Cuentu sti hombre yenduu biní
13
Dxi queca biree Jesús de ndaani yoo que,
yetí uriá dxa nisa roꞌ que.
2 Ne biiya si be ma rí binni laabe,
yetí be ndaani ti canuá.
3 Ne idubi zuba be ndaani canuá que,
bizulú bisiidi be laaca stale cosa peru puru ne ejemplu,
na be:
4 ―Sicarí bizaaca lú ti hombre biree zinduu biní.
Ne ra cusaba be xuba que,
biaba caadxi ni uriá neza ne beeda mani huiini gudó cani.
5 Ne biaba xcaadxi ni lade guie,
ne ca ngue gundani nagueenda,
purti luguiá si napa ni caadxi yu.
6 Peru casi biree gubidxa bizaaqui ni ne bibidxi ni purti qué ñapa ni xcu ni gueteꞌ.
7 Ne biaba xcaadxi ni lade guichi ne gundani,
peru jma bisoo guichi que para laacani ne biiti ca guichi que cani.
8 Peru biaba xcaadxi ni ra nayá,
ne ca ngue huaxa ucuá lú.
Nuu ra bidii dede ti gayuaa carreta niza,
ne nuu ra bidii sesenta,
ne nuu ra bidii treinta.
9 Irá ni racalaꞌdxi guiene la?
ucaa diaga.
Ra uníꞌ Jesús xiñee riguixhe ejemplu
10 Biree si ca binni que zeꞌ,
bidxiña ca discípulu que ra nuu be ne na ca rabi ca laabe:
―Xiñee puru si ejemplu caguixhe lu para laacabe pue.
11 Para rabi be laacaꞌ:
―Purti laatu la?
cudii Dios lugar guiene tu modo runi mandar,
dede ni nagaꞌchiꞌ,
peru ca xcaadxi la?
coꞌ.
12 Tu ma riene caadxi la?
ziene xcaadxi ne ziene ru jma stale.
Peru tu qué riene nin caadxi la?
dede ni ma biene zusiaandaꞌ.
13 Nga runi riguixhe ejemplu para laacabe,
purti neca zuxele lú cabe,
qué ruuya cabe,
ne neca zuxele diaga cabe,
qué runa diaga cabe,
ne qué riene cabe.
14 De laacabe nga bizeete profeta Isaías ra na:
Zuna diaga ca peru qué ziene caꞌ,
ne zuyubi lú ca peru qué zuuya caꞌ.
15 Purti ma biguidxi ladxidóꞌ caꞌ,
ne ma biseegu ca diaga caꞌ.
Ne biseegu ca lú ca
ti cadi guꞌya caꞌ ne guna diaga caꞌ
ti cadi guiene caꞌ,
uyubi ca naa para ulaꞌya laaca,
na Dios.
16 Peru laatu la?
na Jesús rabi ca discípulu stiꞌ,
dichoso laatu purti nanna tu xi cayuuya tu ne riene tu xi cayuna diaga tu.
17 Purti gabe caꞌ laatu,
uyuu stale profeta ne hombre chaꞌhui ni gucalaꞌdxi ñuuya ni cayuuya tu riꞌ peru qué ñuuya caꞌ,
ne gucalaꞌdxi ca ñuna diaga ca ni cayuna diaga tu riꞌ peru qué ñuna diaga caꞌ.
Xi riníꞌ cuentu sti hombre yenduu biní
18 Yanna laucaa diaga xi riníꞌ ejemplu sti hombre ni uluu biní que.
19 Ni biaba uriá neza que la?
zeda gaca casi tobi ni ruiꞌ né cabe laa ximodo runi mandar Dios,
peru qué riene ni,
ne reeda binidxaba raxha ni ma biaba ndaani ladxidóꞌ be que.
20 Ne ni biaba lade guie que,
ngue zeda gaca casi tobi ni runa diaga stiidxa Dios ne oraqueca ricaa ni ne enda nayecheꞌ.
21 Peru qué gapa ni xcu ni gueteꞌ sínuque luguiá si,
ngue runi casi gueeda xiixa naná,
o sa nanda cabe laa pur ca diidxa que la?
maca ziyaba.
