Xi modo iníꞌ né binni Dios
(Mt. 6.9-15; 7.7-11)
11
Ti dxi nuu Jesús ti lugar,
caníꞌ né Dios.
Biluxe si be,
na tobi de ca discípulu stibe rabi laabe:
―Señor,
bisiidi laadu iní né du Dios,
casi bisiidi Juan ca discípulu stiꞌ.
2 Para rabi be laacaꞌ:
―Ora iníꞌ né tu Dios la?
sicarí nga iníꞌ tu:
Bixhoze du ni nuu ibáꞌ,
rinaba du gusisaca irá binni lii.
Ne idxiña dxi guni mandar luꞌ
ne gaca ni na luꞌ.
Cásica raca ni ibáꞌ,
zaqueca gaca ni ndaani guidxilayú.
3 Dané laadu endaró tidi né du dxi.
4 Bisiaanda ni ruchéꞌ né du lii,
casi rusiaꞌnda du ni ruchee né cabe laadu.
Ne cadi udiiu lugar cuba yú binidxaba laadu,
sínuque bilá laadu de lu ná be.
El Padre Nuestro
5 Ne laca rabi be laacaꞌ:
―Pa ñapa tobi de laatu ti xhamigu,
ne ñe ralidxi xhamigu que biaꞌ galaa gueela ne ñabi laabe:
“Xhamiguaꞌ,
bitiiñe laꞌ naa chonna xqueta luꞌ,
6 purti beeda biuuza ralidxeꞌ,
peru qué gapa ni quixhe lú.”
7 Ne nicabi ngue de ndaani yoo,
niná:
“Cadi uchiiña lu naa.
Ma biseegua ra puertaꞌ ne irá du ma nexhe du.
Qué zanda guiasa udiee ni lii.”
8 Zaa naca ñasa be nudii be ni lii pur xhamigu be lii,
peru rabe ñasa be nudii be lii irá ni caquiiñu para ma cadi niziñe rouꞌ laabe.
9 Nga runi cayabe laatu:
Lainaba lu Dios,
zudii laatu.
Lauyubi,
zadxela tu.
Lauxhidxi náꞌ,
zaxele chuꞌ tu.
10 Purti tutiica inaba zacaa,
ne ni uyubi zadxela,
ne ni uxhidxi náꞌ zaxele chuꞌ.
11 Tu tobi de laatu ninaba xiiñi laa ti gueta,
nudii ti guie,
o ninaba laa ti benda,
nudii ti beendaꞌ,
12 o ninaba laa ti dxita,
nudii ti meuxubi.
13 Pa laatu cadi nachaꞌhui tu ne nanna tu gudii tu ni galán xiiñi tu la?
lágaxa Bixhoze tu ni nuu ibáꞌ qué udii Espíritu Santu ni inaba laa.
Na cabe nuu né Jesús binidxabaꞌ
14 Ti dxi nuu tobi hombre ra nuu Jesús riguite binidxaba ique ne bisaana binidxaba que laa mudu.
Peru ulee si Jesús binidxaba que de laabe gunda uniꞌ be.
Nabé bidxagayaa ca binni que.
15 Peru caadxi de laaca na:
―Randa ribee be binidxaba purti nuu né be Beelzebú,
xaíque sti ca binidxabaꞌ.
16 Ne xcaadxi,
para inaaze si laabe,
na usuhuinni be ti seña xaibáꞌ para ganna ca pa dxandí nuu né Dios laabe.
17 Peru nanna be xi caníꞌ ique caꞌ,
para rabi be laacaꞌ:
―Pa ñasa caadxi binni de ti guidxi nucaa lú laca xquidxi la?
qué nindaa guidxi que.
Ne zaqueca pa nindaa saa ti familia nucaa lú saa ca la?
laca qué nindaa familia que.
18 Ne pa ma cucaa lú saa ca xpinni binidxabaꞌ qué zandaa initilú.
Cayabe nga laatu purti laatu na tu randa ribee binidxaba purti nua nia xaíque sticaꞌ.
