7
أجّوجي ن - ئسمغ ن - ؤخاثار ن - لعسكر
1 نتّا يشمّل سيدنا عيسى أينّا أر ئتّيني ئي ميدّن، ئدّو غر ثمدينث ن - كافرناحوم.
2 ييلي ديسّ يان ؤخاثار ن - لعسكر ن ـ رّومان، ئلّا غورس يان ئسمغ ئعزّن غورس عنوݣا، داي ياغاسث شا ألّيݣ ييوض لموث.
3 نتّا يسلّا ؤخاثار ن - لعسكر ئي مايد أر تّينين ميدّن خف سيدنا عيسى، يازن غورس ييتس ن - ئخاثارّ ن - ووداين، ئتّر زّيكس أد دّيدّو حما أد ئجّوجي ئسمغ نّس.
4 نتّا ييوضنن ئمازانّ غر سيدنا عيسى، سحوژّرنث شايݣان نّاناس: «هاثين ئواثا ورݣاز أد أداس ثݣد أينّاش ئتّر،
5 ئدّخ هاثين دا يتّيري ميدّن نّخ، د ـ نتّا أيداخ ئبنان ثيمزݣيدا».
6 داي يمون سيدنا عيسى أݣّيدسن. نتّا يدجّاورنّ غر ثادّارث، يازندّ غورس ؤخاثار ن - لعسكر ييتّس ن - ئمدوكّال نّس ئنّاياسد: «أسيدي، غاس أد ؤر تشقّا ئخف نّش، ئدّخ هاثين ؤر واثاخ أدّ ثكشمد غر ثادّارث ئنو.
7 أياد أخف دا تّحاسابخ ئخف ئنو ؤر واثاخ أود أنّ دّوخ غورش، ماشان غاس ئني شان واوال داي يجّي يسمغ ئنو.
8 هاثين أود نكّين لّان غيفي ينبّاضن، ئلين غوري يعسكرين دا غيفسن تّنباضخ، دا تّينيخ ئي شا ديكسن: دّو! داي يدّو، ئنيخاس ئي وايّاض: أورا! أها يدّود، ئنيخاس ئي يسمغ ئنو: يݣ أياد! داي يݣيث».
9 نتّا يسلّا سيدنا عيسى ئي وياد، ئرعب ديكس داي يبرّم غر ميدّن نّا ثيد ئتفارن ئنّاياسن: «أداون ئنيخ: هاثين ؤر دجّين ؤفيخ أود يوكّ نّا غر ئلّا ليمان أمّ واد أود ݣ ـ ثاروا ن ـ إسرائيل».
10 نتّا ياغولن ئمازانّ نّا يوزن ؤخاثار ن ـ لعسكرغر ثدّارث، أفيننّ ئسمغ نّس ئجّي.
أسّيدر ن - ممّيس ن - ثمطّوط نّامي يمّوث ؤرݣاز
11 س ـ أسكّا نّس، ئدّو سيدنا عيسى غر يوث ن - ثمدينث ئسم نّس نايين، مونن أݣيدس ئمحضرّ نّس د ـ شايݣان ن - ميدّن.
12 نتّا ييوضنّ غر ثاما ن ـ ثݣّورث ن - ثمدينث، ئمناقّار د ـ ميدّن ؤسيند أسبدر ن ـ يان ؤعرّيم ئمّوث، ئݣا أفرضي غر مايس ثيلي يمّوثاس ؤرݣاز، مونند أݣيدس شايݣان ن - ميدّن زݣ ثمدينث.
13 نتّا يانّايتّ سيدنا عيسى، ثسّنغيث ݣ - ثاسا أها ينّاياس: «أد ؤر تّرو!»
14 ئتّوجي غر أسبدر ياژض غيرس، داي بدّين وينّا ثوسينين. أها ينّاياس ئي وعرّيم نّا يمّوثن: «أياعرّيم، داش تّينيخ: كّر!»
15 ئݣّيور ؤمتّين ئقّيم أر ئساوال، أها يرارث سيدنا عيسى ئي مايس.
16 داي ݣّدن ميدّن كول، أر تمجّادن ربّي أر تّينين: «هاياون يان نّبي أخاثار ئدّاد غورخ، هاثين ؤر ئتّو ربّي ميدّن نّس!»
17 داي يساقّا ؤنغميس أد خف سيدنا عيسى ݣ - ثمازيرث ن - أيث ياهودا س ـ ماس ثلّا د - ݣ ـ ثميزار نّا لّانين ثانيلا نّس.
