5
أوال ن سيدنا عيسى ݣ عاري
1 ألّيݣ يانّاي سيدنا عيسى شيݣان ن ميدّن يالي غر عاري، ئطّارح، دّوند غورس ئمحضرن نّس.
2 ئكّر أر تن-ئسّقرا أراسن ئتّيني:
3 "أياعري نّون أييمژلاض ئدّخ تݣا تݣلديت ن ربّي تينّون.
4 أياعري نّسن يي وينّا ئحزنن، ئدّخ دّان أد تّوعزان.
5 أياعري-نّسن ئ-وينّا ئتواضعن، ئدّخ دّان أد كّوسن أشال.
6 أياعري نّسن يي وينّا ݣ ئلّا لاژ د فاد ن-ؤبريد ن ربّي، ئدّخ دّان أتافن.
7 أياعري نّسن يي وينّا ݣ تلّا رّحمت، ئدّخ دّان أد تّورحمن.
8 أياعري نّسن يي وينّا مي ئصفا ؤول، ئدّخ دّان أد أنّاين ربّي.
9 أياعري نّسن ئ-وينّا ئزرّعن ئفسان ن لهنا، ئدّخ دّان أد تّوسمان أرّاو ن ربّي.
10 أياعري نّسن ئ-وينّا ئتّوعدّابن ئيتدخ تفارن أبريد ن لمسيح، ئدّخ تينسن أيتݣا تݣلديت ن-ئݣنوان.
11 أياعري-نّون مش كون رݣمن، مرميدّن كون أها ئنين غيفون أوال ؤر ئحلين ئݣان ئحلّالن خف نّيرت-ئنو نكّين.
12 فرحات ترشقاون، ئدّخ ئدّا أد ئمغور لاجر نّون غر ربّي، هاثين ئمشيد أيد مرمدن ميدّن لانبييا نّا زرينين.
تيسنت د ؤوسيد
(مارقوس 9:50؛ لوقا 14:34-35)
13 كونّي تيسّنت ن واشال أيتݣام، ماشان مش تخسر تيسنتس، مايد ئدّان أداس ئرار ثاثفي نّس؟ هاثين ؤر ياد تليق أود يي شا غاس أد تّوݣر غر برّا عفسن غيفس ميدّن.
14 كونّي أسيدّ ن دّونيت أيد تݣام. هاثين ؤر تّيغيي أتنتل تمدينث ئتّوبنان خف عاري،
15 أها ؤر دا سّيغين ميدّن لانبا ݣينت دّاو ن-وطّاص ن لعبار، ماشان داث تݣّان ݣ يون ن-ؤدغار ئعلّان حما أد ئيش أسيد يي وينّا لّانين كول ݣ تادّارت.
16 ئلازم ئمشيد يي ؤوسيد نّون أد ياغ داث ن ميدّن حما أد أنّاين لافعايل نّون ئژيلن أها ݣين لعزّ يي بّا نّون ئلّان ݣ ئݣنوان.
أوال ن سيدنا عيسى خف شّرع
17 هان أتغالم ئس د دّيخ أد كّسخ شّرع ن موسى د ئواليون ن لانبييا، هاثين ؤر ددّيخ أد كّسخ، ماشان أد شمّلخ.
18 لحق أيد أون تّينيخ نكّينتين، هاثين أد ئتّواكّس ئݣنّا د واشال ؤر تّواكّاس يوت ن-تيرّا نغد يوت ن تنقّيط زݣ شّرع غاس أرد شملن كول نّسن.
19 هان ونّا ؤر ئݣين غاس يوت زݣ لوصيّات-اد تيمژّيانين، أها أر ئسّغرا ئ-مّيدّن أد ݣين أم نتّا أد ئيݣ أمژّيان ݣ تݣلديت ن-ئݣنوان. ئد ونّا ئس ئݣان ئعلمت، ئدا أد ئݣ أخاثار ݣ تݣلديت ن-ئݣنوان.
20 هان نكّين داون تّينيخ مش ؤر يوݣير صّلاح نّون صّلاح ن لعولاما ن شّرع د-ئفرّيسيّين ئكتاتبين ن شّرع ؤر تنّيم أد تكشّمم تاݣليت ن-ئݣنوان.
أحراق
21 «هاثين تسلّام ئس ئتّونا يي يمزوورا: "أد ؤر نقّا، ئد ونّا ئنغان ئلازم أتّاوين غر داث ن لقاضي".
22 ماشان نكّينتين داون تّينيخ: "هان ونّا ئحرقن خف ݣماس س لباطل ئلازم أتّاوين غر داث ن-لقاضي، د ونّا ئنّان: أيامدّالو يي ݣماس ئلازم أد ئدّو غر لمجليس ن-ئخاثار ن ؤوداين أد غيفس حكمن، د ونّا س-ئنّان: أياحيوض ئلازم أد ئدّو غر لعافيت ن جاهنّام.
23 مش تدّيت أتشد توكّي نّش يي ربّي ݣ ؤسغرص تشتيد ئس ئلّا شا لغيار ݣراش د ݣماش،
24 أدجّ ثوكّي نّش دينّا تاما ن-ؤسغرص، أها تدّوت ݣ ؤمزوارو تمصالاحت د ݣماش، ضارت ن-ؤينّا تدّوت تشد ثوكّي نّش.
