Bichuugu ca discípulu zee dxi enda riziilaꞌdxi
12
Qué nindaa de ngue,
ti dxi enda riziilaꞌdxi zidiꞌdi Jesús ne ca discípulu sti ndaani ti ñaa.
Nabé ma candaana ca discípulu que para bizulú undadi ca zee gudó caꞌ.
2 Ora biꞌya caadxi fariseu ni cayuni ca discípulu que la?
na ca rabi ca Jesús:
―Biaa ca xpinni luꞌ,
cayuni ca ni cadi jneza guni binni dxi enda riziilaꞌdxiꞌ.
3 Para na Jesús rabi laacaꞌ:
―Ñee qué huayuunda tu ra cá xi biꞌni David dxi candaana,
laa né ca xpinni la?
4 Biuu be ndaani yuꞌdu sti Dios ne gudó be ca pan ni ma uyuu ndaayaꞌ ni nexhe cadi go cabe,
nin laabe nin cani nuu né laabe que,
sínuque ca sacerdote si.
5 O laca qué huayuunda tu ra cá lu ley sti Moisés xi runi ca sacerdote ni nuu ndaani yuꞌdu roꞌ la?
laca qué rapa ca dxi enda riziilaꞌdxi peru qué riguiꞌba donda ique caꞌ.
6 Gabe caꞌ laatu,
ma nuaa lade tu ne jma risaca que yuꞌdu que né cani nuu ndaani ni.
7 Nuu ra cá lu Xquiꞌchi Dios ra na:
“Jma racaladxe guiá tu binni que guedané tu ni usigaꞌde tu naa.”
Yanna rabe laatu,
pa ñene tu xi na ca diidxa ca la?
ma qué nudxiiba tu donda ique ca discípulu stinne,
purti cadi cuchee caꞌ.
8 Naa nga Hombre Biseenda Dios ne zanda gabe binni xii nga jneza guni dxi enda riziilaꞌdxiꞌ.
Tobi hombre nabidxi ti chu náꞌ
9 Biree Jesús de raqué biuu ndaani yuꞌdu stícabe.
10 Ne nuu ti hombre raqué nabidxi ti chu náꞌ.
Para gunaba diidxa caadxi binni ni nuu ra yuꞌdu que Jesús pa jneza gusianda cabe binni dxi enda riziilaꞌdxiꞌ.
Uníꞌ ca zaqué peru para gapa si ca xi pur cuꞌ ca xqueja be.
11 Para rabi be laacaꞌ:
―Pa ñapa tobi de laatu ti dendxuꞌ ne ñaba me ndaani ti barranca dxi enda riziilaꞌdxiꞌ,
ñee qué niguu ná laame ne nibee laame la?
12 Ñee cadi jma risaca hombre que dendxu la?
Jma pue,
ne zacá rihuinni cadi cuchee né cabe ley pa gacané cabe binni dxi enda riziilaꞌdxiꞌ.
13 Para rabi be hombre ni nabidxi ti chu ná que:
―Bisigaa nouꞌ.
Ne ora bisigaa ná hombre que la?
bianda ni ne guca ni casi sti chu que.
14 Para biree ca fariseu yeníꞌ stiidxa ca ximodo zanda guuti ca laabe.
Ra uca ni bicaa profeta Isaías
15 Peru ma nanna be xi chi guni caꞌ,
para bixele be de raqué,
ne yenanda stale binni laabe para bisianda be laacaꞌ.
16 Ne biinda be lú caꞌ cadi uzeete ca tu laabe.
17 Ne zacá guca ni ti iree ni modo uníꞌ profeta Isaías dxi bizeete de laabe,
na:
18 Ndi nga ni gulié para guni xhiiñaꞌ
ne laabe nga nadxieeꞌ ne ni rusieche ladxiduáꞌ.
Zudiee Espíritu stinne laabe
ne zusiidi be dede cani cadi za de Israel ximodo rune mandar.
19 Qué zucaa lú be ne qué zucaa be ridxi,
ne iruti zuna diaga caníꞌ xhaata be lu calle.
20 Qué zusaba chaahui be cani ziyaba,
cani ruluíꞌ ti gueere ni ma caluuza,
ne qué zadinde né be cani ruluíꞌ ti mecha
ni ma qué ganda gudii biaaniꞌ.
Peru qué ziaana dxí xhiiña be dede guꞌya be gaca ni jneza ndaani guidxilayú.
21 Ne zacá lú ca binni ni cadi za de Israel
ulá be laacaꞌ.
Na cabe nuu né Jesús binidxabaꞌ
22 Oraque bedané cabe ti hombre ra nuu be udxite binidxaba ique ne ma nacheepa lú ne qué randa riníꞌ.
Para bisianda be laa,
ne óraque ma gunda biiya ne uníꞌ.
23 Bidxagayaa irá binni ni nuu raqué,
ne na caꞌ:
―Nagana pa cadi ndi nga ni na cabe gueeda de lade familia sti rey David que.
24 Peru ora bina diaga ca fariseu ni caníꞌ cabe la?
na caꞌ:
―Randa ribee be binidxaba purti nuu né be Beelzebú,
xaíque sti ca binidxabaꞌ.
25 Peru nanna be xi caníꞌ ique caꞌ,
para rabi be laacaꞌ:
―Intiica gobiernu ni tinde saa la?
zanitilú.
Ne zaqueca intiica guidxi o intiica familia ni tinde saa la?
laca zanitilú.
26 Nga runi pa ma cadinde saa ca xpinni binidxaba la?
qué zandaa initilú.
27 Pa naa ribee ca binidxaba purti nuaa nia Beelzebú casi na tu ca la?
laga ca xiiñi tu yaꞌ,
tu pur ribee ca ca binidxabaꞌ.
