Jonás 2

Ra bicaaridxi Jonás Diuxi

Ne ra nuu Jonás ndaaniꞌ bendaroꞌ que; guniꞌnébe Tata Diuxi, Diuxi xtibe. 2 Ne guniꞌbe sicaríꞌ:

“lú guendanagana xtinneꞌ bicaa ridxeꞌ Tata Diuxi,

ne laabe bicabibe naa;

ndaaniꞌ lidxi guendaguti nuaꞌ guniéꞌniá laabe,

ne biuudiagabe ca diidxaꞌ xtinneꞌ.

3 Bisaꞌbiꞌluꞌ naa ra má ziáꞌ,

ndaaniꞌ ladxidoꞌ nisadoꞌ,

ca nisa cuxhooñeꞌque guluu leꞌ ca naa,

ne ca xpiequenisa^a xtiluꞌ gudiꞌdiꞌ ca lugiaꞌyaꞌ.

4 Ne rabe naa: máꞌ guirutiꞌ nacaꞌ nezalúluꞌ;

neca zacá, zuyadxiéꞌ yuꞌduꞌ ndxoꞌ xtiluꞌ.

5 Guluu leꞌ ca nisa que naa dede ma yaca gatexhieꞌ,

ne ra má gueteꞌ guluu leꞌ cani naa;

birenda ca banduiꞌ^b que iqueꞌ.

6 Bieteꞌ dede xcu ca dani ca;

bitaguyoo guidxilayú riꞌ naa dede ra qué ziuudxi guiréꞌ;

lii Tata Diuxi, Diuxi xtinneꞌ,

bilá lu naa luꞌ náꞌ guendaguti.

7 Ra má ziguunduꞌ xquendanabaneꞌ,

bietenaladxeꞌ lii Tata Diuxi,

ne ca xtiidxaꞌ yendá ra nuuluꞌ ndaaniꞌ yuꞌduꞌ ndxoꞌ xtiluꞌ.

8 Ca binni ni rizananda bidoꞌ,

rusiaandaꞌcaꞌ guendaranaxhii xtiluꞌ.

9 Naa la?, zusigaꞌdeꞌ lii

guendariuunda xtinneꞌ,

zuneꞌ ni ma bidiee xtiidxaꞌ lii.

Xtiꞌ Tata Diuxi nga guendarulá.”

10 Ne biseendaꞌ Tata Diuxi bendaroꞌque, ne bidxiꞌbaꞌme Jonás ruaa nisadoꞌ.