10
Yesu u bwɑ̃ɑbu wɑtɑ
kɑ wɔkuru gɔrɑ
1 Yen biru Yinni u kpɑm gɑbu wɑtɑ kɑ wɔkuru gɔsɑ, mɑ u bu gɔrɑ yiru yiru win wuswɑɑɔ wuu mɑro bɑɑgere sɔɔ kɑ bɑɑmɑ mi win tii u gɔ̃ru doke u rɑ dɑ. 2 U nɛɛ, ye yɑ ye bu kɑ gɛ̃ yɑ kpɑ̃, ɑdɑmɑ be bɑ gɛ̃ɛmɔ bɑ ǹ dɑbi. Yen sɔ̃, i gbee yɛ̃ro kɑnɔ u kpɑm tɔmbu mɔrisiɑmɑ bu kɑ gɛ̃. 3 N wee nɑ bɛɛ gɔriɔ nge yɑ̃ɑ binu dɛmɑkunun suunu sɔɔ. I seewo i dɑ. 4 I ku kɑ yɑnsurɔru dɑ kɑ bɔɔru kɑ bɑrɑnu, i ku mɑɑ goo tɔbiri swɑɑɔ. 5 Yɛnu gè sɔɔ i duɑ, i gbiiyo i bu sɔ̃ i nɛɛ, Gusunɔ u bɛɛ ɑlɑfiɑ kɛ̃. 6 Alɑfiɑgii ù n wɑ̃ɑ mi, bɛɛn ɑlɑfiɑ yɑ ko n wɑ̃ɑ kɑ yɛ̃ro. Ù kun mɑɑ wɑ̃ɑ mi, yɑ koo wurɑmɑ bɛɛ sɔɔ. 7 I koowo yɛnu gen sɔbu kpɑ i n dimɔ i n nɔrumɔ ye bɑ bɛɛ wɛ̃, domi n weenɛ bu sɔm kowo win kɔsiɑru wɛ̃. I ku ko yɛnu dɑbinun sɔbu. 8 Wuu gè sɔɔ i duɑ, mɑ bɑ bɛɛ dɑm koosiɑ, i dio ye bɑ bɛɛ wɛ̃, 9 i bɑrɔbu bɛkio be bɑ wɑ̃ɑ mi, kpɑ i bu sɔ̃ mɑ Gusunɔ u sisi u bɑndu swĩi. 10 Adɑmɑ wuu gè sɔɔ i duɑ mɑ bɑ kun bɛɛ dɑm koosie, i doo gen yɑɑrɑɔ, kpɑ i nɛɛ, 11 bɑɑ ben wuun tuɑ ye yɑ mɑni bɛɛn nɑɑsɔ, i bu kpɑremɔ, kpɑ bu kɑ giɑ mɑ Gusunɔ u sisi u bɑndu swĩi. 12 Nɑ bɛɛ sɔ̃ɔmɔ, tɔ̃ɔ te sɔɔ, Sodomugiɑ koo ko kpɑkɑkɑ kɑ sere wuu ge.
Wuu sìn tɔmbɑ yinɑmɔ
bu nɑɑnɛ doke
(I mɑɑ mɛɛrio Mɑteu 11:20-24)
13 Yesu mɑɑ nɛɛ, nɔni swɑ̃ɑrugiiwɑ wunɛ Kɔrɑsɛni, nɔni swɑ̃ɑrugiiwɑ wunɛ Bɛsɑidɑ, domi bɑ̀ n sɔm mɑɑmɑɑkigiɑ ye kuɑ Tiri kɑ Sidoni sɔɔ, ye bɑ kuɑ bɛɛn suunu sɔɔ, wuu sin tɔmbu bɑ ko n dɑɑ gɔ̃ru gɔsie sɑɑ tɛɛbun di, bɑ n sɔ̃ torom sɔɔ bɑ n sɑɑki sebuɑ nuku sɑnkirɑnun sɔ̃. 14 Yen sɔ̃, siribun sɑnɑm sɔɔ, Tiri kɑ Sidonigiɑ koo ko kpɑkɑkɑ kɑ sere bɛɛ. 15 Wunɛ mɑɑ Kɑpenɑmu, ɑ yĩiyɔ kɑɑ suɑrɑ sere wɔllɔ? Aɑwo, bɑ koo nun surewɑ sere gɔriɔ.
