17
مش ئخّا ݣماش أݣيدش
(ماتّى 18:6-7، 21-22؛ مارقوس 9:42)
1 يان واسّ، ئنّا سيدنا عيسى ئي يمحضرّ نّس: «لابدّا أد جرون ئسكّين نّا يتّاوين بنادم غر لمعصيث، ماشان أياعندا نّس ئي ونّا ثنيد ئتّادجّان.
2 هاثين أداس ياف مش أس ئتّواݣل ؤژرو ن - ؤزرݣ غر حنݣي أها يتّواݣر ݣ - لبحر، ؤلا يݣا ماس ئتّاوي شا ݣ - ئمژّيان أد غر لمعصيث.
3 حضوياث ئخفاون نّون! مش ديكّ ئخضا ݣماش أها ثيژّيد غيفس، ئيد مش تّمݣراژ أها ثسامحداس.
4 مغار ديكّ ئخضا سبعا ن - ثيلمرّات ݣ - واسّ أها ياغولدّ غورش كّو ثيلمرت أداش ييني سامحيي، أها ثسامحداس».
5 يوث ن ـ ثيلمرث نّاناس ئمازانّ ئي سيدنا عيسى: «زايداخ ليمان».
6 أها ينّاياسن: «مور غورون ئلّي ليمان ئݣان أنشث ن - شان ييفس أمژّيان، أليݣ أس ثنّام ئي وسكلو ياد ن ـ تّوتّ، أكّوف ثتواژّوضنّ ݣ - لبحر، أها يضاعكون».
لخدمث ن - ئسمغ
7 «مش ئلّا غر شا ديݣون شان ئسمغ نّا دا يكرّزن نغد دا يكسّا يولّي، ئيد أداس ييني أدّاي دّياغول زݣ ييݣر: أورا دغيا قّيم أتشّد؟
8 ئهي، ماشان ئدّا أداس ييني: ݣيي يمنسي أها ثزيلّزد غيفي أرد تّشخ سوخ، داي ضارث ن - ؤينّا ثشّد شݣّين ثسود.
9 ماخ ئيس ئݣا يسمغ نّا شان ؤجميل مش ئݣا أينّاس ئنّا باب نّس؟
10 ئمشيس أود كونّي، أدّاي ثݣيم أينّاون نّيخ، أها ثينيم: نوكني غاس ئسمغان أي نݣا، ؤر نلي أجميل ئدّخ ؤر نݣي غاس أينّا غيفنخ ئلاّن».
أجّوجي ن - عشرا ن ـ ئرݣزن نّاݣ ئلّا لبرص
11 لّيݣ ئدّا سيدنا عيسى غر لقدس، ئزري ئنݣر ن - ثمازيرث ن - سّاميرا د - ثمازيرث ن - لجاليل،
12 نتّا يكشم غر يان ؤسون ديسّ، نّالّينثيد عشرا ن - ئرݣزن ئلّا ديكسن لبرص، أها بدّين ݣ - تّيساع.
13 أر سغويّون أر تّينين: «أسيدنا عيسى، أياسلماد، رحماخ».
14 داي يحقّا ديكسن أها ينّاياسن: «دّوياث سنعثاث ئخفاون نّون ئي ينبدادن ن ـ ثدّارث ن ـ ربّي!» نتّا دّان ݣ - ؤبريد أها جّين.
15 نتّا يانّاي يوكّ زّيݣسن ئيس ئجّي ؤر ديكس ئقّيمي لبرص، ياغولدّ غر سيدنا عيسى أر ئتمجّاد ربّي س - ؤغويّي،
16 أها يبندق س ـ أشال غر ئضارّ ن - سيدنا عيسى أرث ئتّشكار خف ؤينّاس ئݣا، يافد لحال أرݣاز نّا يݣا ؤسّاميرا.
17 داي ينّا سيدنا عيسى: «ئيس ؤريد عشرا أيد ئجّين؟ ئوا ماني تسّعا ضنين؟
18 ئيس ؤر ئلّي مايدّ ياغولن أد ئمجّد ربّي غاس أبرّاني ياد؟»
19 داي ينّاياس ئي وساميري: «كّر دّو، هان ليمان نّش ئفوكّاش».
