Pabiáꞌ naxoo nuu ni guni pur uchee stobi
17
Na Jesús rabi ca discípulu stiꞌ:
―Qué ziaadxa ni uquiinde binni para uchee,
peru gapa gá si ni guni ni que laa.
2 Jma galán ñaca para laa pa nugaanda cabe ti guie ngola yanni,
nundaa cabe laa ndaani nisadóꞌ,
que ñuni pur nuchee tobi de ca nahuiiniꞌ.
3 Laguuya gá qué chi guni tu zacá.
Pa uchee né hermanu stiuꞌ lii la?
bilidxe laa,
ne pa inaba be perdón lii la?
bini perdonar laabe.
4 Ne pa gadxe tiru uchee né be lii ti dxi ne gadxe tiru que gueda naba be perdón lii la?
bini perdonar laabe.
Desdicha Hacia Aquellos que Hagan Pecar a Otros
Xi irá ñuni ni ñapa caadxi huiini fe
5 Oraque na ca apóstol que rabi Señor:
―Bitale fe stidu.
6 Para rabi be laacaꞌ:
―Pa ñapa tu fe neca biaꞌ ti biidxi mostaza la?
ñanda ñabi tu yaga ca ñaaxha de xcu,
niuzuhuaa ndaani nisadóꞌ,
ne ñe ni.
Ni nexhe guni ti mozo
7 Pa ñapa tu ti mozo nicheza layú o nigapa yuze,
ñee casi ñeeda ñabi tu laa:
“Gurí ruaa mexa” la?
8 Coꞌ njaꞌ,
sínuque ñabi tu laa:
“Ulee xhaꞌbuꞌ,
biꞌni endaró xhi ne udiiu ni gahua xhieꞌ.
Iluxe siaꞌ,
óraque ma cui lu lii,
go xhiuꞌ.”
9 Lácaxa rudii tu diuxquixe mozo que purti biꞌni ni gudxi tu laa.
10 Zacaca laatu ora ma biꞌni tu ni bisaana Dios lu ná tu la?
sicarí nga lainíꞌ:
“Gasti qué ñuni du purti bini du ni nexhe si guni du.”
Ra bisianda Jesús chii napa lepra
11 Ra ze Jesús Jerusalén udiꞌdi galahui Samaria ne Galilea.
12 Ra yendá be ti guidxi huiini biree chii hombre napa lepra,
bizuhuaa ca zitu
13 ne bicaa ca ridxi laabe:
―Jesús,
Maistru,
biá laadu.
14 Ora biꞌya be laaca rabi be laacaꞌ:
―Laché ra nuu sacerdote.
Lachiuluíꞌ laa ma bianda tu.
Ne laga ze ca neza nisi pe byuiꞌ lepra que ladi caꞌ.
15 Ora biꞌya tobi de laaca ma bianda,
bigueta uxooñeꞌ,
cucaa ridxi,
cusisaca Dios.
16 Bizuxibi xa ñee be dede gudixhe ique layú,
cudii diuxquixe.
Ngue nda samaritanu laa.
17 Oraque na be:
―Ñee cadi chii cabe bianda la?
Laga xcaꞌ que yaꞌ,
uná laacaꞌ.
18 Ñee iruti ru qué nibigueta nusisaca Dios sínuque laga ni cadi binni laanu ri la?
19 Ne óraque rabi be hombre que:
―Biasa,
uyé.
Bianda lu purti bini cre luꞌ.
Modo ibigueta Hombre Biseenda Dios
20 Oraque unaba diidxa ca fariseu laabe padxí uzulú guni mandar Dios.
Para rabi be laacaꞌ:
―Dxi uzulú guni mandar Dios nga cadi ni ihuinni,
21 ne iruti qué zanda gabi laatu,
“Rarí cayaca ni”,
o “Raricaꞌ”;
purti ma cayuni mandar Dios lade tu.
22 Oraque rabi be ca discípulu stibe:
―Zadxiña dxi zacalaꞌdxi tu guꞌya tu Hombre Biseenda Dios,
neca ti dxi si,
peru qué zuuya tu.
23 Ziuu tu gabi laatu:
“Rarí nuu be”,
o “Rarica nuu be”,
peru qué chi nanda tu.
24 Purti casi riuu xpiaani rayu de ti ladu para sti ladu,
zacaca zaca ni dxi gueeda be sti tiru.
25 Peru nirudóꞌ naquiiñe acaná be ne udxii deche ca binni nuu yanna ri laabe.
26 Cásica uca dxi bibani Noé,
zacaca zaca dxi ibigueta Hombre Biseenda Dios.
27 Cayó cabe,
cayéꞌ cabe,
cachaganá cabe ne cucheela cabe dede dxi biuu Noé ndaani arca ne biaba nisa guie,
binitilú irá cabe.
28 Ne zaqueca guca dxi bibani Lot.
Cayó cabe,
cayéꞌ cabe,
cazíꞌ cabe,
cutoo cabe,
caguu cabe biní,
ne cucuí cabe yoo.
29 Peru casi guxha ñee Lot de ndaani guidxi Sodoma biaba gui ne azufre de ibáꞌ.
Binitilú irá cabe.
30 Zacaca nga zaca ni dxi guenda sti tiru.
31 Ni dxiꞌba ique yoo dxi que la?
cadi guiete chi caa sti ndaani yoo.
Ne zaqueca ni nuu rañaa cadi ibigueta gueda caa stiꞌ.
32 Laguietenalaꞌdxi xi uca xheela Lot.
33 Tu gacalaꞌdxi ulá xpida zuniti ni,
peru tu uniti ni la?
zalá.
34 Ne gabe caꞌ laatu,
ra nexhe chupa lu tobi si luunaꞌ,
zie tobi que,
stobi que ziaana.
35 Ne zaqueca ra nuu chupa gunaa cayuutuꞌ,
zie tobi,
ziaana stobi.
36 Zaqueca ra nuu chupa hombre rañaa,
zie tobi,
ziaana stobi.
37 Oraque na ca rabi ca laabe:
―Paraa gaca ni yaꞌ,
Señor.
Para rabi be laacaꞌ:
―Ra nuu ti cuerpu ni ma guti,
raqué nga cui zisi irá soꞌpeꞌ.