19 Yanna pa naa randa ribee binidxaba purti nua nia Beelzebú la?
laga ca xiiñi tu yaꞌ.
Tu nuu né ca para ribee ca binidxabaꞌ.
Laca laaca rusihuinni ca cuchee tu.
20 Peru ribee binidxaba purti nuu né Dios naa,
ne laganna dxichi ma nuu ni biseenda Dios gueda tí de rey lade tu.
21 Ora tobi hombre napa stipa ne naaze ni ucaa lú né la?
iruti zaxha laa ni nuu ralidxi.
22 Peru ora gueeda stobi ni jma nadipa que laabe zaguixhe dxí laabe ne zaxha laabe xquiiba be ni cá lú be ulá laabe,
ne óraque ziaana ne irá stibe.
23 Cani cadi nuu né naa tobi si la?
ze luguiaꞌyaꞌ,
ne cani cadi cutopa né naa la?
cucheeche.
Ra bigueta né binidxaba xcadxe
24 Ora iree binidxaba ndaani ladxidóꞌ binni,
riree ma canazá ndaani guiꞌxhiꞌ,
canayubi ra iziilaꞌdxiꞌ.
Guꞌya si qué idxela,
óraque naꞌ:
“Zabigueta ralidxe ra bireeꞌ.”
25 Peru ora guedandá guꞌya ma nayá ladxidóꞌ ngue casi ñaca ti yoo ma biluubaꞌ,
ma zuchaahuiꞌ,
26 zabigueta chi caa xcadxe jma rusi nadxaba que laa.
Riuu ca ndaani ladxidóꞌ binni que ne riaana ca raqué.
Ne pa huaxiéꞌ malu binni que ora nuu stubi si ti binidxaba la?
jma rusi yanna.
Tuu nga jma dichoso
27 Caníꞌ ru Jesús nga bicaa ti gunaa ridxi:
―Dichosa de ni uxana lii ne bigadxi lii.
28 Peru rabi be laa:
―Jma dichoso cani ucaa diaga stiidxa Dios ne guni ni na ni.
Bendecidos Son Aquellos que Escuchan y Obedecen
Ra bichaaga Jesús laa ne Jonás
29 Cadi cayaana dxí binni de cabí zisi laabe ne bizulú be rabi be laacaꞌ:
―Aque malu laatu xa binni caꞌ.
Racalaꞌdxi tu guꞌya tu xiixa seña,
peru ti seña si zudiee laatu.
Zusietenalaꞌdxe laatu Jonás.
30 Purti casi uca Jonás seña para ca binni Nínive la?
zacaca zaca Hombre Biseenda Dios casi ti seña para laatu.
31 Ne dxi cuidxi Dios cuenta ca binni nuu yanna ri la?
zuzuhuaa dxa reina de guete que guseegu ruaa tu,
purti neca nabé zitu xquidxi Salomón para xquidxi be peru yeucaa diaga be laa purti nabé riene.
Peru laatu nuu tobi lade tu ni jma risaca que Salomón.
32 Ne laca zuzuhuaa ca binni Nínive guseegu ruaa tu,
purti laaca dxi yegüí né Jonás laaca stiidxa Dios,
unaba ca perdón ne bichaa xpiaꞌ caꞌ.
Ne laatu la?
ma nuu tobi lade tu jma risaca que Jonás.
Ejemplu sti linterna
33 Qué rucaa gui cabe linterna ne ucaachi cabe,
nin cuꞌ cabe xaꞌna ti cajón,
sínuque rugaanda cabe ni luguiáꞌ,
ti tutiica guiuu guꞌya biaaniꞌ.
34 Ne guielú binni nga biaani stiꞌ.
Pa ruyubi guielú cabe guꞌya ni jneza la?
zia xquenda biaani cabe.
Peru pa ruyubi guielú cabe guꞌya ni nadxaba la?
zacahui xquenda biaani cabe.