25 د ونّا د مي تنّاغت، مصلاح ئس فيساع ماحدّ تسولم ݣ-ؤبريد، حما ؤر ش-ئتّاوي بودّعوت غر لقاضي، ئوشيك لقاضي يي لمخزن، ݣرينش ݣ لحبس.
26 لحق أداش تينيخ: هاثين ؤر تّفّغت زݣ سّييس غاس أر تخلّصت أرّيال أنݣّارو"».
لفساد (زّنا)
27 «تسلّام ئس ئتّيانّا ئيمزوورا: "أد ؤر تزنُو".
28 ئد نكّين داون تّينيخ: "هان ونّا ئراعان ݣ يوت ن تمطّوط ئشهات، هاثين ئزنا أݣّيدس ݣ ؤول نّس.
29 داي مش دا تݣّت دّنب س تيطّ نّش تافاسيت، كست تݣرت زّيكّ، ئدّخ أش يوف مش ؤر غورش تّيلي تيطّ ؤلا تتّوݣر صّاحت نّش كول ݣ جاهنّام.
30 داي مش داتݣّث دّنوب س-ؤفوس نّش أفاسي، بّيت تݣرت زّيش، ئدّخ أش يوف مش ؤر غورش ئتّيلي ؤفوس ؤلا تدّوت غر جاهنّام"».
ؤلوف
(ماتّى 19:9؛ مارقوس 10:11-12؛ لوقا 16:18)
31 «داي ئتّيونا ديخ ألتو: "هان ونّا ئلّفن ئ-تمطّوط نّس، ئلازم أداس ئشف لشاريض ن وولوف".
32 ئد نكّين داون تّينيخ: "هان ونّا ئلّفن يي تمطّوط نّس بلا سيبّا ن زنى دا تيتّازن أتزنو، ئد ونّا ييولن تنّا ئلّفن دا ئتزنو"».
تاݣالّيت
33 «داي تسلّام ئس ئتّونا يي يمزوورا: "أد ؤر تݣالّا س لباطّل، ماشان ݣاس يي ربّي س-ؤينّا س تݣّولّيت".
34 ئد نكّين داون تّينيخ: "أد ؤر تݣالّات، لا س-ئݣنّا ئدّخ ئݣا لعرش ن ربّي،
35 ؤلا س واشال ئدّخ ئݣا أعافيس ن-ئضارن نّس، ؤلا س تمدينث ن لقدس ئدّخ تݣا تامدينث ن-ؤݣلّيد أخاتار.
36 أها أد ؤر تݣلّا س-ؤقشاش نّش، ئدّخ ؤر تّيغييت أد ترارت يون ن وانژض أد ئݣ أملّال نغد أبخّان.
37 ماشان أد ئݣ واوال نّون، يّيه، نغد، ؤهو، د ؤينّا ئزايدن نيݣ ن-ؤياد هاثين ئدّاد زݣ شّيطان"».
لحسيفت
38 «تسلّام ئس ئتّوينا: "مش ثكسث ثيطّ نغد ثوغمسث ن شا ن بنادم ياضن، ثدّا أداش ثياكس ثيطّ نّش نغد ثوغمسث نّش".
39 ئد نكّين أداون ئنيخ: "أد ؤر تّرارات لعار، ماشان ونّا ش-ئوّثان غر أمادل ن-ؤودم نّش أفاسي، ؤشاس أمادل ياضن ديخ ألتو.
40 داي ونّا ئران أش ئصّيوض غر لمخزن حما أداش ياوي أدفاس نّش، تادجّت أد ياوي أود أژنّار.
41 د ونّا ش-ئژيّر أد ئس تموند يون ن-ؤحوريف، دّو أݣّيدس سين ئحوريفن،
42 ونّا ش-ئتّرن شا ؤوسكّين تشتاس، د ونّا ئران أد زّيك ئرضل أد ؤر ثتبرام بلا شا"».
ئرياث ئنضليبن-نّون
43 «تسلّام ئس ئتّوينا: "أتّيريت أدجّار نّش تشرهت أعداو نّش".
44 ئد نكّين داون تّينيخ: «ئرييات ئعداون نّون، تتّرم يي ربّي س لخير زݣ ثانيلا ن-وينّا داون تݣّين شا ؤر ئحلين أر كون تمرمادن،
45 حما أتݣيم أرّاو ن بّاتون ئلاّن ݣ ئݣنوان. هاثين نتّا أيد دا يتنقّارن تافوشت نّس خف وينّا ؤر ئحلين د وينّا صلحنين، أر ياكّا أنژار يي وينّا ئدّان ݣ ؤبريد نّس د وينّا ثيفغنين.
46 هاثين مش دا تّيريم وينّا كون ئتّرين ماتّا لاجر غورّون ئلّان؟ ئس ؤر داتݣّين ئصنّاكن أياد أود نيتني؟
47 داي مش دا تسلامم غاس خف أيثماثون ئس تݣّام شا ئژيلن؟ ئس ؤر ئد أود وينّا ؤر ئسّينن ربّي دا تݣّين ئمشيد؟
48 ئليات تشمّلم، ئمشينّا ئشمّل بّا تون ئلّان ݣ ئݣنوان».