Ni bisiidi Jesús lu dani
5
Biiya si Jesús ma rí binni laa,
gudxiꞌba lu ti dani ne gurí raqué.
Oraque bidxiña irá cani jma riuu nú laabe para iziidi caꞌ.
2 Para bizulú be bisiidi be laacaꞌ,
na be:
3 ―Dichoso ni nanna gasti nga laa nezalú Dios,
purti stica irá ni napa Dios ladxi náꞌ.
4 Dichoso ni nuu triste yanna,
purti zaguixhe dxí Dios ladxidóꞌ caꞌ.
5 Dichoso ni nadóꞌ
purti zudii Dios laaca guidxilayú.
6 Dichoso ni rinaba ladxidóꞌ guni ni na Dios,
ne qué ganda chuꞌ dxí dede qué guni ni,
purti zacané Dios laa guni ni,
ne ziecheꞌ.
7 Dichoso ni riá stobi,
purti laca ziá Dios laa.
8 Dichoso ni nayá ladxidóꞌ
purti zuuya Dios.
9 Dichoso ni riguixhe dxí enda ridinde,
purti runi xiiñi Dios laa.
10 Dichoso ni riladxi binni laa,
ti cayuni ni na Dios,
purti sti irá ni napa Dios ladxi náꞌ.
11 Ne dichoso laatu ora rulaa binni diidxa laatu,
ne riladxi ca laatu ne ribee ca falsu luguiá tu purti xpinne laatu.
12 Laguiecheꞌ neca cazaaca tu irá nga,
purti nabé sicarú ni chi gudii Dios laatu ibáꞌ,
ne nanna ca tu zacaca biꞌni cabe ca profeta sti Dios chiqué.
Zidi ne biaani sti guidxilayú
13 Riuu zidi beela para cadi guiuꞌdxuꞌ,
ne laatu zeda gaca tu casi zidi,
ne nuu tu ndaani guidxilayú para cadi initilú pe ni.
Peru pa nidiꞌdi enda naxí sti zidi que la?
ma qué niquiiñe ni para gasti sínuque para ixii ni layú ne ñutu ñee cabe ni.
14 Ra usihuinni tu enda nachaꞌhui sti Dios lade binni la?
casi ñaca cuzaani tu.
Laudii lugar ihuinni biaani stitu casi rihuinni biaani sti ti guidxi zuba ique dani.
15 Purti qué rucaa gui cabe lámpara ne cuꞌ cabe laa xaꞌna dxumi,
sínuque ruzuhuaa cabe ni lu ti mexaꞌ para gudii ni biaani irá binni ni nuu ndaani yoo que.
16 Yanna laatu,
lagaca casi biaani que ti guꞌya binni pabiáꞌ jneza runi tu ne usisaca ca Bixhoze tu ni nuu ibáꞌ.
Ra bisiidi Jesús xi na ley
17 Cadi zácaxa tu zeda uchiaya ley ni bidii Dios Moisés,
ne ni bicaa ca profeta lu Xquiꞌchi Dios,
purti cadi nga zeda guneꞌ sínuque zeda guneꞌ cumplir irá xixé ni bicaa cabe que.
18 Peru gabe caꞌ laatu,
laga nuu ru ibáꞌ ne guidxilayú,
qué ziaana nin tindaa lu ley sin gaca cumplir,
nin ti letra ne nin ti puntu.
19 Nga runi tutiica uchiá neca ti guisi si lu tobi de ca mandamientu ne zacá gusiidi ni binni la?
huaxiéꞌ zasaca lade ca xpinni Dios.
Peru ni guni irá ni na mandamientu,
ne usiidi ni binni la?
laa huaxa zasaca lade ca xpinni Dios.
20 Purti gabe caꞌ laatu,
pa qué guni tu jneza jma que modo runi ca maistru de ley ne ca fariseu ni nuu yanna la?
qué ziuu tu lade ca xpinni Dios.
Enda ridxiichi
21 Huayuna diaga tu xi gudxi Dios ca bixhoze gola tu chiqué,
cadi guuti caꞌ,
ne pa guuti ca ziaba ná caꞌ.
22 Peru naa rabe laatu,
tutiica gapa né stobi xiana la?
laca ma bichee ne ziaba náꞌ.
Ne tutiica gabi stobi binni guidxa la?
zusaba ná justicia sti yuꞌdu laa.
Ne tutiica gabi stobi didxa guidxa la?
cuyubi che gabiá.
23 Ne pa zeda saanu ti ofrenda lu altar para Dios ne guietenalaꞌdxu bichee neu tuuxa la?
24 bisaana gá ofrenda stiuꞌ raqué,
uyé biene né ni bichee neu que,
ne óraque bigueta yetixhe ofrenda stiuꞌ lu altar.
25 Pa chiné tuuxa lii ra nuu justicia la?
biyubi gaca neu laabe tobi si laga ze ru tu neza,
ti cadi uchiña be lii lu juez,
pacaa zutiidi juez lii lu ná ca gendarme ne zaguu ca lii lidxi guiibaꞌ.
26 Gabe caꞌ lii,
qué zaree lu raqué dede qué quiꞌxu irá ni nuzaabuꞌ.
Enda riuu né ni cadi xheelaꞌ
27 Laatu nanna tu xi na ley:
“Iruti chuꞌ né ni cadi xheelaꞌ.”
