7
Yesu u tɑbu sunɔ goon yoo
bɛkiɑ
(I mɑɑ mɛɛrio Mɑteu 8:5-13)
1 Ye Yesu u gɑri yi kpuro tɔmbu sɔ̃ɔwɑ u kpɑ, u dɑ Kɑpenɑmuɔ. 2 Tɑbu sunɔ goo wɑ̃ɑ mi u yoo mɔ, wi u kĩ gem gem. Yoo wiyɑ u bɑrɔ sere u wɑsikirɑ. 3 Ye tɔnwero wi, u Yesun lɑbɑɑri nuɑ, yeyɑ u nùn Yuubɑn guro gurobu gɑbu gɔriɑ bu nùn suuru kɑnɑ u nɑ u win yoo bɛkiɑ. 4 Ye bɑ turɑ Yesun mi bɑ nùn suuru kɑnɑ gem gem bɑ nɛɛ, n turɑ ɑ durɔ wi ye kuɑ 5 domi u bɛsɛn bweseru kĩ. Wiyɑ mɑɑ sun bɛsɛn mɛnnɔ yeru bɑniɑ.
6 Mɑ Yesu u kɑ bu swɑɑ wɔri. Ye u yɛnu ge turuku kuɑ yerɑ tɑbu sunɔ wi, u win bɔrɔbɑ gɔrɑ bu Yesu sɔ̃ u ku tii gɔngɛrɛ ko, domi wi kun be turɑ u du win yɛnuɔ. 7 Yen sɔ̃nɑ u ǹ tii gɑrisi goo wi u koo kɑ tii dɑ Yesun mi. Adɑmɑ u be gesi gɑri geruo, win yoo u koo bɛkurɑ. 8 Domi wi, u gɑbu wiru kpĩiyɛ, u mɑɑ tɑbu kowobu mɔ be u kpɑre. Ù n turo sɔ̃ɔwɑ u doo, u rɑ n dɔɔwɑ. Ù n mɑɑ ben goo sɔ̃ɔwɑ u nɑ, u rɑ n sisiwɑ. Ù n win yoo sɔ̃ɔwɑ u yeni koowo, u rɑ n mɑɑ ye mɔ̀wɑ.
9 Ye Yesu u gɑri yi nuɑ biti yɑ nùn mwɑ, mɑ u sĩirɑ u tɔmbu sɔ̃ɔwɑ be bɑ nùn swĩi u nɛɛ, nɑ ǹ ginɑ nɑɑnɛ doke bɑkɑ binin bweseru wɑɑre, bɑɑ Isirelibɑ sɔɔ.
10 Ye gɔro be, bɑ gɔsirɑ yɛnuɔ bɑ deemɑ yoo wi, u bwɑ̃ɑ dorɑ.
Yesu u gɔmini goon bii seesiɑ
11 Yen sisiru Yesu dɑ wuu gɑgun mi, ge bɑ rɑ soku Nɑyini. Win bwɑ̃ɑbu kɑ mɑɑ tɔn wɔru gunɑ nùn swĩi. 12 Sɑɑ ye u wuu gen gbɑ̃rɑrun kɔnnɔ turuku kuɑ, u wɑ bɑ ɑluwɑɑsi goon goru sɔɔwɑ bɑ kɑ yɑriɔ bu sike. U sɑ̃ɑwɑ win mɛron bii teere te u mɔ. Win mɛro mɑɑ, gɔminiwɑ. Wuugibu dɑbirɑ wɑ̃ɑ kɑ wi. 13 Ye Yinni u kurɔ wi wɑ win wɔnwɔndɑ nùn mwɑ, mɑ u nùn sɔ̃ɔwɑ u nɛɛ, ɑ ku swĩ.
14 Yerɑ u susi u goo ten kpɑkororu bɑbɑ. Be bɑ tu sɔɔwɑ bɑ yɔ̃rɑ. Mɑ u nɛɛ, ɑluwɑɑsi wunɛ, nɑ nun sɔ̃ɔmɔ, ɑ seewo.
15 Mɑ goo te, tɑ seewɑ tɑ sinɑ tɑ gɑri gerumɔ. Mɑ Yesu nùn win mɛro wesiɑ. 16 Bɛrum be kpuro mwɑ, mɑ bɑ Gusunɔ siɑrɑmɔ bɑ gerumɔ bɑ mɔ̀, Gusunɔn sɔmɔ dɑmgiiwɑ u bu kuremɑ. Gusunɔwɑ u win tɔmbu nɑɑwɑ. 17 Yesun lɑbɑɑri ye, yɑ yɑbi Yudeɑ kpuro sɔɔ kɑ mɑɑ yen beri kpuro.
