Ucalaꞌdxi binidxaba nusaba Jesús
4
Ne óraque yené Espíritu Santu laabe ndaani guiꞌxhi ti guꞌya binidxaba pa zuni be ni na.
2 Ne biaana be raqué cuarenta dia sin ño be ne ma candaana dxita be.
3 Oraque beeda binidxaba ra nuu be,
na rabi laabe:
―Pa dxandí Xiiñi Dios lii la?
gudxi ca guie ca gaca ca pan.
4 Para na be rabi be laa:
―Maca cá lu Xquiꞌchi Dios,
cadi pan si nga ibani né binni sínuque irá ca diidxa ni iree de ruaa Dios.
5 Oraque yené binidxaba que laabe ndaani guidxi Jerusalén ni rabi cabe Guidxi sti Dios,
ne bidxiiba laabe ique yuꞌdu roꞌ ra jma nasoo
6 ne na rabi laabe:
―Yanna,
pa dxandí Xiiñi Dios lii la?
uyuu bi de racá,
purti cá lu Xquiꞌchi Dios zuseenda ca ángel sti para cuꞌ ná xiꞌque lu ti cadi gacaná lu lu guie.
7 Para rabi be laa:
―Peru laca cá lu Xquiꞌchi Dios,
cadi inaba cabe xiixa Dios para quite si cabe laa.
8 Peru ucuaa ru binidxaba que laabe,
yené laabe lu ti dani ni jma nasoo,
ne biluíꞌ laabe irá xixé guidxi de idubi naca guidxilayú para guꞌya be pabiáꞌ sicarú cani.
9 Ne na rabi laabe:
―Zudiee lii irá ni pa guzuxibi lu xañeeꞌ usisaca lu naa.
10 Oraque na be rabi be laa:
―Biree de ra nuaa binidxabaꞌ,
purti cá lu Xquiꞌchi Dios,
Dios si nga naquiiñe usisaca cabe ne guni cabe ni na.
11 Oraque ru bixale binidxaba que de laabe,
para beeda caadxi ángel bidii ni gudó be.
Ra bizulú xhiiña Jesús
12 Dxi gunna be ma yeguyoo Juan Bautista la?
bigueta be neza Galilea,
13 peru qué ñaana be Nazaret xquidxi be sínuque yendeza be sti guidxi lá Capernaum ni nuu uriá ti nisa roꞌ lá Galilea lade ca layú sti Zabulón ne Neftalí.
14 Ne ra yendeza be ti guidxi de Galilea,
guca ni casi uníꞌ Dios de ruaa profeta Isaías chiqué,
ra na:
15 Galilea nga xquidxi Zabulón ne Neftalí
ni nuu neza ze cabe nisadóꞌ,
cherica guiigu Jordán,
xquidxi cani qué ñunibiáꞌ gá Dios.
16 Bibani ca binni que ndaani guelacahui,
peru yanna ma biiya ca ti biaani roꞌ.
Chiqué uyuu ca lu ná enda guti,
peru yanna ma biiya ca
ximodo zanda iree ca de laani,
casi ñaca para laaca ma birá gueela
ne ma nuu biaani guidxilayú.
17 Yendá si be guidxi que la?
bizulú byuíꞌ né be binni stiidxa Dios,
rabi be laacaꞌ:
―Lainaba perdón Dios purti ma zeda dxiña dxi guni mandar.
Ra guridxi Jesús tapa hombre rie guuzeꞌ
18 Ti dxi canazá be uriá nisa roꞌ que,
biiya be chupa hombre iropa biꞌchi caꞌ,
cusaba ca ti tarraya roꞌ ndaani nisa,
canaaze ca benda purti nga xhiiña caꞌ.
Tobi que la?
lá Andrés,
ne stobi que la?
Simón ni rabi cabe Pedru.
19 Para rabi be laacaꞌ:
―Lata nanda naa ne laca zune laatu guuze peru para chi yubi tu binni guedané tu ra nuaaꞌ.
20 Ne oraqueca bisaana ca tarraya stica zinanda ca laabe.
21 Ra ze be que biiya be xhupa hombre,
ne laca iropa biꞌchi caꞌ,
Jacobo xiiñi Zebedeu,
ne Juan biꞌchiꞌ.
Nuu né ca bixhoze ca ndaani ti canuá,
cayuni chaahui ca ca tarraya sticaꞌ.
Para na Jesús rabi laacabe:
―Lata nanda naa.
22 Ne oraqueca bisaana cabe bixhoze cabe ne bisaana cabe canuá que,
zinanda cabe Jesús.
Ra bisiidi Jesús stale binni
23 Uzá Jesús irá guidxi sti Galilea,
bisiidi ndaani ca yuꞌdu sti ca judíu,
ne byuiꞌ né laacabe ximodo runi mandar Dios ca xpinni.
Ne irá ra uyé be bisianda be irá enda huará ne irá yuuba sti ca binni que.
24 Ne zaqué bireeche stiidxa be de yendá ni irá guidxi sti Siria,
ne bedané ca binni que irá binni lidxi ca ni huará,
cani napa yuubaꞌ,
ne cani caguite binidxaba ique,
ne cani rudii ataque laa,
ne cani ma guti galaa.
Bisianda be de irá caꞌ.
25 Stale binni uzá nanda laabe,
cásica binni Galilea,
zaqueca binni de Decápolis,
ne de Jerusalén,
ne de Judea,
ne de cherica guiigu Jordán.