Ra bicháꞌ xpiaꞌ ca binni Nínive
3
Beeda xtiidxaꞌ Tata Diuxi ra nuu Jonás, ra guiropa bieque, ne gudxibe laa sicaríꞌ: 2 “Biasa ne guyé guidxiroꞌ Nínive, bicheꞌche diidxaꞌ ni chitidxeꞌ lii”.
3 Ne biasa Jonás ne guyebe Nínive, casi gudxi Tata Diuxi laabe. Nínive nacani ti guidxi nabé naroꞌbaꞌ, biaꞌ chonna gubidxa zazacabe guidubi naca ndaaniꞌni. 4 Bizulú Jonás biuu ndaani guidxique, ne guzábe guidubi ti dxí, zitidxibe laaca: rariꞌ lu chupa late gande gubidxa zanitilú Nínive. 5 Ne ca binni guidxi Nínive bini crecabe Diuxi, ne guníꞌcabe qué zócabe, ne gucucabe lari babaꞌ casi cani huaniisi zaqueca cani nahuiiniꞌ, ti guihuiinni ma bichaacabe xpiaꞌcabe.
6 Yendá ca diidxaꞌ diꞌ ra nuu xaique xti Nínive, ne biasabe ra zubabe, ne guleebe xhababe, ne gucube lari babaꞌ, ne guribe lú dé. 7 Ne biseendaꞌ tidxibe ca binni guidxi Nínive: “Biree ti diidxaꞌ xtiꞌ xaique guidxi, ne xti ca binni runinébe dxiiñaꞌ, ná sicariꞌ: binni ne maniꞌ, yuze ne dendxuꞌ cadi gó caꞌ gaxtiꞌ ne cadi gué ca nisa. 8 Ni guni ca lá? binni ne maniꞌ, gacucaꞌ lari babaꞌ, ne la gucaa ridxi Diuxi de guidubi ladxidoꞌtu, la gucháꞌ xpiaꞌtu, ma cadi gunitu ni nadxabaꞌ, ne ma cadi cuanatu. 9 Tu laa nanna pa zuchaa Diuxi xtiidxaꞌ, ne ma cadi guidxiichiné laanu, ne cadi gunitilu laanu?”
10 Ra biiyaꞌ Diuxi ni biꞌniꞌ cabe que, ra ma bichaacabe xpiaꞌcabe; ma qué niná nunitilú laacabe, ne ma que ñuni ni gudixhe guni laacabe.