3
أوال ن-يحيى لمعمدان
(مارقوس 1:1-8؛ لوقا 3:1-18؛ يوحنّا 1:19-28)
1 ݣ ؤسان نّا، ئبايند يحيى لمعمدان (لمعنا نس: ونّا ئتغبّازن ݣ وامان)، ݣ صحرا ن لْيَهُودِيَّا أر ئسوال خف ربّي.
2 أها أر ئتّيني: «أمژاث أبريد ن-ربّي، أد ؤر تݣّام دّنوب، ئيتّخ تقرّبد تݣلديت ن-ئݣنوان!»
3 يحيى نتّا أݣان أرياز نّا خف ئساول نّبي إِشَعْيَاءْ ئنّا:
«أغويّي ئسغويّون ݣ لخلا سوجدات أبريد ن ربّي تسمقدّام ئبردان نّس».
4 ييلي يحيى دا يلسّا ئعبان زݣ ؤݣليم ن-ئلغمان، أر ئتفكّاس يي ؤستاو نّس س-ؤفكّاس ن-ؤݣليم، أر ئتتّا تامورغي د تمّنت ن لخلا.
5 ئلين ميدّن أر غورس تتدّون زݣ تمدينث ن لقدس د تمازيرث ن ليهوديّا كول د زݣ واتّاين ن تمازيرث ن لأردن.
6 حما أد توغبزن ݣ وامان ن واسيف ن لأردن، أها أر تقرّان س دّنوب نّسن.
7 داي ألّيݣ يانّاي يحيى شيݣان ن-ئفرّيسيّين د-ئصدّوقين دا دتدّون أد توغبزن ݣ وامان، أها ئنّاياسن: «أتاراو ن-ئفيغراون، مايد آون ئنعثن أترولم زݣ لغضب ن ربّي نّا دّيدّان؟
8 ئوا سبيناث توبا نّون س لفعايل نّون غودانين،
9 أد ؤر تّينييات ݣ ئخفاون نّون: "نوكّني نݣا تاروا ن ابْرَاهِيم". ئدّخ أداون ئنيخ هان ربّي ئغي أدّ ئيݣ تاروا يي سيدنا ابْرَاهِيم زݣ ئسلّيون-اد.
10 دغي، هان شّاقّور ئتّواݣ خف ؤژور ن-ؤسكلو، د ؤسكلو نّا ؤر دا ئتّارون لغلت ئژيلن دا ئتّويابّاي ئتّواݣر ݣ لعافيت.
11 نكّين داكُن عمدخ ݣ وامان حما أتّوبم، ماشان ونّا ديدّان ضاري ئيجهد غيفي، د نكّين ؤر واتاخ أداسيخ ئدوشا نّس، نتّا ئدّا أكن ئعمّد س رّوح ن ربّي د لعافيت.
12 نتّا أغر ثلّا ثازّرث ݣ-ؤفوس نّس، ئدّا أد ئزوزّر أمطار نّس، ئسمون ئمندي نّس ݣ لخزين نّس، ئسغوس أليم س لعافيت ؤر دا ئخسّين أبدا».
يحيى دا ئتغبّاژ سيدنا عيسى ݣ وامان.
(مارقوس 1:9-11؛ لوقا 3:21-22)
13 ضارت ن-ؤينّا ئكّر سيدنا عيسى ئدّود زݣ تمازيرث ن لجليل غر أسيف ن لوردن حما أتيغبّژ يحيى.
14 والايني ؤر ثيودجي يحيى أها ئنّاياس: «هاثين نكّين أيد ئيحلادجان أد توغبّژخ خف ؤفوس نّش، ئد شݣ تدّيد غوري أك غبّزخ!»
15 أها ئجاوبث سيدنا عيسى ئنّاياس: «أدجّيي دغي، أد ݣخ أياد، ئدّخ أياد أيد ئلازمن حما أنݣ أينّا ئرا ربّي»، يادجّيت يحيى.
16 ضارث ن مايد ئتّوغبّز سيدنا عيسى، غاس ئفّغد زݣ ومان، فيمرّا ئرژم ئݣنّا، يانّاي رّوح ن ربّي، ئݣا أم ثحمامث أها ثرسد غيفس.
17 ئتّوسمع يون ن صّوت دايتّيني زݣ ئݣنّا: «واد أيد ئݣان ممّي ئعزّان نّا س دا تّفراحخ شيݣان».