Sti mozo gudxite sti xpixuaanaꞌ
16
Ne laca na Jesús rabi ca discípulu stiꞌ:
―Uyuu tobi hombre ricu bisaana xpidxichi lu ná ti xpinni para guni né dxiiñaꞌ.
Peru uyuu tu gudxi laabe caguite xpinni be que xpueltu be.
2 Para guridxi be laa ne rabi be laa:
“Xii nga na cabe cayuꞌnuꞌ.
Yanna ulee cuenta xi biꞌni neu bidxichi bidiee lii,
purti ma chi ndee lii de dxiiñaꞌ.”
3 Oraque bizulú caníꞌ ique xpinni be que:
“Xi gune yanna.
Ma chi gaxha xpixuaana naa dxiiñaꞌ.
Qué gapa stipa gune dxiiña naná,
ne rituí lua chi naba guna.
4 Ah,
ma nanna xi guneꞌ,
ti ora gaxha be naa dxiiña ca la?
ma nuu tu icaa naa ralidxi.”
5 Oraque guridxi be tobi tobi cani nuzaabi xpixuaana be,
rabi be tobi que:
“Pabiáꞌ nuzaabi lu xpixuaanaꞌ.”
6 “Ti gayuaa barril aceite”,
na ngue.
Para rabi be laa:
“Ucuaa nota stiuꞌ,
guiuba gurí,
biꞌni stobi de cincuenta si.”
7 Oraque rabi be stobi:
“Laga lii yaꞌ.
Pabiáꞌ nuzaabi lu xpixuaanaꞌ.”
“Ti gayuaa sacu trigu”,
na ngue.
Para rabi be laa:
“Ucuaa nota stiuꞌ.
Biꞌni stobi de ochenta si.”
8 Ora gunna xpixuaana be modo udxite be laa la?
bidii cuenta pabiáꞌ nexhená be ne bichá enda naróꞌ stibe.
Zacaca nga jma nexhená ca binni zinanda guidxilayú que ca xpinni Dios,
modo riguite ca binni.
9 Zacaca nga cayabe laatu guni tu.
Laiquiiñe irá ni napa tu ndaani guidxilayú riꞌ para gapa tu stale xhamigu tu,
ti ora ma qué gapa tu gastiꞌ,
nuu ni cabeza laatu ibáꞌ.
10 Ni guni jneza ne caadxi huiini la?
laca zuni jneza ne stale.
Ne ni qué guni jneza ne caadxi la?
laca qué zuni jneza ne stale.
11 Nga runi pa qué zanda guni tu jneza ne bidxichi sti binni la?
laca qué zuni tu jneza ne ni risaca para Dios.
12 Ne pa qué guni tu jneza ne ni sti binni la?
iruti zudii laatu ni sti pe tu.
13 Iruti zanda gapa chupa xpixuaanaꞌ,
purti zaca nanalaꞌdxi be tobi que ne zanaxhii be stobi.
Pacaa jma zuni be ni na tobi que ni na stobi.
Qué zanda ganaxhii tu Dios ne ganaxhii ca tu bidxichi.
14 Laca bina diaga ca fariseu ni uníꞌ be que ne biꞌni ca burla laabe,
purti nadxii ca bidxichi.
15 Peru rabi be laacaꞌ:
―Laatu ruyubi tu tidi tu pur nachaꞌhui nezalú binni,
peru runibiáꞌ Dios ladxidóꞌ to.
Purti ni risaca para binni la?
nanalaꞌdxi Dios.
Ley ne enda runi mandar sti Dios
16 Dxi caꞌru gueeda Juan Bautista la?
ley sti Moisés ne ni uníꞌ ca profeta nga nexhe chi nanda tu,
peru dede dxi beeda Juan ma bizulú careeche diidxa ximodo runi mandar Dios,
ne irá binni cuyubi chuꞌ lú ni.
17 Peru jma qué igana ninitilú ibáꞌ ne guidxilayú que ñaana ti puntu huiini sti ley sin ñaca.
Xi na Jesús de enda rilaa né xheelaꞌ
18 Tutiica gaca divorciar né xheela ne ichaganá stobi la?
cuchee ne Dios purti casi ñaca jnadxii rairopa que.
Ne tu ichaganá ti gunaa ni guca divorciar,
laca cuchee né Dios purti casi ñaca nuu né xheela stobi.
Ti hombre ricu ne Lázaro
19 Uyuu tobi hombre nabé napa bidxichi,
racu puru si lari risaca ne irá dxi cayuni saa.
20 Ne uyuu stobi hombre lá Lázaro ribí ra puerta lidxi be,
rinaba guna,
dxá guidxu yuudxu ladi,
21 dede reeda biꞌcu rixupi ladi.
Ne neca bigú si riaba xa mexa stibe ñacalaꞌdxi nutopa ño.
22 Bidxiña dxi guti Lázaro ne yené ca ángel laa ibáꞌ ra nuu Abraham.
Ne laca guti ricu que.
Bicaachi cabe laabe;
23 ne laabe gabiá uyé be,
ne de raqué undisa lú be,
de zitu biiya be Lázaro nayeche nuu ra nuu Abraham,
ne laabe cayacaná be.
24 Para bicaa be ridxi:
“Tata Abraham,
biá naa.
Biseenda Lázaro ugadxe bicuini ná ne gueda usigaanda ludxe purti nabé cayuniná gui ri naa.”
25 Peru na Abraham,
rabi laabe:
“Hiju,
bietenalaꞌdxi gupu irá ni bieche neu dxi nabani luꞌ,
ne Lázaro nabé ucaná.
Peru yanna ma cayeche be raríꞌ,
ne lii cayacaná luꞌ.
26 Ne cadi nga si nga laani,
sínuque didi xiixa galahui de laanu.
Qué zanda che cani nuu rarí ra nuu tu,
ne qué zanda gueeda cani nuu ra nuu tu raríꞌ.”
27 Para na be:
“Pa zacá ni la?
Tata,
rinaba lii useendu Lázaro ralidxi bixhozeꞌ,
28 purti napa ruaꞌ xcaayu bicheꞌ,
güi né be laaca ximodo ni,
ti cadi né ru sica laaca gueda gacaná ca raríꞌ.”
29 Oraque na Abraham:
“Para nga runi napa cabe ni bicaa Moisés ne ni bicaa ca profeta.
Ucaa diaga cabe xi na caꞌ.”
30 “Coꞌ,
Tata Abraham”,
na be,
“sínuque pa ibani tuuxa ni ma guti la?
jma nagueenda zanaba cabe perdón Dios ne uchaa cabe xpiaꞌ cabe.”
31 Peru na Abraham:
“Pa qué ucaa diaga cabe ni na Moisés ne ni na ca profeta la?
laca qué zucaa diaga cabe neca ibani tuuxa ni ma guti.”