7
I kun dɑ n tɔmbu sirimɔ
(I mɑɑ mɛɛrio Luku 6:37-38, 41-42)
1 Yesu u nɛɛ, i kun tɔmbu sirimɔ bɑɑdommɑ, Gusunɔ u ǹ mɑɑ kɑ bɛɛ sirimɔ. 2 Domi nge mɛ i gɑbu sirimɔ, nge mɛyɑ Gusunɔ u koo mɑɑ bɛɛ siri. Mɑ sɑkɑku ge i kɑ gɑbu yĩiruɑmmɛ, geyɑ bɑ koo kɑ bɛɛ yĩiruɑ. 3 Mbɑn sɔ̃nɑ ɑ yɑkɔ mɛɛrimɔ wunɛn kpɑɑsin nɔnu sɔɔ mɑ ɑ ǹ dɑ̃ɑ bĩiru lɑɑkɑri mɔ̀ te tɑ wɑ̃ɑ wunɛn tiin nɔnuɔ. 4 Amɔnɑ kɑɑ kɑ kpĩ ɑ wunɛn kpɑɑsi sɔ̃ u de ɑ yɑkɔ wunɑ win nɔnun di sɑnɑm mɛ ɑ dɑ̃ɑ bĩiru mɔ wunɛn tiin nɔnuɔ. 5 Murɑfiti wunɛ, ɑ gbiiyo ɑ dɑ̃ɑ bĩi te wunɑ wunɛn tiin nɔnun di kpɑ ɑ yɑm wɑ sɑ̃ɑ sɑ̃ɑ ɑ kɑ yɑkɔ wunɑ wunɛn kpɑɑsin nɔnun di.
6 I ku gɑ̃ɑ dɛɛrɑnu bɔ̃nu wɛ̃ nu ku kɑ gɔsirɑ nu bɛɛ mɔnsimɑ. I ku mɑɑ bɛɛn goo gobiginu kɔ̃ kurusɔnun suunu sɔɔ. Su koo nu tɑɑku.
Kɑnɑrun gɑri
(I mɑɑ mɛɛrio Luku 11:9-13)
7 Yesu u nɛɛ, i n dɑ bikie, i ko wɑ i mwɑ. I n dɑ kɑsu, i ko wɑ. I n dɑ gɑmbo so, bɑ koo bɛɛ kɛniɑ. 8 Domi bɑɑwure wi u bikiɑmɔ bɑ koo nùn wɛ̃. Wi u kɑsu u koo wɑ. Wi u mɑɑ gɑmbo soomɔ bɑ koo yɛ̃ro kɛniɑ. 9 Durɔ wɑrɑ bɛɛ sɔɔ, win bii ù n nùn pɛ̃ɛ bikiɑ u koo wurɑ u nùn kperu wɛ̃. 10 Ǹ kun mɛ ù n nùn swɑ̃ɑ bikiɑ u koo nùn wɑɑ wɛ̃? 11 Bɛɛ be i sɑ̃ɑ tɔn kɔ̃sobu mɑ i yɛ̃ mɑ bɑ rɑ bibu kɛ̃ɛ geenu wɛ̃, bɛɛn Bɑɑbɑ wɔllugii u ǹ koo be bɑ nùn kɑnɑmɔ gɑ̃ɑ geenu wɛ̃ n bɛɛ kere?
12 Yen sɔ̃nɑ ye i kĩ tɔmbu bu bɛɛ kuɑ i bu kuo mɛ bɛɛn tii, domi yeniwɑ Mɔwisin woodɑn tireru kɑ Gusunɔn sɔmɔbun sɔ̃ɔsibun tubusiɑnu.
Kɔnnɔ ge gɑ ǹ yɑsu
(I mɑɑ mɛɛrio Luku 13:24)
13 Yesu u nɛɛ, i duo kɑ kɔnnɔ ge gɑ ǹ yɑsu, domi swɑɑ ye yɑ dɔɔ kɑm koo yerɔ yɑ ǹ bɑɑsinɑɑ mɔ, yen kɔnnɔ gɑ mɑɑ yɑsu mɑ tɔn dɑbinu dumɔ mi. 14 Adɑmɑ swɑɑ ye yɑ dɔɔ wɑ̃ɑru sɔɔ yɑ sɛ̃, yen kɔnnɔ gɑ ǹ yɑsu. Bɑ ǹ mɑɑ dɑbi be bɑ ge wɑɑmɔ.
