Ra canayuíꞌ Juan Bautista stiidxa Dios
3
Ca dxi que beeda Juan Bautista,
canayuíꞌ stiidxa Dios ndaani guiꞌxhi Judea.
2 Ne na rabi ca binni que:
―Lainaba perdón Dios,
purti ma zeda dxiña dxi guni mandar.
3 Sicarí nga uníꞌ Dios de ruaa profeta Isaías chiqué,
na:
Zuna diaga cabe cucaa tuuxa ridxi ndaani guiꞌxhi cayabi binni:
“Lausiá neza tidi Señor;
lauxhele ladxidóꞌ to casi ñaca cuxhele tu ti neza para laabe.”
4 Ne irá ni uníꞌ profeta que la?
guca ni dxi beeda Juan Bautista.
Riaana be ndaani guiꞌxhiꞌ,
ne de guicha ladi camellu xhaba be,
ne xiꞌ ti cinturón de guidi ndaani be,
ne endaró stibe nga usú ne dxiña yaga.
5 Ne idubi naca guidxi Jerusalén uyé ra nuu be,
ne irá xixé binni de Judea ne de irá ca guidxi ni dxaaga guiigu Jordán.
6 Ne ulee ruaa ca diidxa de irá ni huachee caꞌ,
ne guluu nisa be laaca ndaani guiigu Jordán que.
7 Peru ora biꞌya be cayeeda stale fariseu ne saduceu ra nuu be para chuꞌ nisa ca la?
na be rabi be laacaꞌ:
―Binni nexhená caꞌ,
ma runebiaꞌya laatu,
zeeda tu ra nuaa purti zácaxa tu tisi chuꞌ nisa tu,
ma qué zusaba ná Dios laatu.
8 Yanna lasá jneza ti ihuinni ma unaba tu perdón Dios de idubi ladxidóꞌ to.
9 Ne cadi ma iree né tu na tu:
“Xiiñi Abraham laadu.”
Gabe caꞌ laatu,
pa qué guni tu jneza casi biꞌni be la?
dede lade guie ri zanda indisa Dios xiiñi be.
10 Ti yaga ni qué ricá cuananaxhi lú,
rugá cabe laa ne ruzaaqui cabe laa.
Zacaca nga ma zeda dxiña dxi sti irá cani qué runi jneza,
laca maca zilá ca lu bele.
11 Naa caguaa niꞌsa laatu casi ti seña ma unaba tu perdón Dios,
peru nuu stobi ni gueeda ruꞌ,
ne ngue jma risaca que naa.
Naa qué risaca diaꞌ nin para indade xquela guidi be ñee be.
Laabe zudii be Espíritu Santu cani guni cre,
ne zulaa be cani qué runi cre lu bele.
12 Zeda guni be casi runi tobi ni riguibi semiá,
zutopa be ca semiá para uchá be ndaani sacu ne zundaa be ca guixi que lu ti gui ni qué ziuu dxi gyuiꞌ.
Ra uyuu nisa Jesús
13 Ca dxi que biree Jesús de Galilea,
beeda ra nuu Juan ra guiigu Jordán para cuꞌ nisa Juan laa.
14 Peru qué na gá Juan cuꞌ nisa laabe,
sínuque na rabi laabe:
―Jma naquiiñe cuꞌ nisa lu naa,
yanna nouꞌ cuaa niꞌsa lii la?
15 Para rabi be laa:
―Zaa,
peru biꞌni ni yanna,
purti jma naquiiñe guni nu irá ni gudixhe Dios gacaꞌ.
Oraque ru guná Juan guluu nisa laabe.
16 Ne casi biluxe uyuu nisa be,
biree be de ndaani nisa que,
ne mala bixale ibáꞌ ne biiya be zeeda yete Espíritu Santu de ibáꞌ,
casi ti paloma,
biaana dxí luguiá be.
17 Oraque ucuá ti ridxi de ibáꞌ:
―Ndi nga Xiiñe ni nadxiee ne ni rusieche naa.