Sti ti juez ne ti viuda
18
Laca gudixhe Jesús ti ejemplu para usiidi laacabe iníꞌ né cabe Dios sin iree cabe gana,
2 na rabi laacabe:
―Uyuu ti juez ndaani ti guidxi,
qué ridxibi Dios ne qué rizaalaꞌdxi binni.
3 Ne ndaani guidxi queca uyuu ti viuda,
ne gatigá ma ze ra nuu be,
zinaba acané be laa purti nuu tu cadinde né laa.
4 Xadxí qué niná be nulabi be laa,
peru bidxiña dxi na be:
“Neca qué ridxibe Dios ne qué rizaaladxe binni,
5 peru modo canaziñe gunaa ri naa la?
chi acaniá laa,
ti ma cadi gueeda uchiichi ru naa.”
6 Para na Señor rabi laacabe:
―Laguuya si laatu xi na juez malu que.
7 Ñee na tu qué zacané Dios ca xpinni ni cucaa ridxi laa ridxi ne huaxhiini la?
Zandaa para icabi be laaca la?
8 Naa cayabe laatu,
qué zandaa diꞌ,
nagueenda zacané be laacaꞌ.
Peru nanna pa zadxela ru Hombre Biseenda Dios tu napa fe dxi ibigueta sti tiru yaꞌ.
Sti ti fariseu ne tobi ni ruquixe impuestu
―Uyé chupa hombre ndaani yuꞌdu roꞌ,
yeníꞌ né Dios.
Tobi que fariseu,
stobi que ruquixe impuestu.
11 Bizuhuaa fariseu que,
caníꞌ stubi na:
“Rudiee diuxquixe lii,
Dios,
purti cadi naca casi ca xcaadxi binni.
Qué ribanaꞌ,
cadi malu naa,
qué riuaa nia ni cadi xheelaꞌ,
ne nin cadi naca casi ni ruquixe impuestu riꞌ.
12 Riaana sin gahua chupa tiru ndaani semana ne rune ni na ley:
rune irá ni napa chii ndaa ne rudiee lii ti ndaa,
cásica ni rune ganar zaqueca ni rudii layú stinneꞌ.”
Nga na fariseu que.
13 Peru stobi que zuhuaa zitu,
nin para nindisa lú ibáꞌ qué naꞌ,
sínuque caguibi ná ladxidóꞌ,
na:
“Biá naa,
Dios,
purti nabé huacheeꞌ.”
14 Ne zanda gabe laatu ora bigueta hombre malu que ralidxi,
ma bia ladxidóꞌ,
peru fariseu que la?
coꞌ.
Purti tu udxiiba laca laa la?
qué zasaca nezalú Dios,
peru tu na qué risaca,
zusisaca Dios laa.
Parábola del Fariseo y el Recolector de Impuestos
Ra uluu Jesús ndaaya caadxi baꞌduꞌ
15 Oraque bedané cabe caadxi xcuidi ra nuu Jesús para quixhe ná luguiá caꞌ.
Peru ora biꞌya ca discípulu né cabe ca baꞌdu que,
udinde né ca laacabe.
16 Peru guridxi Jesús ca baꞌdu que ne na:
―Laudii lugar gueeda ca baꞌdu ca ra nuaaꞌ.
Cadi ucueeza tu laaca purti stica irá ni napa Dios ladxi náꞌ,
laaca ne irá casi laaca ca.
17 Gabe caꞌ laatu ni qué gaca ladxidóꞌ casi ladxidóꞌ cabe ca la?
qué zanda udii lugar guni mandar Dios laa.
Ra uníꞌ né ti ricu Jesús
18 Bidxiña tobi de ca xaíque sti ca judíu ra nuu Jesús,
na:
―Maistru ni nachaꞌhuiꞌ,
xi gune para gapa enda nabani ni qué zaluxe.
19 Para na Jesús rabi laabe:
―Xiñee nouꞌ nachaꞌhueꞌ.
Iruti ru nachaꞌhui jma que tobi lucha Dios.
