Jonás 1

JONÁS

Ra bixhoñelu Jonás de Tata Diuxi

Beeda xtiidxaꞌ Tata Diuxi ra nuu Jonás xiiñiꞌ Amitai ra gudxibe laa sicaríꞌ:

2 “Biasa ne guyé guidxiroꞌ Nínive, bicheeche diidxaꞌ, susabanayáꞌ laacabe, ti ma bidxiña guiráꞌ guendanadxabaꞌ xticabe neza luaꞌ”.

3 Xisi Jonás biasabe ne bixhoñelube de Tata Diuxi, laga Tarsis guniꞌ iquebe chébe, ne bietebe Jope ruaa nisadoꞌ, raqué bidxelabe ti barcu ma yaca guiree chéꞌ Tarsis; ne gudixhebe saca chébe Tarsis ndaanini, zitu de nezalu Tata Diuxi. 4 Huaxa Tata Diuxi bisababe ti bi yooxhoꞌ, ne nabé naxoo guca lu nisadoꞌque, ruluiꞌ nga chiguireza barcu que. 5 Ca binni runi dxiiñaꞌ lu nisaque nabé bidxibi caꞌ, ne tobi tobi bicaaridxi xpidoꞌ; ne bilaacabe lu nisa guiraꞌ ni zinecabe, ti guisisi barcu que. Laga que Jonás maca bietebe ndaaniꞌ barcu que, ne nexhebe nisiaasibe. 6 Bidxiñá xpixuaanaꞌ barcu que laabe ne gudxilaabe:

―Xi cayuꞌnuꞌ raríꞌ binni rasixhaataꞌ? biasa ne bicaa ridxi xpidoꞌluꞌ, zandaca laabe guiabe laanu ne cadi gatinu.

7 Ne cani runi dxiiñaꞌ lu nisa que guniꞌ lisaaca:

―Lataꞌ guiduꞌyanu tu runi casacalúnu guendanagana diꞌ.

Ne bireeni luguiá Jonás. 8 Oraqué gunabadiidxacabe laabe:

―Gudxi laadu xiñee cazacalúnu guendanaganadiꞌ. ¿tu lii? ¿xi dxiiñaꞌ ruꞌnuꞌ? ¿padé lii? ¿xi guidxi zeeduꞌ?

9 Ne gudxibe laacaꞌ:

―Nacaꞌ Hebreu ne ridxibeꞌ Tata Diuxi; xpixuaanaꞌ guibaꞌ, ni bizaꞌ nisadoꞌ ne guidxilayú.

10 Ne nabé bidxibi ca binnique, ti gudxibe laaca canaguxhooñeꞌlube de Tata Diuxi; ne gunabadiidxacabe laabe: ―¿Xiñee biꞌniꞌluꞌ ni yaꞌ?.

11 Nabé naxoo cayaca lu nisaque; ngue runi gunabadiidxacabe laabe: ―¿Xi zanda guninedu lii, ti máꞌ ganda cuezadxi nisadoꞌdiꞌ?.

12 Ne bicabibe laaca: ―la guicaa naa, ne la gulaa naa ndaaniꞌ nisadoꞌ ca, ti ma gatadxini; ti nanna runi naa casacalútu guendanagana diꞌ.

13 Ca binni runi dxiiñaꞌ lu nisaque gucalaꞌdxicabe, nudxiguetacabe barcu que ra nabidxi, huaxa qué ñandadiꞌ ti nabé naxoo cayaca lu nisaque 14 Ngue runi bicaacabe ridxi Tata Diuxi, ne guniꞌcabe: ―Rinabadu lii Tata Diuxi, cadi gatididu guni donda xti badunguiiu diꞌ, ne cadi gudxiibaluꞌ donda luguiadu guni guendaguti xtibe; ti biꞌniꞌluꞌ ni racalaꞌdxiꞌluꞌ.

15 Ne gucuaacabe Jonás, ne bilaacabe laa ndaaniꞌ nisadoꞌ; ne oraqueca biuudxi guendanaxoo lu nisadoꞌque. 16 Ne nabé bidxibi ca binni que Tata Diuxi ne bisigaꞌdecabe laabe xiixa, ne laca bidii xtiidxaꞌcabe laabe.

17 Xisi Diuxi biseendabe ti bendaroꞌ gabi Jonás, ne guyuu Jonás ndaaniꞌ bendaroꞌque chonna dxí ne chonna gueelaꞌ.