Biuu Jesús Jerusalén
21
Ma zeda dxiña cabe Jerusalén,
bedandá cabe Betfagé,
cueꞌ dani lá Olivo.
Ne de raqué na Jesús rabi chupa discípulu stiꞌ:
2 ―Laché ndaani guidxi huiini ni nuu checá ca,
ne casi chindá tu raqué zadxela tu ti burra cá yaga ne cá ti burru huiini cueꞌ me.
Lauxhedxe laacame ne latané laacame ra nuaaꞌ.
3 Ne pa chuꞌ tu gabi laatu xiñee cuxhedxe tu laacame la?
lagabi laaca caquiiñe Señor laacame,
ne óraque zudii ca lugar guedané tu laacame.
4 Irá nga guca ti iree ni modo pe uníꞌ Dios de ruaa profeta que,
ra na:
5 Lagabi ca binni guidxi Sion guꞌya caꞌ,
zeeda rey stica ra nuu caꞌ.
Nadóꞌ zeeda be
ne dxiꞌba be deche ti burru huiiniꞌ,
xiiñi ti mani ni riguꞌba carga.
6 Para biree ca discípulu que ze caꞌ ne biꞌni ca casi gudxi Jesús laacaꞌ.
7 Bedané ca burra ne burru huiini que,
ne gudixhe ca xhaba ca deche came,
para udxiꞌba Jesús deche nahuiini que.
8 Stale binni ni rí raqué bichiaa ca xhaba ca lu neza ra zidiꞌdi be,
ne xcaadxi bichuugu rama ne gudixhe ni lu neza que.
9 Ne ca binni ni za niru,
ne cani nanda atrá,
cucaa ca ridxi,
na caꞌ:
―¡Lacuu viva sti xiiñi rey David!
¡Lausisaca laabe ti Dios biseenda laabe ne lausisaca Dios ni dxiꞌba ibáꞌ!
10 Ne ora ziyuu be ndaani guidxi Jerusalén,
biꞌni ca binni guidxi que bulla ne na caꞌ:
―Tu hombre ri pue.
11 Para na ca xcaadxi binni que:
―Ndi nga Jesús profeta ni biree de Nazaret de Galilea que.
Bisiá Jesús yuꞌdu roꞌ
12 Oraque biuu be ndaani yuꞌdu roꞌ sti Dios,
ne guladxi be irá cani cutoo ne ni cazíꞌ ndaani yuꞌdu que,
ne bitiixhi be jmexa cani cuchaa bidxichi ne xpangu cani cutoo paloma.
13 Ne na be rabi be laacaꞌ:
―Maca cá ni lu Xquiꞌchi Dios ra na:
“Lidxe nuu para iníꞌ né cabe naa ndaaniꞌ.”
Peru laatu laga ma biꞌni tu ni lidxi gubaanaꞌ.
14 Nuu ru be ndaani yuꞌdu roꞌ beeda caadxi ni nacheepa lú ne caadxi ni nachiita ñee ra nuu be,
para bisianda be laacaꞌ.
15 Peru cayuuya ca xaíque sti ca sacerdote ne ca maistru de ley irá ca milagru ni cayuni be que.
Ne laca cayuna diaga ca modo cucaa ca baꞌdu ni nuu ndaani yuꞌdu que ridxi:
“Lausisaca xiiñi rey David.”
Ngue runi bidxiichi né ca laabe.
16 Ne na ca rabi ca laabe:
―Ñee cadi cayuna diaga lu ni caníꞌ ca baꞌdu ca la?
Para na be:
―Cayuna diaꞌga pue.
Qué xa huayuunda tu lu Xquiꞌchi Dios ra cá:
Gudixhe lu usihuinni ca xcuidi huiini ne ca badu huiini enda nandxóꞌ stiuꞌ.
17 Ngue si uníꞌ be,
bisaana be laacaꞌ bixele be de guidxi que,
uyé be Betania ne raqué biaana be huaxhinni que.
Ra udinde né Jesús yaga duꞌgaꞌ
18 Siadóꞌ que biree be ze be Jerusalén sti tiru.
Ze be neza,
bindaana be.
19 Ne biiya be zuhuaa ti yaga duꞌga uriá neza que,
para bidxiña be ra nuu.
Peru qué nidxela be nin ti duꞌgaꞌ,
nisi bandaga cá lu ni.
Para na be rabi be yaga que:
―Qué ziuu dxi ru icá nin sti duꞌga lú luꞌ.
―Ximodo gunda bibidxi yaga ca casi zeꞌ.
21 Para na be rabi be laacaꞌ:
―Gabe caꞌ laatu,
pa gapa tu fe ne qué ichaacha tu de laani la?
cadi ni bine siaꞌ riꞌ zanda guni tu,
sínuque zanda gabi tu dani ca iree de racá guiaba ndaani nisadóꞌ,
ne ziaba ni.
22 Irá ni inaba tu ora iníꞌ né tu Dios,
pa inaba tu ni ne fe la?
zacaa tu ni canaba tu que.
