6
مايد ئزرين أد ئتّواݣ س - واسّ ن - سّبث
(ماتّى 12:1-8؛ مارقوس 2:23-28)
1 يان واسّ ن - سّبث، ئكّا سيدناعيسى ئنݣر ن - ييݣران ن - ئمندي، قّيمين ئمحضرّ نّس أر تكّسن ئبورخصن أر ثن سفروروين س - ئفاسّن نسن أر ثن تتّين.
2 داي نّاناسن ييتّس ن - ئفرّيسين: «مّاخ ألّيݣّ دا تّݣّام أينّا يسّحرم شّرع ݣ - واسّ ن ـ سّبث؟»
3 ئرار غيفسن سيدنا عيسى ينّاياسن: «ئس ؤر ثقرام ݣ ـ لشثاب ن ـ ربّي مايد ئݣا سيدنا داود لّيݣ ثينغا لاژّ نتّا د ـ ئسمونّ نّس؟
4 ئكشم غر ثادّارث ن - ربّي، ياسي أغروم نّا يتّواݣن د ـ ثوكّي ئي ربّي، نّامي ؤر ئزري ووتشّي نّس غاس ئي ينبدادن ن ـ ثدّارث ن ـ ربّي، أها يتشّ زّيكس ئوش أود ئي يسمون نّس».
5 أها ينّاياسن ألثو: «هاثين ممّيس ن - بنادم أيد ئݣان باب ن - سّبث».
أجّوجي ن - ؤكوشام
(ماتّى 12:9-14؛ مارقوس 3:1-6)
6 يان واسّ ن ـ سّبث ضنين، ئكشم سيدنا عيسى غر ثمزݣيدا ن - ووداين ئقّيم أر ئسّقرا ميدّن. يافد لحال ديسّ يان ؤرݣاز نّامي يكّوشم ؤفوس أفاسي.
7 داي حضونث ئسّلمادن ن - شّرع د - ئفرّيسين حما أد راعان ئيد أد ئجّوجي أرݣاز نّا س ـ واسّ ن ـ سّبث، بار أد غيفس أمژن شان سّيبّث نّا خف أس تدعون.
8 ماشان ئسّن سيدنا عيسى أينّا دمان ݣ - لاعقّول نسن، داي ينّاياس ئي وكوشام: «كّر بدّ ݣ - وامّاس!» أها يكّر ئبدّ.
9 داي ينّاياسن سيدنا عيسى: «ريخ أكون سقساخ خف يان ؤسكين: ئس ئحلّا أنݣ أينّا يژيلن ݣ - واسّ ن - سّبث ماد أينّا ؤر ئحلين؟ ئيس ئحلّا أنفوكّا بنادم زݣ لموث ماد أث ناّدجّ أد ئمّث؟»
10 ئحقّا ديكسن كول يوكّ س ـ يوكّ، أها ينّاياس ئي ورݣاز: «أژضدّ أفوس نّش!» نتّا يوژطّيد، ياغول ؤفوس نّس ئطّعنا.
11 داي يطيّراسن عنوݣّا، قّيمين أر تمداشارن ئنݣراتسن خف مايداس تّݣّين.
سيدنا عيسى دا يستّي ئمازانّ نّس س - ثناعشّ
(ماتّى 10:1-4؛ مارقوس 3:13-19)
12 يان واسّ ضارث ن ـ ؤينّا، يالي سيدنا عيسى غر عاري حما أد ئژّالّ، أها يقّيم ئض مايد ئلا أر ئتزّالا ئي ربّي.
13 نتّا ئفّو لحال، ئغرد ئي يمحضرّ نّس، ئسثي زّيكسن ثناعش ئݣاسن ئسم ن ـ ئمازانّ:
14 سيمعان نّامي يݣا بطرس، د - ݣماس أندراووس، د - يعقوب، د - يوحنّا، د ـ فيليبّوس، د - بارتولماووس،
15 د - متّى، د - توما، د - يعقوب ممّيس ن - حالفا، د - سيمعان نّامي دا تّينين أمجاهد،
16 د - ياهودا ممّيس ن - يعقوب، د - ياهودا ئسخريوطي نّا ثيغدرن فّير ن ـ ؤينّا.
