Enda nachaꞌhui ni risaca
6
Laguuya gá qué chi guni tu ni nachaꞌhui nezalú si binni para si gudxiiba ca laatu.
Purti pa guni tu ni para si guꞌya binni la?
qué zacaa tu gasti de Bixhoze tu ni nuu ibáꞌ.
2 Nga runi cadi guni tu casi runi cani na nachaꞌhui peru cadi dxandí ni laa,
purti ora chi gudii ca guna ndaani yuꞌdu o lu calle,
rucaa ca ridxi para ganna binni xi bidii caꞌ,
peru ngue si nga laani.
3 Peru laatu ora gudii tu guna la?
laguni ni pa ganda nin cadi ganna ti chu ná tu xi cayuni sti chu,
4 ne zacá qué zanna iruti pa cudii tu guna sínuque Bixhoze si tu ni ruuya ni runi binni ra nagaꞌchiꞌ,
ne laa nga quixe ni biꞌni tu que.
Ximodo iníꞌ né binni Dios
5 Ne ora iníꞌ né tu Dios la?
cadi guni tu casi ca binni ni na nachaꞌhui peru cadi dxandí ni laa.
Riulaꞌdxi ca uzuhuaa ca ndaani yuꞌdu para iniꞌ né ca Dios.
O pacaa la?
runi ca ni lu calle para guꞌya binni.
Gabe caꞌ laatu,
zaa usisaca binni laacabe peru ngue si nga laani.
6 Peru laatu,
ora chi iníꞌ né tu Dios la?
lachuu ndaani lidxi tu,
lauseegu ra puerta ne lainíꞌ né Bixhoze tu ni qué rihuinni,
ti laa ruuya ni runi binni ra nagaꞌchiꞌ,
ne zaguixe laatu.
7 Ne ora ma caníꞌ né tu laabe la?
cadi utale tu diidxa casi runi ca binni ni qué runibiáꞌ Dios,
purti zácaxa ca tisi iníꞌ ca stale diidxa zucaa diaga be laacaꞌ.
8 Nga runi cayabe laatu,
cadi gaca tu casi laacabe,
purti maca nanna Bixhoze tu xii nga caquiiñe tu ante inaba tu ni laa.
9 Peru laatu la?
sicarí nga lainíꞌ né Dios:
Bixhoze du ni nuu ibáꞌ,
rinaba du gusisaca irá binni lii.
Ne idxiña dxi guni mandar luꞌ
10 ne gaca ni na luꞌ.
Cásica raca ni ibáꞌ,
zaqueca gaca ni ndaani guidxilayú.
11 Dané laadu endaró tidi né du dxi.
12 Bisiaanda ni ruchéꞌ né du lii,
casi rusiaꞌnda du ni ruchee né cabe laadu.
13 Ne cadi udiiu lugar cuba yu binidxaba laadu,
sínuque bilá laadu de lu ná be.
Purti lii nga jma nandxóꞌ loꞌ
ne jma risaca lu que irá xixé,
ne qué ziuu dxi guiaana dxí lu de guni mandar luꞌ.
Amén.
14 Pa guni perdonar tu ni guni binni laatu la?
laca zuni perdonar Bixhoze tu ni nuu ibáꞌ laatu.
15 Peru pa qué guni perdonar tu ni guni binni laatu la?
laca qué zuni perdonar Bixhoze tu ni nuu ibáꞌ laatu.
Xi na Jesús de enda riaana sin go
16 Ne ora gusaana tu de go to para iníꞌ né tu Dios la?
cadi guni tu lú tu nayati casi runi cani riulaꞌdxi udxiiba binni laa,
purti runi ca lú ca nayati para si guꞌya binni biaana ca sin ño caꞌ.
Gabe caꞌ laatu zaa usisaca binni laacabe peru ngue si nga laani.
