Undadi ca discípulu zee dxi enda riziilaꞌdxiꞌ
6
Ti dxi enda riziilaꞌdxi zidiꞌdi Jesús ne ca discípulu sti ndaani ti ñaa,
ne bizulú ca discípulu undadi ca zee gudó caꞌ.
2 Oraque na caadxi fariseu:
―Xiñee cayuni tu ni cadi jneza guni binni dxi enda riziilaꞌdxiꞌ.
3 Para na Jesús rabi laacaꞌ:
―Ñee qué huayuunda tu xi biꞌni David,
laa ne cani canazá né,
dxi candaana ca la?
4 Biuu be ndaani yuꞌdu sti Dios,
ucuaa be ca pan ni ma uyuu ndaayaꞌ.
Gudó be,
ne bidii be cani canazá né be que,
gudó caꞌ,
neca na ley ca sacerdote si zanda go cani,
peru laacabe gudó cabe ni.
5 Naa nga Hombre Biseenda Dios,
ne naa zanda gabe binni xii nga jneza guni dxi enda riziilaꞌdxiꞌ.
Tobi hombre nabidxi ti chu náꞌ
6 Bigueta sti dxi enda riziilaꞌdxi biuu Jesús ndaani yuꞌduꞌ ne bizulú cusiidiꞌ.
Nuu ti hombre raqué nabidxi ti chu ná ladu derechu.
7 Nuu ca maistru de ley ne ca fariseu raqué para si undaachi ca pa zusianda be binni huará dxi enda riziilaꞌdxiꞌ ti gapa ca xi pur cuꞌ ca xqueja be.
8 Peru laabe nanna be xi cá ique caꞌ,
para rabi be dxa hombre nabidxi ti chu ná que:
―Biasa,
bizuhuaa galahui ca.
―Chi naba diidxa laatu xiixa.
Xii nga nexhe aca dxi enda riziilaꞌdxiꞌ,
acané nu binni la?
o guniná nu laa;
ulá nu xpida binni la?
o guuti nu laa.
10 Oraque biiya dxi be irá cani ri laabe ne rabi be dxa hombre que:
―Bisigaa nouꞌ.
Ne bisigaa ná hombre que ne bianda.
11 Peru nabé bidxiichi ca binni que ne caniꞌ stiidxa ca xi zanda guni ca laabe.
Ra zeeda lá irá apóstol
12 Ca dxi que biree Jesús uyé lu ti dani,
yeníꞌ né Dios.
Ne idubi gueela que gutaná be uniꞌ né be Dios.
13 Birá si gueela guridxi be cani canananda laabe ne guli be doce de laacaꞌ ne ulee lá be laaca apóstol.
14 Lade cabe zeeda Simón ni na be iree lá Pedru,
ne Andrés biꞌchiꞌ,
ne Jacobo ne Juan,
ne Felipe,
ne Bartolomé,
15 ne Mateu ne Tomás,
ne Jacobo xiiñi Alfeu,
ne Simón ni guyuu lade ca cananista chiqué,
16 ne Judas biꞌchi Jacobo,
ne Judas Iscariote,
dxa ni bitoo laabe que.
Discípulos Elegidos
Ra bisiidi Jesús stale binni
17 Ne óraque biete irá cabe de lu dani que dede ra bedandá cabe ra napampa.
Ora bedandá cabe biiya cabe ri binni raqué ni beeda de idubi Judea ne de Jerusalén ne de ca guidxi nuu uriá nisadóꞌ,
Tiro ne Sidón.
Beda ucaa diaga ca laabe,
ne para usianda be laacaꞌ.
18 Ne laca bisianda be cani riguite binidxaba ique.
19 Irá binni racalaꞌdxi cana laabe purti nuu enda nandxóꞌ sti Dios luguiá be ne nanna ca neca cana si ca laabe zianda caꞌ.
Ni rusieche ne ni runiná
20 Oraque biiya dxi be ca discípulu stibe ne na be:
―Dichoso de laatu,
cani qué gapa gastiꞌ,
purti stitu ni napa Dios ladxi náꞌ.
21 Dichoso de laatu,
cani candaana purti ziuu dxi idxá tu.
Dichoso de laatu,
cani cayuuna yanna,
purti ziuu dxi uxidxi tu.
22 Dichoso de laatu ora aca nanalaꞌdxi cabe laatu,
ne qué na cabe idxaaga cabe laatu,
ne ulaa cabe diidxa laatu,
ne qué lica racalaꞌdxi cabe guna diaga cabe lá tu purti xpinni Hombre Biseenda Dios laatu.
23 Laguieche dxi que,
dede idxá ladxidóꞌ to de enda nayecheꞌ,
purti nabé sicarú ni cabeza laatu ibáꞌ,
purti zacaca biꞌni ca bixhoze gola cabe ca profeta ni uyuu chiqué.
24 Peru lagapa gá si laatu,
cani napa bidxichi,
purti enda nayeche stitu nga.
25 Lagapa gá si laatu,
cani dxá dxá ca ndaani yanna,
purti ziuu dxi indaana tu.
Lagapa gá si laatu,
cani cuxidxi yanna,
purti ziuu dxi gacaná ladxidóꞌ to dede guꞌna tu.
26 Lagapa gá si laatu ora udxiiba binni laatu,
purti zacaca biꞌni ca bixhoze gola cabe.
