18
لقيسث ن - ثنّامي ئمّوث ؤرݣاز د - لقاضي نّا يخّان
1 يان واسّ ئقّيس سيدنا عيسى ئي يمحضرّ نّس يوث ن ـ لقيسث حما أداسن ئسنعث ئيس أسن ئخصّا أد حضون ثاژالّيتّ أها ؤر زّيكس تّوحيلن.
2 داي ينّاياسن: «ئلّا ݣ - يوث ن - ثمدينث يان لقاضي نّا ؤر دا يتّݣّدن ربّي ؤلا يوقّر ميدّن.
3 ثيلي يوث ن - ثمطّوط نّامي يمّوث ؤرݣاز ݣ - ثمدينث نّا، ثقّيم أر غورس تدّو أراس تّيني: "أمژي لحقّ زݣ ؤنّا غيفي يتعدّان".
4 داي ؤر ديكس تّييوي، ماشان فّير ن - ؤينّا ينّا ݣ - ئخف نّس: "مغار ؤر دا تّݣّدخ ربّي ؤلا وقّرخ أود يون،
5 دّيخ أد أمژخ لحقّ ئي ثمطّوط أد ئدّخ ئي ثسطورّي، أها حما ؤر دتدّو كوياسّ أدي ثسّنغ ئخف"».
6 داي ينّاياسن سيدنا عيسى: «سّغداث ئي ماي دا يتّيني لقاضي نّا يخّان.
7 ئوا ئيس ؤر ئدّي ربّي أد يامژ لحقّ ئي وينّا يسثي، وينّا داس قّارّين س ـ ييض د - واسّ؟ ئيس ؤراسن ئسّغاد دغيا؟
8 أداون ئنيخ: هاثين ئدّا أداسن يامژ لحقّ دغيا. ماشان أدّاي ديدّو ممّيس ن - بنادم، ئيد أدّ ياف شان ليمان خف واشال؟».
لقيسث ن - ؤفرّيسي د - ؤصنّاك
9 داي يقّيس سيدنا عيسى لقيسث أد ئي وينّا أر تّينين ݣ ـ ئخفاون نسن هاثين منان أها أر تحقّارن وييّاض، ئنّاياسن:
10 «دّان سين ن - ئرݣزن غر ثدّارث ن - ربّي حما أد ژّالّين، يوكّ أفرّيسي د - وايّاض أصنّاك.
11 داي يبدّ ؤفرّيسي أر ئتژالّا ئنݣراس د ـ ئخف نّس أر ئتّيني: "أربّي، داش تحمادخ ئدّخ ؤر ݣيخ ئمعصي أم ميدّن ضنين نّا دا تّاشرنين، أرتغشّان، أر تفسادن، ؤلا ݣيخ أمّ ؤصنّاك أد.
12 دا تّاژومخ سناث ن - ثيلمرّات ݣ - ؤسبيع، أر تّكّسخ لعشور خف ؤينّا داد تّراراخ كول".
13 ئيد أصنّاك، ئبدّا ݣ - تّيساع ؤر ئغي أود أد ئهزّا ألّن نّس س ـ ئݣنّا، أر ئكّاث ئدمارّ نّس أر ئتّيني: "أربّي رحميي، هاثين ݣيخ ئمعصي!"».
14 «أداون ئنيخ: هاثين أصنّاك أد ئدّا غر ثادّارث نّس ئرضا غيفس ربّي، ؤر ئيد أم ؤفرّيسي. ئدّخ ؤنّا يسّمژين س ـ ئخف نّس ئدّا أد ئيسّ ئتّوسخاثر ئيد ؤنّا يسخاثرن س ـ ئخف نّس ئدّا أد ئيسّ ئتّوسّمژي».
سيدنا عيسى دا يسبارك ئشيرّان
(ماتّى 19:13-15؛ مارقوس 10:13-16)
15 أويند ييتس ن - ميدّن أراو نسن ئي سيدنا عيسى أد غيفسن ئسيرس ئفاسّن حما أثن ئسبارك. نتّا أنّاين ئمحضرّ أينّا قّيمين أر غيفسن تفقّاعن.
16 ئيد سيدنا عيسى ئغراياسن ئي يشيرّان أها ينّا: «أدجّاث ئشيرّان أد غوري ددّون، ثحيداماسن ئدّخ هاثين وينّا ݣانين أمّ نثني أمي ثݣا ثݣلديتّ ن ـ ربّي ثينسن.
17 سثيتّ أداون ئنيخ: هاثين ؤنّا ؤر ئݣين أم شا ݣ ـ ئشيرّان أد ؤر دا يكتّشم غر ثݣلديتّ ن - ربّي».
ماي نتّݣّا حما نكّوسا ثودرث ن - وابدا؟
(ماتّى 19:16-30؛ مارقوس 10:17-31)
18 يوث ن ـ ثيلمرتّ، ئسقسا يان ؤخاثار ن ـ ووداين سيدنا عيسى ينّاياس: «أياسّلماد ئژيلن، ماي تݣّخ حما أد كّوساخ ثودرث ن - وابدا ݣ ـ دّجنث؟»
19 داي ينّاياس سيدنا عيسى: «مّاخ ألّيݣ ئي ثنّيد ژيلخ؟ ؤر ئلّي أود يوكّ نّا يژيلن غاس ربّي ئويل نّس.