16 Mɑ u win bwɑ̃ɑbu sɔ̃ɔwɑ u nɛɛ, wi u bɛɛ swɑɑ dɑki, nɛnɑ u swɑɑ dɑki, wi u mɑɑ bɛɛ yinɑ, nɛnɑ u yinɑ, wi u mɑɑ mɑn yinɑ u mɑɑ wi u mɑn gɔrimɑ yinɑwɑ.
Wɑtɑ kɑ wɔku ten wurɑmɑru
17 Be wɑtɑ kɑ wɔku te, bɑ wurɑmɑ kɑ nuku dobu, mɑ bɑ nɛɛ, Yinni, sere kɑ wɛrɛkunɔ, nu sun wiru kpĩiyɑwɑ wunɛn yĩsirun sɔ̃.
18 Mɑ u bu sɔ̃ɔwɑ u nɛɛ, nɑ Setɑm wɑ yɑ wɔrumɑmɔ wɔllun di nge guru mɑɑkinu. 19 N wee, nɑ bɛɛ yiiko wɛ̃ i kɑ wɛɛ kɑ nii kɑ wɛrɔn dɑm kpuro tɑɑku, gɑ̃ɑnu gɑnu kun mɑɑ kpɛ̃ nu bɛɛ mɛɛrɑ ko. 20 Adɑmɑ, i ku gɔ̃ru dorɑ yèn sɔ̃ wɛrɛkunu nu bɛɛ wiru kpĩiyɑ, i gɔ̃ru doro yèn sɔ̃ bɑ bɛɛn yĩsinu yoruɑ wɔllɔ.
Yesun gɔ̃ru gɑ dorɑ
21 Sɑɑ tiɑ ye sɔɔ, Yesun gɔ̃ru gɑ dorɑ too kɑ Hunde Dɛɛron dɑm, mɑ u nɛɛ, Bɑɑbɑ, wɔllu kɑ tem Yinni nɑ nun siɑrɑ yèn sɔ̃ ɑ kɑ yɑbu ye yɛ̃rugibu kɑ bwisigibu beruɑ mɑ ɑ ye bibu sɔ̃ɔsi. N wɑ̃ Bɑɑbɑ, domi mɛyɑ n kɑ nun nɑɑwɑ wunɛn kĩru sɔɔ.
22 Nɛn Bɑɑbɑ u mɑn bɑɑyere wɛ̃. Goo sɑri wi u Bii yɛ̃ mɑ n kun mɔ Bɑɑbɑ wi. Goo mɑɑ sɑri wi u Bɑɑbɑ wi yɛ̃ mɑ n kun mɔ Bii wi, kɑ mɑɑ wi Bii wi, u kĩ u Bɑɑbɑ sɔ̃ɔsi.
23 Mɑ u sĩirɑ win bwɑ̃ɑbun berɑ giɑ u bu sɔ̃ɔwɑ be tɔnɑ u nɛɛ, doo nɔɔrugiiwɑ wìn nɔni wɑɑmɔ ye i wɑɑmɔ. 24 Domi nɑ bɛɛ sɔ̃ɔmɔ Gusunɔn sɔmɔbu kɑ sinɑmbu dɑbirɑ bɑ kĩɑ bu wɑ ye i wɑɑmɔ tɛ̃, bɑ ǹ mɑɑ wɑ. Bɑ kĩɑ bu nɔ ye i nɔɔmɔ tɛ̃, bɑ ǹ mɑɑ nuɑ.
Sɑmɑrigii wi u tɔn geeru kuɑ
25 N wee, woodɑ yɛ̃ro goo u seewɑ u kɑ Yesun lɑɑkɑri mɛɛri mɑ u nɛɛ, yinni, mbɑ kon ko n kɑ wɑ̃ɑru te tɑ ku rɑ kpe tubi di.
