9
سيدنا عيسى دا يتّازن ئمحضرّ نّس س - ثناعش
(ماتّى 10:5-15؛ مارقوس 6:7-13)
1 يان واسّ، ئغراد سيدنا عيسى ئي يمحضرّ نّس س - ثناعش، ئوشاسن جّهد د - ثنباطّ أد تژّعن أدجّنون، أر جّوجين ئغنشاثن كول،
2 أها يازنثن حما أد سيولن ئي ميدّن خف ثݣلديتّ ن - ربّي، جّوجين ئموضينّ.
3 داي ينّاياسن: «أد ؤر تّاوياث أݣّيدون أود ئميقّ، لا ثاغريث، ؤلا ياخريض، ؤلا ياغروم، ؤلا ييقّاريضن، ؤلا ياعبان أمشايض.
4 د - دوكّ ماتّا ثادّارث نّاݣ أون ئتّورحب، ثقّيميم ديكس أر تدّوم ئبردان نّون.
5 ئيد مش ؤر كون رين ميدّن، ثفّغم زݣ ثمدينث نسن، أها ثنقّرم أݣضرور زݣ ئضارّ نّون حما أداسن ئيݣ ؤينّا ثماثارث ئيد ربّي أغاثن ئحاسبن».
6 داي فّغن ئمحضرّ، دّون أر تّكّين خف مايد ئݣان ئغرم أر ساوالن خف ئنغميسن ژيلنين ن ـ ربّي، أر جّوجوين ئموضينّ ݣ - مايد ئݣان أدغار.
أحيّر ن - ؤنبّاض هيرودس
(ماتّى 14:1-12؛ مارقوس 6:14-29)
7 نتّا يسلّا هيرودوس أنبّاض ن ـ ثمازيرث ئي مايد أر ئتّجرون كول، داي يحيّر ئدّخ أر تّينين ييتّس ن - ميدّن: «هاثين سيدنا يحيى أيدّ ئكّرن زݣ لموث».
8 أر تّينين ييتس ضنين: «هاثين نّبي إيليّا أيدّ ياغولن». ئيد وييّاض أر تّينين: «هاثين شان يون زݣ لانبيا ييمزوورا أيدّ ئكّرن زݣ لموث».
9 داي ينّا هيرودس: «نكّ س - ئخف ئنو أيداس ئبّين أقرّو ئي يحيى، ئوا مايد ئمس واد نّا خف مي دا تسلّاخ ئي يسكّينّ أمّ ويد؟» يقّيم أر يورزّو بار أث يانّاي.
سيدنا عيسى يسوتّشا خمسالاف ن - ؤرݣاز
(ماتّى 14:13-21؛ مارقوس 6:30-44؛ يوحنّا 6:1-14)
10 نتّا أغولند ئمازانّ، قّيسناس ئي سيدنا عيسى أينّا ݣان كول. أها ياويثن، دّون غاس نثني غر لخلا ثانيلا ن ـ يوث ن ـ ثمدينث ئسم نّس بيت صايدا.
11 ماشان سّنن ميدّن ماني ݣ - ئلّا أها ثفارنث، داي يرحباسن ئسيولاسن خف ثݣلديتّ ن - ربّي، أها يجّوجي وينّا ياغشا ديكسن.
12 نتّا يدّجاور ييض، تّوجين ئمحضرّ س - ثناعش غر سيدنا عيسى نّاناس: «أزن لغاشي أد ئدّو غر ئسونّ د - ئغرمان نّا لّانين ݣ ـ ئحيدان أد، حما أد أفين مانيݣ نسان د ـ ماي تتّان، ئدّخ هاثين ؤر ئلّي مايد ئتّواتّان ݣ ـ لخلا ياد».
