Ra yegüí ca discípulu stiidxa Dios
9
Guridxi Jesús doce discípulu sti que,
ne gudixhe ladxi ná cabe cuee cabe binidxaba de binni,
ne usianda cabe binni huará.
2 Biseenda laacabe chi güi cabe modo runi mandar Dios ne usianda cabe binni.
3 Na rabi laacabe:
―Cadi chiné tu gasti ni iquiiñe tu neza,
nin bastón,
nin ixhiapa,
nin pan,
nin vueltu.
Lachiné lari ni nacu si tu.
4 Ne ra guiete tu la?
laguiaana ndaani yoo que dede dxi ma iree tu de guidxi que.
5 Ne ra qué na cabe icaa cabe laatu,
lairee de guidxi que,
ne laquibi yu cá ñee tu casi ti seña bichee cabe ra qué niná cabe nucaa diaga cabe laatu.
6 Para biree ca ze caꞌ,
uzá ca guidxi pur guidxi.
Yegüí né ca binni stiidxa Dios,
ne bisianda ca cani huará.
Ra guti Juan Bautista
7 Ora bina diaga gobernador Herodes xi irá cayuni Jesús,
bichenda ni laa,
purti nuu tu na Juan Bautista bibani,
8 ne nuu tu na Elías biguetaꞌ.
Xcaadxi na tobi de ca profeta ni uyuu chiqué nga ma nabani sti tiru.
9 Para na Herodes:
―Juan la?
naa biseenda gaxha yanni.
Peru tuu ndi na cabe cayuni irá ndi yaꞌ.
Ne biyubi guꞌya laabe.
Ra biyaana Jesús gaayu mil
10 Ora bigueta ca apóstol de ra biseenda Jesús laacaꞌ,
biyubi ca ra nuu Jesús ne byuiꞌ né ca laabe xi irá biꞌni caꞌ.
Para ucuaa be laacaꞌ yené be laaca uriá guidxi Betsaida.
11 Peru ora gunna binni paraa nuu be,
yenanda ca laabe.
Bichagalú be laaca ne byuíꞌ né be laaca modo runi mandar Dios.
Ne bisianda be cani caquiiñe guianda.
12 Ne raqué nuu cabe bidxí layú para bidxiña ca apóstol ra nuu be,
na ca rabi ca laabe:
―Ñee cadi ma ñanda ñaꞌbu ca binni ca ñe ca la?
tila nidxela ca ra ñaana ca ne ni ño ca ndaani ca guidxi huiini ne ca ranchu nuu gaxha ca,
purti ndaani guiꞌxhi ndi nuu nu.
13 Para rabi be laacaꞌ:
―Laudii ni go cabe laatu.
Oraque na caꞌ:
―Peru xi pe ndi napa du,
gaayu pan ne chupa benda.
O racalaꞌdxu chi sí du ni go irá binni ri la?
14 Ne nuu biaꞌ gaayu mil hombre raqué.
Oraque rabi be ca discípulu stibe:
―Laucuí ca binni ca neza cincuenta cincuenta.
15 Ne zaqué bicuí cabe irá ca binni que.
16 Ne ucuaa be gaayu pan ne chupa benda que,
undisa lú be ibáꞌ,
bidii be diuxquixe Dios.
Para undaa be cani,
bidii be cani ca discípulu quiꞌzi lu ca binni que.
17 Gudó irá ca binni que dede bidxá caꞌ,
ne biaana ru jma nandahui.
Bitopa cabe biaꞌ sti doce dxumi.
Jesús Alimenta a 5,000
Ra uníꞌ Pedru tuu nga Jesús
18 Ti dxi yeníꞌ né Jesús Dios,
yené ca discípulu stiꞌ ne ra nuu cabe que rabi be laacaꞌ:
―Tu na binni naa.
19 Para na caꞌ:
―Nuu tu na Juan Bautista lii,
nuu tu na Elías,
ne nuu tu na tobi de ca profeta ni uyuu chiqué,
ma bibani.
20 ―Laga laatu yaꞌ,
rabi be laacaꞌ.
―Tu rabi tu naa.
Oraque na Pedru:
―Lii nga Cristu ni ulí Dios.
Bizeete Jesús chi gati
―Naa nga Hombre Biseenda Dios.
