Ra zeeda lá irá apóstol
10
Oraque guridxi be doce discípulu stibe que ne gudixhe be irá ndi ladxi ná caꞌ:
cuee ca binidxaba ni riguite ique binni,
ne gusianda ca intiica enda huará ne yuubaꞌ.
2 Ndi nga lá doce apóstol que:
primé ca Simón,
ni rabi cabe Pedru,
ne Andrés biꞌchiꞌ,
raqué ma nanda Jacobo xiiñi Zebedeu,
ne Juan biꞌchiꞌ.
3 Raqué ma nanda Felipe,
ne Bartolomé,
ne Tomás ne Mateu ni biquixe impuestu chiqué,
ne Jacobo xiiñi Alfeu,
ne Lebeu ni rabi cabe Tadeu,
4 ne Simón ni guyuu lade ca cananista chiqué,
ne Judas Iscariote ni bitoo Jesús que.
Ra yegüí ca apóstol stiidxa Dios
5 Biseenda be idubi doce que,
peru ora ma chi iree caꞌ,
na be rabi be laacaꞌ:
―Cadi che tu ra nuu cani cadi judíu,
ne cadi guiuu tu xquidxi ca samaritanu.
6 Laché ra nuu cani za de Israel,
cani ruluíꞌ dendxu ni cananiti.
7 Ne lagabi laaca ma zeda dxiña dxi guni mandar Dios.
8 Lausianda cani napa lepra ne xcaadxi enda huará,
ne lausibani cani ma guti,
ne lacuee ca binidxaba ni riguite binni.
Qué niguixe tu saca gudixhe irá ndi lu ná tu guni tu.
Yanna laguni cani sin guiaxa tu.
9 Cadi chiné tu oro,
nin plata,
nin cobre,
10 ne cadi chiné tu ra idxá ni iquiiñe tu ladu ze tu,
nin chiné tu chupa muda lari,
nin chupa par guela guidi,
nin bastón,
purti naquiiñe udii cabe ni go ni canayuni dxiiñaꞌ.
11 Ne guidxi tiica chuꞌ tu,
pa guidxi huiini o pa guidxi roꞌ,
lainaba diidxa ralidxi tuuxa ni nachaꞌhuiꞌ,
ne laguiaana ralidxi be de ora ma ixele tu de guidxi que.
12 Ne ora guiuu tu ralidxi cabe,
laugapa diuxi.
13 Ne ora ma nuu tu raqué,
lacuu ndaaya yoo que,
ne pa aca cabe nachaꞌhui ne laatu la?
ziaana ndaaya stitu ndaani yoo que,
peru pa coꞌ la?
zabigueta ni luguiá tu.
14 Pa nuu paxaraa qué na cabe guiaana tu,
ne qué na cabe gucaa diaga cabe laatu la?
laguiree de ra yoo que,
o de guidxi que,
ne ora ma chi iree tu de raqué la?
laquibi ñee tu,
ti cadi chiné tu nin yu stícabe.
15 Ne gabe caꞌ laatu,
dxi cuidxi Dios cuenta binni guidxilayú la?
jma pe zusaba ná be ca binni guidxi que,
que ca binni Sodoma ne Gomorra.
Zadiꞌdi cabe ra nagana
16 Cuseenda laatu casi ñaca nuseenda dendxu lade gueuꞌ.
Nga runi lagataná casi nexhená beendaꞌ.
Peru laca lagaca nadóꞌ casi nadóꞌ paloma.
17 Laguuya gá laatu ne ca binni que purti ziné ca laatu ra nuu ca justicia stica ni nuu ndaani yuꞌdu ne zaguiñe ca laatu raqué.
18 Zuchiña cabe laatu ra nuu ca gobernador ne ra nuu rey purti xpinne laatu,
ne zacá laca zanda güi tu stiidxa nezalú cani cadi za de Israel.
19 Ne ora uchiña cabe laatu raqué la?
cadi chuꞌ tu xizaa xi iníꞌ tu nezalú cabe o xi gabi tu laacabe.
Purti ora ma zuhuaa tu nezalú cabe la?
zadxela tu xi iníꞌ tu,
20 purti cadi laadi tu chi iníꞌ tu sínuque Espíritu sti Bixhoze tu ni nuu ibáꞌ nga che de ruaa tu.
