Enda rudxiiba donda ique stobi
(Lc. 6.37-38, 41-42)
7
Cadi gudxiiba lu donda ique stobi,
ti qué quiba donda ique luꞌ.
2 Purti donda ca gudxiiba lu ique stobi que,
ngue ca guiaana luguiá luꞌ.
Purti cásica guꞌnu stobi la?
zaqueca gaca luꞌ.
3 Pa nuu tindaa bandadi ndaani lú lu la?
ximodo zanda guꞌya lu tindaa guixi nuu lú stobi yaꞌ.
4 Ñee zaꞌbu stobi que:
“Dané cuee guixi nuu lú lu ca”,
ne lii zaa nuu bandadi que lú lu la?
5 Cadi quite lu binni,
gulee ca bandadi nuu lú lu ca,
ti ganda guꞌya chaahui lu para cueeu guixi ni nuu lú stobi.
6 Cadi gudii tu xiixa ni zeeda de Dios cani qué iquiiñe para laani,
casi ñaca nudii tu ni biꞌcuꞌ.
Zanda ca guni cabe casi runi biꞌcuꞌ,
ucaa lú cabe laatu ne guxuuxe cabe laatu.
Risaca stiidxa Dios casi ti perla,
ne qué ñuu dxi nundoou perla lu bihui para guxhaata ñee si ni.
Lainaba, lauyubi ne lauxhidxi náꞌ
(Lc. 11.9-13; 6.31)
7 Lainaba lu Dios,
zudii laatu.
Lauyubi,
zadxela tu.
Lauxhidxi náꞌ,
zaxele chuꞌ tu.
8 Purti tutiica inaba zacaa,
ne ni uyubi zadxela,
ne ni uxhidxi ná zaxele chuꞌ.
9 Lácaxa nuu tuuxa lade tu,
pa ninaba xiiñi laa ti gueta,
nudii ti guie.
10 O pa ninaba be laa ti benda,
ñee nudii laabe ti beenda la?
11 Pa laatu cadi nachaꞌhui tu casi Dios ne nanna tu gudii tu ni galán xiiñi tu la?
lágaxa Bixhoze tu ni nuu ibáꞌ qué gudii ni galán cani inaba laa.
12 Nga runi,
irá ni racalaꞌdxi tu guni binni laatu la?
ngue ca laguni laacaꞌ,
purti zacá nga na ley ne nga ca bicaa ca profeta.
Chupa neza nuu
13 Laguiuu neza ni napa puerta nabéꞌ,
purti neza ni xilaga puerta sti la?
nga neza ladu rinitilú binni,
purti ruluíꞌ jma galán neza que,
ne stale tu riuu ladu que.
14 Peru neza enda nabani la?
jma nabé puerta ne nagana neza stiꞌ,
ne huaxiéꞌ tu ridxela ni.
Pur ni guni binni zahuinni tu laa
15 Laguuya gá laatu ne ca profeta ni na zeeda de Dios peru cadi dxandí ni,
purti casi guiuu cabe laatu ruluíꞌ nadóꞌ cabe casi dendxuꞌ,
peru ndaani ladxidóꞌ cabe naduxhu cabe casi gueuꞌ.
16 Peru zahuinni lu xhiiña cabe tu laacabe ne pa dxandí zeeda cabe de Dios.
Ñee na tu zanda icá uva lu yaga guichi birubaꞌ,
o icá duꞌga lu yaga bii la?
17 Ndi nga laani:
ti yaga ni nazaaca,
zudii cuananaxhi galán,
peru ti yaga yuudxu la?
zudii cuananaxhi ni qué zaquiiñeꞌ.
18 Ti yaga ni nazaaca la?
qué zacá biꞌxhu cuananaxhi stiꞌ,
ne zaqueca ti yaga qué iquiiñe la?
puru biꞌxhu ricá lú.
19 Irá yaga ni qué rudii cuananaxhi chaꞌhui la?
rugá cabe laa para icá gui.
20 Nga runi rabe laatu,
pur ni guni cabe zacabiáꞌ tu tu laacabe.
Cadi irá ziuu ra runi mandar Dios
21 Cadi irá ni gabi naa,
Señor,
Señor,
ziuu ra runi mandar Dios,
sínuque cani guni si ni na be.
22 Stale tu zabi naa dxi que:
“Señor,
ñee cadi byuí du stiidxa lu la?
ne cadi pur lá lu gulee du binidxaba de binni la?
ne cadi laca pur lá lu bini du stale milagru la?”
23 Oraque zabe laacaꞌ:
“Qué runebiaꞌya laatu.
Laguiree de ra nuaaꞌ,
purti qué ñuu dxi ñuni tu jneza.”
Ti hombre nuu xpiaani ne tobi nahuati
24 Nga runi tutiica gucaa diaga ca diidxa riꞌ ne guni ni na cani la?
zeda gune laa casi ti hombre ni nuu xpiaaniꞌ,
bicuí lidxi lu guie.
25 Biaba nisa guie bidxá guiiguꞌ,
biete bi yooxhoꞌ,
ne irá nga bidxela saa yoo que,
peru qué ñaba ni purti zuba ni lu guie.
26 Peru tutiica gucaa diaga ca diidxa riꞌ ne qué guni ni na cani la?
zeda gune laa casi ti hombre huati ni bicuí lidxi lu yuxi.
27 Biaba nisa guie,
bidxá guiiguꞌ,
biete bi yooxhoꞌ bidxela saa yoo que,
ne dede uxidxi ra bixá ni.