5
سيدنا عيسى ئسثي ئمحضرن نّس ئمزوورا
(ماتّى 4:18-22؛ مارقوس 1:16-20)
1 يان واسّ ئلّا سيدنا عيسى ئبدّا ثاما ن - ؤݣلمام نّا مي دا تّينين جانّيسارث، أر غيفس تّمثحاين ميدّن حما أد سّغدن ئي واوال ن - ربّي.
2 شوي يانّاي سناث ن - ثغرّوبا بدّانث ݣ - ئميسّي ن - ؤݣلمام، فّغند زّيكسنث ئصيّاضن حما أد سّيردن ثيراتسّيوين نسن.
3 داي يني سيدنا عيسى ݣ ـ يوث زّيݣسن، ݣ ـ ثنّا يݣان ثين سيمعان، ئتّر زّيكس أتّيسوشّم شوي غر جاج ن - وامان. ئقّيم أرد ئساوال ئي ميدّن زݣ جاج ن ـ ثغرّابوت.
4 نتّا يشمّل أوال نّس، ئنّاياس ئي سيمعان: «كشم غر أدغار نّا يغبان، ثݣريم ثيراتسّيوين نّون أد ثصّيّضم».
5 داي ينّاياس سيمعان: «أسيدي، هاثين نوحل ألّ يوفو نتصيّاض، أها ؤر نوميژ شا، ماشان دغي ݣ ـ ئي تنّيد، دّيخ أد ݣرخ ثيراتسّيوين».
6 ݣين أينّاسن ئنّا سيدنا عيسى أها أمژن شيݣّان ن - ئسلمان ألّيݣ رانث ثراتّسيوين نسن أد بينث.
7 شيّرن ئي يسمونّ نسن نّا نّلّانين ݣ - ثغرّابوت ياضن حما أد دّون أداسن عاونن. داي دّوند أها عمّرن ثيغرّوبا سّناث ألّيݣ رانث أد غلينث.
8 نتّا يانّاي سيمعان بطرس أينّا، داي يبندق داث ن - سيدنا عيسى أها ينّاياس: «دّو زّيݣي أمولانا! هاثين ݣيخ أرݣاز ئعصان ربّي».
9 داي يهبض نتّا د - ئسمونّ نّس كول ئدّخ ؤمژن شايݣان ن - ئسلمان.
10 أود يعقوب د - يوحنّا أراو ن - زابادي نّا أمّونين د - سيمعان ݣ ـ ؤغرّابو هبضن، داي ينّاياس سيدنا عيسى ئي سيمعان: «غاس أد ؤر تݣّد، زݣ واسّا ثدّيد أد تصيّادّ ميدّن».
11 نتّا حريندّ ثيغرّوبا سّناث غر ثاغارث، زرين كولشي أها ثفارن سيدنا عيسى.
أجّوجي ن - ونّا ݣ - ئلّا لبرص
(ماتّى 8:1-4؛ مارقوس 1:40-45)
12 يوث ن ـ لمرث ئلّا سيدنا عيسى ݣ - يوث ن - ثمدينث، ئمناقّار د ـ يان ؤرݣاز نّا مي يتّشا لبرص صّاحث. نتّا يانّاي سيدنا عيسى، أها يتّوتّي س ـ أشال ئحودر داثاس أها يسحوژّرث ئنّاياس: «أسيدي، مش ثريد هاثين ثغيد أد ئي ثجّوجيد!»
13 ياژض سيدنا عيسى أفوس نّس ئسّيغث أها ينّاياس: «ريخ، ئوا زديݣ!» ݣ ـ وانسا يجّي ورݣاز ئكّساس لبرص.
14 داي يوصّاث سيدنا عيسى ينّاياس: «أد ؤر تّيني أياد ئي ياود يوكّ، ماشان دّو سنعث ئخف نّش ئي ونبداد ن ـ ثدّارث ن ـ ربّي، ثاويد أݣيدش ثوكّي ئي ربّي خف ؤجّوجي نّش أم ؤينّا يلّان ݣ ـ شّرع ن ـ سيدنا موسى، حما أداسن ئيݣ ؤينّا ثماثارث كول نسن خف ثوجيث نّش».
15 واخّا أمشيسّ، أر ئتساقّا ؤنغميس ن ـ ثنباطّ نّس ؤݣار، أها أر غورس تدّون شايݣان ن - ميدّن أد سّغدن ئي وسّلمد نّس، تّوجوجين زݣ ييغنشاثن نسن.
16 ماشان نتّا أر ئتدّو غر لخلا حما أد ئژّال غاس نتّا.
أجّوجي ن - ؤفوشال
(ماتّى 9:1-8؛ مارقوس 2:1-12)
17 يان واسّ ئلّا سيدنا عيسى أر ئسّلماد ميدّن، ئلين ييتس ن - يفرّيسين د - ئسّلمادن ن - شّرع ن - ووداين حاضرن، دّاند زݣ مايد ئݣان ئغرم ݣ ـ ثمازيرث ن - لجاليل د - ثمازيرث ن ـ أيث ياهودا، د - زݣ لقدس. أها يوشاس مولانا جّهد أخاثار ئي سيدنا عيسى حما أد ئجّوجي ئموضينّ.
