3
سيدنا يحيى نّا دا يتغبّازن ݣ - وامان
(ماتّى 3:1-12؛ مارقوس 1:1-8؛ يوحنّا 1:19-28)
1 ݣ - ؤسݣّاس ويسّ خمّسطاعش زݣ ـ ثنباطّ ن - قايصار طيباريوس، أݣلّيد ن ـ رّومان، لّيݣ ئݣا بيلاطوس لبونطي أنبّاض خف ثمازيرث ن - أيث ياهودا، ئيݣ هيرودوس أنبّاض خف ثمازيرث ن - لجاليل، أها يݣ ݣماس فيلبّوس أنبّاض خف ثمازيرث ن - ئطوريا د - تراخونيتيس، ئيݣ ليسانيوس أنبّاض خف ثمازيرث ن - ئبيلينا؛
2 ݣ - لوقث نّا ݣ - ئݣا حنّان د - قيّافا ئنمغورّ ن ـ ثدّارث ن ـ ربّي، ئسيول ربّي ئي سيدنا يحيى ممّيس ن - زاكاريا ݣ - لخلا.
3 داي يكّر ئدّو غر ثميزار كول نّا لّانين ثانيلا ن - واسيف ن - لوردن، أر ئتّبرّاح ئي ميدّن أد تّوغبّزن ݣ ـ وامان حما أد سنعثن ئيس ران أد ثوبن أغولن غر ربّي حما أداسن ئغفر.
4 ئمشينا ئتّيارين ݣ - لشثاب ن - نّبي إشعيا لّيݣ غيفس ئنّا: «هان يان ؤبرّاح دا يتبرّاخ ݣ ـ لخلا أر ئتّيني: عديلاث أبريد ئي مولانا، ثسطّعنام ئبردان نّس أد منون،
5 مايد ئݣان ثالاتّ ثدّا أتّادر، د ـ مايد ئݣان عاري د - ثيشّوتّ أد ئݣريݣرث، أها طّعنان ئبردان نّا فرغنين، وهينن وينّا وعرنين،
6 داي أنّاين ميدّن كول أفوكّا ن - ربّي!»
7 شايݣان ن ـ لغاشي أيد أر ديتدّون غر سيدنا يحيى حما أثن ئغبّز ݣ ـ وامان أها أراسن ئتّيني: «أياراو ن - ئفيغراون، مايداون ئعلمن أتّرولم زݣ لعيقاب ن ـ ربّي نّا غا ديدّون؟
8 ݣاث شان ئسكّين نّا دا سنعاثنين ئيس تّوبم سثيتّ، غوراون أد تّينيم ݣ - ئخفاون نّون: هاثين ثاروا ن - سيدنا براهيم أي نݣا، ئدّخ أداون ئنيخ: هاثين ئغي ربّي أدّ ئسّوفغ ثاروا ئي سيدنا براهيم زݣ ئژرا ياد!
9 هان شّاقور ئتّوسرس خف ئژوران ن - ئسكلا، كّو أسكلو نّا ؤر دا ئتّارون لغلّث ئژيلن ئدّا أد ئتّوابّي ئتّواݣر ݣ - لعافيث».
10 داي سقسانث ميدّن نّاناس: «ئوا، ماي نتّݣّا؟»
11 أها ينّاياسن: «ؤنّا غر لّان سينّ ن ـ ئعبانّ، أد ئوش ئي ونّا غر ؤر ئلّي، د - ونّا غر ئلّا ووتشّي، أث ئشّار د - وينّا غر ؤر ئلّي».
12 داي دّوند غورس ألثو ييتّس ن - ئصنّاكن حما أد تّوغبّزن ݣ - وامان، أها نّاناس: «أياسّلماد، مايداخ ئخصّان أث نݣ؟»
13 داي ينّاياسن: «أد ؤر تّامژاث ݣ ـ صّنكّ ؤݣار ن - ؤينّا يݣان لقانون».
14 أها سقسانث أود ييتس ن - ئعسكرين نّاناس: «ئي نوكّني مايداخ ئخصّان أث نݣ؟» داي ئنّاياسن: «أد ؤر تعدّاواث خف ميدّن، ؤلا ثݣّرام لباطل خف أود يوكّ، أها ثعنقم س - لمونا نّون».
15 يافد لحال ميدّن أر تّعايانن لماسيح، قّيمين كول نسن أر تّينين ݣ ـ ئخفاون نسن بار ئيد سيدنا يحيى أيد ئݣان لماسيح.
16 داي ئسيولاسن سيدنا يحيى كول نسن ئنّاياسن: «نكّين دا كون تغبّازخ ݣ - وامان، ماشان ئدّا أدّ ئدّو ونّا غيفي يجهدن، ونّامي ؤر واثاخ أد ريخ أود ئفيلان ن - واركسن نّس، نتّا يدّا أكون ئغبّز ݣ - رّوح ن - ربّي د - لعافيث،
17 نتّا أغر ثلّا ثازرث ݣ - ؤفوس نّس حما أد ئزّديݣ أنّرار نّس، أها ئسمون ئمندي ݣ - ؤعريش نّس؛ ئيد أليم أث ئسغوس س - يوث لعافيث نّا ؤر دا ئخسّين».
18 أها يقّيم سيدنا يحيى أر ئسّلماد ئي ميدّن شايݣان ن - ئسكّين ياضن أراسن ئتبرّاح س ـ ئنغميسن ژيلنين خف ربّي.
19 ئيد أنبّاض هيرودوس، ييژّي غيفس ئدّخ ييول هيروديا ثامطّوطّ ن - ݣماس فيلبّوسس، د - خف شايݣان ن ـ لفعايل ؤر ئحلين نّا يݣّا كول.
