16
لقيسث ن - ؤنبداد نّا يݣان أخوّان
1 داي ينّا سيدنا عيسى ئي يمحضرن نّس: «ئلّا يان ؤرݣاز ئطرّحن، ييلي غورس يان ؤنبداد. ئتّوينّاياس غيفس ئس داس ئسفساد أينّا يݣان وينس.
2 أها يغراسد ئنّاياس: "ماتّا ؤياد نّامي دا تسلّاخ غيفش، ئتوينّايي دايي تّاشرد؟ ؤشيي لحساب ن - ؤينّا خف ثݣيد كول أنبداد ئدّخ زݣ سّياد غر داث ؤر تقّيميد أتّݣّد أنبداد غيري".
3 داي ينّا ونبداد ݣ - ئخف نّس: "هان سيدي نو يدّا أدي يژّع زݣ لخدمث، ماي تّݣّخ؟ ثاغوزي ؤراس غيخ، أها ؤر تّيرضوخ أد تّرخ.
4 ئوا سّنخ مايد تّݣّخ، حما أدّاي تّواژعخ زݣ لخدمث أد ئسّي تّرحابن ميدّن ݣ ـ ثادّروين نسن".
5 داي يغردّ ئي وينّا مي يثفار كول سيدي نّس شان ؤمرواس أها يسقسا أمزوارو ينّاياس: "مشثا أيداش ئتّثفار سيدي نو؟"
6 أها ينّاياس: "ميّا ن - ثبيدوزث ن - زّيث ن ـ زّيثون". داي ينّاياس ؤنبداد: "هاياش تّوصيل نّس بّيث، قّيم دغيا أخاش يوكّ ضنين أري ديكس خمسين ن ـ ثبيدوزث".
7 داي ينّاياس ئي يوكّ ضنين: "ئي شݣّين مشثا أيداش ئتّوثفارن؟" أها ينّاياس: "ميّا ن - لعبرا ن - ييردن". داي ينّاياس ؤنبداد: "هاياش تّوصيل نّش بّيث، أخاش يوكّ ضنين أري ديكس ثمانيين ن ـ لعبرا"».
8 «داي يرعب باب ن - شّي ݣ ـ ؤنبداد نّس وار لامين ئدّخ ئشوا. سثيتّ، هاثين أراو ن - دّونيث أد شوان ئنݣراتسن ؤݣار ن ـ واراو ن - ؤسيدّ.
9 نكّين داون تّينيخ: ݣاث لخير ئي ميدّن س - لمال ن ـ دّونيث أد، ثݣيم ئمدّوكّال حما أدّاي قضونث أد غورون ييلي لاجر ݣ ـ دّجنث».
10 «هان ونّا ݣ - ئلّا لامين ݣ - شا يدروسن، ئدّا أد ديكس ييلي أود ݣ - شا يعدّان، ئيد ؤنّا ݣ - ؤر ئلّي لامين ݣ - شا يدروسن، ؤر ئدّي أديكس ييلي أود ݣ - شا يعدّان.
11 داي مش ؤر ديݣون لامين ݣ ـ لمال ن ـ دّونيث، ماي كون ئسّامانن خف لكنز أرسلي ن ـ ييݣنّا؟
12 د ـ مش ؤر ديݣون لامين ݣ ـ ؤينّا ؤر ئݣّين وينّون، مايد ئدّان أداون ئوش أينّاون ئتّوزمّمن أد ئيݣ وينّون».
13 «ؤر ئتّيغيي أود يوكّ أد ئيݣ ئسمغ ئي سينّ ن ـ ئيد بابين، ئدّخ ئدّا أد ؤر ئتّيحميل يوكّ أها ييري وايّاض، نغد أد ئقّيم غر يوكّ أها يزري وايّاض. هاثين ؤر تّيغيم أتّݣيم ئسمغان ن - ربّي د وين لفلوس ݣ - يوث ن - ثيلمرتّ».
مايدا يتّيني شّرع خف وولوف
(ماتّى 11:12-13؛ 5:31-32؛ مارقوس 10:11-12)
14 ئلين أود ئفرّيسين أر سّغادن ئي وياد كول أها أر تصّان خف سيدنا عيسى ئدّخ نيثني عزّين غورسن لفلوس شايݣان.