Dɑ̃ru kɑ ten binu
(I mɑɑ mɛɛrio Luku 6:43-44)
15 Yesu u mɑɑ nɛɛ, i lɑɑkɑri koowo kɑ sɔmɔ weesugibu. Yɑ̃ɑ gɔnɑ bɑ rɑ n tii pote, bu kɑ nɑ bɛɛn mi, ɑdɑmɑ sɔɔwɔ bɑ sɑ̃ɑwɑ nge dɛmɑkunu ni nu kɑsu nu go nu tem. 16 I ko bu giɑ sɑɑ ben kookoosun di nge mɛ bɑ rɑ dɑ̃ru gie sɑɑ ten binun di. Bɑ rɑ berenu sɔri ɑwĩi wɔllɔ? Bɑ koo gɑndun binu sɔri sɑ̃kɑ wɔllɔ? 17 Dɑ̃ɑ geerɑ tɑ rɑ bii geenu mɑ, kpɑ dɑ̃ɑ kɔ̃suru tu bii kɔ̃sunu mɑ. 18 Dɑ̃ɑ geeru tɑ ǹ kpɛ̃ tu bii kɔ̃sunu mɑ, mɛyɑ mɑɑ dɑ̃ɑ kɔ̃suru tɑ ǹ kpɛ̃ tu bii geenu mɑ. 19 Dɑ̃ru bɑɑtere te tɑ ǹ bii geenu mɑrumɔ bɑ rɑ tu burewɑ bu kɔ̃ dɔ̃ɔ sɔɔ. 20 Nge mɛyɑ i ko kɑ sɔmɔ weesugii be giɑ sɑɑ ben kookoosun di.
Nɑ ǹ bɛɛ yɛ̃ gɑm
(I mɑɑ mɛɛrio Luku 13:25-27)
21 Yesu mɑɑ nɛɛ, n ǹ mɔ bɑɑwure wi u mɑn sokumɔ Yinni, Yinni, wiyɑ u koo du mi Gusunɔ u bɑndu swĩi, mɑ n kun mɔ wi u nɛn Bɑɑbɑ wi u wɑ̃ɑ wɔllɔn kĩru mɔ̀. 22 Tɔ̃ɔ te, tɑ̀ n tunumɑ, tɔn dɑbirɑ tɑ koo mɑn sɔ̃ tu nɛɛ, Yinni, Yinni sɑ ǹ gɑri geruɑ kɑ wunɛn yĩsiru? Sɑ ǹ wɛrɛkunu gire kɑ wunɛn yĩsiru? Sɑ ǹ mɑɑ sɔm dɑmgii dɑbinu kue kɑ wunɛn yĩsiru? 23 Sɑnɑm mɛyɑ kon bu sɔ̃ bɑtumɑ sɔɔ n nɛɛ, nɑ ǹ bɛɛ yɛ̃ gɑm, i doonɔ nɛn min di, bɛɛ be i kɔ̃sɑ mɔ̀.
Bɑnɔbu yiru
(I mɑɑ mɛɛrio Luku 6:47-49)
24 Yesu mɑɑ nɛɛ, yen sɔ̃, bɑɑwure wi u nɛn gɑri yini nɔɔmɔ, mɑ u yi mɛm nɔɔwɑmmɛ, u ko n kɑ durɔ bwisigii wini weenɛ wi u win diru bɑnɑ kpee sɑɑrɑ wɔllɔ. 25 Gurɑ yɑ nɑ, dɑɑnu yibɑ mɑ nim tɛriɑ mɑ woo gɑ dii te swee. Adɑmɑ tɑ ǹ wɔrumɛ yèn sɔ̃ bɑ te bɑnɑ kpee sɑɑrɑ wɔllɔ. 26 Adɑmɑ bɑɑwure wi u nɛn gɑri yini nɔɔmɔ mɑ u ǹ yi mɛm nɔɔwɑmmɛ, u ko n kɑ durɔ gɑri bɔkɔ wini weenɛ wi u win diru bɑnɑ yɑni sɛɛri wɔllɔ. 27 Gurɑ yɑ nɑ, dɑɑnu nu yibɑ mɑ nim tɛriɑ mɑ woo gɑ dii te swee, mɑ tɑ wɔrumɑ. Mɑ ten wɔrumɑɑ kpɛ̃ɑ.
Yesun yiiko