20 شݣّين ثسّند لفرايض ن ـ شّرع: أد ؤر تفساد، أد ؤر نقّا، أد ؤر تّاكر، أد ؤر زلّا شّهات نّش، وقّر ئبّاش د - مايش».
21 داي ينّاياس ؤرݣاز: «أياد كول دا ثتݣّخ زݣّوس مژّييخ».
22 نتّا يسلّا سيدنا عيسى ئي وياد أها ينّاياس: «ئسول ئقّيماش يان ؤسكّين: زّنز أيدّا نّش كول أها ثبضوتّ ئي يمژلاض، داي ييلي غورش لكنز ݣ - ييݣنّا، أها ثدّوددّ تّفاردي».
23 نتّا يسلّا ؤرݣاز ئي وينّا، داي يقّيم ديكس لحال عنوݣّا ئدّخ ثيد يوفا لحال ئطّرّح شايݣان.
24 لّيݣ ثيانّاي سيدنا عيسى ئدّا يقّيما ديكس لحال عنوݣا أها ينّاياسن ئي يمحضرّ نّس: «مشثا أيد ئوعر خف وينّا طرّحنين أد كشمن غر ثݣلديتّ ن - ربّي!
25 هاثين ئوهن ؤكتشّوم ن - ؤلغم زݣ ثيطّ ن - ثساروتّ ن - ثݣني خف ؤكشّوم ن - ونّا يطّرّحن غر ثݣلديتّ ن - ربّي».
26 داي نّان وينّا أر سّغادنين: «ئوا مايد ئمس ؤنّا يغين أد ئتّوفوكّا؟»
27 أها ينّاياسن سيدنا عيسى: «أينّامي ؤر غين ميدّن، ئغيياس ربّي».
28 داي ينّاياس بطرس: «هاثين نوكّني نزري أينّا يݣان وينّخ كول، أها نتفارش!»
29 داي ينّاياسن سيدنا عيسى: «أداون ئنيخ سثيتّ: كول ؤنّا يزرين ثادّارت نّس، نغد ثامطّوط نّس، نغد أيثماس، نغد لوالدين نّس، نغد أراو نّس خف ثݣلديتّ ن - ربّي،
30 ئدّا أد يامژ ؤݣار ن - ؤياد ݣ - دّونيث، أها ثيلي غورس ثودرث ن - وابدا ݣ ـ دّجنث».
سيدنا عيسى دا يساوال ديخ خف لموث نّس
(ماتّى 20:17-19؛ مارقوس 10:32-34)
31 ياوي سيدنا عيسى ئمحضرّ نّس س - ثنعاش غر تّيساع أها ينّاياسن: «هاياخ ندّا غر لقدس، هاثين ئدّا أديكس ئجرو ؤينّاس كاشفن لانبيا كول خف ممّيس ن - بنادم،
32 ئيس ئدّا أد ئتّوامژ ئتّواوش ئي وينّا ؤر ݣينين ؤداين، أها عژّرن ديكس، رݣمنث سوسفن غيفس،
33 دّان أث هرّسن أها نغينث، ماشان ئدّا أدّ ئكّر زݣ لموث ݣ - واسّ ويسّ شّراض».
34 داي ؤر فرين ئمحضرّ شا ݣ ـ ؤينّا ينّا. ئتوسّنثل زّيكسن واوال نّا أها ؤر سّينن ماخف أر يساوال.
سيدنا عيسى دا يجّوجوي أدرغال
(ماتّى 20:29-34؛ مارقوس 10:46-52)
35 لّيݣ نّيدجّاور سيدنا عيسى غر ثمدينث ن - أريحا، ئلّا يان ؤدرغال ئقّيما ݣ ـ يير ن - ؤبريد أر ئتتّر.
36 نتّا يسلّا ئي لغاشي أر ئزرّي، ئسقسا خف مايد ئجران.
37 أها نّاناس ميدّن هاثين سيدنا عيسى ؤنّاصيرا أيد ئزرين.
38 داي يسغوي ؤدرغال أر ئتّيني: «أسيدنا عيسى ئرو ن - سيدنا داود، رحميي!»
39 داي نهرنث وينّا أر تدّونين داث ن ـ سيدنا عيسى حما أد ئسوسم، ئميل ئزايد أر ئسغويّو ؤݣار أر ئتّيني: «أييرو ن - سيدنا داود، رحمي!»
40 ئسلّاياس سيدنا عيسى، داي يبدّ، أها ينّاياسن أداس ثيد أوين. لّيݣ ثيد ييوض، ئسقساث:
41 «ماي ثريد أداش ݣخ؟» أها ينّاياس ؤدرغال: «أسيدي، ريخ أد تّانّايخ!»