18 شوي هان ييتس ن - ميدّن ؤسيند يان ؤرݣاز ئفوشلن زݣ ئضارّ ݣ ـ ثيسّي، أها أر ؤرزّون بار أث سّكشمن حما أث سيرس داث ن ـ سيدنا عيسى.
19 نتّا ؤر ؤفين ماني زݣ ئيث سيكّان ئدّخ ئعدّا لغاشي، أها سّيلينث غر أفلاّ ن - ئغرم، كّسن شان ثاطّوبيّاثين زݣ - سّقف، أها سّݣّلولانثيد س - ثيسّي نّس غر أمّاس ن - ميدّن داث ن - سيدناعيسى.
20 نتّا يانّاي سيدنا عيسى ليمان نسن أها ينّاياس ئي وفوشال: «أيارݣاز، هاثين تّوغفرنثاش لمعصيّاث نّش».
21 داي قّيمين ئسّلمادن ن - شّرع د - ئفرّيسين أر تّينين ݣ ـ ئخفاون نسن: «مايد ئمس ؤرݣاز أد دا يساوالن س ـ لكوفر، هاثين غاس ربّي ييويل نّس أيد ئغين أد ئغفر لمعصيّاث!»
22 داي ياشي سيدنا عيسى د - ؤينّا دمان، أها ينّاياسن: «ماخ ألّيݣ ثدمام أينّا ݣ ـ وولاون نّون؟
23 مايد ئوهنن، أد ئنيخ: تّوغفرنثاش لمعصيّاث نّش ماد أد ئنيخ: بدّ أر تدّود؟
24 ماشان دّيخ أداون سنعثخ ئيس ثلّا ثنباطّ غر ممّيس ن - بنادم خف واشال حما أد ئغفر لمعصياث». داي ينّاياس ئي وفوشال: «داش تّينيخ: كّر بدّ، أسي ثيسّي نّش ثدّود غر ثدّارث نّش!»
25 أها يكّر ݣ ـ وانسا داثاسن، ياسي أينّا خف ئمحض ئدّو غر ثادّارث نّس أر ئتّمجّاد ربّي.
26 داي هبضن كول نسن أها ݣّدن، قّيمين أر تمجّادن ربّي أر تّينين: «هاثين نانّاي لعجايب أسّاد».
سيدنا عيسى ئسثي يان ؤصنّاك
(ماتّى 9:9-13؛ مارقوس 2:13-17)
27 فّير ن ـ ؤينّا، يفّغ سيدنا عيسى أها يانّاي يان ؤصنّاك ئسم نّس لاوي يلّا ئقّيما ݣ - وانسا نّاݣ دا يتّامژ صّنك، داي ينّاياس: «ثفاريي!»
28 ئكّر لاوي يادجّ كولشي ئثفارث.
29 أها يݣاس لاوي ئي سيدنا عيسى يوث ن - زّردا ثاخاثارث ݣ - ثادّارث نّس، ئلين أݣّيدسن شايݣان ن - ئصنّاكن د - ئنݣباون ضنين.
30 داي كّرن ئفرّيسين د - ئسّلمادن ن - شّرع أر تلامّان ئمحضرّ ن ـ سيدنا عيسى نّاناسن: «مّاخ ألّيݣ دا تتّام أر ثسّام د - ئصنّاكن د - وينّا عصانين ربّي؟».
31 أها يرار غيفسن سيدنا عيسى ينّاياسن: «هاثين غاس ئموضين أيدا ئتّحدادجّان أضبيب، ؤريد وينّا صحانين.
32 نكّين ؤرد دّيخ أد غرخ ئي وينّا منانين حما أد ثوبن، ماشان ئي وينّا عصانين».
أژوم
(ماتّى 9:14-17؛ مارقوس 2:18-22)
33 أها نّاناس: «ئمحضرّ ن - يحيى د - وين ئفرّيسين دا تّاژومن أر تژالّان شايݣان، ئيد ئمحضرّ نّش غاس دا تتّان أر سّان».
34 داي ينّاياسن سيدنا عيسى: «ئيس دا تّاژومن ئنبݣيون ن - ثمغرا أدّاي ييلي يسلي أݣّيدسن؟
35 ماشان ثدّا أدّ ثدّو لوقث نّاݣ زّيكسن ئتّواسي يسلي، ثسّاعت نّا دّان أد أژومن».
36 أها ينّاياسن أوال أد: «ؤر ئلّي ونّا يتبّين أنقّال زݣ لكتّان ؤجديد ئݣيث ئي لكتّان أقديم، ئدّخ ئدّا لكتّان ؤجديد أد ئفلي، د ـ ؤنقّال س ـ ئخف نّس ؤر ئدّي أدّ ياس خف لكتّان أقديم.
37 أها ؤر ئلّي ؤنّا يتّݣّين شّراب ؤجديد ݣ - ئݣدّيدن ئقديمن، ئدّا شّراب ؤجديد أد ئسطّيقس ئݣدّيدن ئقديمن، داي ينّغل شّراب، خسرن ئݣدّيدن.
38 ماشان دا تّݣّين شّراب ؤجديد ݣ - ئݣدّيدن ؤجديدن.
39 أها ؤر ئلّي أود يوكّ نّا يسّان شّراب أقديم ييري أد ئسو ؤجديد ضاراس ئدّخ ئدّا أد ييني، أقديم أيد يوفن».