35 Biiya gá qué chi gyuiꞌ biaani ni napu ca para gaca ni guelacahui.
36 Purti pa nuu tu ra nayaꞌniꞌ,
nin tindaa ra nacahui la?
nayaꞌni dxindxi zuuya tu irá cosa,
casi ora ruzaani ti biaani laatu.
Bidxiiba Jesús donda ique ca fariseu
37 Casi biluxe uníꞌ be,
bini invitar ti fariseu laabe chi to né be laa gueta ralidxi.
Uyé be ne gurí be ruaa mexaꞌ.
38 Nabé bidxagayaa fariseu que ora biꞌya qué niguiibi ná be para ño be casi runi caꞌ.
39 Peru rabi be laa:
―Laatu,
ca fariseu,
zeda gaca tu casi vasu ne bladu ni riaꞌri ladi si peru ndaani cani nabiidiꞌ.
Zacaca laatu,
de luguiá si ruluíꞌ nachaꞌhui tu,
peru ndaani ladxidóꞌ to nabiidiꞌ,
purti ribaꞌna tu sti binni ne ruchee né tu Dios.
40 Binni huati caꞌ,
ñee cadi tobi si ni bizáꞌ cuerpu stitu ne ladxidóꞌ to la?
41 Lagacané cani qué gapa,
ti ihuinni ma bia idubi naca tu.
42 Lagapa gá si laatu,
fariseu caꞌ.
Purti na tu zinanda tu ley,
peru cadi dxandí ni.
Ni runi tu la?
rudii tu Dios biaꞌ nexhe icaa dede lu ca guixi huiini rudii layúꞌ stitu casi menta ne ruda ne xcaadxi,
peru qué rulabi tu pa naquiiñe sa binni jneza ne ganaxhii Dios.
Nga nga ni jma naquiiñe guni tu,
peru laca cadi guiaana ca xcaadxi ca.
43 Lagapa gá si laatu,
fariseu caꞌ.
Purti riulaꞌdxi tu cui tu lu ca bangu ndaani yuꞌdu ra ribí cani jma risaca,
ne riulaꞌdxi tu ugapa diuxi binni laatu ladu tiica che tu.
44 Lagapa gá si laatu.
Purti zeda gaca tu casi baꞌ ni qué rihuinni.
Ridiꞌdi cabe luguiá sin ganna cabe.
Zacaca riguite tu binni sin ganna ca tu pe laatu.
45 Oraque na ti maistru de ley rabi laabe:
―Maistru,
ora riníuꞌ zacá la?
dede ne laadu rucoou ni.
46 Para rabi be laa:
―Laca lagapa gá si laatu,
maistru de ley caꞌ.
Purti ruguáꞌ tu binni ni iruti randa ruaꞌ,
peru laatu nin bicuini ná tu qué na tu indisa né tu ni.
47 Lagapa gá si laatu.
Purti cayuni chaahui tu xpaꞌ ca profeta ni biiti ca bixhoze gola tu,
48 ne zacá rihuinni cayuulaꞌdxi tu ni biꞌni cabe.
Laacabe bizulú cabe ni,
ne laatu cunduuxe chaahui tu ni.
49 Peru nanna Dios ximodo laatu,
nga runi na:
“Zuseenda profeta ne apóstol ra nuu cabe.
Zuuti cabe caadxi ne zazabi nanda cabe xcaadxi.”
50 Ne zuquixe Dios ca binni de yanna riꞌ rini sti ca profeta ni huayuuti cabe dede dxi bizulú guidxilayú,
51 dede rini sti Abel hasta rini sti Zacarías ni biiti cabe lade yuꞌdu roꞌ ne altar ni nuu lu patiu.
Irá nga zaguixe ca binni nuu yanna riꞌ.
52 Lagapa gá si laatu,
maistru de ley caꞌ.
Purti casi ñaca naaze tu llave para guiene tu stiidxa Dios,
peru qué na tu guiene tu,
ne nin qué na tu udii tu lugar guiene xcaadxi.