Naquiiñe inaba binni perdón Dios
13
Ca dxi queca uyé caadxi binni ra nuu Jesús ne byuiꞌ né ca laabe xi biꞌni Pilatu,
modo biiti caadxi binni Galilea ra cayuuti ca binni que mani para usigaꞌde ca Dios.
2 Para na be rabi be laacaꞌ:
―Ñee na tu bidii Dios lugar bizaaca ca binni Galilea zaqué purti jma malu laaca que ca xcaadxi binni xquidxi ca la?
3 Cadi pur nga diꞌ.
Laatu laca zanitilú tu casi binitilú cabe pa qué inaba tu perdon Dios.
4 O na tu jma malu dieciocho ni guti ra biaba torre Siloé que,
que ca xcaadxi binni nabeza Jerusalén la?
5 Cadi pur nga di nga laani.
Laatu laca zanitilú tu pa qué inaba tu perdón Dios.
Sti ti yaga duꞌgaꞌ
6 Ne laca byuiꞌ né be laaca ti cuentu,
rabi be laacaꞌ:
―Uyuu tobi hombre gupa ti yaga duꞌga ndaani ñaa stiꞌ.
Ti dxi yeguuya be pa cá duꞌga lú ni,
peru qué nidxela be.
7 Para rabi be ni cayapa raqué:
“Biaa guꞌyuꞌ.
Ma raca chonna iza huayeda yube duꞌga lu yaga riꞌ,
peru qué huadxelaꞌ.
Yanna bisaba ni.
Xi para zuhuaa si ni racá cuchiiña ni layú.”
8 Para na ngue rabi laabe:
“Señor,
bisaana ni iza ri si,
iduꞌya nu.
Chi taañe ñee ni ne uchaya abono ni.
9 Ne pa icá lú ni la?
riaana ni,
peru pa coꞌ la?
ma riaba ni.”
Ra bisianda Jesús ti gunaa natigu deche
10 Ti dxi enda riziilaꞌdxi cusiidi Jesús ndaani ti yuꞌduꞌ.
11 Raqué nuu ti gunaa natigu deche.
Ma raca dieciocho añu naguni huará binidxaba laa.
Qué lica randa ruzuhuaa be jneza.
12 Ora biꞌya Jesús laabe,
na:
―Señora,
ma bianda luꞌ.
13 Ne udixhe ná luguiá be.
Oraqueca bizuhuaa be jneza,
ne bidii be diuxquixe Dios.
14 Peru bidxiichi xaique sti yuꞌdu que,
xiñee bisianda Jesús laabe dxi que para na rabi ca binni que:
―Xhoopa gubidxa nuu para guni nu dxiiñaꞌ.
Latáꞌ tobi de ca dxi ca para guianda tu ne cadi dxi enda riziilaꞌdxi peꞌ.
15 Para na Señor rabi laa:
―Adxé ni riníꞌ tu,
adxé ni runi tu.
Lácaxa qué riné tu xpuey tu ne xpurru tu gue nisa dxi enda riziilaꞌdxiꞌ.
16 Yanna gunaa riꞌ za de Abraham,
ne ma raca dieciocho añu naaze binidxaba laabe.
Ñee cadi jneza ilaa be de lu ná binidxaba dxi enda riziilaꞌdxi la?
17 Ora uniꞌ be nga bituí lú irá ni cayaani ná laabe,
peru irá ca binni que cayeche né ca irá enda nandxóꞌ ni cayuni be.
Sanación en el Sabbat
Biidxi mostaza
18 Ne laca rabi be laacaꞌ:
―Chi güe nia laatu ximodo ridale ca xpinni Dios.
19 Zeda gaca ni casi ti biidxi mostaza ni ucuaa ti hombre bidxiiba lu layú stiꞌ.
Birooba ni,
uca ni ti yaga roꞌ,
dede biete mani huiini biꞌni lidxi lú ni.
El Reino de Dios como una Semilla de Mostaza
Ejemplu sti levadura
20 Bigueta rabi be laacaꞌ:
―Nuu stobi zanda usaca nu enda runi mandar sti Dios.
21 Zeda gaca ni casi levadura biguucha ti gunaa chonna kilu harina,
ne biasa idubi naca cuba que.
Puerta nabéꞌ
(Mt. 7.13-14, 21-23)
22 Idubi neza ze Jesús Jerusalén,
riaana irá guidxi roꞌ ne guidxi huiiniꞌ,
rusiidiꞌ.
23 Ra canazá be que biree tobi na,
rabi laabe:
―Señor,
ñee huaxiéꞌ binni zalá la?
Para rabi be laacaꞌ:
24 ―Lauyubi guiuu tu neza ra puerta ni nabéꞌ,
purti gabe caꞌ laatu,
stale tu zacalaꞌdxi guiuu peru qué zanda chuꞌ.
25 Purti ora ma biasa xpixuaana yoo biseegu ra puertaꞌ ne laatu biaana tu sin ñuu tu,
zuxhidxi ná tu ne zaná tu:
“Señor,
Señor,
bixhele guiuꞌ du.”
Oraque zacabi be laatu:
“Qué ganna diaꞌ padé laatu.”
26 Zuzulú tu gabi tu laabe:
“Lácaxa cadi bidóꞌ né du lii ne bidéꞌ né du lii,
ne bisiidi lu ndaani xquidxi du.”
27 Peru zabi be laatu:
“Cadi ma gudxe laatu qué runebiaꞌya laatu la?
Laixele de naa,
binni qué iquiiñeꞌ.”
28 Raqué nga uzulú tu guꞌna tu dede xhidxi laya tu ora guꞌya tu nuu Abraham ne Isaac ne Jacob ne ca profeta ra runi mandar Dios,
ne laatu ma biaana tu sin ñuu tu.
29 Purti zeeda binni de neza gueteꞌ,
de neza guiaꞌ,
de neza rindani gubidxa ne de neza riaazi gubidxa para cui ca ruaa mexa ra runi mandar Dios.
30 Purti nuu caadxi ni qué risaca nezalú binni,
zasaca raqué.
Ne nuu ni risaca nezalú binni,
qué zasaca raqué.
Ra ucaná ladxidóꞌ Jesús pur Jerusalén
31 Dxi queca uyé caadxi fariseu ra nuu be,
rabi laabe:
―Uyé,
biree de ndaani guidxi riꞌ purti racalaꞌdxi Herodes guuti lii.
32 Para rabi be laacaꞌ:
―Laché,
lachitidxi mañoso ca de huidxe iluxe xhiiñaꞌ.
Yanadxí ne ixíꞌ zabee ruaꞌ binidxaba de binni ne zusianda laacaꞌ.
33 Naquiiñe saya yanadxí ne ixí ne huidxe ti chindaya Jerusalén,
purti qué rati di profeta sti guidxi jma que Jerusalén.
34 ¡Ah Jerusalén,
Jerusalén,
ruuti lu ca profeta ne ruchá lu guie cani ruseenda Dios ra nuu luꞌ!
¡Panda que tiru huayacaladxe nutopa ca xiiñi luꞌ casi rutopa bere ca bere huiini sti xa xhiaa,
peru qué niná luꞌ!
35 Yanna laguuya ma chi guiaana stubi lidxi tu,
ne ma qué zuuya ru tu naa dede dxi ganda dxi usisaca tu ni useenda Dios.