سيدنا عيسى دا يسّلماد أر ئجّوجوي
17 داي يسرّح أݣيدسن سيدنا عيسى، ئبدّ ݣ - يان واسكار. ئلين ديسّ شايݣان زݣ ئمحضرّ نّس د ـ يان ؤربيع أخاثار ن - ميدّن زݣ مايد ئݣان ثانيلا ݣ - ثمازيرث ن - أيث ياهودا د - زݣ لقدس، د ـ زݣ يير ن - لبحر نّا ݣ - ثلّا صور د - صايدا،
18 دّاند ران أد سّغدن ئي واوال نّس، تّوجّوجين زݣ ييغنشاثن نسن. أها تّجّوجين أود وينّا أر تّوهوّالنين س - وادجّنون ؤعرنين.
19 داي أر ؤرزّون ميدّن كول بار أد غورس أژضن ئدّخ أر زّيكس ديتّفّغ يان جّهد نّا أر ثن ئجّوجوي كول نسن.
لباراكاث د - ثرݣّام
20 داي يبرّم سيدنا عيسى غر ئمحضرّ نّس، أها ينّا: «أياعريت نّون أييمژلاض ئدّخ ثݣا ثݣلديتّ ن - ربّي ثينّون!
21 أياعريت نّون أوينّا ينغا لاژّ دغي، ئدّخ كونينّ ئقّان أتدجّاونم. أياعريت نّون أوينّا دا تّرونين دغي، ئدّخ كونين ئقّان أتّصّيم.
22 أياعريت نّون مش ؤر كون حميلن ميدّن أها ؤر كون رين أر كون رݣمن، أها أر كون تحقّارن ئدّخ دا تّامنم س - ممّيس ن - بنادم.
23 فرحاث ݣ - واسّ نّا أها ثصرورّيم،a ئدّخ ئدّا لاجر نّون أد ئمغور ݣ - ييݣنّا. هاثين أمشيد أيد أر تݣّان أود لجدود نسن ئي لانبيا.
24 ماشان أياكون ياغن أوينّا طرّحنين، ئدّخ ثفرحم أينّا كونينّ ئقّان دغي.
25 أياكون ياغن أوينّا دجّيونّين دغي، ئدّخ ئقّنن أكون ئنغ لاژ، أياكون ياغن أوينّا تصّينين دغي، ئدّخ كونين ئقّان أداون ئنّيري أها ثروم.
26 أياكون ياغن مش دا ييسّون سّمغورن ميدّن، ئدّخ أود لجدود نسن أر سّمغورن س ـ لانبيا ن - ثحلّال».
ئرياث ئنضليبن نّون
27 «ماشان أداون ئنيخ أوينّا دا سّغادنين: ئرياث ئنضليبن نّون، ثݣيم لخير ئي وينّا ؤر كون حميلنين،
28 ثتّرم ئي ربّي أد ئيݣ لباراكا ݣ ـ وينّا دا كون رݣّمنين، ثتّرماس زݣ ثنيلا ن - وينّا داون تݣّينين لعار.
29 ؤنّاش ئوّثن س ـ ؤباريق غر أݣّاي نّش، ثبرّمداسد أود وايّاض، د - ؤنّاش ييوين أژنّار نّش، ثادجّت أد ياوي أود ثاقبّوت نّش.
30 ؤنّاش ئتّرن شا، ثوشداسث، د - ؤنّاش ييوين أيدّا نّش، أد ؤر أسث تتّر.
31 ئوا تݣّاواث ئي ميدّن أكيس ثرام أداون ثݣين».
32 «مش دا تّيريم غاس وينّا دا كون تّيرينين، ماتّا لفضل نّا غورون ئلّان؟ ئدّخ هان أود وينّا عصانين ربّي دا تّيرين وينّا دا ثن تّيرينين.
33 داي مش دا تّݣّيم لخير غاس ئي وينّا دا ونث تّݣّينين، ماتّا لفضل نّا غورون ئلّان؟ ئدّخ هان أود وينّا عصانين ربّي دا تݣّين ئمشيسّ.
34 مش ثرضلم غاس ئي وينّا مي ثعوّلم أداون رارين، ماتّا لفضل نّا غورون ئلاّن؟ ئدّخ هان أود وينّا عصانين ربّي دا رطّلن ئي وينّا عصانين حما أداسن رارين أينّاسن رضلن.
35 ماشان ئرياث ئنضليبن نّون، أها ثيژيلم أݣيدسن، رضلاث أها ؤر تعوّالاث أداون ئتّورار، داي يوعدّو لاجر نّون أها ثݣيم أراو ن - ؤنافلّا، هاثين نتّا دا ياكّا أود ئي وينّا ؤر داث تّحمادنين د - ئي وينّا خّانين.
