10
سيدنا عيسى يوزن ثناين ؤسبعين ن - ؤمحضر
(ماتّى 10:7-15؛ مارقوس 6:8-11)
1 فّير ن - ؤينّا يسثي سيدنا عيسى ثناين ؤسبعين ن ـ ؤمحضر ضنين، أها يازنثن سينّ سينّ أث زويرن غر مايد ئݣان ثامدينث د - مايد ئݣان أدغار نّا غر ئعوّل أد ئدّو.
2 أها ينّاياسن: «ثامݣرا ثعدّا، ماشان دروسن ئشوّالن، ئوا تّراث ئي مولانا باب ن - ثمݣرا أدّ يازن ئشوّالن عدّانين غر ثمݣرا نّس.
3 ئوا دّوياث، هايي ؤزنخكون أم ئعلّوشن ئنݣر ن - ووشّان.
4 أد ؤر تّاسياث أݣيدون لفلوس، ؤلا ياخريض، ؤلا يبوركسن ئمشوياض؛ أد ؤر تسلاّماث خف أود يوكّ ݣ - ؤبريد.a
5 داي ثادّارث نّا غر ثكشمم، أها ثينيم ݣ - ثيزويري: "أزول خف أيث ثادّارث أد".
6 داي مش ديكس ئلّا ونّا يران لهنا، ئدّا أد غيفس دّيݣّز لهنا نّون، ئيد مش ؤر ديكس ئلّي، ئدّا لهنا نّون أد غورون دّياغول.
7 قّيماث ݣ - ثادّارث نّا غر ثكشمم أد ؤر زّيكس تّموتّياث، ثشّيم ثسويم أينّا غاون ؤشين، ئدّخ كول ؤنّا دا يخدّمن ئواثا ثيغراض نّس.
8 داي مش ثدّام غر شان ثمدينث أها رحبناون ميدّن نّس، ثشّيم أينّا غاون ؤشين،
9 ثجّوجيم ئموضينّ نّا ديكس لّانين أها ثينيم: "هان ثاݣلديتّ ن - ربّي ثقرّبد غورون".
10 ئيد مش ثدّام غر شان ثمدينث أها ؤر كون رين ميدّن نّس، فّغاث غر ئساراݣن نّس أها ثينيم:
11 "هان أود أݣضرور ن ـ ثمدينث نّون نّا ينّضن ݣ ـ ئضارّ نّخ داونث نتنقّار، ماشان ئسيناث ئيس تثقرّب غورون ثݣلديتّ ن - ربّي".
12 أداون ئنيخ: هان لحالث ن - ثمدينث ن - سادوم ݣ - واسّ ن - لحساب ثدّا أتّاف لحالث ن - ثمدينث نّا».
ثيمدينين نّا ؤر رينين أد أمننث
13 «أياعندا نّم أثامدينث ن - كورازين! أياعندا نّم أثامدينث ن - بيت صايدا! ئدّخ مور تّواݣّنث ݣ - صور د - صايدا لعجايب نّا ديكّنث ئتواݣن، أليݣ ثوبن ئمزداغ نسنث زݣ واهوّا، أها نسين ثيخنشيين، قّيمين أر زوزّورن ثينيفسث خف ئقرّا نسن حما أد سنعثن ئيس ثوبن.
14 ماشان ݣ - واسّ ن - لحساب، ثدّا لحالث ن - صور د - صايدا أتّوهين خف لحالث نكونث.
15 ئيد شمّينثين أثامدينث ن - كافرناحوم، ئس ثغالد ئيس ثدّيد أنّ ثاوضّ ئݣنّا؟ هاثين ثدّيد أتّضرد غر جاهنّام».
16 داي ينّا سيدنا عيسى ئي يمحضرّ نّس: «هاثين ؤنّا دا غورون ئسّغادن، دا غوري يسّغاد أود نكّين، د - ؤنّا ؤر كون ئرين، ؤري يري أود نكّين، د - ؤنّا ؤر ئي يرين، ؤر ئري أود ربّي نّا يي دّيوزنن».
ثناين ؤسبعبن ن ـ ؤمحضر أغولندّ
17 داي أغولندّ ئمحضرّ س - ثناين ؤسبعين فرحن، أها نّاناس ئي سيدنا عيسى: «أمولانا، هان أود أدجّنون داخ تّضاعن س - ييسم نّش».
18 أها ينّاياسن: «هاثين أنّايخ شّيطان ياتّويدّ زݣ ييݣنّا أم ووسم.
19 نكّين ؤشيخاون ثانباطّ نّاس غا تّعفاسم خف ئفيغراون د - ثغيرضام، ثيرّوم شّيطان أنضليب أها ؤر كون ئتّاغ أود ئميقّ.
20 ماشان أد ؤر تّفراحاث ئدّخ داكون تضّاعن وادجّنون، ماشان فرحاث ئدّخ تّوارين ييسماون نّون ݣ - ئݣنوان».
أفراح ن - سيدنا عيسى
21 داي يعمّر رّوح ن ـ ربّي سيدنا عيسى س - ؤفراح أها ينّا: «داش تّحمادخ أيبّا باب ن - ييݣنّا د - واشال، ئدّخ ثسّنثلد أياد خف أيث ثانژّي د - أيث ثوسّنا أها ثسنعتّ ئي ثسلمييوين. ئيّيه، أيبّا، ئدّخ ئمشيد أي ثريد.
