Ejemplu sti ca ni biꞌni xhiiña tobi hombre
20
Modo runi mandar Dios xpinni zeda gaca casi ti hombre,
xpixuaana ti layú.
Siadóꞌ roꞌ biree ziyubi tu guni dxiiña lu jlayú.
2 Ne biaana né be caadxi ni bidxela be óraque quixe be laaca ti denariu ti dxi.
Para biree ca ziguni ca dxiiña que.
3 Dxi queca biree be uyé be galahui biaꞌ las nueve,
biiya be zuhuaa caadxi,
gasti cayuni.
4 Para rabi be laacaꞌ:
“Napa dxiiña guni tu ne zaguixe laatu biaꞌ jneza guiaxa tu.”
Para biree ca ze caꞌ ziguni ca xhiiña be.
5 Biree be sti tiru biaꞌ galaa dxi ne sti tiru biaꞌ las tres,
ne casi biꞌni be primé que zaqueca biꞌni be óraque.
6 Biree ru be sti tiru biaꞌ las cincu ne bidxela be xcaadxi zuhuaa,
gasti cayuni.
Para na be rabi be laacaꞌ:
“Xiñee idubi dxi nuu si tu.”
7 Para na caꞌ:
“Purti iruti nudii dxiiña laadu.”
Para na be:
“Lachiguni dxiiña lu layú stinneꞌ,
ne zaguixe laatu biaꞌ jneza guiaxa tu.”
8 Huaxhinni que na be rabi be ni rapa xpidxichi be:
“Guridxi cani cayuni dxiiña ca ne gudixe laacaꞌ.
Bizulú né cani biuu últimu ne biluxe né cani biuu primé.”
9 Ne ora bidxiña cani uyé biaꞌ las cincu que,
ucuaa ca ti denariu cada tobi caꞌ.
10 Ne ora beeda cani uyé siadóꞌ que,
zácaxa ca nicaa ca jma stale,
peru laca biaꞌ queca ucuaa caꞌ.
11 Ne ora biꞌya ca biaꞌ queca ucuaa ca la?
bidxiichi né ca laabe.
12 Ne na caꞌ:
“Ca ndi ti hora si biꞌni ca dxiiña ne gudixe lu laaca biaꞌ ca gudixe lu laadu,
laa nda du bidxuí du idubi dxi.”
13 Para na be rabi be tobi de laacaꞌ:
“Xhamiguaꞌ,
qué niguite diaꞌ lii.
Ñee cadi biaana nia lii icoou ti denariu la?
14 Ucuaa stiuꞌ ne uyé.
De naa piaꞌ beeda ni bidiee laacabe biaꞌ bidiee lii.
15 Ñee qué zanda gune nia stinne ni racaladxe la?
o cadxiichi tu tisi guca nachaꞌhui ne laacabe la?”
16 Zacá nga laani,
stale de cani biaana atrá zazá niru,
ne zaqueca stale de cani za niru,
ziaana atrá.
Ne stale tu raca invitar,
peru huaxiéꞌ tu zanda guiuu.
Ra bigueta bizeete Jesús zati
17 Ti dxi ze Jesús neza Jerusalén,
ucuaa idubi doce discípulu stiꞌ ne biree chu ne laacabe ti ladu,
ne na rabi laacabe:
18 ―Laguuyaꞌ,
mayaca guiuꞌ nu Jerusalén,
ne raqué inaaze ca xaíque sti ca sacerdote ne ca maistru de ley naa,
ne zanaba ca gateꞌ.
Naa nga Hombre Biseenda Dios.
19 Zutiidi ca naa lu ná cani cadi judíu para guxidxi ca ngue de naa ne quiñe ca naa ne ucaa ca naa lu cruz,
peru raguionna gubidxa ziasa de lade gueꞌtuꞌ.
Ra uyé xheela Zebedeu ra nuu Jesús
20 Oraque bidxiña né xheela Zebedeu iropa xiiñi ra nuu Jesús,
ne bizuxibi xañee Jesús ne na rabi laabe pa zuni be xiixa para laa.
21 Para na be rabi be laa:
―Xi racalaꞌdxu guneꞌ.
Oraque na gunaa que:
―Xiñee qué cueeu ti orde cui iropa xiiñe ri cueꞌ lu dxi guni mandar luꞌ,
tobi ladu derechu ne stobi ladu bigaꞌ.
22 Peru na be rabi be ca xiiñi gunaa que:
―Qué ganna tu xi canaba tu.
Ñee zanda gacaná tu casi chi gaca naꞌyaꞌ,
ne tidi tu ni chi tide ri la?
―Zanda,
na caꞌ.
23 Oraque na be:
―Dxandí zacaná tu ne zadiꞌdi tu casi chi tideꞌ,
peru para cui tu cuee ladu derechu ne ladu biga la?
cadi nexhe ni lu naya para gudieeꞌ,
purti maca gudixhe Bixhoze tuu nga icaa ni.
24 Ne ora bina diaga xhii discípulu que de ni guca que la?
bidxiichi né ca xhupa que.
25 Peru guridxi Jesús laacabe ne na rabi laacabe:
―Nanna tu modo sti cani runi mandar ndaani guidxilayú,
runi stica irá binni ni runi mandar caꞌ.
Ne zaqueca ca hombre ni risaca,
riulaꞌdxi ca guni binni ni na caꞌ.
26 Peru laatu cadi guni tu zacá lade tu,
sínuque tu gacalaꞌdxi isaca jma la?
napa xidé gaca casi jmozo ca xcaadxi.
27 Ne zaqueca guni tutiica gacalaꞌdxi sa niru,
28 casi huayune lade tu.
Naa nga Hombre Biseenda Dios ne benda cadi para gacané cabe naa,
sínuque para gacaniá laacabe ne para udiee xpida para ilá stale binni.
Bianda chupa lú cheepaꞌ
29 Ora biree cabe de Jericó,
yenanda jma binni laabe.
30 Ne ruaa neza ra zidiꞌdi cabe que zuba chupa hombre nacheepa lú.
Ne ora gunna ca zidiꞌdi be raqué la?
bicaa ca ridxi ne na caꞌ:
―Señor,
Xiiñi David,
biá laadu.
31 Oraque udinde né ca binni que laaca para nigani caꞌ,
peru laga jma rusi reciu bicaa ca ridxi ne na caꞌ:
―Señor,
Xiiñi David,
biá laadu.
32 Para bizuhuaa dxí Jesús ne guridxi laacaꞌ,
ne na rabi laacaꞌ:
―Xi racaladxi tu gune para laatu.
33 Para na caꞌ:
―Señor,
racalaꞌdxi du ixele lú du.
34 Oraque biá Jesús laaca ne udaꞌna lú caꞌ.
Ne oraqueca bixele lú caꞌ ne yenanda ca laabe.