ميلمي أغا دّثدّو ثݣلديتّ ن - ربّي
20 يان واسّ، سقسان ئفرّيسين سيدنا عيسى نّاناس: «ميلمي أغا دّثاوض ثݣلديتّ ن - ربّي؟» أها ينّاياسن: «ؤر ثدّي ثݣلديتّ ن - ربّي أتّيضهير س ـ شان ثماثارث نّا دا يتّويانّاين.
21 ؤر تّيغيم أتّينيم: هاتّين ثلّا داد، نغد هاتّين ثلّا دينّ ئدّخ ثاݣلديتّ ن - ربّي ثلّا يينݣراثون».
22 داي ينّاياسن ئي يمحضرّ نّس: «ثدّا أدّ ثدّو لوقث نّاݣ تّينيم أوايد ئلّان د ـ ممّيس ن - بنادم أود غاس يان واسّ، ماشان ؤر تّيغيم.
23 داي دّان أداون ئنين: "هاثين ئلّا داد"، نغد "هاثين ئلّا دينّ"، ماشان أد ؤرثن تّامناث ؤلا ثن تّفارم،
24 ئدّخ أدّاي دّياغول ممّيس ن - بنادم، ئدّا أد ئيݣ أم ووسم نّا دا يكّاثن ݣ ـ يوث ن ـ ثمناط ن ـ ؤجنا أها يسّيدّن غر ثمناط ثايّاض.
25 ماشان ئخصّاياس بعدا أد ئتّوعدّب شايݣان، أها ؤرث تّيحميلن ميدّن ن - زّمان أد.
26 أدّاي دّياغول ممّيس ن ـ بنادم، ثدّا دّونيث أتݣ أم ݣ ـ لوقث ن - سيدنا نوح:
27 لّان ميدّن أر تّتّان أر سّان، أر تّمياوالن، أر أسّيسّ نّاݣ ئكشم سيدنا نوح أغرّابو أها ثقّوم دّونيث س ـ وامان داي يخلون كول نسن.
28 ئمشينّا يجران أود ݣ - لوقث ن ـ لوط: لّان ميدّن أر تتّان أر سّان، أر سّاغن أر زّنزان، أر تّژّون أر بنّون،
29 ماشان ݣ - واسّ نّاݣ ئفّغ لوط زݣ ثمدينث ن - سادوم، ئوثدّ ربّي ثامدينث س ـ ؤنژار ن - لعافيت د - لكبريث زݣ ييݣنّا، أها خلون كول نسن.
30 هاثين ئمشيد أيد ئدّان أد ئجرو ݣ - واسّ نّاݣ ديتدّو ممّيس ن - بنادم.
31 كول وونّا يلّان أفلّا ن ـ ئغرم ݣ ـ واسّ نّا، ييلي وينّا يݣان وينس نّس جاج ن ـ ثادّارث، ؤراس ئخصّا أد ئسرّح أثيد ياسي، د - ونّا يلّان ݣ - ييݣر، ئخصّاياس أد ؤر ئتّاغول غر ثدّارث.
32 شثياث مايداس ئجران ئي ثمطّوطّ ن ـ لوط.
33 هاثين ؤنّا يران أد ئسراح ثودرث نّس ئدّا أتّ ئزل، ئيد ونّا يزلان ثودرث نّس ئدّا أتّ ئسراح.
34 أداون ئنيخ: هاثين ݣ - ييض نّا، دّان سين ن ـ ميدّن أد ݣنن ݣ - يوث ن - ثيسّي، أها يتّواسي يوكّ ئقّيم وايّاض.
35 ئلينث سناث ن - ثوثمين دا ژّاضنث س ـ يان ؤزرݣ أها ثتّواسي يوث ثقّيم ثايّاض».
36 a
37 داي سقسانث ئمحضرن نّاناس: «ماني ݣ - ئتّجرو ؤياد أمولانا؟» أها ينّاياسن: «أنسا نّاݣ دا تّيلي ثمورضيسث أݣ دا تّموتّورن ئݣيدار».