4
إبليس دايتجرّاب سيدنا عيسى.
(مارقوس 1:12-13؛ لوقا 4:1-13)
1 داي ئحري رّوح ن ربّي سيدنا عيسى غر لخلا حما أت تيجرّب شيطان.
2 أها ياژوم ربعين ن واس د ربعين ن-ييض ألّيݣ تينغا لاژ.
3 داي ئدّود غورس شيطان ئنّاياس: "مش تݣيت ممّيس ن ربّي، ئنياسن يي ئيسليون أد عايدن أد ݣين أغروم".
4 أها ئجاوبت سيدنا عيسى ئنّاياس: "هاثين ئتواري ݣ لشتاب ن ربّي: ؤر ئد غاس س-ؤغروم أس دايتيدير بنادم ماشان س كول مايد ئݣان أوال ن ربّي".
5 داي ياويت شيطان غر تمدينث تامقدست ن لقدس، ئسبدّيت نّيݣ ن تمصريت ن لهيكل زعما تدّارث ن ربّي.
6 أها ئنّاياس: "مش تݣيد ممّيس ن ربّي، ݣر ئخف نّش غر ئزدار، ئدّخ ئتّواري ݣ لشتاب ن ربّي ئس ئدّا أد غيفش ئوصّا لمالايكات نّس أد سحاضرن ئفاسّن نّسن حما أد ؤر تّاوضن ئضارن نّش ئسلي".
7 داي ئنّاياس سيدنا عيسى: "ئتيارو ديخ ألتو، أد ؤر تجرّاب سيدي ربّي-نّش".
8 أها ياويت شيطان ديخ ألتو غر يون ن عاري ئعلّان شيݣان، ئسنعثاس تيݣلّيدين ن تميزار ن دّونيت كول د لعزّ نّست.
9 داي ئنّاياس: "أياد أداشت تشفخ كول، مش تتّوتيت خف ئفادّن تشجدتيي".
10 أها ئنّاياس سيدنا عيسى: "دّو زّيݣي أ شّيطان! ئدّخ ئتّواري ݣ لشتاب ن ربّي ؤر تشجاد غاس يي سيدي ربّي باب نّش د غاس نتّا أيد تّعبادت".
11 داي ئدّو شيطان ئزريث، دّوند غورس لمالايكات أر غيفس تسخارن.
أوال ن سيدنا عيسى ݣ تمازيرث ن لجليل
(مارقوس 1:14-15؛ لوقا 4:14-15)
12 داي أليݣ ئسلاّ سيدنا عيسى ئس ئتيامژ يحيى ݣ لحبس، ياغول غر تمازيرث ن لجليل.
13 أها ئمّوتّي زݣ تمدينث ن نّاصرا ئدّو ئزدغ ݣ تمدينث ن كفرناحوم ئلّان ثما ن لبحر ن لجليل ݣ ثمازيرت ن زابولون د تمازيرث ن نَفْتَالِي،
14 حما أد ئصحو ؤينّا ئنّا نّبي إِشَعْيَاء ئنّان:
15 "أتمازيرث ن زابولون د تمازيرث ن نَفْتَالِي، ئلّان خف ؤبريد ن لبحر زݣ تمناضين لغرب ن واسيف ن الأردن ئݣان تمازيرث ن لجليل ݣ لّان لݣنوس ؤر ݣينين ؤداين ألّو!
16 شعب ئقّيمان ݣ تالّست أنّاين أسيد أخاثار، د وينّا ئقّيمان ݣ تالّست ن لموت د ئمولا نّس، ئنقّر واسيد غيفسن".
17 داي ئيبد سيدنا عيسى زݣ لوقت نّا أر ئساوال أر ئتّيني: "توبات، ئدّخ ديقرّبد نبط ن-تݣلديت ن-ئݣنوان".
سيدنا عيسى دايستّي ئمحضارن ئمزوورا
(مارقوس 1:16-20؛ لوقا 5:1-11)
18 يون وّاس، أر ئتنيودّو سيدنا عيسى تاما ن-ؤݣلمام ن لجَلِيل، يانّاي سين ن واوماتن نّا ئݣان ئصيّاضن أر ݣّارن ثاراتسا ݣ ومان: سمعان نّا مي داتّينين بطرس د ؤماس أندراوس.
19 داي ئنّاياسن: "تفاراتييي، دّيخ أكون رارخ أتݣيم ئصيّاضن ن ميدّن".
20 أدجّين ݣ ؤودغار تيراتسيوين نسن تفارنت.
21 أها ئدّو زݣ سّييس يانّاي سين ن واوماتن، يعقوب ممّيس ن-زبدي د ݣماس يحيى، ݣ ؤغرّابو نثني د ئبّا تسن داعدّلن تيراتسيوين نّسن، ئغراسن.
22 زرين أغرّابو زرين أود باب-نسن.
سيدنا عيسى دا ئسّغرا أر ئجويوي ئموضين
23 داي ئقّيم سيدنا عيسى أر ئسّارا ݣ تمازيرث ن لجليل كول، أر ئسّقرا ݣ أنسيون ن-تژاليت ن وُوداين أر ئتبرّاح س-ئنغميسن ژيلنين ن تݣلديت ن ربّي أر ئسّوجّيݣ مايد ئݣان ئغنشا د واطّان ئلّان ݣ ميدّن كول.
24 ياوضن لخبار نّس تامازيرث ن سوريا كول، أر غورس د تّاوين كول وينّا ياغ شا د وينّا ئشان شا، أر أس تاوين ألّو وينّا دايتوتّوين س لارياح د ئكوشامن، أرثن ئجوجوي.
25 داي تفارن شيݣان ن ميدّن زݣ تمازيرث ن لجليل د زݣ عشرا ن تمدينين د زݣ تمدينث ن لقدس د زݣ تمازيرث ن يهوذا د تمناطّين ن واسيف ن لأردن.