سيدنا عيسى د - سيدنا يحيى نّا دا يتغبّازن ميدّن ݣ - وامان
18 كّرن ئمحضرن ن - سيدنا يحيى قّيسناس أياد كول نّا يݣا سيدنا عيسى. داي يغردّ ئي سين زّيكسن
19 يازنثن غر سيدنا عيسى حما أث سقسان: «ئيد شݣّين أيد ئݣان لماسيح نّا نّيقّن أدّ ئدّو ماد أنعاين شان يوكّ ضنين؟».
20 دّون ئمحضرّ ن ـ سيدنا يحيى سّين غر سيدنا عيسى نّاناس: «هاثين يوزناخدّ غورش سيدنا يحيى نّا دا يتغبّازن أش نسقسا: "ئيد شݣّينثين أيد ئݣان لماسيح نّا نّيقّن أدّ ئدّو ماد أنعاين شان يوكّ ضنين؟"».
21 داي ݣ - لوقث نّا س ـ ئخف نّس، ئجّوجي سيدنا عيسى شايݣان ن - ميدّن نّا ݣ ـ لّان شايݣان ن ـ ييغنشاثن، ئسّوفغ أدجّنون زݣ وينّاݣ لّان، ئرارد ئژري ئي شايݣان ن - ئدرغالن.
22 داي ينّاياسن سيدنا عيسى ئي يمحضرّ ن ـ سيدنا يحيى: «دّوياث غر أسّلماد نّون ثقّيسماس أينّا ثانّايم د - ؤينّا مي ثسلّيم، هان ئدرغالن دا تّانّاين، د - ئحيزان دا تّدّون، د - وينّا يتشّا لبرص دا تجّين، د - ئضرضار دا تسلّان، د - ئمتّين دا تكّرن زݣ لموث، د - ئمژلاض دا سّغادن ئي ينغميسن ژيلنين خف ربّي.
23 أياعريتّ ن - ونّا ؤر ديݣي يشكّان».
24 نتّا دّان ئمازانّ ن - سيدنا يحيى، ئقّيم سيدنا عيسى أر ئساوال ئي ميدّن خف سيدنا يحيى ينّاياسن: «لّيݣ غورس ثدّام غر لخلا، ماي ثانّايم؟ ئيد شان ؤغانيم نّا دا يتّاوي وزݣو؟
25 ئوا ماخف أر ثورزّوم؟ ئيد ئيس ثعوّلم أتّانّايم شان ؤرݣاز نّا ينسان ئعبان نّا لݣّاغنين؟ هان وينّا نسانين مرسيواث غودانين أها برّعن لّان ݣ - لقصور ن ـ ئݣلّيدن!
26 ئوا ماخف أر ثورزّوم؟ ئيد شان نّبي؟ يّيه، أداون ئنيخ: هاثين ؤݣار ن - نّبي أيد ئݣا.
27 سيدنا يحيى أخف ئتّياري ݣ ـ لشثاب ن ـ ربّي: دّيخ أنّ أزنخ أمازان ئنو داثاش أداش ئحبّل ئي وبريد.
28 أداون ئنيخ: هاثين ؤر ئلّي ينݣر ن ـ ميدّن كول ؤنّا يوݣرن سيدنا يحيى، ماشان أمژّيان كول ݣ - ثݣلديتّ ن - ربّي يوݣرث».
29 نتّا سلّان ميدّن كول ئي وياد، أود ئصنّاكن ئغشّاشن س - ئخفاون نسن، نّان ئمنا وبريد ن - ربّي ئدّخ ثنيد يوفا لحال ئغبّزثن سيدنا يحيى ݣ ـ وامان.
30 ئيد ئفرّيسين د - ئسّلمادن ن - شّرع، ؤر رين أينّاسن ئرا ربّي، داي ؤر رين أثن ئغبّز سيدنا يحيى ݣ ـ وامان.
31 سيدنا عيسى ينّا: «ماغر سّرويسخ ثاروا ن ـ لوقث أد؟ مايد رويسن؟
32 ݣان أمّ شان ثربيعث ن - ئشيرّان قّيمانين ݣ - رّحبث ن ـ سّوق، أر تّمغران ئنݣراتسن أر تينين: "نݣاياون أحيدوس، أها ؤر ثشطّيحم، نووّثاون أݣجدور، أها ؤر ثروم"».
33 «ئدّخ ديدّا سيدنا يحيى ؤر أر ئتتّا أغروم ؤلا أر ئسّا شّراب، أها ثنّام: "ئلّا ديكس دجّن!"
34 ئدّود ممّيس ن - بنادم أر ئتتاّ أر ئسّا، أها ثنّام: "أرݣاز أد ؤر دا يتّياوان زݣ ووتّشي أر ئسّا شّراب، أر ئتّمون د ـ ئصنّاكن د - وينّا عصانين ربّي".