Xiñee cayuni Jesús ni cayuni
23 Bigueta ru be ndaani yuꞌdu roꞌ,
ne laga cusiidi be bidxiña ca xaíque sti ca sacerdote ne ca xaíque sti guidxi que ra nuu be,
na ca rabi ca laabe:
―Tu naca lu para cayuꞌnu irá ndiꞌ,
o tu gudxi lii guꞌnu cani.
24 Para rabi be laacaꞌ:
―Naa laca napa xiixa inaba diidxa laatu,
ne pa gabi tu naa ni chi inaba diidxa laatu ri la?
laca zabe laatu tu naca para cayune cani.
25 Xi na tu de ni biꞌni Juan ra beda nduu nisa binni yaꞌ.
De Dios zeeda ni la?
o de binni guidxilayú.
Oraque ucuaa yu né ca ni ne na caꞌ:
―Pa gabi nu laabe zeeda ni de Dios la?
zabi be laanu xiñee qué ñuni cre nu ni.
26 O pa gabi nu laabe zeeda ni de binni guidxilayú la?
gapa gá si nu laanu ne idubi guidxi riꞌ purti napa cabe Juan de profeta sti Dios.
27 Para na ca rabi ca laabe:
―Qué ganna di du.
Oraque rabi be laacaꞌ:
―Nin naa qué zabe laatu tu gudxi naa gune ni rayune riꞌ.
Sti chupa biꞌchiꞌ
28 Xi na tu de ndi yaꞌ.
Ti hombre gupa chupa xiiniꞌ,
ne ti dxi rabi be ni jma huaniisi que:
“Uyé rañaa yanadxí,
xiiñeꞌ.”
29 Para na rabi laabe:
“Qué ziaa diaꞌ.”
Peru ratu si que uca arrepentir,
ne biree uyé.
30 Oraque bidxiña be ra nuu stobi que,
ne zaqueca gudxi be laa.
Para na rabi laabe:
“Nagasi ma chaaꞌ,
apá.”
Peru qué ñe.
31 Yanna xi na tu.
Uná de lade iropa cabe biꞌni ni na bixhoze.
Para na caꞌ:
―Primé que.
Oraque na be rabi be laacaꞌ:
―Gabe caꞌ laatu,
jma nagueenda ziuu cani ruquixe impuestu ne ca gunaa dxaba ra runi mandar Dios que laatu.
32 Purti beda usiidi Juan Bautista ximodo sa tu jneza ne qué ñuni cre tu laa.
Peru cani ruquixe impuestu ne ca gunaa dxaba la?
bini cre caꞌ.
Laatu neca biiya tu irá,
qué nuchaa tu xpiaꞌ tu ne qué nuni cre tu.
Sti ca hombre qué iquiiñeꞌ
33 Lauca diaga sti ejemplu chi tixhe riꞌ.
Sicarí bizaaca lú xpixuaana ti layú.
Bizuhuaa be yaga uvas lu layú que,
ne guluu be leꞌ ni,
ne biꞌni be pila para ixii uvas ndaaniꞌ,
ne bicui be ti torre ra guiaana ni gapa ni.
Biluxe biꞌni si be ni,
bisaana né be ni caadxi hombre gapa ni,
ti ora udii ni la?
icaa né be ni laacaꞌ.
Ne biree be yendeza be zitu de raqué.
34 Dxi ma gunda dxi iruugu uvas que,
biseenda be caadxi xpinni be,
chi caa ni raca caber laabe.
35 Peru cani bisaana né be ni que,
laga udiñe ca ti xpinni be que ne biiti ca stobi ne bichá ca guie stobi.
36 Ne óraque biseenda be jma stale que cani uyé que,
peru laca zaqueca biꞌni ca hombre que laacaꞌ.
37 Ultimu na be:
“Chi guseenda xiiñeꞌ,
zanda ca gapa xpiaꞌ cabe ne laa.”
38 Peru ora biꞌya cani cayapa layú que xiiñi be la?
uníꞌ stiidxa ca na caꞌ:
“Ndi nga ni icaa irá ni.
Laguuti laa ti guiaana né nu irá stiꞌ.”
39 Ne ulee ca laabe de ndaani leꞌ que para biiti ca laabe.
40 Yanna xi na tu,
xi gaca xa de cani biaana né layú que dxi gueeda xpixuaana ni yaꞌ.
41 Para na ca xaíque sti ca sacerdote ne ca xaíque sti ca judíu:
―Qué lica ziá be laaca para guuti be laacaꞌ.
Ne zusaana né be layú que xcaadxi ni zaná gudii laabe cuananaxhi ni iree ndaani leꞌ que.
42 Oraque na be rabi be laacaꞌ:
―Qué huayuu dxi guꞌnda tu lu Xquiꞌchi Dios ra cá ca diidxa ri la?
Guie ni bisaꞌbi cani cucuí yoo que,
guie que pe naaze yoo que yanna.
Nga nga ni biꞌni Dios,
ne para laanu
ma enda ridxagayaa ni.
43 Pur nga runi cayabe laatu ziaaxha tu de lade ca xpinni Dios ne ma adxé tu guiuu jlugar tu,
tobi ni zanda iquiiñe para laabe.
44 Ne tu guiaba lu guie ni bisaꞌbi cabe que zacadé,
ne zaqueca tu guiaba guie que luguiá laca zacadé.