22 ئوشايي يبّا ثانباطّ خف مايد ئݣان شا، ؤر ئلّي أود يوكّ ئسّنن سثيتّ ممّيس غاس ئبّاس، ؤلا يلّا ونّا يسّن سثيتّ ئبّاس غاس ممّيس، د - ؤنّامي يرا ممّيس أث ئسنعث».
23 داي يبرّم غر ئمحضرّ نّس أها ينّاياسن غاس نيثني: «أياعريتّ نّون ئدّخ ثانّايم أينّا دا تّانّايم!
24 أداون ئنيخ: شايݣان ن - لانبيا د - ئݣلّيدن أر تّينين أوايد يانّاين أينّا دا تّانّايم أها ؤر أنّاين شا، أها سّغدن ئي وينّامي دا ثسّغادم، ماشان ؤر سّغيدن ئي شا».
لقيسث ن - ؤسامري نّا ݣ - ثلّا رّحمث
25 يان واسّ ئرا يوكّ زݣ ئسّلمادن ن - شّرع أد ئجرّب سيدنا عيسى أها ينّاياس: «أياسّلماد، ماي تّݣّاخ حما أد كّوساخ ثودرث ن - وابدا ݣ ـ دّجنث؟»
26 أها ينّاياس: «ماي دا يتّيني شّرع ن ـ سيدنا موسى؟ ماي ديكس ثفريد؟»
27 داي ينّاياس ؤرݣاز: «ئخصّاياش أد تّيريد مولانا ربّي نّش س - وول نّش كول، د - س - رّوح نّش كول، د - س - ؤينّامي ثغيد كول، د - س - لعقل نّش كول، أها ثيريد أدّجار نّش أم ئخف نّش».
28 داي ينّاياس سيدنا عيسى: «سثيتّ أي ثنّيد. ئوا يݣ أياد داي ثيديرد».
29 ماشان ئرا ورݣاز أد ئسراح ئخف نّس أها ينّاياس ئي سيدنا عيسى: «ئي ماني ونّا يݣّان أدّجار ئنو؟».
30 ئرار غيفس سيدنا عيسى س ـ يوث ن ـ لقيسث ينّاياس: «ئلّا يان ؤرݣاز ئسرّحدّ زݣ لقدس غر أريحا، حاطّرناس ئقطّاطعين أها كشّضنث، ستّورسثنث، دّون زرينث ݣ ـ يير ن ـ ؤبريد ئنݣر ن - ثودرث د - لموث.
31 داي هان يان ووداي ئݣان أنبداد ن ـ ثدّارث ن ـ ربّي ئزري زݣ ؤبريد نّا. نتّا يانّايث، أها يانف غر ثمناط ضنين.
32 شوي ئدّود يوكّ زݣ أيث لاوي، نتّا ييوض غر ثاما نّس يانّايث، أها يانف غر ثمناط ضنين ن ـ ؤبريد ئدّو ييبردان نّس.
33 ماشان ئزري يوكّ زݣ أيث سّامرا (نّا ؤر أر تّيحميلن ووداين)، نتّا ييوضن غر ثاما ن ـ ؤرݣاز، يانّايث أها يسّنغيث ݣ - ثاسا.
34 ئتّوجي غورس، ئسودّماس شان زّيث د ـ شان وامان ن ـ واضيل خف ئثرساون نّس ياسّاسثن. أها يسنيث خف لبهيمث نّس ياويث غر يان لفندق ئتنهلّا ديكس».
35 «س - أسكّا نّس، ئوشاس ئي باب ن - لفندق سينّ ن ـ ئقّاريضن ن ـ نّقّرث أها ينّاياس: "تنهلّا ݣ ـ ؤرݣاز أد، داي مش غيفس ثسخسرد ؤݣار ن ـ ؤياد، دّيخ أداش ثخلّصخ أدّاي دّاغولخ"».
36 داي ينّاياس سيدنا عيسى ئي وسّلماد ن - شّرع: «ئوا مايداش ئضهرن؟ مان ديكسن ݣ - شراض أد أيد ئݣان أدجّار ن ـ وونّا خف ضرن ئقطّاطعين؟»
37 أها ينّاياس ؤسّلماد ن ـ شّرع: «ؤنّاس ئݣان رّحمث». داي ينّاياس سيدنا عيسى: «ئوا دّو أود شݣّينثين ثݣد أم وامشيد».
سيدنا عيسى ݣ - ثادّارث ن - مارثا د - مريم
38 ييلي سيدنا عيسى د ـ ئمحضرّ نّس ؤمژن أبريد غر لقدس، أوضنن غر يوث ن ـ ثغرمتّ، داي ثغراسن يوث ن - ثمطّوطّ ثلّا ثزدغ ديسّ ئسم نّس مارثا حما أد غورس دّون غر ثادّارث نّس.
39 ثيلي غورس يوث ن - ؤلثماس ئسم نّس مريم، ثقّيماياس ئي سيدنا عيسى غر ئضارّ أر ثسّغاد ئي ونّا أر ئتّيني.
40 ئيد مارثا، ثطّواعر ݣ - لعولث ن ـ ثدّارث. داي ثدّودّ مارثا غر سيدنا عيسى ثنّاياس: «أمولانا، ئس ؤر تّثيويد ݣ ـ ؤياد نّا يي ثݣا ولثما، ثودجّايي دا سّعوالخ غاس نكّين؟ ئوا يينياس أد ئي ثعاون!»