Cadi uluiꞌ binni ni cadi naca
12
Bizulú cabí zisi binni Jesús dede calá saa caꞌ.
Para na rabi ca discípulu stiꞌ:
―Laguuya gá qué chi icá sti ca fariseu laatu.
Nabé ricá enda rusiguii stícabe binni casi riaazi levadura cuba pan.
2 Peru napa xidé ihuinni irá ni yeꞌgu lú,
ne zaqueca zanna binni irá ni nagaꞌchiꞌ.
3 Zacá nga laani.
Irá ni huaníꞌ tu ra nacahui,
ziuu tu iníꞌ ni ra nayaꞌniꞌ.
Zaqueca irá ni huaníꞌ tu xa diaga binni ndaani yoo,
ziuu tu quiba ique yoo ucheeche ni guidxi.
Tu naquiiñe idxibi nu
4 Xhamigua caꞌ,
racaladxe ganna tu tuu nga idxibi tu.
Cadi idxibi tu ni zanda guuti cuerpu si stitu ne ma qué zanda ru guni gastiꞌ.
5 Sínuque laidxibi Dios purti laa zándala guuti cuerpu stitu la?
ne zanda cuꞌ laatu gabiá.
Nga runi cayabe laatu,
laidxibi laabe.
6 Laaca tu nanna tu ridoo chupa mani huiini pur chupa domiꞌ,
peru neca qué risaca came,
qué ziaba si tobi de laacame layú pa qué na Dios.
7 Ne laatu la?
jma risaca tu que stale mani huiiniꞌ.
Nga runi cadi idxibi tu,
purti dede guicha ique tu ma bigaba Dios.
Ni qué rituí lú gaca xpinni Cristu
8 Cayabe laatu,
tutiica iníꞌ xpinne laa nezalú binni la?
laca zanié xpinne laa nezalú ca ángel sti Dios.
9 Peru tu iníꞌ nezalú binni cadi xpinne laa la?
laca zanié nezalú ca ángel sti Dios cadi xpinne laa.
10 Naa nga Hombre Biseenda Dios.
Pa chuꞌ tu cuꞌ dí naa la?
zuni perdonar Dios laa.
Peru pa chuꞌ tu usaca Espíritu Santu binidxaba la?
qué zuni perdonar Dios laa.
11 Ora chi nduu cabe xqueja tu ndaani yuꞌdu sti ca judíu o chiné cabe laatu ra nuu justicia la?
cadi chuꞌ tu xizaa xi iníꞌ tu.
12 Purti ora ma nuu tu raqué zusiidi Espíritu Santu laatu xi iníꞌ tu.
Pabiáꞌ naxoo enda ruyubi gapa bidxichi
13 De lade ca binni que biree tobi na rabi laabe:
―Maistru,
gudxi biche icaa nia laa biaꞌca ni bisaana né bixhoze laadu.
14 Peru rabi be laa:
―Tu gudxi lii juez naa para quiize sti binni yaꞌ.
15 Ne óraque rabi be irá ca binni que:
―Laguuya gá laatu ne enda ruyubi gapa bidxichi,
purti cadi nga si nga enda nabani sti binni.
16 Oraque byuíꞌ né be laaca ti cuentu rabi be laacaꞌ:
―Sicarí bizaaca tobi hombre ricu.
Nabé guca xquela.
17 Ne bizulú caníꞌ ique:
“Xi guneꞌ,
ma qué gapa paraa uchaya irá niza riꞌ.”
18 Peru óraque na:
“Ma nanna xi guneꞌ.
Zuxhaya ca troja stinneꞌ.
Zucué cani jma naroꞌba para idxá irá niza riꞌ ne irá stinneꞌ.
19 Ne óraque zanda iniéꞌ:
Yanna huaxa ma chi iziiladxeꞌ ne ma chi guiecheꞌ,
purti ma napa stale ni gahua ne ni gueeꞌ,
ne ma naguaa chaahue ni iquiiñe stale iza.”