21 Zadxiña dxi neca biꞌchi cabe zuluíꞌ cabe para gatiꞌ,
ne zaqueca zuluíꞌ bixhoze cabe laacabe,
ne laca ziuu tu guiasa luguiá bixhoze ne guluíꞌ bixhoze para gatiꞌ.
22 Zaca nanalaꞌdxi cabe laatu purti xpinne laatu.
Peru cani qué ixhacalaꞌdxi dede dxi iluxe irá ni la?
zalá.
23 Pa iladxi cabe laatu ndaani ti guidxi la?
laché sti guidxi purti gabe caꞌ laatu neca guni tu zacá,
caꞌru iluxe tidi tu irá guidxi sti Israel dxi ibigueta Hombre Biseenda Dios.
24 Qué risaca ni caziidi jma que maistru stiꞌ,
ne zaqueca qué risaca mozo jma que xpixuaanaꞌ.
25 Nga runi cadi quiche ruaa ni caziidi pa guni cabe laa ni runi ca cabe maistru stiꞌ.
Pa gabi cabe xpixuaana ti yoo binidxaba la?
irá cani nuu né laa ndaani yoo que laca zabi cabe ni laa.
Tu naquiiñe idxibi nu
26 Nga runi cadi idxibi tu laacabe,
purti ziuu dxi ihuinni irá ni yeꞌgu lú yanna,
ne zaqueca ziuu dxi ganna binni irá ni gaꞌchiꞌ.
27 Ni gabe laatu nagaꞌchiꞌ,
laatu lainíꞌ ni nezalú binni,
ne ni usiide laatu xa diaga si tu la?
laquiꞌba ique yoo ne lainíꞌ ni reciu.
28 Ne cadi idxibi tu cani ruuti cuerpu si,
purti qué zanda guuti cabe alma,
sínuque laidxibi ni zanda unitilú alma ne cuerpu ndaani gabiá.
29 Laaca tu nanna tu ridoo chupa mani huiini pur chupa domiꞌ,
peru neca qué risaca came,
qué ziaba si tobi de laacame layú pa qué na Dios.
30 Zaqueca ma bigaba be irá xixé guicha ique tu.
31 Nga runi cadi idxibi tu,
purti jma risaca tu que ca mani huiiniꞌ.
Ni qué rituí lú gaca xpinni Cristu
32 Tutiica iníꞌ xpinne laa nezalú binni la?
laca zanié xpinne laa nezalú Bixhoze ni nuu ibáꞌ.
33 Peru ni qué ná iníꞌ pa xpinne laa nezalú binni la?
laca qué zanié pa xpinne laa nezalú Bixhoze ni nuu ibáꞌ.
Beda ndaa saa Jesús binni
34 Cadi zácaxa tu zeda gune binni guidxilayú tobi si,
purti cadi nga zeda gune sínuque casi ñaca zedaniá ti espada.
35 Purti zeda ndaa saa hombre ne bixhoze,
ne badu dxaapa ne jñaa,
ne gunaa ne suegra.
36 Ne ca binni lidxi pe hombre zaca nanalaꞌdxi laa.
37 Tu jma nadxii bixhoze o jñaa que naa la?
qué zaquiiñe para xpinneꞌ,
ne zaqueca tu jma nadxii xiiñi que naa la?
qué zaquiiñe para xpinneꞌ.
38 Ne tu qué na gacaná ra gueda nanda naa la?
qué zaquiiñe para xpinneꞌ.
39 Ni guyubi ilá xpida ndaani guidxilayú la?
zuniti ni ibáꞌ,
peru ni guniti xpida pur naa guidxilayú la?
zadxela ni ibáꞌ.
Tu irá guiaxa lu xhiiña Dios
(Mr. 9.41)
40 Tu uchagalú laatu la?
casi ñaca nicaa naa,
ne tu icaa naa la?
casi ñaca nicaa ni biseenda naa.
41 Pa nuu tuuxa uchagalú ni canayuíꞌ stiidxa Dios purti Dios biseenda laa la?
biaꞌca quixe Dios ni canayuíꞌ stiidxa que la?
biaꞌ queca quixe laabe.
Ne pa nuu tobi ni ruchagalú tutiica ni nachaꞌhui la?
biaꞌca quixe Dios ni nachaꞌhui que la?
biaꞌ queca quixe laabe.
42 Tutiica uchagalú tobi de ca xpinne ni jma nahuiini riꞌ ne gudii laabe neca ti vasu nisa purti xpinne laabe la?
qué ziaana sin qué quixe Dios laa.