Trampa sti ca fariseu ne ca saduceu
16
Nuu be raqué bidxiña caadxi fariseu ne saduceu laabe,
beda guuya si ca pa ñanda nusaba ca laabe.
Para unaba ca laabe uluíꞌ be laaca ti seña xaibáꞌ ti ganna ca pa dxandí nandxóꞌ be.
2 Peru laabe laga rabi be laacaꞌ:
―Ora ma chi guiaazi gubidxa ne guꞌya tu naxiñá ibáꞌ,
óraque na tu:
“Qué ziaba nisa guie ixíꞌ purti naxiñá ibáꞌ.”
3 Ne zaqueca pa guꞌya tu naxiñá ibáꞌ siadóꞌ la?
óraque na tu:
“Yanadxí ziaba nisa guie purti naxiñá ibáꞌ ne nachuundu nuu.”
Laatu riene tu xi na ca seña ni rihuinni ibáꞌ,
peru ca seña ni cayuuya tu yanna riꞌ,
nga qué riene tu.
4 Qué na tu guni tu ni na Dios sínuque ni na tu,
ne yanna ma canaba tu udiee laatu ti seña,
peru qué zacaa tu sti seña sínuque seña si sti profeta Jonás.
Ne óraque biree be ze be.
Ra udixhená Jesús ca discípulu
5 Ne ora yendá ca discípulu que cherica nisa,
bedasilú laaca qué niné ca pan.
6 Ne óraque pe rabi be laacaꞌ:
―Lagataná ne laguuya gá laatu ne ca levadura sti ca fariseu ne sti ca saduceu.
7 Oraque na caꞌ:
―Cayabi be ndi laanu tisi qué ñedané nu pan.
8 Peru nanna be xi caníꞌ caꞌ,
para na be rabi be laacaꞌ:
―Hombre caꞌ,
xiñee nabé huaxiéꞌ napa tu fe naa.
Xiñee nuu tu xizaa qué ñedané tu pan.
9 Ñee de yanna caꞌru guiene tu la?
Ñee ma biaanda laatu de gaayu pan ni gudó gaayu mil que la?
ne panda dxumi bitopa tu de ni biaana.
10 Ñee laca ma biaanda laatu de gadxe pan ni gudó tapa mil que la?
ne panda dxumi bitopa tu.
11 Xiñee qué ñanda ñene tu cadi cuzeete diaꞌ de levadura sti pan peꞌ ora gudxe laatu lagapa laatu ne levadura sti ca fariseu ne sti ca saduceu.
12 Ne óraque ru biene ca xi cayabi be laacaꞌ,
purti cadi cuzeete be levadura sti pan peꞌ sínuque cuzeete be ni rusiidi ca fariseu ne ca saduceu,
ne nga nga levadura ni cayabi be laaca guuya gá caꞌ.
Ra uníꞌ Pedru tuu nga Cristu
13 Dxi ma bedandá Jesús neza Cesarea de Filipo,
na rabi ca discípulu stiꞌ:
―Tu na binni naa.
14 Para na ca rabi ca laabe:
―Nuu tu na Juan Bautista lii,
ne nuu tu na Elías,
ne xcaadxi na Jeremías o tobi de ca profeta.
15 Para rabi be laacaꞌ:
―Laatu yaꞌ.
Tu rabi tu naa.
16 Oraque na Simón Pedru rabi laabe:
―Lii nga Cristu,
Xiiñi Dios ni nabani.
17 Para na be:
―Dichoso lii,
Simón,
xiiñi Jonás,
purti cadi binni guidxilayú bisiene nga lii,
sínuque Bixhoze ni nuu ibáꞌ.
18 Ne ma gulee laꞌya lii Pedru,
ne ni riníꞌ lá lu ca la?
“guie”.
Ne lu guie ca chi ucué ti yuꞌduꞌ,
ne yuꞌdu ca nga,
ca xpinneꞌ.
Ne gasti qué zanda uxhá ni,
gueeda ni gueeda,
neca enda guti.
19 Zusaana ca llave sti ibáꞌ ladxi ná luꞌ,
ne intiica cuee lu de gaca ndaani guidxilayú la?
laca qué zaca ni ibáꞌ.
Ne intiica na lu gaca ndaani guidxilayú la?
laca zaca ni ibáꞌ.
20 Ne óraque gudxi be ca discípulu stibe cadi gabi ca iruti pa laabe nga Cristu.
Bizeete Jesús chi gati
21 Dede óraque bizulú be bisiá be stiidxa be,
rabi be ca discípulu stibe:
―Naquiiñe chaa Jerusalén ne zuniná ca xaíque sti guidxi naa raqué,
laaca né ca maistru de ley ne ca xaíque sti ca sacerdote,
dede zuuti ca naa,
peru zabane ra guionna gubidxa.
22 Oraque guridxi Pedru laabe ti ladu ne bizulú cayabi laabe:
―Dios guꞌya qué izaaca lu ni nouꞌ ca.
23 Peru óraque biiya dxí be Pedru ne na be:
―Biree de ra nuaa,
binidxabaꞌ.
Qué gueda uchenda lu naa purti cadi de Dios di zeeda ni cá ique lu ca sínuque de binni guidxilayú.
24 Ne na be rabi be irá ca discípulu stibe:
―Tu gacalaꞌdxi gaca xpinne la?
gusiaanda laca laa,
cadi lica guiá xpida,
ne sa nanda naa.
25 Purti tu gacalaꞌdxi ulá xpida zuniti ni,
peru tu guniti xpida pur naa la?
zalá.
26 Paraa iquiiñe ni binni pa guni ganar idubi guidxilayú peru guniti xhialma.
O pagala zanda quixe binni saca ulá xhialma.
27 Naa nga Hombre Biseenda Dios ne zadxiña dxi ibigueta nia enda nandxóꞌ sti Bixhozeꞌ.
Zedaniá ca ángel stinne ne dxi ca nga quixe cada tobi biaꞌ ni biꞌniꞌ.
28 Gabe caꞌ laatu,
caadxi de cani nuu raríꞌ qué zati dede qué guꞌya guenda guidxilayú sti tiru,
peru ma para gune ganar.