20 Peru na Dios rabi laabe:
“Binni huati.
Yanna gueela ca zati luꞌ.
Ne tu guiaana né irá ni naguu chaahui lu ca yaꞌ.”
21 Zacá nga cani rutopa lú para laca laa,
peru qué gapa gasti ni risaca nezalú Dios.
Rapa Dios ca xiiñiꞌ
22 Oraque rabi be ca discípulu stibe:
―Nga runi cayabe laatu,
cadi chuꞌ tu xizaa paraa iree ni go to para ibani tu,
o paraa iree lari cuaqui tu.
23 Purti jma risaca xpida tu que endaró,
ne jma risaca cuerpu stitu que lari.
24 Laguuya ca biaꞌqui guꞌya tu.
Qué riguu ca bini,
que ribee ca guela,
qué gapa ca troja,
qué gapa ca lidxi ca ra nuchá ca ni ño caꞌ,
peru rudii Dios ni go caꞌ.
Ñee cadi jma risaca tu que ca mani huiini la?
25 Uná de laatu,
pa niguu xaíque nisoo xcaadxi,
ñee nisoo la?
26 Pa nin nga qué zanda guni tu la?
xiñee riuu tu xizaa pur ni iquiiñe tu yaꞌ.
27 Laguuya modo rigaa ca guieꞌ guiꞌxhiꞌ.
Qué runi ca dxiiñaꞌ,
qué riguiba caꞌ,
peru nin Salomón,
neca nabé bizuchaahuiꞌ,
qué ñacu lari sicarú biaꞌ sicarú cani.
28 Ne pa zacá ruzuchaahui Dios ca guieꞌ guiꞌxhiꞌ,
neca yanadxí nagáꞌ caꞌ,
ixí ma chaqui ca la?
lágaxa laatu,
qué udii be ni gacu tu,
binni qué runi cre caꞌ.
29 Nga runi cayabe laatu,
cadi ma canazá tu ma nuu tu xizaa xi go to,
xi gue tu.
30 Purti zacá runi ca binni ni qué runi cre Dios,
peru laatu la?
ma nanna Bixhoze tu ni nuu ibáꞌ xi irá caquiiñe tu.
31 Lauyubi guni mandar Dios ndaani ladxidóꞌ to,
ne xcaadxi ca zacá si lú ni.
Enseñando Sobre Oración y Fe
Ni dxandí risaca
32 Cadi idxibi tu,
dendxu huiini stinne caꞌ,
purti neca huaxiéꞌ tu peru rieche Bixhoze tu gudii laatu irá ni napa ladxi náꞌ.
33 Lautoo ni napa tu.
Lagacané cani caquiiñeꞌ.
Ne zacá casi ñaca caguu chaahui tu xpueltu tu ra qué zaniti.
Caguu chaahui tu ni ibáꞌ ra qué ziuu gubaanaꞌ ne qué zacá bandaa ni.
34 Zacá nga laguni,
purti ra nuu ni risaca para laatu la?
raqué nuu ladxidóꞌ to.
Gataná binni
35 Ne laca rabi be laacaꞌ:
―Lagataná,
zaa nacu tu xhaba tu ne zaa cá guí xpiaani tu.
36 Lagaca casi ni cabeza ibigueta xpixuaana de enda xheelaꞌ ti casi guiuu xpixuaana uxhidxi náꞌ,
maca ziuxheleꞌ.
37 Dichoso de ni nexhená guedandá xpixuaanaꞌ.
Ziuu xpixuaana be,
ne cuee si lari,
zucuí laabe ruaa mexaꞌ,
udii ni go xhi be.
38 Dichoso laabe pa nexhená be guedandá xpixuaana be,
neca guedandá galaa gueela o télayu.
39 Sicarí nga laani,
pa ñanna xpixuaana ti yoo pora ñe gubaana ralidxi la?