Naquiiñe tide stale enda naná.
Zudxii deche ca xaíque sti guidxi ne ca xaíque sti ca sacerdote ne ca maistru de ley naa,
ne zuuti ca naa,
peru zabane raguionna gubidxa.
Pedro Declara a Jesús como Cristo
23 Ne rabi be irá caꞌ:
―Tu gacalaꞌdxi gaca xpinne la?
gusiaanda laca laa,
ne cadi lica guiá xpida sínuque usaana ni lu naya irá dxi ne gueda nanda naa.
24 Purti tu gacalaꞌdxi ulá xpida la?
zuniti ni,
peru tu uniti xpida pur naa la?
zalá.
25 Paraa iquiiñe ni binni pa guni ganar idubi naca guidxilayú peru uniti xhialma.
26 Purti tutiica ituí lú chi nanda naa ne stiidxa la?
naa laca zatuí lua inié xpinne laa dxi useenda Dios naa guenda casi ti rey ne enda nandxóꞌ sti Bixhozeꞌ ne sti ca ángel chaꞌhuiꞌ.
27 Peru gabe caꞌ laatu,
nuu caadxi rarí qué zati dede qué guuya ora ma cayuni mandar Dios.
Ra biiya cabe bidxaa Jesús
28 Udiꞌdi biaꞌ xhono gubidxa de uníꞌ Jesús ca nga,
ucuaa Pedru ne Juan ne Jacobo,
udxiꞌba né lu dani,
yeníꞌ né Dios.
29 Ne laga nuu be caníꞌ né be Dios mala biiya cabe ma adxé laabe.
Naquichi bé bihuinni xhaba be dede riaꞌqui biaaniꞌ.
30 Ne cayuíꞌ né be chupa hombre diidxaꞌ,
Moisés ne Elías.
31 Guionna cabe nuu cabe galahui xtuxhu ti biaani roꞌ.
Cuzeete cabe modo chi gati be Jerusalén.
32 Ma nuu bacaanda lú Pedru ne xhupa que,
peru qué niná ca ñasi caꞌ.
Ne zacá gunda biiya ca cuzaani ladi Jesús ne xhupa zuhuaa né laa que.
33 Ma chi ixele ca hombre que de Jesús para na Pedru:
―Maistru,
aque galán nuu nu rarí njaꞌ.
Zanda guni du chonna ranchu huiiniꞌ,
tobi para lii,
tobi para Moisés,
ne stobi para Elías.
Peru nin ganna Pedru xi caníꞌ.
34 Caníꞌ ru be mala biseegu ti za laacabe.
Nabé bidxibi cabe ora biꞌya cabe nuu cabe lade za.
35 Ne ucuá ti ridxi lade za que:
―Ndi nga Xiiñeꞌ ni nadxieeꞌ.
Laucaa diaga laa.
36 Biaana dxí si ridxi que,
biiya cabe ma stubi Jesús nuu.
Dxí dóꞌ uyuu cabe ca dxi que.
Iruti ñabi cabe ni biꞌya cabe que.
La Transfiguración
Ra bisianda Jesús ti hombre huiini napa ataque
37 Sti dxi que ra ziyete cabe lu dani beda chagalú stale binni Jesús.
38 Mala biree tobi hombre lade ca binni que,
bicaa ridxi na rabi Jesús:
―Maistru,
biiya laꞌ xiiñeꞌ.
Tobi lucha laabe napaꞌ.
39 Ne riguite binidxaba ique be rucaa be ridxi,
rinaaze laabe,
ruchuche laabe layú dede riree bupu ruaa be,
ruxuuxe laabe dede yaca tiꞌ guuti laabe.
Oraque ru rundaa laabe.
40 Ma unaba ca discípulu stiuꞌ ñaxha ca binidxaba ca de laabe,
peru qué ñanda.
41 Oraque na Jesús:
―Aque qué runi cre tu xa,
binni caꞌ,
ne naguidxi ladxidóꞌ to.
Dede padxí naquiiñe guiaana nia laatu ne gune huantar laatu yaꞌ.
Oraque rabi be hombre que:
―Dané xiiñu ca raríꞌ.
42 Ma zidxiña hombre huiini que Jesús,
unaaze binidxaba que laa,
bitubi laa yu.