Bidxiiba ca ni cadi dxandí profeta.
Las Bienaventuranzas
Enda ruquixe ni guni stobi laa
(Mt. 5.38-48; 7.12)
27 Peru ndi nga ni racaladxe gabe laatu,
cani cucaa diaga naa.
Laganaxhii cani qué na chuꞌ né laatu tobi si,
ne lagacané cani nanalaꞌdxi laatu.
28 Lacuu ndaaya cani riguu dí laatu,
lainíꞌ né Dios pur cani riníꞌ laatu.
29 Pa chuꞌ tu capa xa diaga tu la?
laudii ca né sti ladu.
Pa chuꞌ tu gaxha laatu chamarra stitu,
laudii ca laa ne xcamixa tu.
30 Tutiica inaba laatu laudii,
ne tu gaxha laatu stitu la?
cadi inaba tu ni laa.
31 Laguni laacabe ni racalaꞌdxi tu guni cabe laatu.
32 Pa ganaxhii tu cani nadxii si laatu la?
ñee na tu ma xiixa nga cayuni tu la?
Purti dede ca binni qué rulabi ley sti Dios runi zacá.
33 Ne zaqueca pa gacané tu cani racané si laatu la?
cadi caguu tu gasti lú ni,
purti zacaca runi cani qué rulabi ley sti Dios.
34 Ne pa utiiñe tu cani rutiiñe si laatu la?
cadi caguu tu gasti lú ni purti zacaca runi cani qué rulabi ley sti Dios.
Rutiiñe caꞌ cani nanna ca zutiiñe laacaꞌ.
35 Peru laatu la?
laganaxhii cani cadi nadxii laatu ne lagacané laacaꞌ,
ne lautiiñe sin cueza tu utiiñe cabe laatu.
Pa guni tu zacá la?
nabé naroꞌba ziaxa tu,
ne zahuinni dxandí xiiñi Dios laatu.
Purti laabe nachaꞌhui be ne cani qué rudii diuxquixe laabe ne cani cuchee né laabe.
36 Laguiá binni casi riá Dios stitu binni.
Sermón en el Monte
Enda rudxiiba donda ique stobi
37 Cadi udxiiba tu donda ique binni ti cadi quiba donda ique tu,
ne laguni perdonar stobi ti guni perdonar Dios laatu.
38 Lagacané stobi de ni caquiiñeꞌ,
ne laca zacané Dios laatu de ni caquiiñe tu.
Zuchá tipa be ná tu dede zaxii.
Purti biaꞌ ca udii tu stobi biaꞌ queca icaa tu.
39 Oraque gudixhe be ti ejemplu para laaca rabi be laacaꞌ:
―Qué zanda inaaze ti lú cheepa ná sti lú cheepaꞌ,
purti pa ñuni cabe ni la?
iropa cabe ñaba cabe ndaani barranca.
40 Tobi ni caziidi la?
qué ziuu dxi tidi lú jmaistru,
sinuque ora ma binduuxe,
ma nanna biaꞌ nanna jmaistru.
41 Ximodo zanda guꞌya lu guixi nuu lú stobi ne qué guꞌya lu bandadi nuu lú lu yaꞌ.
42 O ximodo zanda gabi lu stobi:
“Dané cuee guixi nuu lú lu ca,
xhamiguaꞌ.”
Ne lii zaa nuu bandadi ca lú lu la?
Cadi quitu binni.
Gulee ca bandadi nuu lú lu ca,
ti ganda guuya chaahui lu cuee lu guixi nuu lú stobi.
Pur ni guni binni zahuinni tu laa
43 Pa nazaaca ti yaga cuananaxhi la?
qué zacá cuananaxhi ni cadi galán lú.
Ne zaqueca pa qué iquiiñe ti yaga la?
qué zacá cuananaxhi galán lú.
44 Irá yaga rihuinni xi yaga laa pur ca cuananaxhi stiꞌ.
Qué zanda uchuugu lu duꞌga lu yaga guichi yaa,
ne qué zanda uchuugu lu uvas lu yaga guichi gueda.
45 Pa nachaꞌhui ti binni la?
zuni enda nachaꞌhui purti nga nga ni nuu ndaani ladxidóꞌ,
ne binni ni nadxaba la?
runi enda nadxabaꞌ,
purti nga nga ni nuu ndaani ladxidóꞌ.
Purti de ndaani ladxidóꞌ cabe riaaxha ni riníꞌ cabe.
Ti hombre nuu xpiaaniꞌ ne tobi nahuati
46 Xiñee rabi tu naa,
“Señor,
Señor”,
peru qué runi tu ni rabeꞌ.
47 Chi tidxe laatu ximodo zeda gaca cani gueda ucaa diaga stiidxaꞌ ne guni ni na ni.
48 Zeda gaca ca casi ti hombre bicuí lidxi.
Gudaañe guete dede yendá guie ne lu guie que undaa cimientu.
Biree guiigu bidiñe ntaa nisa cueꞌ yoo que.
Qué lica niniibi ni purti zuba ni lu guie.
49 Peru cani ucaa diaga naa ne qué guni ni gabe la?
zeda gune laaca casi stobi hombre bicuí lidxi lu yuxi sin nindaa cimientu.
Casi pe bidxá guiigu bidxela saa nisa cueꞌ ni,
bixá ca ni.
Nin stindaa huiini ni qué ñaana.