ñataná para cadi ñuu cabe ralidxi.
40 Laatu laca lagataná,
purti nin ganna tu mala ibigueta Hombre Biseenda Dios.
Mozo chaꞌhui ne mozo qué iquiiñeꞌ
41 Oraque na Pedru rabi laabe:
―Señor,
ñee byuíꞌ lu nga para laasi du la?
o para irá binni.
42 Para na be:
―Byue ni para tutiisi gacalaꞌdxi chuꞌ xpiaaniꞌ,
guni xhiiña xpixuaana jneza.
Zuni xpixuaana be laabe xaíque sti ca xcaadxi xpinni,
guꞌya be go ca biaꞌ nexhe go caꞌ,
ne go ca xhiora ni.
43 Dichoso de laabe pa jneza cayuni be ora guedandá xpixuaana be.
44 Purti óraque ma dede irá ni napa zusaana ladxi ná be.
45 Peru pa niná be:
“Zandaa ru gueeda xpixuaanaꞌ.”
Ne óraque nuzulú niguiñe be ca xcaadxi mozo ne ca criada,
ño be ne ñeꞌ be de ra nixudxi be,
46 nin ganna be mala ñedandá xpixuaana be.
Ninaaze laabe,
ñunidé laabe,
niree nanda laabe casi tobi ni qué iquiiñeꞌ.
47 Ni nanna xi racalaꞌdxi xpixuaana ne qué gataná guni ni la?
jma naná ziaba náꞌ.
48 Peru ni qué ganna xi na xpixuaana ne gueda uchee la?
huaxiéꞌ ziaba náꞌ.
Ni napa stale gracia jma stale naquiiñe guni,
ne ni usaana cabe stale ladxi ná la?
jma stale zanaba cabe laa.
Beda ndaa saa Jesús binni
49 Naná ni zeda gune ndaani guidxilayú.
Casi ñaca zeda usaba gui ndaani ni,
ne para naa pa ñanda si ma ñaca ni.
50 Napa xidé tide ti enda naná naroꞌbaꞌ,
ne qué zanda chuꞌ dxí ladxiduáꞌ dede ora ma udide ni.
51 Ñee zácaxa tu beda gune binni tobi si la?
Coꞌ,
cadi nga beda guneꞌ,
sínuque beda utinde binni.
52 Purti de ca yanna ra nuu gaayu binni ndaani ti yoo,
ziasa chonna zucaa lú xhupa que,
ne zucaa lú xhupa que laacaꞌ.
53 Ziuu hombre zucaa lú bixhoze,
ne zucaa lú bixhoze laa.
Ziuu gunaa zucaa lú jñaa,
ne zucaa lú jñaa laa.
Zucaa lú gunaa xualidxi,
ne zucaa lú xualidxi laa.
54 Ne laca rabi be ca binni que:
―Ora guꞌya tu guiasa ti guelacahui na tu chi guiaba nisa guie,
ne dxandí riaba nisa guie.
55 Ne ora guꞌya tu cundubi bi nisa na tu enda nandáꞌ,
ne dxandí raca nandáꞌ.
56 Xiñee riene tu ni rihuinni ibáꞌ ne guidxilayú peru qué riene tu ni cayaca yanna riꞌ.
Racalaꞌdxi si tu quite tu binni,
nga laani.
Lauyubi gaca tu tobi si
57 Xiñee qué uyubi tu lade si tu uná nga ni jneza guni tu.
58 Pa chiné tuuxa lii ra nuu justicia biyubi ca chuꞌ neu laabe tobi si laga ze tu neza,
para cadi chiné be lii ra nuu juez.
Pacaa zutidi juez lii lu ná gendarme para useguyoo lii.
59 Ne gabe caꞌ lii qué zareeu de raqué dede qué quiꞌxu irá ni nuzaꞌbuꞌ.