11
سيدنا عيسى د يحيى لمعمدان (ئتغبّازن ݣ وامان)
1 داي نتّا ئشمّل سيدنا عيسى ئواليون نّس ئ-ئمحضار نّس س تناعش، ئدّو زݣ سّيس حما أد ئسّغرا ئصيوض لخبار ئيـﮋلن ݣ تمدينين نسن.
2 ئد يحيى، أليݣ ئلّا ݣ لحبس، ئسلّا خف ئسكّين نّا ئݣا لمسيح، يازن ئيتسن زݣ ئمحضار نّس
3 أداس ئنين: «ئد شݣّين أيداخ ئقّانن أت نݣان أد ياغول، ماد أنݣانّ يون ياضن؟»
4 ئجاوبثن سيدنا عيسى، ئنّاياسن: «دّويات قّيسات يي يحيى أينّا مي تسلّام د ؤينّا تانّايم:
5 هان ئدرغالن داتّانّاين، د ئحيزان دا تدّون، د وينّا ݣ ئلّا لبرص دا تجّين، د ئضرضورن دا سّغادن، د ئمتّين دا تّكّرن، د ئمژلاض دا سغادن ئ-ينغميسن ژيلنين ن ربّي.
6 د أياعري نّس يي ونّا ؤر ديݣي ئشكّان».
7 داي نتّا دّان ئمحضار ن يحيى ئبردان نّسن، ئبدو سيدنا عيسى أر-ئساوال يي تربّاع خف يحيى: «ما غر تدّام أتّانّايم ݣ لخلا؟ ئد يون ن-ؤغانيم ئتّحرّاش ؤزݣو؟
8 ماشان ماغر تفّغم أتّانّايم؟ ئد يون ن-ؤرݣاز ئلسان ئعبان لوݣّاغنين؟ هاثين ݣ لقصورا ن-ئݣلّيدن أݣ لّان وينّا لسانين ئعبان لوݣّاغنين!
9 ماشان ما غر مي تفّغم أتّانّايم؟ ئد يون ن نّبي؟ أداون ئنيخ: يّيه، هات يوݣر نّبي.
10 هاثين واد أخف ئنّا مولانا ݣ لشثاب نّس: "هان نكّين أنّازنخ دات-اش أمازان ئنو، نّا ئدّان أد ئسّوجد ئ-وبريد نّش داثاش".
11 لحق أداون تّينيخ: هاثين ؤر دّيكّير ݣ وينّا لولانين زݣ تعيّالين ونّا يوݣرن يحيى ئيتغبّازن ݣ وامان، ماشان ونّا ئݣان أمژيان ݣ تݣلديت ن-ئݣنوان أتياݣر.
12 داي زݣ ووسّان ن يحيى أر دغي، لّان ميدّن لتّورزّون أد كشمن س لجهد غر تݣلديت ن-ئݣنوان. د وينّا جهدنين ران أتّاوين.
13 ئدّخ شّرع ن موسى د لانبيا كول نبأن غيفس ألّيݣ دّيدّا يحيى.
14 داي مش ترام أ-تّامنم، هاثين يحيى-ياد أيد ئݣان إيليّا نّا ئدّان أد ياغول.
15 ونّا غر لّان ئمجّان أد ئسّغد!
16 «ماغر مي سرويسخ أرّاو ن زّمان-اد؟ سّرويسخ تن يي ئتّس ن-ئشيرّان قّيمانين ݣ لسواق أر قّارن ئ-يمدّوكال نسن.
17 أر تّينين: "نوّتاون تاغانيمت ؤر تشطّيحم شا، نوّتاون أݣجدور ؤر تروم شا".
18 ئدّخ دّيدّا يحيى ؤر دا ئتتّا ؤر دايسّا، أر تّينين: سكنت وادجنون.
19 ئدّودّ ممّيس ن بنادم، دايتتّا أر ئسّا، أر تّينيم: "واد ئݣا يون ن-ؤرݣاز ئتتّين شيݣان أر ئسّا شّراب، أر ئتّمون د ئصنّاكّن د لمودنيبين". دا تضهار نزازيت زݣ لغلت نّس».
تيمدينين نّا ؤر ئحلين
20 داي ئبدو سيدنا عيسى ݣ لوقت نّا أر ئتلامّا ئمزداغ ن تمدينين نّاݣ ئݣا شيݣان ن لموعجيزات، ئدّخ ؤر توبن.
21 أها ئنا: «أياشم ياغن أتامدينث ن كورزين! أياشم ياغن أتامدينث ن بيت صيدا! ئدّخ مور تّواݣّنت ݣ تمدينث ن صور د تمدينث ن بيت صيدا لموعجيزات نّا ئتّواݣّن ديݣونت، ؤما توبن ئمزداغ نسنت زݣ واهلي أها لسين تيخنشيين أمسن ئغد.
22 ماشان أداون ئنيخ: هان لحالت ن تمدينث ن صور د تمدينث ن بيت صيدا أتّوهين ݣ واسّ ن لحساب خف لحالت نكونث.
23 ئد شمّين أتامدينث ن كافرناحوم! ئس تهزّات غر ئݣنّا؟ ئقّانشمين أد تاتّويت ݣ لهاويث ئدّخ مور تّواݣّنت ݣ تمدينث ن سدوم لموعجيزات نّا ئتّواݣّن ديݣم قنّا أتقّيم أر أسّاد.
24 ماشان داون تّينيخ: هان لحالت ن تمدينث ن سدوم أد توهين ݣ واسّ ن لعيقاب خف لحالت نّم».
أفراح ن سيدنا عيسى
25 داي ئنا سيدنا عيسى ݣ لوقت-نّا أها ئنّا: «داش تّحمادخ أ-مولانا، أ-باب ن-ئݣنّا د واشال، ئدّخ تسّنتلت ئسكين-اد خف أيت لحكما د-أيت لعقل أها تسنعتّ ئ-يشيرّان!
26 يّيه، أبّا نو، ئدّخ ئمشيد أيد دا ش-ئسفراحن.
27 ئتّونشفايي كولشي زݣ بّانو، ؤر ئلّي أود يون ئسّنن أربا غاس ئبّاس، د-أود يون ئسّنن ئبّاس غاس أربا، د ونّا ئرا ؤوربا أداس ئسضهر.
28 أدّوياد غوري كول أ وينّا ؤر ئحلين د وينّا مي ئستّول واݣا د نكّين أكن سّݣونفاخ.
29 حزمات ثاولوت ئنُو غيفون حما أد كون حريخ، ثحفضم أينّا تّينيخ، ئدّخ أضرافي أيد ݣيخ د وول ئنو ئژيل، أها ثافيم رّاحث ن لارواح نّون.
30 ئدّخ ثاولوت ئنو توهن د واݣا ئنو ئفسّوس».