لينجيل ن ـ سيدنا عيسى خف ؤفوس ن ـ يوحنّا
1
لمسيح أيد ئݣان أوال ن ربّي
1 ݣ تيزويري، ئلّا واوال، د واوال ئلّا غر ربّي، ئݣ واوال ربّي.
2 ݣ تيزويري ئلّا د ربّي.
3 ئݣا ربّي ئسّ مايد ئݣان شا، د بلا نتّا ؤر ئتّواݣّ مايد ئݣان شا زݣ ؤينّا ئلّان.
4 ديكس أݣ تلّا تودرت، د تودرت-اد أسيدّ ن ميدّن أيد تݣا.
5 أسيدّ دا ئسّادّا ݣ تالّست، والاينّي تالّست ؤر تغي أتسخسي.
6 ئلّا يون ن-ؤرݣاز يوزنتيد ربّي، ئسم نّس يحيى.
7 ئدّاد أم ئنيݣي، أد-ئشاهد ئ-وسيدّ، باش أد-امنّ ميدّن كول خف نّيرت ن شّهاتّ نّس.
8 أرݣاز-اد ؤر ئݣّي أسيد، والاينّي ئدّاد باش أد ئشاهد ئ-وسيد.
9 أسيدّ-اد أيد ئݣان أسيدّ أرسلي نّا ديدّان غر دّونيت أها ئسّيدّ خف ميدّن كول.
10 هان أوال ئكّا ݣ دّونيت، أها تتّواݣّ ئس دّونيت، ئميل ميدّن ن دّونيت-اد ؤر سّين مايد ئمس.
11 ئدّاد غر تمازيرت نّس، ئميل ميدّن نّس ؤر-ئس رحيبن شا.
12 ماشان ئيتس رحبن أها أمنّ ئس، داي ئوشاسن لحقّ أد ݣين أراو ن ربّي،
13 نّا د-ئلولان ؤر-ئد زݣ بنادم نغد زݣ شّهوات ن وول نغد أينّا ئرا بنادم، ماشان ربّي س-ئخف نّس أيتن ئݣان د واراو نّس.
14 د واوال ياغول ئݣا بنادم ئعمّرن س رّحمت د لحقّ أها ئزدغ ئنݣراخ، هاتين نانّاي لعزّ نّس، لعزّ نّا ئوشا ئبّاس ئ ممّيس أفرضي.
15 ئشاهداس يحيى أها ئبرّح ئ ميدّن، ئنّاياسن: «هان ونّا أخف أون سّيولخ، لّيݣ نّيخ: "ونّا دّيدّان ضاري، أدّور نّس ئخاتر ؤݣار ن وينو، ئدّخ ئلّا ياد داثي"».
16 داي زݣ لخير نّس وار لحدّ، نومژ كول نّخ لباراكا خف تايّاض.
17 علاحقّ شّرع نّاخ ئوشا ربّي، ييوياختيد سيدنا موسى، ئد رّحمت د-لحقّ ييوياختنيد سيدنا عيسى لمسيح.
18 أݣّد يون ؤر دجّين يانّاي ربّي، ماشان ممّيس أفرضي نّا ئݣان ربّي أها ئعزّ شايݣان غر ئبّاس، أيداخ ئسنعتن مايد ئمس.
شّهاتّ ن يحيى
(ماتّى 3:1-12؛ مارقوس 1:2-8؛ لوقا 3:15-17)
19 تاد أيد ئݣان شّهاتّ ن يحيى لّيݣ غورس دّوزنن ئخاتارن ن ووداين ن تمدينت ن لقدس ييتس ن-ئنبدادن ن تادّارت ن ربّي د-ييتس زݣ أيت لاوي حما أت تسقسان: «ماي تمسد؟»
20 يحيى ئقرّا ؤر ئنكير شا، ئنّاياسن س طايطاي: «ؤر ئد نكّ أيد ئݣان لمسيح».
21 داي سقسانت: «ئوا ماتّا نتّا شݣّ؟ ئد شݣّين أيد ئݣان نّبي إيليّا؟» أها ئنّاياسن يحيى: «أراح، ؤر تݣيخ». «بار ئسّ تݣيت نّبي (نّا خف ئسيول سيدنا موسىa)؟» ئنّاياسن: «ئهي».
22 داي سقسانت ألّو: «ئوا ئنياخ ماي تمسد؟ هاتين ئخصّاخ أن نرار لواجاب ئ يخاتارن نّاخ دّيوزنن، مايدا تّينيد خف ئخف نّش؟».
23 أها ئنّاياسن: «نكّين، أغويّي ن يان ؤبرّاح ئسغويون ݣ-لخلا: "سمنويات أبريد ئ مولانا" أم ؤينّا ئنّا نّبي إشعيا!»
24 زݣ وينّا دّوزن ئخاتارن ن ووداين غر يحيى، لّان ييتس زݣ تربيعن ن-يفرّيسيّين.
25 داي سقسانت: «ئوا مّاخ ألّيݣ دا تبّژت ميدّن ݣ وامان مش ؤر ئد شيݣّ أيد ئݣان لمسيح، ؤلا إيليّا، ؤلا نّبي (نّا خف ئسيول سيدنا موسى)؟»
26 أها ئنّاياسن يحيى: «نكّ، دا تبّژخ ميدّن ݣ وامان، ماشان ئلّا يون ئنݣراون نّا ؤر تسّينم.
27 ئدّا أد دّيدّو فّيري، ونّا مي ؤر واتاخ أود أد رّيخ ئفيلان ن-ئدوشا نّس».
28 ئجرا ؤياد كول ݣ-يغرم ن بيت عنيا نّا ئلّان ورين ئ واسيف ن الأردن ماني ݣ-ار ئتبّژ يحيى ميدّن ݣ وامان.
