18
مايد ئݣان أخثار ݣ-ثݣلديت ن-ئݣنوان
(مارقوس 9:33-37؛ لوقا 9:46-48)
1 ݣ لوقت نّا جمعند ئمحضار غر سيدنا عيسى نّناس: «ماݣ تݣّان أخثار ݣ ثݣلديت ن-ئݣنوان؟»
2 داي ئغرد سيدنا عيسى يي يون ن لعيل أمزيان ئسبدّث ݣ وامّاس نسن.
3 داي ئنّياسن: «أداون ننيخ لحق، مش ؤر تبدّيلم، ثݣيم أم لعيلا، هاثين ؤر تكشّمم ثاݣلديت ن-ئݣنوان.
4 هان ونّا ݣ تواضعن ئݣ أم ؤرباياد، نتّا أيد ئتݣّان أخثار ݣ ثݣلديت ن-ئݣنوان.
5 ونّا ئرحبن س يون ن-ؤربا ئمشيد خف-ئسم ئنو، هاثين ئرحب ئسّي.
6 «ئد ونّاݣ ستّوتّين ݣ دّنوب يون ؤربا زݣ ئمژيان-اد نّاݣ ؤمن ئسّي، يوفاس أد ياݣل يون ئسلّي أخثار ن-ؤزرݣ ئتّوݣر غر أبوض ن لبحر.
7 أ وّيها نسن يي ميدن ن دّونيت-اد زݣ لومور نّا داي تسبّابن يي دّنوب! ئدّخ أياد ئلازم أد ئجرو، والاينّي أ وّيها نّس يي ونّا دا ئتسبّابن ديݣسن!
8 هاثين مش ئدّا ؤفوس نّش نغد أضار نّش أرديݣ دّنوب، بّيت تݣرتّ زّيك، يوفاش أد تكشمث غر تودرت ن وابدا ثݣيث أحيزون نغد ؤر غورش ئيلّي ؤفوس ؤلا ثدّيث غر لعافيت ن وابدا، أها ئلين غورش سين ئفاسّن د سين ئضارن.
9 داي مش تݣا ثيطّ نّش دّنوب، كّست ثݣرت زّيك، يوفاش أتكشمث غر تودرت ن وابدا س-يوث ن ثيط، ؤلا ثدّيث غر لعافيت ن جاهنّام، أها ئلينث غورش والّن».
10 «راراث لبال نّون أد-ؤر تحقّاراث أود يون زݣ ئمژيان-اد، ئدّخ أداون ئنيخ: هان لمالايكا نّسن ݣ ئݣنوان دا تّنّاين كّوياس ؤودم ن بّا ئنو ئلّان ݣ ئݣنوان.
11 [ئدّخ هان ممّيس ن بنادم ئدّاد أد-ئفوكّا أينّا ئخلان].
لميتال ن-ؤعلّوش يوشكان
12 ما يداون ياضهر؟ مش لّان غر شان ن يون ن-ؤورݣاز ميّا ن-ؤعلّوش، ئزلاس يون، ئس ؤر ئدي أد يادج تسعا ؤ-تسعين ن-ؤعلّوش ݣ عاري ئدّو أد ئقلّب خف ونّا يوشكان؟
13 داي مش ئدّا آر ثياف، أداون ننيخ لحق، ئدّا أد ئس ئفرح ؤݣار ن تسعود ؤتسعين ن-ؤعلّوش نّا ؤر يوشكين.
14 ئمشيد بّاثون ئلّان ݣ ئݣنوان ؤر داي تّيري أد ئيمّت أݣد شان يون زݣ ئمژّيان-اد.
أمساماح
15 داي مش ئخضا ݣماش ݣ لحق نّش، ثدّوث ثمسفهام ئ-نݣراون غاس كنّي سّين، مش آش ئسلا هاثين ثربحث ݣماش.
16 ئد مش ؤر ئري أداش ئسل، ثاويث ألتو أݣّيدش يون ن-ؤرݣاز نغد سين، حما أد ئتّوثبت واوال س-ؤقمو ن سين شهود نغد شراض.
17 ئد مش ؤر آسن ئسلي، ثنيت ئ-وݣراو ن-ئمومن، داي مش ؤر ئسغيد ئ-وݣراو ن-ئمومن، ئلازم أد غورش ئݣ أم يون ن-ؤكافر نغد أم يون ن-ؤصنّاك.
18 لحق أيداون تّينيخ: هاثين أينّا تقّنم خف واشال أد ئقّن ݣ ئݣنّا، د ؤينّا مي ثرژمم خف واشال أد ئتورژم ݣ ئݣنّا.
19 أداون ننيخ ديخ ألثو: هاثين مش مسسان سين زّيݣون ݣ وشال خف شا ن-ؤسكين نّا تّرن، ئدّا أداسن ثيش بّا-ئنو ئلّان ݣ ئݣنوان.
20 أكماني ݣ مون سين نغد شراض س-ئسم ئنو، دّيخ أد يليخ ݣ وامّاس نسن».
لقيسث ن-ئسمغ نّا ؤر دا ئتسماحن
21 يان واس ئيقرّبد بُطْرُس غر يَسُوع ئنّياس: «أمولانا، مشثا ن تيكّال أݣ ئتّدناب ݣما ݣ لحق ئينو أراس تساماحخ؟ ئد آر سبعا ن تيكّال؟»
22 داي ئنّاياس سيدنا عيسى: «ؤر-اش تينيخ سبعا ن تيكّال، ماشان آر سبعين ن تيكّلت سبعا ن تيكّال.
23 خف ؤياد ثݣا ثݣلديت ن-ئݣنوان أم ؤݣلّيد ئران أد-ئمحاساب د-ئسمغان نّس.
24 ألّيݣ ئبدا أر ئس ئتمحاساب، أويناسد يون خف ئلّا ؤمرواس ن عشرا لاف ن-ؤقاريض ن نقرث.
25 ماشان ؤر غورس ئلّي ماسي ئتخلّاص أمرواس، داي يامر باب نّس أد تزّنزن نتّا د تمطّوط نّس د واراو نّس د وينّا غورس ئلاّن حما أد-ئفوكّا أمرواس نّس.
26 ئسجداس ئسمغ ئنّاياس: "صبر غيفي أ سيدي هايّي دّيخ أداش رارخ كول أمرواس نش!"
27 ئحنّا غيفس باب نّس أها ئرژماس ئسامحاس ݣ-ؤمرواس.
28 داي ئفّغ ئسمغ نّا ياف يون ئسمغ زݣ ئمدّوكال نّس نّامي ئتفار أمرواس ن ميّا دينار، يامژث داي ئجيّفث، ئنّاياس: "برمي أينّا داش تفّورخ!"
29 داي يتّوتّي ئسمغ ئݣان أمدّاكل نّس داث ن-ئضار نّس ئحاولث ئنّاياس: "صبر غيفي غاداش رارخ أينّا ييث تفورث".
30 داي ؤر ئري ماشان ييويث ئݣرث ݣ لحبس أر د-ئيخلّص أمرواس نّس.
31 ألّيݣ أنّاين ئسمغان ياضنين أينّا ئجران، ثطايراسن شيݣان، دّون نّناس يي باب نّسن أينّا ئجران.
32 أها ئغراسد ݣ لوقث نّا باب نّس، ئنّياس: "أيا ئسمغاد ؤر ئحلين! ؤدجيغاش أمرواس نّا كول، ئدّخ ئيث حاولث.
33 ئس ؤر غيفش ئلازم أود شݣّين أد ترحمث ئسمغاد أمدّاكل نّش ئمشي نّاك رحمخ نكّين؟".