Lagabi laacabe iníꞌ cabe ximodo nga laani.
28 Peru naa la?
ribee ca binidxaba purti napa Espíritu sti Dios ne zacá rihuinni ma cayuni mandar Dios lade tu.
29 Zanda xa chi ndana cabe ralidxi ti hombre ni nadipaꞌ pa caꞌru iliibi.
Peru ora ma liibi be la?
óraque huaxa zanda cuana cabe ni napa be.
30 Tu cadi nuu pur naa la?
cucaa lú naa,
ne tu cadi cayacané naa gapa xpinne la?
cabee laacabe de naa.
31 Ne gabe caꞌ laatu,
zuni perdonar Dios cani ruchee,
ne cani riguu dí,
peru qué ziuu dxi guni perdonar be cani gusaca Espíritu Santu binidxabaꞌ.
32 Naa nga Hombre Biseenda Dios ne zuni perdonar be cani gucaa lú naa,
peru cani gucaa lú Espíritu Santu la?
qué zuni perdonar be laacaꞌ,
nin ora nabani ca nin ora ma guti caꞌ.
Pur ni guni binni zahuinni tu laa
33 Laaca tu nanna tu qué zanda udii ti yaga cuananaxhi pa cadi nazaaca,
peru pa nazaaca ni la?
zudii ni cuananaxhi ni iquiiñeꞌ purti pur cuananaxhi sti yaga rihuinni ximodo laa.
34 Ne laatu,
binni malu caꞌ,
ximodo zanda iníꞌ tu jneza pa cadi nayá ladxidóꞌ to yaꞌ.
Purti de ndaani ladxidóꞌ cabe nga riree diidxa ni riníꞌ cabe.
35 Binni nayá ladxidóꞌ la?
zaníꞌ ni jneza purti dxandí nayá ladxidóꞌ.
Peru binni cadi nayá ladxidóꞌ la?
zaníꞌ ni cadi jneza purti zacá laa de ndaani ladxidóꞌ.
36 Peru naa rabe laatu,
dxi cuidxi Dios cuenta irá binni guidxilayú la?
zabi be laaca xi pur bindaa ruaa ca ca diidxa ni cadi jneza ca.
37 Purti stiidxa piouꞌ nga usihuinni pa dxiꞌba donda ique lu o pa nayá ladxidóꞌ loꞌ.
Ra canaba binni guꞌya xiixa seña
38 Oraque na caadxi maistru de ley ne caadxi fariseu,
rabi laabe:
―Maistru,
xiñee qué uluíꞌ lu laadu ti seña xaibáꞌ para ganna du dxandí nandxóꞌ loꞌ.
39 Para rabi be laacaꞌ:
―Laatu qué na tu guni tu ni na Dios,
sínuque ni na tu,
ne yanna ma canaba tu guꞌya tu seña.
Peru qué zudiee ruaꞌ seña laatu sínuque gabe siaꞌ laatu guietenalaꞌdxi tu de profeta Jonás.
40 Purti cásica uyuu Jonás ndaani benda roꞌ que chonna gubidxa ne chonna gueela la?
zaqueca ziaana Hombre Biseenda Dios ndaani yu chonna gubidxa ne chonna gueelaꞌ.
41 Ne dxi uzuhuaa irá binni nezalú Dios,
ziasa ca binni Nínive ne zuseegu ca ruaa ca binni nuu yanna riꞌ,
purti laaca ucuaa ca stiidxa Jonás ne unaba ca perdón Dios,
peru yanna ma nuaa lade tu ne jma risaca que Jonás ne qué na tu icaa tu stiidxaꞌ.
42 Chiqué beeda ti reina de neza gueteꞌ de ti guidxi lá Sabá.
Beeda be ra nuu Salomón purti bina diaga be pabiáꞌ riene ne nuu né Dios laa.
Ne dxi cuidxi Dios cuenta binni la?
zuseegu be ruaa ca binni nuu yanna riꞌ purti laabe beeda be de zitu,
beda guna diaga be Salomón,
ne naa jma risaca que Salomón ne nuaa caꞌ lade tu ne qué na tu icaa tu stiidxaꞌ.
Ra biqueta né binidxaba xcadxe
43 Ora iree ti binidxaba de ndaani ladxidóꞌ binni la?
riree,
ma canazá ndaani guiꞌxhiꞌ,
canayubi ra iziilaꞌdxiꞌ.
Guꞌya si qué idxela,
óraque naꞌ:
“Zabigueta ralidxe ra bireeꞌ.”
44 Ne ora guedandá guꞌya ma nayá ladxidóꞌ ngue,
casi ñaca ti yoo ma iruti nabeza,
ma biluuba,
ma zuchaahuiꞌ.
45 Ibigueta,
chi caa xcadxe jma rusi nadxaba que laa,
riuu ca ndaani ladxidóꞌ binni que,
ne riaana ca raqué.
Ne pa huaxiéꞌ malu binni que ora nuu stubi si ti binidxaba la?
jma rusi yanna.
Zacaca zazaaca ca binni qué runa ni nuu yanna riꞌ.
Jñaa Jesús ne ca biꞌchiꞌ
46 Cayuíꞌ né ru be ca binni que diidxaꞌ,
bedandá jñaa be ne ca biꞌchi be,
bizuhuaa ca ra puertaꞌ,
ne racalaꞌdxi ca iníꞌ né ca laabe.
47 Para na tobi de cani nuu raqué rabi laabe:
―Rarica zuhuaa jñoouꞌ ne ca biꞌchi luꞌ,
caquiiñe ca lii.
48 Para rabi be ni gudxi ni laabe que:
―Tuu nga jñaaꞌ,
ne tuu nga ca bicheꞌ.
49 Oraque biluíꞌ ná be ca discípulu stibe,
ne na be: