20
لقيسث ن-ئخدّامن ن دّيليث
1 هان ثݣلديت ن-ئݣنوان لاّ تشباه يي يون ن-ؤرݣاز غر ئلّا ؤرثي ن دّيليث، داي ئفّغ صّباح زّيك أد ياوي ئخدّامن يي ؤرثي نّس.
2 داي ئمسسا د-ئخدّامن نّا س والف ن واريال يي واسّ، يازنثن غر ؤورثي نّس.
3 داي ئفّغ ديخ أتّاين ن تسعود يانّاي ئخدّامن ياضن بدّان ݣ لموقف ؤر دا خدّمن.
4 داي ئنّياسن: «دّوياث أود كنّي غر ؤرثي نو، دّيخ أداون خلصخ ثيغراض ن واس نّون. داي دّون».
5 داي ئفّغ ديخ أتّاين ن ضّوهر، ئعايد ئفغ ديخ أتّاين ن لعاصر، ئزايد ديخ ئخدّامن ياضن.
6 داي ئفّغ ديخ أتّاين ن لخمسا ن ثدوݣّات، ياف ئخدّامن ياضن بدّان ؤر دا خدّمن، داي ئنّاياسن: «مّاخ ألّيݣ ثبدّام أسّ كول ؤر تخديمم؟»
7 داي نّناس: «ئدّخ ؤراخ ئسخديم أود يون»، داي ئنّياسن: «دّوياث أود كنّي غر ؤرثي ئنو أتخدمم».
8 ألّيݣ ثيوض ثدوݣّات، ئنّاياس باب ن-ؤرثي يي ؤومقابل نّس: «غرد يي يخدّامن تشتاسن ثيغراد نّسن ثبدوث زݣ ئمݣّورا عاد ئمزوورا».
9 داي دّوند وينّا د دّانين ݣ لخمسا ن ثدݣّات ئخلصاصن يي كّو يون ديكسن س والف ن واريال يي واسّ.
10 ألّيݣ ددّان ئمزورا غالن ئد أد أمژن ؤݣار ن-ئنݣورا، والاينّي ؤمژن أود نيثني غاس ألف ن واريال.
11 ماشان ألّيݣ أر-اسن ئتخلاّص أر تݣمݣيمن خف باب ن وورثي.
12 نّاناس: «ويد ݣان ئمݣّورا خدمن غاس يوث ن ثسّاعت، أها تسمساساتّن ئدنخ نكني نّاݣ خدمن ماݣلا واسّ ثحمو ثافوشث».
13 ئجاوب ئنّاياس يي يون ديكسن: «ئيس غيفش تعدّاخ أيا مدّاكل؟ ئس ؤر مسساخ ديدش س والف ن واريال؟
14 أمژ أينّا ش ديوسان ثدّوث، هاثين ريخ نكّين أداش شفخ أم ؤينّا شيخ يي ؤمݣّارو.
15 ئس ؤر غوري لحق أد ݣخ أينّا ريخ س-ؤينّا ئݣان وينو؟ ماد شݣ ثݣيث أمحساد خف سخّيث ئنو؟»
16 ئزايد ئنّاياسن سيدنا عيسى: «ئمشيد أس تعيادن ئمݣّورا أد ݣين ئمزوورا، ئد ئمزوورا أد ݣين ئنݣّورا».
سيدنا عيسى دا يسنعاث تيكّلث تيس شراط خف لموث نّس د تنشرا نّس.
(مارقوس 10:32-34؛ لوقا 18:31-34)
17 ألّيݣ يولي سيدنا عيسى غر ثمدينث ن لقدس ئعزل ئمحضار نس س تناعش ݣ-ؤبريد، داي ئنّاياسن:
18 «هان نكني نولي غر ثمدينث ن لقدس، ئد ممّيس ن بنادم ئدّا أد ئيتّوشف غر ئيفاسن ن-ئخاثار ن تادّارت ن ربّي د لعولاما ن شّرع، دّان أد غيفس حكمن س لموث.
19 أها ؤشينت غر ئفاسّن ن لݣنوس نّا ؤر ئسّين ربّي حما أد غيفس تصّين وْثنث نغنث خف ؤحنيݣ ن-ؤطّورق، ئد ݣ واسّ ويس شراض ئدّا أدّيكر».
ثوثرا ن مّا نّس ن يعقوب د يحيى
(مارقوس 10:35-45)
20 داي ثدّود غورس مّايس ن وارّاو ن زبدي د واراو نّس سّين، تسجد داثاس ثتّراس شان ن لحاشث.
21 داي ئنّاياس: «ماي ثريث؟» ثنّاياس: «عاهديي أد قّيمن وارّاون ئنو، يون خف ؤفاسي نّش ئد وايض خف ؤژلماض ݣ ثݣلّيت نّش».
22 داي ئجاوبتن سيدنا عيسى ئنّياس: «ؤر تسّينث كنّي مادا تتّرم، ئد أتّيغييم أتسوم لكاس لمرار نّا دّيخ أتسوخ. نّاناس: «أنّيغيي!».
23 أها ئنّياسن: «س نّيث، ثدّام أتسوم لكاس ئنو، ئد أقجديم خف ؤُفَاسِي ئنو د-ؤژلماض ئنو ؤر غُورِي لحقّ نكّين أتن شفخ، ئتخ ؤر تّونشفان غاس ئ-وينّا مي ثن ئسّوجد بّانو».
24 ألّيݣ سلّان ئمحضار س عشرا يي ؤياد، حرقن خف واوماثن سّين.
25 داي ئغراسن سيدنا عيسى، ئنّياسن: «كنّي لاّ تسّينم لملوك لاّ تنباضن خف شعب نسن، ئد ئنبّاضن ئخاثار كّو يون لا ئتنباض خف ونّا ݣ لاّن دّاواسن.
26 ماشان كنّي أد ؤر ئتّيلي ؤياد ئنݣراون، ئتخ ونّا ئران ديݣون أد ئيݣ أخثار ئخصّياس أديݣ أخدّام نّون.
27 ئد ونّا ئران ديݣون أد ئݣ أمزوارو، ئخصّاص أديݣ ئسمغ نّون.
28 أمشيد أود ممّيس ن بنادم ؤر ديدّي حما أد غيفس خدمن ميدّن، ماشان ئدّاد أد ئيخدم أها ئفدو تودرت ن شيݣان ن ميدّن».
سيدنا عيسى دا ئجّوجوي سين ن-ئدرغالن
(مارقوس 10:46-52؛ لوقا 18:35-43)
29 نتّا ئفّغن زݣ ثمدينث ن-أريحا، ئثفورث يون ن-ؤربيع أخثار ن ميدّن.
30 داي ئلين سين ن-ئدرغالن قّيمان ثما ن-ؤبريد، نتّا سلان ئس ئدّا سيدنا عيسى أد ئزري داي أر سغويّون أر تّينين: «رحماخ، أسيدي، أممّيس نداود!»
31 وخّا داثن سفسثان ميدّن. زايدند غورس أر سغويّون س جهد أر تّينين: «أمولانا، رحماخ، أممّيس ن داود!»
32 داي ئبدّ سيدنا عيسى، ئغراسن سّين، ئنّاياسن: «ماي ثرام أداون ݣخ؟»
33 نّاناس سّين نّسن: «أمولانا! نرى أد رژمنث والّن نّخ».
34 داي ئحنّا سيدنا عيسى غيفسن، ئسّلفاسن يي والّن نّسن سّين، فيساع رژمنث والّن نّسن سّين داي دّون ثفورنث.