13 داي ينّاياسن: «ؤشاثاسن كونّي أد تشّين!» أها نّاناس: «ماي تتّان؟، هاثين غاس خمسا ن - ثوغريفين د - سينّ ن ـ ئسلمان أي غورخ، ئوا غاس مشد أندّو أدّ نسغ ؤتشّي ئي وانشثيد ن - لغاشي؟»
14 ئدّخ لّان س - أم خمسالاف ن - ؤرݣاز. داي ينّا سيدنا عيسى ئي يمحضرّ نّس: «غاس سغيماتّن س - ثربّاع، كّو ثاربيعث أديكس ييلي خمسين ن ـ يوكّ».
15 داي سغيمينثن كول أم ؤينّاسن ئنّا.
16 ياسي سيدنا عيسى خمسا ن - ثوغريفين نّا د - سينّ ن - ئسلمان، ئهزّا ألّن نّس س ـ ئݣنّا، ئتّر ئي ربّي أديكسن ئيݣ لبراكا، ئبّيثن أها يوش ئي يمحضرن أد ؤشين ئي لغاشي.
17 داي تشّين كول نسن ألّيݣ دجّيونن، أها سمونن ئقّشران نّاد قّيمانين، عمّرن ئسّن ثناعش ن - ثازّݣاوث.
بطرس دا يتّيني مايد ئمس سيدنا عيسى
(ماتّى 16:13-19؛ مارقوس 8:27-29)
18 يان واسّ، ئلّا سيدنا عيسى أر ئتژالّا غاس نتّا، ئلين ئمحضرّ نّس أݣّيدس داي يسقساثن ئنّاياسن: «مايد دا غيفي تّينين ميدّن مايد مسخ؟»
19 أها نّاناس: «ييتس دا تّينين: شݣّين سيدنا يحيى نّا دا يتغبّازن ݣ ـ وامان. أر تّينين ييتس ضنين: شݣّين نّبي إيليّا، ئيد وييّاض دا تّينين: شݣين يوكّ زݣ لانبيا ييمزوورا يكّرد زݣ لموث».
20 داي ينّاياسن: «ئي كونّي مايدا غيفي تّينينم؟» ئسيول بطرس ئنّاياس: «شݣّينثين أيد ئݣان لماسيح نّا ديوزن ربّي».
21 داي ينهرثن أد ؤر تّينين أينّا ئي ياود يوكّ.
22 أها ينّا: «هاثين لابدّا أد ئتّوكرفص ممّيس ن - بنادم شايݣان، أها ؤرث تّيحميلن ئخاثارّ ن - ووداين د - ئنمغورّ ن ـ ثدّارث ن ـ ربّي، د - ئسّلمادن ن - شّرع. أها يتّونغ ماشان ئدّا أدّ ئكّر زݣ لموث ݣ - واسّ ويسّ شّراض».
23 داي ينّاياسن ئي ميدّن كول: «ؤنّا يران أد ئيݣ أمسثفر ئنو، ئخصّاياس أد ئتّو يخف نّس، ياسي أحنيݣ ن ـ ؤطّورق a نّس كّوياسّ أها يثفاريي.
24 ئدّخ ؤنّا يران أد ئسراح ثودرث نّس، ئدّا أتّ ئزل، ئيد ؤنّا يوشان ثودرث نّس غيفي، ئدّا أد غورس ثيلي ثودرث ثارسليث.
25 ئدّخ مايداس ئنفع ئي بنادم مش ئربح دّونيث كول أها يزل ئخف نّس نغد ئيث ئخلا؟
26 هاثين ؤنّا ؤر ئسّي يقرّان ؤلا يقرّا س - واوال ئنو، ؤردا ييسّ ئتقرّا ممّيس ن - بنادم أدّاي ديدّو ݣ - لعزّ نّس د - لعزّ ن - ئبّاس د - لمالايكاث نّا صفانين.
27 سثيتّ أداون ئنيخ: هاثين لّان داد وينّا ؤر تّمثاثنين أرد أنّاين ثاݣلديتّ ن - ربّي».
أبدّل ن - سّيفث ن - سيدنا عيسى
(ماتّى 17:1-8؛ مارقوس 9:2-8)
28 أمّ ثمانيا ن - ووسّان فّير ن - مايد ئنّا سيدنا عيسى أياد، ئمون د - بطرس د - يوحنّا د ـ يعقوب، يالي غر عاري حما أد ئژّال.