26 Yesu nùn bikiɑ u nɛɛ, mbɑ bɑ yoruɑ woodɑ sɔɔ. Mbɑ ɑ rɑ gɑri mi.
27 U wisɑ u nɛɛ, <<Kɑɑ Gusunɔ wunɛn Yinni kĩɑ kɑ wunɛn gɔ̃ru kpuro, kɑ wunɛn bwɛ̃rɑ kpuro, kɑ wunɛn dɑm kpuro, kɑ wunɛn bwisikunu kpuro, kpɑ ɑ wunɛn tɔnusi kĩɑ nge wunɛn tii tii.>>
28 Yesu nɛɛ, ɑ wisɑ n dɛnde, ɑ koowo mɛ, kɑɑ n wɑ̃ɑru mɔ.
29 Adɑmɑ durɔ wi, u kĩ u tii gem wɛ̃ mɑ u bikiɑ u nɛɛ, wɑrɑ nɛn tɔnusi.
30 Yesu u nɛɛ, ɑ swɑɑ dɑkio ɑ nɔ, durɔ goowɑ u wee Yerusɑlɛmun di u dɔɔ Yerikoɔ, mɑ u wɔri gbɛnɔbun nɔmɑ sɔɔ. Gbɛnɔ be, bɑ nùn swɑɑ di, bɑ nùn so, mɑ bɑ doonɑ bɑ nùn deri u wɑsikirɑmɔ. 31 N deemɑ kɑ sɑɑbu, yɑ̃ku kowo goo sɑrɔ kɑ swɑɑ ye. U durɔ wi wɑ mɑ u sɛ̃ɛnɑ u doonɑ. 32 Mɛnɑ mɑɑ Lefi goo u turɑ yɑm mi. U nùn wɑ mɑ u sɛ̃ɛnɑ u doonɑ. 33 Adɑmɑ Sɑmɑrigii goo u wuu dɔɔ u turɑ win bɔkuɔ. Ye u durɔ wi wɑ win wɔnwɔndɑ nùn mwɑ. 34 U susi mɑ u gum kɑ tɑm wisi win mɛɛrɑn bosu sɔɔ mɑ u su bɔkuɑ. Yen biru u nùn sɔndi ye u sɔnin wɔllɔ u kɑ nùn dɑ sɔbun sɔbiɑ yerɔ mɑ u nùn nɔɔri. 35 Yen sisiru, u gobi suɑ yi yi kɑ sɔm kowon sɔ̃ɔ yirun gobi nɛ, u yi sɔbiɑ yerun wirugii wɛ̃ mɑ u nɛɛ, ɑ durɔ wi nɔɔrio. À n mɑɑ di n mɛni kerɑ win sɔ̃, kon nun kɔsiɑ nɑ̀ n wurɑmɑ.
36 Mɑ Yesu nɛɛ, tɔmbu itɑ ye sɔɔ, ben wɑrɑ ɑ tɑmɑɑ u sɑ̃ɑ durɔ win tɔnusi wi u wɔri gbɛnɔbun nɔmɑ sɔɔ mi.
37 U nɛɛ, wi u nùn wɔnwɔndu kuɑ, wiyɑ.
Mɑ Yesu u nɛɛ, ǹ n mɛn nɑ, ɑ doo kpɑ ɑ n mɔ̀ mɛ.
Yesu dɑ Mɑɑtɑ kɑ Mɑɑrin mi
38 Sɑnɑm mɛ bɑ wɑ̃ɑ swɑɑɔ u wuu gɑgu duɑ mɑ kurɔ goo wi bɑ rɑ soku Mɑɑtɑ u derɑ u sɔbiɑ win yɛnuɔ. 39 Kurɔ wi, u wɔnɔ mɔ wi bɑ rɑ soku Mɑɑri. Wɔnɔ wi, u sɔ̃ Yinnin bɔkuɔ u win gɑri swɑɑ dɑki. 40 Adɑmɑ Mɑɑtɑ u kɑ doo kobu wɑsire, mɑ u nɑ u nɛɛ, Yinni n ǹ nun gɑm sɑ̃ɑ ye nɛn wɔnɔ u mɑn sɔmɑ ye derie nɛ turo? A ǹ kɑɑ de u nɑ u mɑn somi?