Peru óraque udinde né Jesús binidxaba que ne oraqueca bianda hombre huiini que,
para bidii be laa bixhoze.
43 Nabé bidxagayaa irá ca binni que pabiáꞌ nandxóꞌ Dios.
Jesús sana a un muchacho del espíritu del mal
Bigueta bizeete Jesús zati
Ne laga cadxagayaa ca binni que irá ni cayuni be,
rabi be ca discípulu stibe:
44 ―Laucaa diaga chaahui ni chi tidxe laatu riꞌ,
qué chi guiaanda ni laatu.
Naa nga Hombre Biseenda Dios ne ma chi utoo cabe naa lu binni guidxilayú.
45 Peru qué ñene ca xi cayabi be laacaꞌ,
purti ma nexhe cadi guiene ca ni.
Ne bidxibi ca ninaba diidxa ca laabe xi riníꞌ ni.
Tu laa jma risaca
46 Oraque bizulú ca discípulu cacaa yu ca uná de laaca jma risaca.
47 Peru nanna Jesús xi caníꞌ cabe,
para ucuaa ti baꞌdu bizuhuaa cueꞌ.
48 Ne na rabi laacabe:
―Tutiica acané baꞌdu ri pur naa la?
casi ñaca cayuni ni naa.
Ne tu guni ni naa la?
cayuni ni ni biseenda naa.
Purti ni jma huaxiéꞌ risaca lade tu la?
nga nga ni jma risaca.
Ni cadi cucaa lú, cayacané
49 Biluxe si uníꞌ Jesús,
na Juan:
―Maistru,
biduꞌya du ti hombre cuzeete lá lu ra cabee binidxaba de binni,
peru bicueeza du laa purti cadi canazá né laanu.
50 Para rabi be laa:
―Xiñee canaucueeza tu laabe,
purti cani cadi cucaa lú laanu la?
nuu né laanu tobi si.
Ra udinde né Jesús Juan ne Jacobo
51 Dxi ma cazaa dxi ibigueta be ibáꞌ udixhe ique be che be Jerusalén.
52 Bisá niru be ca xpinni be ndaani ti guidxi sti Samaria para chi yubi ca ra guiaana be.
53 Peru qué niná ca binni Samaria ñaana be raqué purti ze be Jerusalén.
54 Ngue biꞌya Jacobo ne Juan para na ca rabi ca laabe:
―Señor,
ñee racalaꞌdxu inaba du guiaba gui de ibáꞌ para initilú cabe casi biꞌni Elías chiqué la?
55 Oraque biiya dxí be laaca ne udinde né be laacaꞌ,
rabi be laacaꞌ:
―Nin qué ganna tu tu cayabi laatu iníꞌ tu zacá.
56 Purti biseenda Dios naa ndaani guidxilayú ri cadi para uniteluáꞌ binni sínuque para ulaꞌya laacaꞌ.
Ne biree cabe ze cabe sti guidxi.
Cani racalaꞌdxi sa nanda Jesús
57 Neza ze cabe na ti hombre rabi Jesús:
―Señor,
racaladxe chi nanda lii ratiica cheuꞌ.
58 Para rabi be laa:
―Ca mistu guiꞌxhi la?
napa ca cueva ra riaana caꞌ,
ne zaqueca ca mani huiini napa ca lidxi caꞌ.
Peru naa nga Hombre Biseenda Dios,
ne qué gapa nin ra quixhe iqueꞌ.
59 Ne rabi be stobi:
―Dananda naa.
Para na ngue:
―Señor,
bidii lugar ucaache siaꞌ bixhozeꞌ.
60 Oraque rabi be laa:
―Bisaana nga guni ni qué na gueda nanda naa.
Lii la?
yegüí né binni modo runi mandar Dios.
61 Oraque biree stobi na rabi laabe:
―Zinanda lii,
Señor,
peru chi tidxe siaꞌ ca binni lidxe ma chaaꞌ.
62 Para na be:
―Ni quixhe ná lu aradu ne udxigueta lú atrá la?
qué zaquiiñe para guni dxiiñaꞌ.
Zaqueca ni gueda nanda naa ne ibigueta atrá la?
qué zaquiiñe lade ca xpinni Dios.