Ra bidxiichi Jonás
―Tata Diuxi, cadi gudxeꞌcaꞌ ni lii laga nuaa ruaꞌ xquidxeꞌ la? Nga runi bixhoñeluaꞌ ne guniꞌ iqueꞌ cháꞌ Tarsis; ti nanna caꞌ, lii nga ti Diuxi ni nachaꞌhuiꞌ ne ni racané, cadi naguenda ridxiichiluꞌ, ne nabé rialaꞌdxiluꞌ binni, ne qué runitilúluꞌ binni ora gucháꞌ xpiaꞌ. 3 Tata Diuxi rinaba lii gaxhuꞌ naa xquendanabaneꞌ yanna ¡Ti má ñacaladxeꞌ ñateꞌ que nibaneꞌ!
4 Ne bicabi Tata Diuxi laabe:
―Ñee naluꞌ neza nga cadxiichi xianaluꞌ la?
5 Ngue gucaꞌ biree Jonás de ndaaniꞌ guidxi que, ne guyébe yetibe neza rindani gubidxa xtiꞌ guidxi que; raque biꞌniꞌbe ti bandá, ne guribe xaꞌnaꞌ ni, ne gulezasibe ñuuyabe xi guizaaca guidxi que. 6 Biꞌniꞌ Tata Diuxi guindani ti lubaꞌ, ne biroobaꞌni ti cuꞌni bacaꞌndaꞌ ra nuu Jonás, ne ti ganda guietebe xiana que. Ne nabé biecheꞌ Jonás runi lubaꞌ que. 7 Huaxa laca Diuxi biseendaꞌ ti bicutiꞌ, ra maꞌ zeeda guirá gueela xti dxi que, gudó bicutiꞌ que xcu lubaꞌ que ne bibidxini. 8 Ra biasa gubidxa, biseendaꞌ Diuxi ti bi ndaꞌ, ne bizaꞌquiꞌ gubidxa que ique Jonás, dede cudii guelacahui laabe, ne gunababe gatibe, ne guniꞌbe: ―guibaneꞌ sicarí la? ngueca la gateꞌ yaꞌ.
9 Ne oraqué bicabi Diuxi Jonás:
―Ñee tisi bibidxi lubaꞌ ca nga cadxiichi xiana luꞌ la?
Ne bicabibe: ―Nabé cadxiicheꞌ, pa ñandasi ñateꞌ caꞌ.
10 Oraqué bicabi Tata Diuxi laabe: ―cayá luꞌ ti lubaꞌ huiini ni que nudxiibaꞌ luꞌ ne que nusiroobaluꞌ; ti dxí biroobaꞌ ne xti dxí bibidxi.
11 Yanna naa yaꞌ que siaꞌyaꞌ Ninive la? xha guidxiroꞌ ra nuu má de 120,000 binni ni qué runibiaꞌ xinga xneza, sin guzeeteꞌnu pabiaꞌ mani huiini napa.