Yohɑnu Bɑtɛmu kowon
gɔrobu
(I mɑɑ mɛɛrio Mɑteu 11:2-19)
18 Yohɑnun bwɑ̃ɑbɑ nùn ye kpuron lɑbɑɑri sɔ̃ɔwɑ. Mɑ u win bwɑ̃ɑ ben yiru sokɑ, 19 u bu gɔrɑ Yesun mi bu nùn bikiɑ, wiyɑ wi u sisi? Nge bɑ n kpɑo mɑrɑ. 20 Ye durɔ be, bɑ turɑ win mi, bɑ nɛɛ, Yohɑnu Bɑtɛmu kowowɑ sun gɔrimɑ wunɛn mi su bikiɑ, wunɑ wi u sisi? Nge sɑ n kpɑo mɑrɑ.
21 Sɑɑ ye sɔɔ, u tɔn dɑbirun bɑrɑnu kɑ ben ɑlebu bɛkiɑ, mɑ u ben wɛrɛkunu girɑ, u mɑɑ wɔ̃ko dɑbinu yɑm wɑɑsiɑ. 22 Mɑ u bu wisɑ u nɛɛ, i doo i Yohɑnu tusiɑ ye i wɑ kɑ ye i nuɑ. Wɔ̃kobɑ yɑm wɑɑmɔ, yɛmɔbɑ sĩimɔ, be bɑ bɑrɑ disigiru bɑrɔ bɑ bɛkurɑmɔ bɑ dɛɛrɑmɔ, sosobu bɑ gɑri nɔɔmɔ, bɑ gɔribu seeyɑmɔ, mɑ bɑ sɑ̃ɑrobu Lɑbɑɑri geɑn wɑɑsu mɔ̀. 23 Doo nɔɔrugiiwɑ bɑɑwure wìn nɑɑnɛ yɑ yɔ̃ dim dim nɛ sɔɔ.
24 Ye Yohɑnun gɔrobɑ sĩɑ, mɑ u tɔn dɑbinu Yohɑnun gɑri sɔ̃ɔbu wɔri. U bu bikiɑ u nɛɛ, mbɑ i mɛɛrim dɑ gbɑburɔ. Yɑkɔ ge woo gɑ toorimɔ? 25 Durɔ wi u yɑ̃ɑ bɛɛrɛginu sebuɑ? Wee, be bɑ yɑ̃ɑ gobiginu sebuɑ mɑ bɑ wɑ̃ɑru dimɔ dukiɑ sɔɔ, beyɑ bɑ wɑ̃ɑ sinɑ kpɑɑnɔ. 26 Ǹ n mɛn nɑ, mbɑ i mɛɛrim dɑ. Gusunɔn sɔmɔ goo? Mɛyɑ nɑ bɛɛ sɔ̃ɔmɔ yɛ̃ro mɑm Gusunɔn sɔmɔ kere mi n tomɑ. 27 Domi Yohɑnu wiyɑ wìn gɑri bɑ yoruɑ bɑ nɛɛ,
<<N wee, nɑ nɛn gɔro gɔrɑ wunɛn wuswɑɑɔ wi u koo nun gbiiyɑ u wunɛn swɑɑ sɔmɛ.>>
28 Nɑ bɛɛ sɔ̃ɔmɔ mɑ be tɔn kurɔbɑ mɑrɑ sɔɔ, goo kun Yohɑnu kere, ɑdɑmɑ wi u yɑ̃kɑbu bo Gusunɔn bɑndu sɔɔ, u Yohɑnu kere.
29 Ye bɑ ye nuɑ, tɔmbu kpuro kɑ gbere mwɑɔbu sɑnnu bɑ Gusunɔ gem wɛ̃, domi beyɑ Yohɑnu u rɑɑ bɑtɛmu kuɑ. 30 Adɑmɑ Fɑlisibɑ kɑ woodɑ yɛ̃robu bɑ ǹ dɑɑ wure Yohɑnu u bu bɑtɛmu ko. Nge mɛyɑ bɑ kɑ yinɑ ye Gusunɔ u gɔ̃ru doke u bu kuɑ.
