Ra bisianda Jesús ti hombre dxá gui
14
Sicarí uca ti dxi enda riziilaꞌdxiꞌ.
Yetó Jesús gueta ralidxi ti hombre ni risaca lade ca fariseu.
Ne laca nuu xcaadxi fariseu raqué,
nisi cundaachi laabe.
2 Nuu tobi hombre raqué huará,
dxá tipa gui.
3 Para rabi be ca maistru de ley ne ca fariseu:
―Ñee jneza usianda cabe binni dxi enda riziilaꞌdxi la?
4 Peru qué niná ca niníꞌ caꞌ.
Para ucuaa be hombre que,
bisianda be laa,
ne rabi be laa ma zanda chibíꞌ.
5 Ne óraque rabi be laacaꞌ:
―Pa ñaba ti buey o ti burru sti tobi de laatu ndaani bizé,
lácaxa qué ñe nindee laame,
neca dxi enda riziilaꞌdxiꞌ.
6 Nin qué nidxela ca xi niníꞌ ca óraque.
Xi guni binni ra enda xheelaꞌ
7 Ora biꞌya be cuyubi ca ra jma galán cui ca la?
bilidxe be laacaꞌ,
rabi be laacaꞌ:
8 ―Ora che tu ti ra enda xheela la?
cadí nirudóꞌ laatu chi tí tu ruaa mexaꞌ,
quenquita nuu stobi jma risaca chi tí raqué.
9 Ne óraque ñeeda ni bini invitar lii que,
nindisa lii nucuí stobi que.
Nabé nituí lú lu óraque,
ñasa luꞌ,
nibeza lu ño si ca xcaadxi que.
10 Nga runi ora guni invitar cabe lii la?
uleza de ora gueeda ni bini invitar lii,
gabi lii:
“Gudáꞌ,
xhamiguaꞌ,
cherí nuu ti lugar jma galán para lii.”
Zacá zasaca lu nezalú ca xcaadxi nuu raqué.
11 Purti tutiica uyubi isaca la?
qué zusisaca iruti laa,
ne tu na qué risaca la?
zusisaca binni laa.
12 Oraque rabi be ni bini invitar laabe que:
―Ora guꞌnu ti endaró o ti endaró xhi la?
cadi cuidxi lu ca xhamigu luꞌ,
ca biꞌchi luꞌ,
ca lisaa luꞌ,
ca xpecinu lu ni napa,
gueda to né lii,
purti zaqueca zuni cabe lii.
Zaguixe cabe ni.
13 Sínuque ora guꞌnu endaró la?
guridxi cani qué gapa gastiꞌ,
cani nachangu náꞌ,
cani nachangu ñee,
cani nacheepa lú.
14 Ne nabé zieche luꞌ,
ti laacabe qué gapa cabe ni quixe cabe lii,
peru zaguixe Dios lii dxi ibani cani nayá ladxidóꞌ.
Ejemplu sti endaró xhi
15 Ora bina diaga tobi de cani zuba né be ruaa mexa que ni uníꞌ be,
na rabi laabe:
―Dichoso cani cui ruaa mexa ra runi mandar Dios.
16 Oraque na be rabi be laa:
―Bini invitar tobi hombre stale binni chi to gueta ralidxi.
17 Ora ma nuu endaró que biseenda be mozo stibe chi tidxi laaca gueda to caꞌ.
18 Peru irá ca adxé adxé ni biree né caꞌ.
Tobi que na:
“Uzié ti layú ne naquiiñe chi guuya ni.
Gudxi laabe guni perdonar be naa.”
19 Stobi na:
“Nagasi uzié gaayu yunta buey.
Chi guuya xi tal xa nuu came.
Gudxi laabe guni perdonar be naa.”
20 Stobi na:
“Nacubi bichaganayaꞌ.
Nga runi qué zanda chaaꞌ.”
21 Ora bigueta jmozo be que gudxi laabe xi irá na ca binni que.
Nabé bidxiichi be ne rabi be laa:
“Yeuxooñe luguiaa ne irá ca calle ndaani guidxi riꞌ.
Yetopa cani qué gapa gastiꞌ,
cani nachangu náꞌ,
cani nachangu ñee,
cani nacheepa lú,
dané raríꞌ.”
22 Ora bigueta mozo que na rabi laabe:
“Señor,
ma bine irá ni guꞌdxu naa,
peru nuu ru lugar.”
23 Para rabi be laa:
“Yanna,
biree de guidxi,
uyé lu ca neza roꞌ ne ca neza huiiniꞌ,
ne pa idxaagu tuuxa la?
udubayú laacaꞌ dané laaca para idxá lidxe de binni.
24 Ne gannu couꞌ,
nin tobi de cani bine invitar que,
qué zo di ca ralidxeꞌ.”
Xi guni binni para sa nanda Cristu
25 Nabé stale binni nanda Jesús ra ze Jerusalén,
ne bitiixhi lú be rabi be laacaꞌ:
26 ―Pa chuꞌ tu gueda nanda naa peru jma nadxii bixhoze ne jñaa ne xheelaꞌ ne ca xiiñiꞌ ne biꞌchiꞌ ne bizaꞌnaꞌ,
ne jma nadxii laca laa la?
qué zanda gaca xpinneꞌ.
27 Ne tu qué na gacaná ra gueda nanda naa la?
qué zaquiiñe para xpinneꞌ.
28 Lácaxa nuzulú tobi hombre ti yoo sin que nirudóꞌ nibí ñuuya chaahui pa zugaanda xpidxichi para iluxe ni.
Oraque ru nuzulú ni.
29 Pacaa nindaa si be cimientu ma qué ñanda nunduuxe be ni la?
irá binni ñuni burla laabe,
30 niná caꞌ:
“Hombre ca bizulú si ti yoo.
Yanna ma qué ganda unduuxeꞌ.”
31 Ne zaqueca ti rey ra chi tinde né sti rey.
Lácaxa cadí nirudóꞌ nibí ñuuya chaahui pa zanda ucaa lú né chii mil si soldadu stiꞌ,
stobi ni napa gande mil.
32 Ne pa ñuuya qué zanda la?
nusenda tidxi sti rey que laga nuu ru zitu,
ñabi laabe racalaꞌdxi gaca cabe tobi si ti cadi nucaa lú be laa.
33 Zacá nga laani.
Tutiica de laatu qué usaana irá ni napa la?
qué zanda di gaca xpinneꞌ.
Zidi ni qué ixí