28 Peru naa rabe laatu,
neca chuꞌlaꞌdxi si tuuxa ti gunaa ni cadi xheelaꞌ,
ne icá ique chuꞌ né laabe la?
ma bichee,
neca qué ñuu né pe laabe.
29 Pa nuu xiixa ruuya lu ne ruquiinde ni lii guꞌnu ni cadi jneza la?
bixele de laani,
purti jma huaxiéꞌ naná zaca para lii ixele lu de laani biaꞌ naná zaca para lii pa cheuꞌ gabiá,
purti qué ziuu dxi ireeu de raqué.
30 Ne pa nuu xiixa ni racalaꞌdxu tidi lu ná luꞌ,
ne pur laani chi uchee lu la?
bixele de ra nuu ni,
purti jma huaxiéꞌ naná zaca para lii uniti lu ni,
que initilú luꞌ pa cheuꞌ gabiá.
Nga runi pa nuu xiixa ni runi pur guꞌnu ni cadi jneza la?
bisaana ni nagueenda,
pacaa zuchee luꞌ,
ne ora ma bichee lu la?
zusaba ná Dios lii.
Enda rilaa né xheelaꞌ
31 Laatu huayuna diaga tu na lu ley:
“Tutiica gacalaꞌdxi gusaana xheela la?
gaca divorciar ne laabe.”
32 Peru naa rabeꞌ,
ni usaana xheelaꞌ,
neca qué nuchee né xheela laa la?
cuchee,
purti cayuni pur gapa xheela jnadxii.
Ne zaqueca tutiica ichaganá ti gunaa ni ma bisaana xheela la?
cuchee,
purti ma nuu né xheela binni.
Xi naca enda runi jurar
33 Laca huayuna diaga tu xi gudxi Dios ca bixhoze gola tu chiqué:
“Tutiica guni jurar chi guni xiixa para Dios la?
naquiiñe guni cumplir ni ma uníꞌ.”
34 Peru naa rabe laatu,
cadi lica pe guni jurar tu,
nin pur ibáꞌ,
purti racá nga zuba Dios,
35 nin pur guidxilayú purti racá zuhuaa ñee be,
ne nin pur Jerusalén,
purti nga nga xquidxi Rey ni nandxóꞌ ne nga nga Dios.
36 Ne zaqueca cadi guni jurar tu pur ique tu,
purti qué zanda guni tu pur indani guicha ique tu adxé color,
gaca ni naquichi o nayaaseꞌ.
37 Ora riníꞌ tu la?
lainíꞌ “ya” pa huandí zuni tu ni,
o pa qué zuni tu ni la?
lainíꞌ “coꞌ”,
peru cadi usiguii tu ne cadi cuꞌ ru tu jma juramentu lú ni,
purti cadi de Dios zeeda irá nga.
Enda ruquixe ni guni stobi laa
38 Huayuna diaga tu xi cá lu ley:
“Pa gaxha cabe ti chu lú lu la?
guxha ti chu lú cabe.
Ne pa gaxha cabe ti laya lu la?
guxha ti laya cabe.”
39 Peru naa cayabe laatu,
pa ucaa lú cabe laatu la?
cadi ucaa lú tu laacabe.
Ne pa chuꞌ tu capa ti ladu xhaga tu la?
laudii ca né sti ladu.
40 Ne tu gacalaꞌdxi tinde né laatu para gaxha xcamixa tu la?
lausaana né ca laa xhamarra tu.
41 Ne pa chuꞌ tobi de cani runi mandar uguáꞌ laatu bultu stiꞌ ti kilómetru la?
laguáꞌ ni chupa kilómetru.
42 Ni inaba xiixa laatu,
laudii ni laa,
ne ni quiꞌñe laatu,
lautiiñe laa.
Enda ranaxhii ni nanalaꞌdxi laa
(Lc. 6.27-28, 32-36)
43 Laca na ley ganaxhii tu cani nadxii laatu,
ne gaca nanalaꞌdxi tu cani nanalaꞌdxi laatu.
44 Peru naa rabeꞌ:
Laganaxhii cani nanalaꞌdxi laatu,
ne lainíꞌ né Dios pur cani riguu dí laatu.
Lagacané cani runi pur uchiichi laatu,
ne lainaba lu Dios pur cani riladxi laatu.
45 Laguni zacá ti chi ndee tu Bixhoze tu ni nuu ibáꞌ,
purti laa rudii lugar guzaani gubidxa sti ra nuu cani nachaꞌhui ne ra nuu cani nadxabaꞌ,
ne rusaba nisa guie ra nuu cani runi ni na,
ne ra nuu cani qué runi ni na.
46 Purti pa ganaxhii tu cani nadxii si laatu la?
ñee na tu zacaa tu xiixa de Dios pur nga la?
Cadi xa laca nga ca runi cani ruquixe impuestu,
ne napa tu laaca de malu.
47 Ne pa gulabi tu cani ridxaaga si laatu la?
xi caguu tu lú ni yaꞌ.
Cadi xa laca nga ca runi cani qué runibiáꞌ Dios.
48 Nga runi lagaca nachaꞌhui ne irá binni,
cásica nachaꞌhui Bixhoze tu ni nuu ibáꞌ.