31 Mɑ Yinni u bikiɑ u nɛɛ, mbɑ kon kɑ tɛ̃n tɔmbu weesinɑ. Mbɑ bɑ kɑ weenɛ. 32 Bɑ sɑ̃ɑwɑ nge bibu be bɑ sɔ̃ yɑburɔ, bɑ sokunɑmɔ bɑ mɔ̀, sɑ bɛɛ guuru soowɑ mɑ i ǹ yɑwɑ. Sɑ bɛɛ gɔɔ womu kuɑ, i ǹ mɑɑ swĩ. 33 Domi Yohɑnu Bɑtɛmu kowo u nɑ, u ǹ dĩɑnu dimɔ, u ǹ mɑɑ tɑm nɔrumɔ, mɑ i nɛɛ, u wɛrɛkunu mɔ. 34 Tɔnun Bii u nɑ, u dimɔ u nɔrumɔ, mɑ i gerumɔ u sɑ̃ɑ dim kĩro kɑ tɑm nɔro, gbere mwɑɔbu kɑ kɔ̃sɑn kowobun bɔrɔ. 35 Kɑ mɛ, Gusunɔn bwisi yi rɑ tii sɔ̃ɔsi bwisi gee be bɑ yi wurɑn mi.
Yesu dimɔ Fɑlisi goon yɛnuɔ
36 Fɑlisi goo wi bɑ mɔ̀ Simɔɔ u Yesu dim sokɑ. Mɑ Yesu u duɑ win dirɔ u sinɑ u kɑ di. 37 Kurɔ tɑnɔ goo wɑ̃ɑ wuu mi. Ye u nuɑ mɑ Yesu u dimɔ Fɑlisi win yɛnuɔ, yerɑ u kɑ too burɑru nɑ te tɑ turɑre yibɑ. 38 U yɔ̃rɑ Yesun biruɔ win nɑɑsu giɑ u sumɔ. Mɑ win yĩresu nɑɑ si wɑɑyɑ, mɑ u su sunkumɔ kɑ win seri, u su sɔ̃sumɔ, mɑ u su turɑre ye wisi. 39 Fɑlisi wi u Yesu dim sokɑ, ye u wɑ mɛ, u geruɑ win gɔ̃ruɔ u nɛɛ, durɔ wi, ù n Gusunɔn sɔmɔn nɑ, u ko n yɛ̃ kurɔ weren bweserɑ wi u nùn bɑbɑmɔ, domi kurɔ tɑnɔwɑ. 40 Mɑ Yesu u nɛɛ, Simɔɔ, nɑ gɑri gɛɛ mɔ yi kon nun sɔ̃.
Mɑ Simɔɔ u nɛɛ, yinni, ɑ geruo.
41 Mɑ Yesu u nɛɛ, durɔ goo wɑ̃ɑ wìn dibu tɔmbu yiru bɑ nɛni. Turo nɛni sii geesun gobi nɛɛrɑ wunɔbu (500), turo mɑɑ weerɑɑkuru. 42 Ye bɑ ǹ gɑ̃ɑnu wɑ bu kɔsiɑ, mɑ u be yiru kpuro suuru kuɑ. Tɛ̃ be yiru ye sɔɔ, wɑrɑ koo nùn kĩɑ n kere.
43 Simɔɔ u nɛɛ, nɑ tɑmɑɑ wi bɑ suuru kuɑ n kere.
Mɑ Yesu u nùn sɔ̃ɔwɑ u nɛɛ, gemɑ ɑ geruɑ.
44 Yerɑ u sĩirɑ kurɔ win mi giɑ mɑ u Simɔɔ bikiɑ u nɛɛ, ɑ kurɔ wi wɑ? Ye nɑ duɑ wunɛn yɛnuɔ ɑ ǹ mɑn nim kɑ̃ n kɑ nɛn kɔ̃ri kpɑkiɑ, ɑdɑmɑ kurɔ wini u nɛn nɑɑsu wɑɑyɑ kɑ win yĩresu, mɑ u su sunkɑ kɑ win seri. 45 A ǹ mɑn tɔburɑ kɑ sɔ̃subu, ɑdɑmɑ kurɔ wini, mìn di nɑ duɑ, u ǹ nɛn nɑɑsu sɔ̃sum deri. 46 A ǹ gum wisi nɛn wiru wɔllɔ, ɑdɑmɑ kurɔ wini u turɑre wisi nɛn nɑɑsɔ. 47 Yen sɔ̃, nɑ nun sɔ̃ɔmɔ mɑ kurɔ win durum bɑkɑ ye, bɑ nùn ye suuru kuɑ. Yeyɑ n derɑ win kĩrɑ kpɛ̃ɑ. Adɑmɑ wi bɑ fiiko suuru kuɑ, u rɑ n kĩwɑ fiiko.
48 Mɑ u kurɔ wi sɔ̃ɔwɑ u nɛɛ, bɑ nun wunɛn durum suuru kuɑ.