15
لقيسث ن - ؤحولي نّا يوشّكان
1 يوث ن ـ لمرث، مونند ئصنّاكن كول د - وينّا فّغنين أبريد ن ـ ربّي حما أد سّغدن ئي مايد أر ئتّيني سيدنا عيسى.
2 داي وراسن ئعجيب لحال ئي يفرّيسين د - ئسّلمادن ن - شّرع قّيمين أر تّينين: «هان أرݣاز أد دا يتّرحاب ئي وينّا عصانين ربّي أر ئتتّا أݣّيدسن!»
3 داي يقّيساسن سيدنا عيسى لقيسث أد أها ينّاياسن:
4 «مش تلّا غر شا ديݣون ميّا ن - ؤحولي، أها ياشّكاس يون زّيكسن، ئيس ؤر ئتّادجّا تسّعا وتسّعين ݣ - لخلا أها يدّو أد ئرزو خف وونّا يوشّكان أرد ئيث ياف؟
5 داي أدّاي ثياف أها يفرح ياسيث خف ئغيرّ نّس،
6 ياغول غر ثادّارث نّس أها يغرد ئي يمدّوكّال نّس د - وادجّارن نّس يينياسن: "فرحاث أݣّيدي هاثين ؤفيخ أحولي نو نّايي يوشّكان".
7 أداون ئنيخ: هاثين أمشيس أود ݣ - ييݣنّا، دا يتّيلي ؤفراح س ـ يان ئمعصي نّا يثوبن ؤݣار ن - تسعا وتسعين منانين نّا ؤر ئحداجّان ئي تّوبث».
لقيسث ن - ؤقّاريض نّا يوشّكان
8 «نغد مش لّان عشرا ن - ئقاريضن ن ـ نقّرث غر شان ثمطّوطّ، أها ياشّكاس يان ؤقاريض، ئس ؤر ثسّاغا أسيدّ أها ثشطّب ثادّارث ثرزو عنوݣّا أرد ئيتّاف؟
9 داي أدّاي تّاف، أها ثغرد ئي ثمدّوكّال نّس د - ثادجّارين نّس ثينياسنث: "فرحمت أݣّيدي ئدّخ ؤفيخ أقاريض نّايي يوشكان"».
10 «أداون ئنيخ: هاثين ئمشيد أي دا يتّيلي ؤفراح داث ن - لملايكاث ن - ربّي س - يان ئمعصي نّا يثوبن».
لقيسث ن - ؤربا نّا يوشّكان
11 داي ينّاياسن سيدنا عيسى ديخ لقيسث أد: «ئلّا يان ؤرݣاز غورس سينّ ن - واراو.
12 أها ينّاياس ؤمژّيان ديكسن: "أيبّا، ؤشيي أمور ئنو زݣ ثكاسوتّ" داي ئبضوياسن ئي واراو نّس سّين أينّا يݣان وينس كول.
13 ماشان فّير ن - شان ووسّان دروسنين، ئسمون ؤربا أمژّيان أينّا غورس ئلّان كول، ئدّو غر يوث ن - ثمازيرث نّا يبعدن أها يسفسد أيدّا نّس كول.
14 نتّا يسخسر أينّا غورس ئلّان كول، ئكّر يان بوهيّوف ئوعرن ݣ - ثمازيرث نّا، ياغول ؤر يوفي مايد ئتشّا.
15 أها يدّو أد ئخدم غر يان ؤرݣاز ݣ - ثمازيرث نّا، يازنث غر ئݣران نّس حما أداس ئكس ئلفان.
16 أها ينغيث لاژّ ألّيݣّ أر ئتّيني أوايد يوفان أد ئسݣيون أديس نّس غاس أود س - ثيكيطّ نّا أر تتّان ييلفان. ماشان أود يوكّ أستّ ئوشان.
17 نتّا يعايتّيد ئخف نّس داي ينّا: "مشثا ن - ئخدّامن أيد ئلّان غر ئبّا دا غيفسن ئتشّاياض ووتّشي، أر تّمثاثخ نكّينثين داد س - لاژّ.
18 دّيخ أد كّرخ أد دّوخ غر ئبّا أها يينيخاس: أيبّا، عصيخ ربّي أها عصوخش.
19 ؤر قّيميخ واثاخ أد ݣخ ممّيش، ݣييي غاس د ـ أمّ يون زݣ ئخدّامن نّش"».
20 «داي يكّر ياغول غر ئبّاس. لّيݣ ئسول ألثو ؤر نّييويض غر ثدّارث، يانّايث ئبّاس غر تّيساع أها يسّنغيث ݣ ـ ثاسا، يازّل ئݣراس ئغيل أرث ئسّودوم.
21 داي ينّاياس ممّيس: "أيبّا، هاثين عصيخ ربّي أها عصوخش، ؤر قّيميخ واثاخ أد ݣخ ممّيش".
22 داي ينّاياسن ئبّاس ئي يسمغان نّس: "سدّرفاث، أوياثدّ مرسيوث ئژيلن كول أها ثسّلسيماستّ، ثݣيماس ثالخاثمث ݣ - ؤضاض، ثاويماسدّ ئدوكا.
23 ثاويمدّ يان ؤمݣّيز نّا يقّوان أها ثغرصماس، أنتشّ، نفرح،
24 ئدّخ ممّي ياد ئكّا يموّث أها ياغول دغي يدّر، ياشّك أها يتّواف". داي قّيمين أر تّرشاقن».
25 «يافد لحال ممّيس أخاثار ئلّانّ ݣ - ييݣر، نتّا يدّاد ئدجّاوردّ غر ثادّارث، ئسلّا ئي لهزّ ن - ؤحيدوس د - ؤشطّح.
26 أها يغردّ ئي يون زݣ ئمزيلّزن ئسقساث خف مايد ئجران.
27 أها ينّاياس ؤمزيلّز: "هاثين ݣماش أيدّ ياغولن، داي يغرص ئبّاش ئي ومݣّيز ئقّوان ئدّخ دّياغول س - لمان"
28 أها يحرق ممّيس أخاثار ؤر ئري أد ئكشم، داي يفّغد ئبّاس أرث ئسحوژّور.
29 ماشان ئنّاياس ئي يبّاّس: "أراش خدّمخ مشثا ن - ئسݣّاسن أياد، ؤر دجّين عصيخ أوال نّش أها ؤر دّجين ئي ثوشيد أود ئغيد حما أد فرحخ د - ئمدّوكّال ئنو،
30 ماشان لّيݣ دّياغول ممّيش أد نّا يتشّان ثازلا نّش ݣ - ثوثمين ئفسدن، أها ثغصرداس ئي ومݣّيز ئقوان"».