. 18 Yiruse nɑ u nɛɛ, yinni wunɛn gobi yi, yi mɑrɑ nɔɔbu. 19 U nùn sɔ̃ɔwɑ u nɛɛ, wunɛ mɑɑ, nɑ nun kuɑ wuu mɑrosu nɔɔbun wirugii. 20 Kpɑo nɑ u nɛɛ, yinni wunɛn gobi wee yi nɑ beruɑ kĩɑsu sɔɔ. 21 Domi nɑ wunɛn bɛrum mɔ yèn sɔ̃ ɑ sɑ̃ɑ tɔn sɛ̃sɔgii. A rɑ suewɑ ye ɑ kun yii, kpɑ ɑ gɛ̃ mi ɑ kun duure. 22 U nùn sɔ̃ɔwɑ u nɛɛ, nɑ kon nun siriwɑ wunɛn gɑri sɔɔn di, yoo kɑm. A yɛ̃ mɑ nɑ sɑ̃ɑ tɔn sɛ̃sɔgii, nɑ rɑ sue ye nɑ kun yii, kpɑ n gɛ̃ mi nɑ kun duure. 23 Ǹ n mɛn nɑ, mbɑn sɔ̃nɑ ɑ ǹ goo nɛn gobi yi wɛ̃ u kɑ gobi mɛro ko, kpɑ n nɛnyɑm mwɑ kɑ ɑre sɑnɑm mɛ nɑ wɔmɑ. 24 Mɑ be bɑ wɑ̃ɑ mi, u bu sɔ̃ɔwɑ bu gobi yi mɔɔ bu wɔkurugii wi wɛ̃. 25 Bɑ nùn sɔ̃ɔwɑ bɑ nɛɛ, yinni, u wɔkuru mɔ kɔ. 26 U nɛɛ, nɑ bɛɛ sɔ̃ɔmɔ, wi u mɔ, win mɔru sɔɔrɑ bɑ koo nùn sosiɑ. Wi u kun mɑɑ mɔ, fiiko ye u mɑm mɔ bɑ koo nùn mwɑɑri. 27 Yen biru i kɑ nɛn yibɛrɛbɑ nɑ mini be bɑ kun kĩ n bɑndu di kpɑ i bu sɑkiri nɛn wuswɑɑɔ.
Yesu u Yerusɑlɛmu duɑ
28 Ye Yesu yeni geruɑ u kpɑ, u win swɑɑ mwɑ u bu gbiiyɑ Yerusɑlɛmu giɑ. 29 Sɑnɑm mɛ u Bɛtefɑgi kɑ Betɑni turuku kuɑ, guurun berɑ giɑ te bɑ rɑ soku Olifin guuru, u tɔmbu yiru gɔrɑ win bwɑ̃ɑbu sɔɔ 30 u nɛɛ, bu doo wuu ge gɑ wɑ̃ɑ ben wuswɑɑɔ mi. Bɑ̀ n duɑ bɑ koo kɛtɛku buu wɑ gɑ sɔri ge goo kun sɔnire. U nɛɛ, bu gu sɔsiɑmɑ bu kɑ nɑ. 31 Goo ù n bu bikiɑ mbɑn sɔ̃nɑ bɑ gu sɔsiɑmɔ, bu nɛɛ, Yinniwɑ u gen bukɑtɑ mɔ.
32 Be u gɔrɑ bɑ doonɑ, mɑ bɑ yɑbu bɑɑyere deemɑ nge mɛ u bu sɔ̃ɔwɑ. 33 Ye bɑ kɛtɛku buu ge sɔsiɑmɔ, gen yinnibɑ nɛɛ, mbɑn sɔ̃nɑ i kɛtɛku buu ge sɔsiɑmɔ.
34 Bɑ nɛɛ, Yinniwɑ u gen bukɑtɑ mɔ.
35 Mɑ bɑ kɑ Yesu kɛtɛku buu ge nɑɑwɑ. Bɑ ben yɑ̃nu tɛriɑ gen wɔllɔ mɑ bɑ Yesu sɔndi. 36 Ye u dɔɔ, mɛyɑ tɔmbɑ ben yɑ̃nu tɛriɑmɔ swɑɑ sɔɔ. 37 Sɑnɑm mɛ u Yerusɑlɛmu turuku kuɑ Olifin guurun swɑɑn bɔkuɔ, win bwɑ̃ɑbu kpuro bɑ nɔɔgiru suɑ bɑ Gusunɔ siɑrɑmɔ kɑ nuku dobu sɔm mɑɑmɑɑkiginu kpuron sɔ̃ ye bɑ wɑ. 38 Bɑ nɛɛ, Gusunɔ u sunɔ wi u sisi kɑ win yĩsiru domɑru kuo, ɑlɑfiɑ yɑ n wɑ̃ɑ wɔllɔ, kpɑ yiiko yɑ n wɑ̃ɑ wɔwɔlleɔ.
39 Fɑlisi gɑbu sɑɑ tɔn wɔrun suunu sɔɔn di bɑ Yesu sɔ̃ɔwɑ bɑ nɛɛ, yinni ɑ wunɛn bwɑ̃ɑ be mɑrisio.
40 U bu wisɑ u nɛɛ, nɑ bɛɛ sɔ̃ɔmɔ, bɑɑ beni bɑ̀ n mɑri, kpenu koo gbɑ̃rɑ.
Yesu Yerusɑlɛmu swĩiyɑ
41 Sɑnɑm mɛ Yesu u Yerusɑlɛmu turuku kuɑ, ye u ye wɑ yerɑ u swĩi wɔri yen sɔ̃, 42 u nɛɛ, wunɛ Yerusɑlɛmu ɑ̀ n dɑɑ tɛ̃ yɛ̃ ye yɑ koo kɑ nun ɑlɑfiɑ nɑɑwɑ ni, bɑɑ gisɔ! Adɑmɑ wee, yɑ nun kukue. 43 Sɑnɑm koo nun nɑɑwɑ mɛ̀ sɔɔ wunɛn yibɛrɛbɑ bɑ koo nun tɑrusi, kpɑ bu nun kooro bure bu nun sɛ̃kenɛ beri berikɑ kpuron di. 44 Bɑ koo nun nɑm, wunɛ kɑ wunɛn bibu be bɑ wɑ̃ɑ wunɛn suunu sɔɔ. Bɑ ǹ derimɔ kpenu nu sɔnnɑ wunɛ sɔɔ, yèn sɔ̃ ɑ ǹ tubɑ sɑɑ ye Gusunɔ u nun nɑɑwɑ.
Yesu u duɑ sɑ̃ɑ yerɔ
45 Yesu duɑ sɑ̃ɑ yerɔ mɑ u kiɑ dɔrobu girɑm wɔri. 46 U bu sɔ̃ɔwɑ u nɛɛ, bɑ yoruɑ, <<Nɛn diru tɑ ko n sɑ̃ɑwɑ kɑnɑrun diru.>> Adɑmɑ bɛɛ i tu kuɑ gbɛnɔbun wɑ̃ɑ yeru.