22 Ne ni biaba lade guichi que la?
ngue zeda gaca casi tobi ni guna diaga stiidxa Dios peru jma cá ique ximodo ibani ndaani guidxilayú riꞌ,
ne rudii lugar quite bidxichi ique,
ne irá nga ruuti stiidxa Dios ni nuu ndaani ladxidóꞌ be que.
23 Peru ni biaba ra nayá que la?
ngue nga zeda gaca casi cani runa diaga stiidxa Dios ne riene xi riníꞌ ni purti riree ndu caꞌ.
Nuu de laaca ni zeda gaca casi layú ni bidii ti gayuaa que,
ne nuu de laaca casi ni bidii sesenta que,
ne nuu de laaca casi ni bidii treinta,
peru irá ca bidii caꞌ.
Baladxi biaba lade semiá
24 Bigueta bisiidi be ca binni que,
gudixhe be xcaadxi ejemplu,
na be:
―Modo runi mandar Dios zeda gaca casi ti hombre bisaba semiá ndaani ñaa stiꞌ,
25 peru laga nisiaasi binni,
beeda tuuxa nanalaꞌdxi laabe ne bidxiiba baladxi lade semiá que ne zeꞌ.
26 Dxi ma biniisi semiá que,
ma cabee guieꞌ bihuinni nuu baladxi que lade.
27 Oraque beeda ca mozo que ra nuu xpixuaana ni,
ne na caꞌ:
“Señor,
cadi ladxa semiá si bidxiiba lu la?
Xi guca xa yanna,
nucha ni baladxiꞌ.”
28 Para na xpixuaana ni:
“Laca tu laa nanalaꞌdxi naa,
beda guni ni.”
Oraque na ca mozo que:
“Racalaꞌdxu chi gaxha du cani la?”
29 Para na be:
“Coꞌ,
zaa nuu cani,
pacaa ra cayaxha tu cani,
zanda ca gaxha tu ne semiá.
30 Lausaana cani,
zaa iniisi cani tobi si ne ora ma gula semiá ca,
naa ma gabe cani chi chuugu semiá,
utopa ca ca baladxi que gundiibi ca para chaquiꞌ.
Ne óraque ru gutopa ca ca semiá idxá sacu.”
Biidxi mostaza
31 Ne bigueta gudixhe be sti ejemplu,
na be:
―Modo idale ca xpinni Dios zeda gaca casi guca ti biidxi mostaza ni gucuaa ti hombre ne yeusaba rañaa stiꞌ.
32 Laani jma nahuiini ni lade irá xixé biidxiꞌ,
peru undani si ni la?
biniisi ni ne guca ni yaga roꞌ,
dede beeda mani huiini bizáꞌ lidxi lu rama stini.
Ejemplu sti levadura
33 Gudixhe ru be sti ejemplu para laacaꞌ,
na be:
―Modo idale ca xpinni Dios zeda gaca casi guca levadura ni gucuaa ti gunaa ne biguucha chonna kilu harina,
ne irá ni biasa ni.
Zacaca nga idale ca xpinni Dios.
Ra riete xiñee biquiiñe Jesús ejemplu
34 Puru ne ejemplu bisiidi be ca binni que.
Qué nusiidi di be laaca sin ejemplu.
35 Biꞌni be zacá ti iree ni modo pe uníꞌ Dios de ruaa ti profeta chiqué,
ra na:
Zaguixhe stale ejemplu ra güe nia laacabe diidxaꞌ.
Zabe laacabe ni gaꞌchi dede dxi bizáꞌ Dios guidxilayú.
Bisiene Jesús stiidxa baladxi ne semiá
36 Biluxe si bisiidi be ca binni que,
biuu be ndaani yoo,
ne bidxiña ca discípulu stibe ra nuu be,
gunaba ca laabe gusiene be laaca xi riníꞌ ejemplu sti baladxi biaba rañaa que.
37 Para rabi be laacaꞌ:
―Ni bisaba semiá pe que la?
nga Hombre Biseenda Dios.
38 Layú que nga guidxilayú.
Semiá que zeda gaca ca xpinni Dios,
ne baladxi que,
xpinni binidxabaꞌ.