سيدنا عيسى أيد ئݣان أعلّوش ن ربّي
29 س-أسكّا نّس، يانّاي يحيى سيدنا عيسى ئدّاد غورس، أها ئنّا: «واد أيد ئݣان أعلّوش ن ربّي نّا ئتسفاضنb دّنوب ن ميدّن ن دّونيت-اد.
30 نتّا أخف أون سّيولخ لّيݣ أون نّيخ: "ئدّا أد دّيدّو فّيري يون ؤرݣاز نّا يي يوݣرن، ئدّخ ئلّا ياد داتي".
31 نكّ ؤر سّينخ مايد ئمس، ماشان دّيخد أد بّژخ ميدّن ݣ وامان، حما أت تيسين أيت إسرائيل».
32 داي ئشاهد يحيى س-ؤينّا يانّاي، ئنّا: «هاتين أنّايخ رّوح ن ربّي ئسرّحد زݣ ئݣنّا ئݣ أم يوت ن تتبيرت أها ئرس غيفس.
33 نكّ ؤر سّينخ مايد ئمس، والاينّي ربّي نّا يي دّيوزنن باش أد بّژخ ميدّن ݣ وامان، ئنّايي: "تدّيت أت تانّايت رّوح ئسرّحد أها ئرس خف يون ؤرݣاز، هاتين نتّا أيد ئدّان أد ئبّژ ميدّن ن دّونيت-اد ݣ رّوح ن ربّي".
34 نكّينتين أنّايخ، شاهدخ ئس ئݣا ؤرݣاز-اد ممّيس ن ربّي».
ئمحضرن ئمزوورا ن سيدنا عيسى
35 س-أسكّا نّس، ئلّا يحيى دينّا ديخ ألتو د سين زݣ ئمحضرن نّس.
36 لّيݣ يانّاي يحيى سيدنا عيسى ئزري، ئنّا: «هان أعلّوش ن ربّي».
37 نتّا سلّين ئمحضرن سّين ئ واوال نّس، كّرن تفارن سيدنا عيسى.
38 ئبرّم سيدنا عيسى يانّايتن دا ت تفارن، أها ئنّاياسن: «ماي ترام؟» أها نّاناس: «رابّي ماني ݣ تزدغد؟» (رابّي، لمعنا نّس: لموعلّيم)
39 ئنّاياسن: «أوريو أها تانّايم». دّون أها أنّاين أدغار نّا ݣ-ئقّيما، أتّاين ن تاسّاعت تيس ربعا ن تادݣّات. أها زّْرين غورس أينّا ئقّيمن زݣ أسّ.
40 ئݣ أندراوس ؤماس ن سمعان بطرس يون زݣ سين-اد نّا سلّين ئ واوال ن يحيى أها تفارن سيدنا عيسى.
41 أينّا ئݣا د-أمزْوارو، ئدّا أد ئرزو ؤماس سمعان، داي ئنّاياس: «هاتين نوفا لمسيا». (زعما ونّا ئݣان لمسيح)
42 داي ياويث غر سيدنا عيسى. ليّݣ تيانّاي سيدنا عيسى، ئنّاياس: «شݣّ أيد ئݣان سمعان ممّيس ن يوحنا، ئسم نّش ئدّا أد ئݣ صفا». (ئسم-اد س واوال ن-أيت ليونان: بطرس. لمعنا ن صفا د بطرس: أقشمير).
عيسى دا ئقّار ئ فيلبس د نثنائيل
43 س-أسكّا نّس، ئرا سيدنا عيسى أد ئدّو غر تمازيرت ن لجليل، ياف فيلبّس أها ئنّاياس: «تفارييي».
44 ئكّا فيلبّس ئݣا زݣ تمدينت ن بيت صيدا نّا زݣ ئݣا أندراوس د بطرس.
45 داي فّير ن-ؤينّا، ياف فيلبّس نثنائيل أها ئنّاياس: «هاتين نوفا ونّا خف ئسّيول سيدنا موسى ݣ لشتاب ن شّرع أها سّيولن غيفس أود لانبييا، عيسى نّا ئݣان زݣ تمدينت ن نّاصرا، ئݣ ممّيس ن يوسف».
46 ئنّاياس نثنائيل: «ئد أد دّيفّغ شا ئژيلن زݣ تمدينت ن نّاصرا؟» أها ئنّاياس فيلبّس: «أورا أها تانّايد».
47 داي يانّاي سيدنا عيسى نثنائيل ئدّاد غورس أها ئنّا غيفس: «هان يون زݣ أيت إسرائيل أرسلي نّا ݣ-ؤر تلّي تحراميات».
48 داي ئنّاياس نثنائيل: «ممشي تݣيد ألّيݣ ئ تسّنت؟» ئسيول سيدنا عيسى ئنّاياس: «أنّايخش لّيݣ تلّيد دّاو ن تازارت، أها فّيراس ئغراش فيلبّس».
49 أها ئنّاياس نثنائيل: «ألموعلّيم، شݣّ أيد ئݣان ممّيس ن ربّي! شݣّ أيد ئݣان أݣلّيد ن-إسرائيل!»
50 ئسيول سيدنا عيسى ئنّاياس: «ئد ئدّخ أش نّيخ أنّايخش دّاو ن تازارت أخف ئسّي تّامند؟ ئقنشين أت تانّايت ئتس ن-ئسكّين ؤݣرنين شايݣان ويد!»
51 داي ئنّاياسن ديخ ألّو: «يّيه، ستيتّ أيدا أون تّينيخ: تدّام أت تانّايم ئݣنّا ئرژم، د لمالائكات ن ربّي دا تّالين غر ئݣنّا أر تسرّاحن غر ممّيس ن بنادم!»