29 لّيݣ أر ئتّژالّا، ياغول وودم نّس ئبدّل أها ملولن ئعبانّ نّس أر سفيقّيسن.
30 داي هان سينّ ن - ئرݣزن أر أݣّيدس تّمساوالن، نيثني: سيدنا موسى د - نّبي إيليّا،
31 فّغند س ـ لعزّ ن - ييݣنّا، قّيمين أر تّمساوالن خف لموث نّس ݣ - لقدس حما أد ئتّوشمّل ؤينّا يزمّم ربّي.
32 ييلي بطرس د ـ ئسمونّ نّس سّين ييويثن ؤنودّم، ماشان فافاند أها أنّاين لعزّ ن - سيدنا عيسى د - ئرݣزن سّين نّا بدّانين أݣّيدس.
33 لّيݣ ران ئرݣزن سّينّ أد دّون، ئنّاياس بطرس ئي سيدنا عيسى: «أسيدي، ئژيل دغي ݣ ـ نلّا داد. ندّا أنعديل شراطّ ن - ثنولين، يوث نّش، د - يوث ئي سيدنا موسى، د - يوث ئي سيدنا إيليّا». د - نتّا ؤر ئسّين مايد أر ئتّيني.
34 ئسول بطرس أر ئساوال، ثدّود يوث ن - ثسيݣنوتّ أها ثسمالو غيفسن، داي ݣّدن ئمحضرّ ليݣ أسن ثغمس.
35 ئسيولد يان واوال زݣ ثسيݣنوتّ ئنّاد: «واد أيد ئݣان ممّي نّا سثيخ، سّغاداث غورس!»
36 نتّا يفسثا واوال نّا، أفيننّ سيدنا عيسى يلّا غاس نتّا، داي سوسمن ؤر قّيسن ئي ياود يوكّ ݣ ـ لوقث نّا أود ئميقّ زݣ ؤينّا أنّاين.
سيدنا عيسى يجّوجوي أربا نّا ݣ - لّان وادجّنون
(ماتّى 17:14-18؛ مارقوس 9:14-27)
37 س - أسكّا نّس، ئضرد سيدنا عيسى د ـ ئمحضرّ نّس زݣ عاري أها نّالينثيد شايݣان ن - ميدّن.
38 داي يسغويّد يان ؤرݣاز زݣ جاج ن ـ ميدّن أر ئتّيني: «أسيدي، دا زّيكش تّتّرخ أتّراعاد ݣ ـ ممّي، هاثين غاس نتّا أي غوري،
39 داث ئسغار يان دجّن أر دا يسغويّو، أرث ئسّفريريس أرد زّيكس دّفّغن ئكلوفّا، أها ؤر داس ئرّوژوم أرد ئيݣ ئثرساون.
40 تّرخ زݣ ئمحضرّ نّش أد زّيكس ثسّوفغن، ئميل ؤر غين».
41 داي يسيول سيدنا عيسى ينّا: «ألجيل أنفراراغ وار ليمان! أر ميلمي أݣّيدون تّغيماخ؟ د ـ أر ميلمي ييكون تّساعافخ؟» داي ينّاياس ئي ورݣاز: «أويد ممّيش غر داد!»
42 نتّا يحادّز وربا غر سيدنا عيسى، ئنفطّ دجّن أر ئسفوروض، داي يژّع سيدنا عيسى دجّن أها يجّوجي أربا يرارث ئي يبّاس.
43 داي هبضن ميدّن كول ݣ - ؤينّامي يغي سيدي ربّي أخاثار.
سيدنا عيسى دا يساوال خف لموث نّس ثيلمرتّ ثيسّ سناث
(ماتّى 17:22-23؛ مارقوس 9:30-32)
سولن ميدّن كول هبضن ݣ ـ ؤينّا أر ئتݣّا سيدنا عيسى، ئنّاياسن ئي يمحضرّ نّس:
44 «راراث لبال نّون ئي ماي ريخ أداون ئنيخ: هان ممّيس ن - بنادم ئدّا أد ئتّوغدر».