15 داي ينّاياسن: «كونّي دا تّيريم أتّسعنثم ئي ميدّن ئيس ثمنام، ماشان ئلّا ربّي ئسّن ثوخّيث نّا يلّان ݣ - وولاون نّون. هاثين أينّامي دا سّمغورن ميدّن شّان، ؤر ئحلي غر ربّي».
16 «ئقّيما شّرع ن ـ سيدنا موسى د - لشثوب ن ـ لانبيا أر لوقث ن ـ سيدنا يحيى. داي زݣ لوقث نّا أر ئتّوبرّاح س - ثݣلديتّ ن - ربّي، د ـ كّو يون أر ئتّݣّا ثامسّومانث حما أد غورس ئكشم.
17 ماشان ؤر ئيد ئيس ؤر ئقّيمي شّرع ن ـ سيدنا موسى، ئدّخ هاثين ؤكّوس ن - ييݣنّا د - واشال أد ئوهين خف ؤتّوتّي ن - يوث ن - ثنقّيط زݣ - شّرع».
18 «ؤنّا يلّفن كول ئي ثمطّوط نّس أها ياول ثايّاض، هاثين دا يتفساد، د - ؤنّا ييولن ثنّا يلّفن، أود نتّا دا يتّفساد».
لقّيسث ن - ؤرݣاز نّا يطّرّحن د - ليعازار
19 «ئلّا يان ؤرݣاز ئطّرّحن، أر ئرّوس مرسيواث نّا غلانين، أر ئتبرّاع كوياسّ.
20 ييلي يان ؤماثراو ئمحض داث ن ـ لباب نّس ئسم نّس ليعازار، ثعمّر صاّحث نّس س ـ ئثرساون.
21 أر ئتّيني أوايد ئتّشان غاس زݣ ؤينّا دا يتشاياضن خف لميدا ن - ؤنّا يطرّحن. أود ئضان أرد تتدّون أها أراس تلّغن ئثرساون نّس».
22 «داي يمّث ؤماثراو، أسينث لمالايكاث غر ثاما ن - سيدنا براهيم. أها يمّث أود ؤنّا يطرّحن، ئتّومضل.
23 ئدّو غر جاهنّم أر ئتّوعدّاب. نتّا يحقّا زݣ سّييس أها يانّاي غر تّيساع سيدنا براهيم د ـ ليعازر يلّا يقّيما ثاما نّس.
24 أها يغراس ئنّاياس: "أيبّا براهيم رحميي، أزندّ ليعازار أد ئسّومّغ ئخف ن ـ ؤضاض نّس س - وامان أدي يسّميضّ ييلّس ئدّخ هاثين دا تّوعدّابخ ݣ - ؤحدّيق أد".
25 داي ينّاياس سيدنا براهيم: "أممّي، شثي ئيس غورش ئكّا وينّا ثريد كول ݣ - ثودرث نّش، ئيد لعازار ؤر غورس ئكّي ݣ ـ ثودرث نّس غاس ثامارا، دغي هاثين دا يتّوسعوندا داد، ئيد شݣّين دا تّوعدّابد.
26 د - نّيݣ ن - ؤياد كول، هاثين ئلّا يان واقّا نّا يغبان ئنݣراخ أݣّيدون، مغار ئلّا ونّا يران أنّ ئنضو غورون ؤر ئتّيغي، ؤلا يغي ؤنّا نيلّان ديسّ أدّ ئنضو غورخ"».
27 «داي ينّاياس ؤنّا يطرّحن: "ئوا عافاش أيبّا براهيم أزن ليعازار غر ثدّارث ن - ئبّا
28 ئدّخ هاثين لّان غوري خمسا ن - أيثما، ريخ أثن ئنهو حما ؤر دتدّون أود نيثني غر أنسا ياد ن ـ ؤعدّب".
29 أها ينّاياس سيدنا براهيم: "هاثين ئلّا غورسن شّرع ن - سيدنا موسى د - لشثوب ن ـ لانبيا، ئخصّاياسن أد ضاعن أينّا ديكسن ئلّان".
30 داي ينّاياس ؤنّا يطرّحن: "ئهي أيبّا براهيم! هاثين مش غورسن ئدّا شان يون زݣ وينّا مّوثنين، دّان أد ثوبن".
31 أها ينّاياس سيدنا براهيم: "مش ؤر دا سّغادن ئي وينّا ينّا سيدنا موسى د - لانبيا، ؤر دّين أد أمنن مقّار ديكّر شان يوكّ زݣ وينّا مّوثنين"».