17 Peru pa guiaana tu sin go to la?
lauzaa begu ique tu,
ne laquiibi lú tu,
18 ti qué ganna iruti pa biaana tu sin ño to sínuque Bixhoze si tu ni qué rihuinni,
ti laa nga nanna ne ruuya ni runi binni ra nagaꞌchi ne laa nga quixe ni laatu nezalú binni.
Ni dxandí risaca
19 Cadi guyubi tu gapa tu stale ni risaca ndaani guidxilayú riꞌ,
purti zanda go bandaa ni ne icá tini ni ne chuꞌ gubaana cuana ni.
20 Sínuque laguyubi gapa tu ni risaca ibáꞌ purti ngue qué zo bandaa laa ne qué zacá tini ne qué ziuu gubaana cuana laa.
21 Purti ra nuu ni risaca para laatu la?
raqueca nuu ladxidóꞌ to.
Biaani sti cuerpu
22 Guielú tu nga zeda gaca casi biaani sti cuerpu stitu.
Nga runi pa ruyubi tu guꞌya tu ni jneza la?
ziaani xquenda biaani tu.
23 Peru pa ruyubi tu guꞌya tu ni cadi jneza la?
zacahui xquenda biaani tu.
Ne pa ñuiꞌ ni napa tu de biaani ca la?
pabiáꞌ nacahui ñaana tu.
Dios o bidxichi
24 Iruti zanda gapa chupa xpixuaana ne guni ni na iropa cabe tobi si tiru,
purti jma zanaxhii be tobi ne zaca nanalaꞌdxi be stobi,
o pacaa jma zacá nú be ngue ne qué zazaalaꞌdxi be stobi que.
Zaqueca qué zanda di ganaxhii tu Dios ne ganaxhii ca tu bidxichi.
Rapa Dios ca xiiñiꞌ
25 Nga runi cayabe laatu cadi cuꞌ xa ique tu ximodo ibani tu,
xi go to o xi gue tu,
nin cuꞌ xa ique tu xi cuaqui tu.
Purti cadi para go si tu napa tu enda nabani,
ne cadi para cuaqui si tu lari nuu tu.
26 Laguuya ca mani huiini ni ripapa.
Qué riguu ca biní ne qué ribee ca guela,
ne qué ruchá ca troja,
peru rudii Bixhoze tu ni nuu ibáꞌ ni go caꞌ.
Ñee cadi jma risaca tu que laacame la?
27 Neca ñuu tu xizaa ne nuyubi tu modo nibani tu xcaadxi,
ñee ñanda nibani tu jma que biaꞌ dxi nexhe ibani tu la?
28 Ne xiñee riuu tu xizaa pur ni gacu tu yaꞌ.
Laguuya modo rigaa ca liriu ni nuu ndaani guiꞌxhiꞌ,
neca qué runi ca dxiiña ne qué riguiba caꞌ,
29 peru nin rey Salomón qué ñanda nuzuchaahui casi laacani neca nabé bisaca.
30 Ne pa ruzuchaahui Dios ca guieꞌ guiꞌxhi neca yanadxí si nagáꞌ caꞌ ne ixí ma bibidxi ca para icá gui ca la?
ñee qué runi cre tu pa zudii be ni cuaqui tu la?
31 Nga runi cadi chuꞌ tu xizaa ne cadi na tu:
“Xi idóꞌ no,
o xi idéꞌ nu,
o xi gacu nu yaꞌ.”
32 Purti nga nga ni ruyubi ca binni ni qué runibiáꞌ Dios,
peru ma nanna Bixhoze tu ni nuu ibáꞌ xi irá cayaadxa laatu.
33 Peru nirudóꞌ laguyubi guni mandar Dios ndaani ladxidóꞌ to ne sa tu modo na,
ne óraque zudii laatu cani riuu tu xizaa pur laa.
34 Nga runi cadi chuꞌ tu xizaa de ni chi gaca ixíꞌ,
purti ixí ru nga guꞌya tu xi gacaꞌ.
Lagucaa ique si de ni naquiiñe tu yanadxí.