39 Ne ni bisaba baladxi que nga binidxabaꞌ.
Dxi iruugu semiá que nga iluxe guidxilayú,
ne cani chi uchuugu ca semiá que nga ca ángel.
40 Ne cásica idopa baladxi que chaqui la?
zaqueca zaca ni dxi iluxe guidxilayú.
41 Naa nga Hombre Biseenda Dios ne zuseenda ca ángel stinne para gueda ndee irá ni cuchiiña ca xpinneꞌ ne irá cani qué runi jneza.
42 Zundaa cabe laaca lu bele ne raqué nga guꞌna ca dede go yaa ca guidi ruaa caꞌ.
43 Ne dxi ca nga guzaani cani nachaꞌhui ra runi mandar Dios,
casi ruzaani gubidxa.
Cani racalaꞌdxi guiene la?
gucaa diaga.
Tesoro gaꞌchiꞌ
44 Ne laca rabi be laacaꞌ:
―Enda runi mandar sti Dios zeda gaca casi ti tesoro ni bidxela tobi hombre gaꞌchi ndaani yu.
Biiya be ni ne bicaachi be ni sti tiru,
ne ziyeche be yeutoo be irá ni napa be para sí be layú que ne icaa be tesoro que.
Perla ni jma risaca
45 Laca rabi be laacaꞌ:
―Enda runi mandar sti Dios zeda gaca casi ti perla ni bidxela ti hombre ra canayubi perla chaꞌhui para síꞌ.
46 Ora biꞌya jma risaca ni que irá xixé perla la?
yeutoo irá ni napa para uzíꞌ ni.
Ejemplu sti tarraya
47 Ne gudixhe ru be stobi,
na be:
―Enda runi mandar sti Dios zeda gaca casi tarraya ni rusaba cani rie guuze ndaani nisadóꞌ.
Rutopa tarraya que irá clase benda
48 peru ora ma bidxá ni,
rití né cabe ni uriá para ribí cabe ique ni.
Rusaꞌbi cabe ni qué zaquiiñeꞌ,
ne ruchá cabe cani zaquiiñe que ndaani dxumi.
49 Zacaca zaca ni ra gueeda iluxe guidxilayú riꞌ,
zeda ndee ca ángel cani qué iquiiñe lade cani nachaꞌhuiꞌ.
50 Ne zundaa ca laacabe lu bele,
ne raqué nga guꞌna cabe dede go yaa cabe guidi ruaa cabe.
Tesoro cubi ne tesoro yooxhoꞌ
51 Oraque unaba diidxa be ca discípulu stibe pa biene ca ni gudxi be laaca que.
Para na caꞌ:
―Biene du,
Señor.
52 Para rabi be laacaꞌ:
―Tobi ni ma riene chaahui ley sti Moisés ne óraque gueda iziidi ni rusiide de modo runi mandar Dios la?
zeda gaca casi ti ricu ni ribee de lu irá ni napa,
caadxi nacubi ne caadxi nayooxhoꞌ.
Ra nuu Jesús Nazaret
53 Biluxe si byuiꞌ né Jesús laacabe irá nga,
biree de raqué,
54 uyé xquidxi ne biuu ndaani yuꞌduꞌ,
bisiidi ca binni xquidxi.
Nabé bidxagayaa ca laabe ne na caꞌ:
―Paraa ulee be irá enda biaani ni napa be ri pue,
ne irá enda nandxóꞌ ni runi be.
55 Ñee cadi laabe nga xiiñi carpinteru que la?
ne María lá jñaa be,
ne biꞌchi be nga Jacobo ne José ne Simón ne Judas.
56 Lácaxa cadi rarí nabeza ca bizaꞌna be.
Paraa ulee be cani cayuni be riꞌ.
57 Ne pur ni caníꞌ ique cabe que,
ma qué ñanda ñuni cre cabe laabe.
Para na be rabi be laacaꞌ:
―Stobi stobi lugar risaca profeta,
peru ra qué risaca be nga ndaani xquidxi pe be ne lade binni lidxi be.
58 Ne huaxiéꞌ bisihuinni be enda nandxóꞌ stibe raqué purti qué ñuni cre ca laabe.