45 ماشان ؤر فرين شا ݣ ـ ؤينّا ينّا ئدّخ ئتّوسنثل زّيكسن حما أد ؤرث تّيسينن، أها ݣّدن أث سقسان.
مامي يمقّور شّان؟
(ماتّى 18:1-5؛ مارقوس 9:33-37)
46 داي يكّر يان ؤمغانّا يينݣر ن - ئمحضرّ خف مان ديكسن أمي يمقّور شّان.
47 ماشان ئسّن سيدنا عيسى مايد ئلّان ݣ ـ وولاون نسن، داي ياويد يان ؤربا أمژّيان ئسبدّيث ثاما نّس،
48 أها ينّاياسن: «ؤنّا يرحبن ئي وربا أمژّيان أمّ واد ݣ ـ وودم ئنو، هاثين ئرحب ئسّي أود نكّين؛ د - وّنّا ييسّي يرحبن، هاثين ئرحب أود س ـ ؤنّا يي دّيوزنن. ئدّخ ؤنّامي ثنّام ديݣون ؤر ئواثا شا، نتّا أمي يمقّور شّان».
ؤنّا ؤر ئݣين أنضليب نّخ، ئݣا زّيݣنخ
(مارقوس 9:38-40)
49 ئسيول يوحنّا ينّاياس: «أياسّلماد، هاثين نانّاي يان ؤرݣاز أر يسّوفوغ أدجّنون س - ييسم نّش أها ؤرث نودّجي، ئدّخ ؤر ئݣي زݣ ئمسثفرّ نّش أمّ نوكني».
50 ماشان ينّاياس سيدنا عيسى: «حيداثاس ئدّخ ؤنّا ؤر ئݣين ضضّ نّون، هاثين ئݣا زّيݣون».
أيث سّاميرا ؤر قبيلن سيدنا عيسى
51 نتّا ثدّجاور لوقث نّاݣ غا يتّواسي سيدنا عيسى غر ئݣنّا، ئعوّل أد ئعيّن لقدس.
52 داي يازن ييتّس ن ـ ئمازانّ أد زويرن داثاس، أها دّون كشمن غر يان ثغرمتّ ݣ - ثمازيرث ن ـ سّاميرا حما أداس حبّلن ئي شان ثادّارث.
53 ماشان ؤراس رحيبن ئمزداغ ن ـ ثغرمتّ نّا ئدّخ سّنن ئيس ئعوّل أد ئدّو غر لقدس.
54 نتّا ينّاي يعقوب د ـ يوحنّا أينّا، أها نّاناس ئي سيدنا عيسى: «أمولانا، ئيس ثريد أنيني ئي لعافيث أدّ ثضر زݣ ييݣنّا خف ميدّن أد أها ثخلوثن؟»
55 داي يبرّم غورسن سيدنا عيسى، يفقّع غيفسن.b
56 داي دّون غر يوث ن ـ ثغرمتّ ياضن.
سيدنا عيسى ماد دّونيث
57 داي نتّا أر تّدّون ݣ - ؤبريد، ئنّاياس يان ؤرݣاز ئي سيدنا عيسى: «دّيخ أكّ ثفارخ دوكّ ماني غر ثدّيد».
58 أها ينّاياس سيدنا عيسى: «ئكعبن غورسن ئفران، د - ئجضاض غورسن لعشوش، ئيد ممّيس ن - بنادم ؤر غورس ئلّي أود ماني ݣ - ئتسنّاد أقرّو نّس».
59 داي ينّاياس سيدنا عيسى ئي يوكّ ضنين: «ثفاريي!» أها ينّاياس ؤرݣاز: «أسيدي، أدجّيي بعدا أد دّوخ أد مضلخ ئبّا».
60 داي ينّاياس سيدنا عيسى: «أدجّ ئمتّينّ أد مضلن ئمتّين نسن، ئيد شݣّين دّو برّح خف ـ ثݣلديتّ ن - ربّي».