20 Ma nannu xi na ca mandamientu:
“Cadi chuꞌ neu ni cadi xheela luꞌ,
cadi guuti lu binni,
cadi cuana luꞌ,
cadi cueeu falsu luguiá stobi,
gunaxhii bixhoꞌzo ne jñoouꞌ.”
21 Para na be:
―Irá nga huayune dede dxi nahuiineꞌ.
22 Ora bina diaga Jesús xi na be,
na rabi laabe:
―Tobi si riaadxi lii.
Bitoo irá ni napuꞌ,
bidii ni ca pobre.
Zacá zapu stale ni risaca ibáꞌ,
ne dananda naa.
23 Nabé ucaná ladxidóꞌ be ora bina diaga be nga,
purti nabé stale bidxichi napa be.
24 Ora biꞌya Jesús pabiáꞌ ucaná ladxidóꞌ be,
na:
―Aque nagana para ti ricu udii lugar guni mandar Dios ndaani ladxidóꞌ.
25 Jma pe qué igana tidi ti camellu xaꞌna ti aguxaꞌ que udii ti ricu lugar guni mandar Dios ndaani ladxidóꞌ.
26 Oraque na cani bina diaga ni:
―Pa zacá ni la?
tuu ndi zanda ilá.
27 ―Ni qué zanda guni binni la?
Dios zanda guni,
na Jesús.
28 Oraque na Pedru:
―Laadu yaꞌ.
Bisaana du irá xixé ni napa du,
para canananda du lii.
29 Para rabi be laacaꞌ:
―Gabe caꞌ laatu,
irá ni usaana lidxi o bixhoze o biꞌchi o xheelaꞌ o xiiñiꞌ para chuꞌ lade ca xpinni Dios la?
30 zudii Dios laaca jma ru stale que biaꞌ bisaana ca yanna riꞌ,
ne ora ma iree ca ndaani guidxilayú ri,
zacaa ca enda nabani ni qué zaluxe.
Ra bigueta bizeete Jesús zati
31 Oraque ucuaa be doce discípulu stibe que,
biree chu né be laacaꞌ ne rabi be laacaꞌ:
―Laguuyaꞌ,
ma chuu nu Jerusalén,
ne raqué chi aca irá ni bicaa ca profeta izaaca Hombre Biseenda Dios.
32 Zusaana cabe naa lu ná cani cadi judíu para quite ca naa ne guniná ca naa ne uchá xhinni ca luaꞌ.
33 Zaguiñe ca naa ne zuuti ca naa peru raguionna gubidxa de biiti ca naa zabaneꞌ.
34 Qué lica ñene ca discípulu xi caníꞌ be purti cadi nexhe guiene ca ne qué ganna ca xi cuzeete be.
Jesús Predice Su Muerte y Resurrección
Ra bisianda Jesús tobi nacheepa lú
35 Ra ziyuu be ndaani guidxi Jericó zuba tobi hombre nacheepa lú uriá neza,
canaba guna.
36 Ne ora bina diaga zidiꞌdi stale binni raqué,
unaba diidxa xi cayaca.
37 Para rabi cabe laa:
―Jesús de Nazaret nga zidiꞌdi racá.
38 Oraque bicaa ridxi:
―Jesús,
Xiiñi David,
biá laꞌ naa.
39 Udinde né ca binni za niru que laabe para nigani be,
peru jma rusi bicaa be ridxi:
―Biá naa,
Xiiñi David.
40 Oraque biaana dxí Jesús,
bisenda caa laabe gueeda be ra nuu.
Casi bidxiña be na rabi laabe:
41 ―Xi racalaꞌdxu gune para lii.
Para na be:
―Señor,
racaladxe inayaꞌ.
42 Oraque na Jesús:
―Ma zanda iná lu,
ne bianda lu purti bini cre luꞌ.
43 Oraqueca uná be ne yenanda be Jesús cusisaca be Dios.
Ne zaqueca biꞌni irá binni biiya ra guca ni,
bisisaca ca Dios.
Sanación de Bartimeo