Ra uyé ca xpinni Juan Bautista ra nuu Jesús
11
Ne biluxe gudxi si Jesús ca discípulu que xi naquiiñe guni ca la?
biree de raqué zeꞌ,
ziusiidi ne zigüí stiidxa Dios ndaani xquidxi irá cabe.
2 De ra yeguyoo Juan Bautista gunna de irá ni cayuni Cristu,
para biseenda chupa discípulu sti ra nuu be.
3 Ne ora yendá ca ra nuu be,
na ca rabi ca laabe:
―Na Juan pa lii nga ni nexhe gueeda o pa zabeza du stobi.
4 Para rabi be laacaꞌ:
―Lachitidxi Juan irá ni cayuuya tu ne ni cayuna diaga tu.
5 Lagüíꞌ né laabe ma riná cani nacheepa lú,
ma rizá cani nachiita ñee,
ma bianda cani gupa lepra,
ma runa diaga ca diaga cuaataꞌ,
ne ma bibani cani ma guti,
ne ma cayuna diaga ca pobre stiidxa Dios.
6 Dichoso cani guni cre Dios biseenda naa.
7 Biree si cani biseenda Juan que,
bizulú Jesús bizeete laabe lú ca binni que,
ne na rabi laacabe:
―Tuu nga yeguuya tu ndaani guiꞌxhi chiqué.
Ñee yeguuya tu tobi ni ruluíꞌ ti gueere lase ni runiibi bi laa ladu na la?
8 Pa cadi nga la?
tuu nga yeguuya tu.
Ñee yeguuya tu ti hombre zuchaahui la?
Coꞌ njaꞌ,
purti ni zuchaahui zadxela tu laa ndaani lidxi rey.
9 Tu pe nga yeguuya tu yaꞌ.
Ti profeta la?
Nga nga laani,
ne jma que ti profeta.
10 De laabe nga ruzeete Xquiꞌchi Dios ra na:
Zuseenda ti xpinne sa niru lú luꞌ para guni chaahui neza tidi luꞌ.
11 De lade irá binni,
qué huaree tobi jma nandxóꞌ que Juan Bautista,
peru nuu tu jma nandxóꞌ que laabe ne nga nga tutiica guiuu lade ca xpinni Dios,
neca huaxiéꞌ laa.
12 Dede dxi beeda Juan ma cadale xpinni Dios ndaani guidxilayú,
ne cayuuya ca stale enda nandxóꞌ stibe,
peru laca stale tu racalaꞌdxi gaca xpinni be peru modo na,
cadi modo na be.
13 Ma xadxí uníꞌ ca profeta ne laca cá ni lu ley sti Moisés zadxiña dxi guꞌya binni gaca irá ni cayaca yanna riꞌ.
14 Ne pa na tu guiene tu ca diidxa ri la?
ziene tu Juan nga Elías ni uníꞌ ca profeta que gueeda.
15 Tu racalaꞌdxi guiene la?
gucaa diaga.
16 Tu zanda gusaca ca binni nuu yanna riꞌ.
Rusaca laacabe casi xcuidi ni ribí luguiaa ne rucaa ridxi xcompañeru:
17 “Bixhidxi du saa peru qué niná tu nuyaa tu,
ne bixhidxi du son gueꞌtu ne laca qué niná tu ñuuna tu.”
18 Zacá ca runi ca binni riꞌ,
purti beeda Juan,
ne biiya cabe qué ño ne qué ñeꞌ,
para na cabe nuu né be binidxabaꞌ.
19 Yanna ma benda lade cabe.
Naa nga Hombre Biseenda Dios,
ne ruuya cabe rahua ne reeꞌ,
ne ma na cabe nalaya ne binigüéꞌ naa,
ne ridxaaga ca malu ni ruquixe impuestu ne cani qué rulabi ley.
Peru casi na dichu que:
“Pur ni runi binni rihuinni tu laa.”
Ca guidxi chi guiaba náꞌ
20 Oraque bizulú Jesús gudinde né ca binni de ca guidxi ra jma uzá,
purti qué niná ca ninaba ca perdón Dios neca biiya ca irá milagru ni biꞌni be.
21 Na be rabi be laacaꞌ:
―Laguuya gá laatu,
binni Corazín ne binni Betsaida,
purti nabé huahuinni enda nandxóꞌ sti Dios lade tu,
peru naguidxi ru ladxidóꞌ to.
Pa ñaca nizaya ñune milagru ndaani guidxi Tiro ne ndaani guidxi Sidón biaꞌ ma bine ndaani xquidxi tu ca la?
biaa padxí ma ninaba ca perdón ne ñuu ca triste pur irá ni huachee caꞌ.
22 Gabe caꞌ laatu,
dxi cuidxi Dios cuenta binni guidxilayú la?
jma zusaba ná laatu que ca binni de Tiro ne de Sidón.
23 Ne laatu,
binni Capernaum caꞌ,
laatu cabeza tu usisaca Dios laatu,
peru jma pe nagueenda guseenda be laatu ra nuu binidxabaꞌ.
Purti pa ñaca ñuuya binni Sodoma ca milagru ni ma biiya tu ca la?
ma nusaana ca de nuchee caꞌ ne ma qué nunitilú Dios laacaꞌ.
24 Peru gabe caꞌ laatu,
dxi cuidxi Dios cuenta binni guidxilayú la?
jma zusaba ná laatu que ca binni de Sodoma.
Latáꞌ irá ni ma bidxaga
25 Oraque uníꞌ né Jesús Dios,
na:
―Bixhozeꞌ,
lii nga runi mandar lu ibáꞌ ne guidxilayú.
Rudiee diuxquixe lii purti cucaachi lu ni cayuni lu riꞌ para cadi guiene cani nuu xpiaani ne cani na riene,
peru culuíꞌ lu ni cani zeda gaca casi baꞌduꞌ.
26 Ne zacá cayuni lu ni purti zacá guyuulaꞌdxi lu gaca ni.
27 Oraque rabi be ca binni que:
―Ma gudixhe Bixhoze irá xixé cosa ladxi nayaꞌ.
Naa nga Xiiñi be ne iruti runibiáꞌ naa jma que laabe,
ne zaqueca iruti runibiáꞌ laabe jma que naa ne cani racaladxe gunibiáꞌ laabe.
28 Latáꞌ ra nuaa irá ni ma bidxaga de cuyubi modo guia ladxidóꞌ,
cani ma qué ganda guni irá ni rucaa cabe laa guni,
purti para laa ruluíꞌ naguixhe cabe ti ayubu xa yanni.
Latáꞌ ra nuaaꞌ,
zaziilaꞌdxi ladxidóꞌ to.
29-30 Laudxiiba ayubu stinne xa yanni tu purti nasisi ni,
cadi nanaa ni casi ni nua tu ca.
Laudii lugar usiide laatu purti qué zaca nia laatu naduxhuꞌ ne qué zadinde nia laatu.