36 ئوا تݣّاواث رّحمث ئي ميدّن ئمشينّا ئݣا ربّي بّاثون بو رّحمث».
أد ؤر تحكاماث خف ميدّن
37 «أد ؤر تّحاساباث أود يوكّ حما أد ؤر كون ئتّحاساب ربّي. أد ؤر حكّماث خف أود يوكّ حما أد ؤر غيفون ئحكّم ربّي. تّساماحاث حما أداون ئسامح ربّي.
38 ؤشاث، ئتّمّوشاون: ثوكّي نّون ثدّا أداون ثتّورار س ـ يان لعبار ئستسّان ئدزّان س - ووزّور، ئتّوسرساون ݣ - ئشيمي، ئدّخ لعبار نّاس دا تّعبارم ئي وييّاض أس غاون ئتّوعبر».
39 أها ينّاياسن أوال أد: «ئيد أد ييغي ؤدرغال أد يامژ أفوس ئي ودرغال؟ ئس ؤر دّين أنّ تّوتّين سّين نسن ݣ - شان ؤحفور؟
40 هاثين ؤر ئلّي ومحضر نّا يوݣرن أسّلماد نّس، ماشان ؤنّا يشمّلن ألمّود نّس كول أد ئݣ أمّ ؤسّلماد نّس».
41 «ماخ ألّيݣ دا تّانّايد أحشلاف نّا يلّان ݣ - ثيطّ ن - ݣماش، أها ؤر دا تّاشيد د - ؤحنيݣ نّا يلّان ݣ - ثيطّ نّش؟
42 نغد ميمش أيد تّيغيد أتّينيد ئي ݣماش: أݣما، أدجّيي أد سّوفغخ أحشلاف نّا يلّان ݣ - ثيطّ نّش، د - شݣّين ؤر دا تّانّايد أحنيݣ نّا يلّان ݣ - ثينش؟ ألمونافيق، سّوفغ بعدا أحنيݣ زݣ ثيطّ نّش حما أتسّيدّد أتسّوفغد أحشلاف نّا يلّان ݣ - ثيطّ ن - ݣماش».
أسكلو د - لغلّث نّس
43 «هاثين ؤر ئلّي أود يان ؤسكلو يژيلن نّا دا يتّارون لغلّث نّا ؤر ئحلين، ؤلا يلّا شان ؤسكلو نّا ؤر ئحلين نّا دا يتّارون لغلّث ئژيلن،
44 ئدّخ كّو أسكلو يتّواسّن زݣ لغلّث نّس. هاثين ؤر دا نتّكّس ئقورّان زݣ ئسنّان ؤلا نكّس أضيل زݣ شرّمو.b
45 بنادم نّا يژيلن دا ديسّوفوغ أينّا يژيلن زݣ ـ وول نّس نّا يژيلن، د - بنادم نّا ؤر ئحلين دا ديسّوفوغ أينّا ؤر ئحلين زݣ ـ وول نّس نّا ؤر ئحلين، ئدّخ أقمو دا يساوال س ـ ؤينّا يلّان ݣ ـ وول».
لبني خف ؤقشمير
46 «ما خف دا يي ثقّارم: "أمولانا، أمولانا"، د - كونّي ؤر دا تّݣّام أينّا داون تّنيخ؟
47 كول ؤنّا دا غوري دّيتدّون ئسّغد ئي واوال ئنو أها أر ئيسّ ئتّݣّا أداون ئنيخ مايد ئرويس:
48 ئرويس يان ؤرݣاز نّا يبنان يوث ن - ثادّارث، ئغز ئسّغبو ئيݣ لّساس خف ؤقشمير، نتّا ثدّاد لحملث ن - واسيف ثنشل ثادّارث نّا، داي ؤر زّيكس ثيوي شا ئدّخ ئلّا لساس نّس خف ؤقشمير.
49 ئد ونّا دا يي يسّغادن أها ؤر دا يتّݣّا س - واوال ئنو، ئرويس يان ؤرݣاز نّا يبنان ثادّارث نّس خف واشال ؤراس ئݣي لّساس، نتّا ثنشلتّ لحملث ن ـ واسيف، دغيا ثاتّوي ؤر زّيكس ئقّيمي شا».