Xi na Jesús de enda rilaa né xheelaꞌ
19
Biluxe si uníꞌ Jesús ca diidxa ca,
biree de Galilea uyé neza Judea cherica guiigu Jordán.
2 Yenanda jma binni laabe ne raqué bisianda be laacaꞌ.
3 Oraque beeda caadxi fariseu ra nuu be,
cuyubi ca modo usaba ca laabe pur ni iníꞌ be.
Para na ca rabi ca laabe:
―Ñee nouꞌ jneza ilaa né cabe xheela cabe pur intiica cosa la?
4 Oraque rabi be laacaꞌ:
―Qué xa huayuunda tu ra cá xi biꞌni Dios dxi bizulú bizáꞌ binni.
Bizáꞌ be hombre ne gunaa,
5 ne na be:
“Pur nga runi zusaana hombre bixhoze ne jñaa,
ne zadxaaga xheela ne zaca ca tobi si.”
6 Ne zacá ma cadi chupa cabe sínuque tobi si laacabe.
Pur nga runi ni ma bichaaga Dios la?
ma cadi indaa binni guidxilayú.
7 Para na ca fariseu rabi laabe:
―Peru xiñee bisiidi Moisés laadu naquiiñe indisa du acta de divorcio ne óraque ma zaa ilaa né du xheela du yaꞌ.
8 Para na be rabi be laacaꞌ:
―Purti naguidxi ladxidóꞌ to,
nga runi gudxi be laatu zaa ilaa né tu xheela tu,
peru cadi zacá guca ni dxi bizulú ni.
9 Peru naa rabe laatu,
tutiica gaca divorciar né xheela ne ichaganá stobi,
neca qué nuchee xheela la?
ma enda rapa jnadxii ngue.
Ne tu ichaganá ti gunaa ma guca divorciar né xheela la?
laca zaqueca cayuni.
10 Para na ca discípulu stibe rabi laabe:
―Pa zacá nouꞌ guni hombre ne xheela la?
jma nagueenda guiaana cabe sin ichaganá cabe.
11 Oraque na be rabi be laacaꞌ:
―Cadi irá zanda guiaana sin ichaganáꞌ,
sínuque cani ma nexhe ni para laa.
12 Purti nuu hombre riale maca para cadi ichaganáꞌ,
ne nuu xcaadxi ni nuu pe tu runi ni laa para cadi ichaganáꞌ.
Peru laca nuu ni riale ni de laa si guiaana sin ichaganáꞌ,
purti jma cá ique guni xhiiña Dios ni nuu ibáꞌ.
Cani zanda guiaana sin ichaganá la?
cadi ichaganáꞌ.
Ra uluu Jesús ndaaya caadxi baꞌduꞌ
13 Oraque bedané cabe caadxi baꞌdu ra nuu Jesús para quixhe ná luguiá caꞌ ne iníꞌ né Dios pur laacaꞌ.
Ne ora biꞌya ca discípulu que zeeda cabe la?
udinde né ca laacabe.
14 Peru óraque na Jesús rabi laacaꞌ:
―Cadi ucueeza tu ca baꞌdu ca,
zaa gueeda cabe ra nuaaꞌ,
purti stícabe irá ni napa Dios ladxi náꞌ,
laacabe ne irá casi laacabe ca.
15 Ne óraque gudixhe ná Jesús ique ca baꞌdu que,
ne biree zeꞌ.
Ra uníꞌ né ti ricu Jesús
16 Bidxiña ti hombre ra nuu Jesús ne na:
―Maistru chaꞌhuiꞌ,
xi enda nachaꞌhui naquiiñe gune para gapa enda nabani ni qué zaluxe.
17 Para na Jesús rabi laabe:
―Xiñee gudxi lu naa zacá.
Iruti ru nachaꞌhui jma que tobi lucha Dios.
Pa racalaꞌdxu gapu enda nabani la?
biꞌni ni na ca mandamientu.
18 Oraque na be:
―Uná mandamientu.
Para na Jesús rabi laabe:
―Cadi guuti lu binni,
cadi chuꞌ neu ni cadi xheeluꞌ,
cadi cuana luꞌ,
cadi cueeu falsu luguiá stobi.
19 Gunaxhii bixhoꞌzo ne jñoouꞌ,
ne gunaxhii stobi cásica nadxii lu lii.
20 Para na be:
―Irá nga huayune dede dxi nahuiineꞌ.
Yanna xi ru riaadxaꞌ.
21 Para na Jesús rabi laabe:
―Pa qué racalaꞌdxu usiaadxa lu nin caadxi la?
yeutoo ni napuꞌ,
ne bidii ni ca pobre ne zapu stale ni risaca ibáꞌ.
Oraque dananda naa.
22 Ne ora bina diaga be xi na Jesús la?
uyuu yuuba ladxidóꞌ be ne biree be ze be purti nabé ricu laabe.
23 Oraque na Jesús rabi ca discípulu:
―Gabe caꞌ laatu,
nabé nagana zaca para ricu chuꞌ lade ca xpinni Dios.
24 Ne chi tidxe ni laatu sti tiru.
Jma qué igana chuꞌ ti camellu xaꞌna ti aguxaꞌ que chuꞌ ti ricu lade ca xpinni Dios.
25 Nabé bidxagayaa ca discípulu ni uníꞌ Jesús que,
ne na caꞌ:
―Tu zanda ilá pue.
26 Biiya dxí Jesús laacabe ne na rabi laacabe:
―Nabé nagana ndi para binni guidxilayú peru para Dios gasti ni nagana.
27 Oraque na Pedru rabi laabe:
―Laadu yaꞌ,
xi zacaa du,
ma bisaana du irá xixé ne ma beda nanda du lii.
28 Para na be rabi be laacaꞌ:
―Chi tidxe caꞌ ndi laatu:
dxi guzulú guidxilayú cubi ne guseenda Dios naa cue casi rey la?
dxi que laca zudiee laatu ra cui tu para guni mandar tu cani za de idubi doce xiiñi Israel,
purti uzá né tu naa.
29 Ne tutiica gusaana lidxi o biꞌchi o bizaꞌna o bixhoze o jñaa o xheela o xiiñi o xquidxi pur naa la?
zacaa ti gayuaa tantu de ni bisaana que,
ne zapa enda nabani ni qué zaluxe.
30 Peru stale de cani za niru ziaana atrá ne zaqueca stale de cani za atrá,
zazá niru.