35 ماشان ثانژّي ن - ربّي دا تّيضهير ݣ ـ وينّا ثفارنين أبريد نّس».
سيدنا عيسى يسامحاس ئي ثمطّوطّ نّا يفسدن
36 ئغرا يان ؤفرّيسي ئي سيدنا عيسى حما أد غورس ئتّش. داي يدّو سيدنا عيسى يكشم غر ثادّارث ن - ؤفرّيسّي يسنّد غر ثاما لميدا.
37 ثيلي ݣ - ثمدينث نّا يوث ن - ثمطّوطّ ئفسدن. لّيݣ ثسّن ئيس ئلّا سيدنا عيسى ݣ - ثادّارث ن - ؤفرّيسي، داي ثدّود، ثاويدّ يوث ن - ثالبوشت ن - زّهر نّا يغلان،
38 أها ثوث خف ئفادّن نّس فّير ن ـ سيدنا عيسى ثقّيماس غر ئضارّ أر تّرو، ثسفالّ أراس ثسّبزوي يضارّ س - ئمطّاون نّس، أراسثن ثن ثسّفض س - ؤشكوك نّس، أراس ثسّودوم ئضارّ أراسن تّامس زّهر.
39 لّيݣ يانّاي ؤفرّيسي نّاس ئغران أينّا، ئسيول ئنݣراس د - ئخف نّس أها ينّا: «مور ئݣي ؤرݣاز أد نّبي أها سثيتّ يوزنثيد ربّي، أليݣ ئسّن مايد ثمس ثمطّوط أد نّا دا غورس ئطّاژضن د - ميمش أيد ثݣّا ثودرث نّس، ئدّخ ثݣا ثامطّوط ئفسدن!»
40 ئسيول سيدنا عيسى ينّاياس: «أسيمعان، ريخ أداش ئنيخ شا». ئنّاياس سيمعان: «واخّا أياسّلماد، ئني أينّا ثريد».
41 داي ينّاياس: «ئلّا يان ؤرݣاز ئرضلن لفلوس ئي سين ن - ميدّن. ئرضل ئي يوكّ خمسيّا ن ـ ؤقّاريض ن ـ نّقّرث، ئرضل ئي وايّاض خمسالاف.
42 نتّا ؤر غورسن ئلّي ماس أس تّراران أمرواس، داي يسامحاسن سّين نسن. ئوا يينيي، مان ديكسن أيد ئدّان أث ييرين ؤݣار؟».
43 ئرارغيفس سيمعان ئنّاياس: «عينخ ؤنّا مي يسامح ݣ - شايݣان ن ـ لفلوس». داي ينّاياس سيدنا عيسى: «سثيتّ أي ثنّيد».
44 ئبرّم غر ثمطّوطّ أها ينّاياس ئي سيمعان أفرّيسي: «راعا ݣ ـ ثمطّوط أد، لّيݣ دّكشمخ غر ثادّارث نّش ؤر ئي ثوشيد أود أمان أد سّيردخ ئضارّ ئنو زݣ ؤݣضرور، ئيد ثامطّوط أد هاثين ثسّيرديثن س - ئمطّاون نّس، أها ثسفضيثن س - ؤشكوك نّس.
45 أود أسلّم ؤر غيفي ثسلّيمد، ئيد نتّاث زݣّوس دّكشّمخ ؤر ثرصّا زݣ ؤسّودم ن - ئضارّ ئنو.
46 شݣّين ؤر ثوميسد أود شان زّيث ئي وقرّو نو، ئيد نتّاث ثومس زّهر ئي يضارّ ئنو.
47 خف ؤياد أداش ئنيخ: هاثين تّوغفرنثاس لمعصيّاث نّس نّا عدّانين، أينّا خف مي يي ثسنعث أنشثيد ن ـ ثايري؛ ماشان ؤنّا مي يتّوغفر شا يدروسن، دا يسنعاث غاس شوي ن ـ ثايري».
48 داي ينّاياس ئي ثمطّوطّ: «هاثين تّوغفرنثام لمعصيّاث نّم».
49 قّيمين وينّا لّانين أݣيدس غر لميدا أر تّينين ݣ - ئخفاون نسن: «مايد ئغال واد ݣ ـ ئخف نّس ألّيݣ دا يتّغفار ئي ميدّن لمعصياث نسن؟»
50 أها ينّاياس ئي ثمطّوطّ: «هان ليمان نّم ئفوكّاشم، مون د - لمان!»