Ejemplu sti dendxu biniti
15
Bidxiña irá cani ruquixe impuestu ne cani qué rulabi ley ra nuu Jesús para ucaa diaga ca laabe.
2 Ne bizulú ca fariseu ne ca maistru de ley caníꞌ ca laabe,
na caꞌ:
―Nga puru si cani cuchee ridxaaga,
ne ro né laacabe.
3 Para gudixhe be ti ejemplu para laacaꞌ,
rabi be laacaꞌ:
4 ―Pa ñapa tobi de laatu ti gayuaa dendxuꞌ,
ne niniti tobi me,
xi ñuni be.
Ñee cadi nusaana be noventa y nueve que,
niyubi be laame dede ra nidxela be laame la?
5 Ne ora nidxela be laame nayeche nudxiiba be laame xiꞌque be.
6 Nindá né be laame ralidxi be,
nibidxi be ca xhamigu be ne ca xpecinu be,
ñabi be laacaꞌ:
“Latáꞌ,
guieche né tu naa,
purti bidxela dendxu stinne ni biniti.”
7 Zacaca jma zieche né cani nuu ibáꞌ tobi ni huachee ora inaba perdón Dios,
que noventa y nueve nachaꞌhui ni cadi caquiiñe inaba perdón.
Sti moneda biniti
8 Chi tixhe stobi.
Laga pa ñapa ti gunaa chii moneda ne niniti tobi yaꞌ.
Nee cadi nucaa gui biaaniꞌ,
nunduuba ndaani yoo,
nuyubi chaahui dede ra nidxela ni la?
9 Ne ora ma bidxela ni,
ñabi ca xhamiga ne ca xpecina:
“Latáꞌ guieche né tu naa.
Ma bidxela moneda stinne ni biniteꞌ.”
10 Zacaca nga rabe laatu.
Nabé rieche ca ángel sti Dios ora gueda naba tobi ni cuchee perdón Dios.
Sti hombre buiini ucuaa jneza
11 Bigueta byuíꞌ né be laaca sti cuentu,
na be:
―Uyuu tobi hombre gupa chupa xiiñiꞌ.
12 Ti dxi na ni jma nahuiini que rabi bixhoze:
“Apá,
dané naa bidxichi ni raca caber udiiu naa.”
Para ucuaa bixhoze be ni,
undaa ni lú iropa biꞌchi cabe.
13 Qué nindaa de ngue bitopa be irá stibe,
biree be uyé be zitu.
Raqué udxite be irá ni.
Bibani be modo na ique be.
14 Ne biaꞌsi pe dxi ma birá irá stibe,
guca ti gubiña ndaani guidxi ra nuu be que,
ne bizulú biaadxa endaró laabe.
15 Para uyé be yeyubi be dxiiña ra nuu ti hombre de guidxi que.
Ne biseenda laabe chi gapa be bihui ra ranchu stiꞌ.
16 Dede uyuu tiru ucalaꞌdxi be ño be ca vaina ni cayó ca bihui que,
peru iruti nudii ni laabe.
17 Raqué nuu be uyuu xpiaani be,
na be:
“Biaa panda mozo napa bixhozeꞌ dede riaana si ni ro caꞌ,
ne naa nuaa raríꞌ,
cayate zieꞌ.
18 Zabigueta ra nuu bixhozeꞌ,
ne zabe laa:
Apá,
bichee nia Dios ne bichee nia lii.
19 Ma qué iquiiñe diaꞌ para gapu naa casi xiiñi luꞌ,
sinuque gupa naa casi ti mozo stiuꞌ.”
20 Para biasa be,
biree be zibíꞌ be.
De zitu ru zeeda be biiya bixhoze be laabe,
biá laabe.
Bixooñe yechagalú laabe,
gudidxi dxiichi laabe,
gudó ti bixidu lucuá be.
21 Oraque na be:
“Apá,
bichee nia Dios ne bichee nia lii.
Ma qué iquiiñe diaꞌ para gapu naa casi xiiñi luꞌ.”
22 Peru na bixhoze be rabi ca jmozo:
“Guiuba latané lari ni jma galán gacu be,
ne lacuu aníu ná be ne laucaa zapatu ñee be.
23 Ne latané yuze huiini ni jma naróꞌ guuti nu,
guni nu saa,
ne guieche nu.
24 Purti para naa casi ñaca guti xiiñe riꞌ peru ma bibani,
ne binite laabe peru ma bidxela be.”
Ne irá cabe bieche cabe.
25 Laga cayaca irá nga nuu biꞌchi be lugola rañaa.
Ne ora bigueta bidxiña gaxha bina diaga caxidxi saa,
cuyaa cabe.
26 Para guridxi tobi de ca mozo que,
unaba diidxa xi cayaca raqué.
27 Para na mozo que rabi laa:
“Ma bigueta biꞌchi luꞌ ne biiti bixhoꞌzo ti yuze huiini naróꞌ purti nazaaca bigueta be.”
28 Peru nabé bidxiichi ni jma huaniisi que ne qué niná ñuu.
Para biree bixhoze na rabi laa:
“Biuu,
xiiñeꞌ.”
29 Oraque na rabi bixhoze:
“Biaa panda iza cayune xhiiña luꞌ ne cuzuuba stiidxa luꞌ,
ne qué huadiiu naa nin ti chiva huiini para ñahua nia ca xhamiguaꞌ.
30 Peru yanna casi beeda xiiñi lu ca,
ma biitu yuze huiini ni jma naróꞌ para laa,
laa nda yechite xpidxichi lu luguiá gunaa.”
31 Para na bixhoze rabi laa:
“Hiju,
lii la?
qué hualadi lu de naa,
ne irá ni napa stiuꞌ.
32 Peru naquiiñe guni nu saa ne guieche nu,
purti casi ñaca guti biꞌchi lu riꞌ ne bibani.
O casi ñaca biniti nu laabe ne bidxela be.”