20 داي يݣر هيرودوس سيدنا يحيى ݣ ـ لحبس، س ـ ؤياد يزايد لمعصيث ضنين ئي ثينّا يݣا كول.
أغبّز ن - سيدنا عيسى ݣ - وامان
(ماتّى 3:13-17؛ مارقوس 1:9-11)
21 لّيݣ تّوغبّزن ميدّن كول ݣ ـ وامان، ئتّوغبّز أود سيدنا عيسى، داي نتّا أر ئتّژالّا يتّورژم ييݣنّا،
22 أها يرسدّ غيفس رّوح ن - ربّي ݣ ـ سّيفث ن - ثثبيرث، ئسيولد يان واوال زݣ ييݣنّا أر ئتّيني: «شݣّين ممّي نّا غوري يعزّين، فرحخ ئسّك شايݣان».
طاسيلا ن - سيدنا عيسى لماسيح
23 لّيݣ ئسفالّ سيدنا عيسى لخدمث نّس، ثلّا غورس أم ثلاثين ن - ؤسݣّاس. ميدّن كول أر تّيغالن ئيس ئݣا ممّيس ن - يوسف، ئيݣ يوسف ممّيس ن - عالي،
24 ئيݣ عالي مّيس ن - متّثاث، ئيݣ متّثاث ممّيس ن - لاوي، ئيݣ لاوي ممّيس ن - مالكي، ئيݣ مالكي ممّيس ن - يانّا، ئيݣ يانّا ممّيس ن - يوسف،
25 ئيݣ يوسف ممّيس ن - متّاثيا، ئيݣ متّاثيا ممّيس ن - عاموص، ئيݣ عاموص ممّيس ن - ناحوم، ئيݣ ناحوم ممّيس ن - حسلي، ئيݣ حسلي ممّيس ن - ناجّاي،
26 ئيݣ ناجّاي ممّيس ن - مات، ئيݣ مات ممّيس ن - متّاثيا، ئيݣ متّاثيا ممّيس ن - شيمعي، ئيݣ شيمعي ممّيس ن - يوسف، ئيݣ يوسف ممّيس ن - ياهودا،
27 ئيݣ ياهودا ممّيس ن - يوحنّا، ئيݣ يوحنّا ممّيس ن - ريسا، ئيݣ ريسا ممّيس ن - زاروبابيل، ئيݣ زاروبابيل ممّيس ن - شالتيئيل، ئيݣ شالتيئيل ممّيس ن - نيري،
28 ئيݣ نيري ممّيس ن - مالكي، ئيݣ مالكي ممّيس ن - أدّي، ئيݣ أدّي ممّيس ن - قوصام، ئيݣ قوصام ممّيس ن - مودام، ئيݣ مودام ممّيس ن - عير،
29 ئيݣ عير ممّيس ن - ياشوع، ئيݣ ياشوع ممّيس ن - أليعازار، ئيݣ أليعازار ممّيس ن - يوريم، ئيݣ يوريم ممّيس ن - متّثاث، ئيݣ متّثاث ممّيس ن - لاوي،
30 ئيݣ لاوي ممّيس ن - شمعون، ئيݣ شمعون ممّيس ن - ياهودا، ئيݣ ياهودا ممّيس ن - يوسف، ئيݣ يوسف ممّيس ن - يونان، ئيݣ يونان ممّيس ن - ألياقيم،
31 ئيݣ ألياقيم ممّيس ن - ماليا، ئيݣ ماليا ممّيس ن - مينان، ئيݣ مينان ممّيس ن - متّاثا، ئيݣ متّاثا ممّيس ن - ناثان، ئيݣ ناثان ممّيس ن - داود،
32 ئيݣ داود ممّيس ن - ياسّى، ئيݣ ياسّى ممّيس ن - عوبيد، ئيݣ عوبيد ممّيس ن - بوعازّ، ئيݣ بوعازّ ممّيس ن - سالامون، ئيݣ سالامون ممّيس ن - ناحشون،
33 ئيݣ ناحشون ممّيس ن - عمّيناداب، ئيݣ عمّيناداب ممّيس ن - أدمي، ئيݣ أدمي ممّيس ن - عرني، ئيݣ عرني ممّيس ن - حصرون، ئيݣ حصرون ممّيس ن - فارص، ئيݣ فارص ممّيس ن - ياهودا،
34 ئيݣ يهودا ممّيس ن - يعقوب، ئيݣ يعقوب ممّيس ن - إسحاق، ئيݣ ئسحاق ممّيس ن - براهيم، ئيݣ براهيم ممّيس ن - تارح، ئيݣ تارح ممّيس ن - ناحور.
35 ئيݣ ناحور ممّيس ن - ساروج، ئيݣ ساروج ممّيس ن - راعو، ئيݣ راعو ممّيس ن - فالج، ئيݣ فالج ممّيس ن - عابر، ئيݣ عابر ممّيس ن - شالح،
36 ئيݣ شالح ممّيس ن - قينان، ئيݣ قينان ممّيس ن - أرفكشاد، ئيݣ أرفكشاد ممّيس ن - سام، ئيݣ سام ممّيس ن - نوح، ئيݣ نوح ممّيس ن ـ لامك،
37 ئيݣ لامك ممّيس ن - ماتوشالح، ئيݣ ماتوشالح ممّيس ن ـ أخنوخ، ئيݣ أخنوخ ممّيس ن - يارد، ئيݣ يارد ممّيس ن - ماهللئيل، ئيݣ ماهللئيل ممّيس ن - قينان،
38 ئيݣ قينان ممّيس ن - أنوش، ئيݣ أنوش ممّيس ن - شيث، ئيݣ شيث ممّيس ن - أدام، ئيݣ أدام ممّيس ن - ربّي.