21
أكشّوم ن سيدنا عيسى غر ثمدينث ن لقدس
(مارقوس 11:1-11؛ لوقا 19:28-40؛ يوحنّا 12:12-19)
1 ألّيݣ نقربن غر ثمدينث ن لقدس ئوضنن غر ئغرم ن بيت فاجي نّا ئلّان ثما ن عاري ن زّيتون، يازن سيدنا عيسى سين ن-ئمحضار.
2 ئنّاياسن: «دّوياث سّين نّون غر ئغرم ئلّان دات-اون، ثدّام أد تافيم يوث ن ثغيولث ثلا تشرف د يون ؤشنيض ئلاّ غورس، رزمثاسن سّين ثاويمثنيد.
3 داي مش-اون ئسيول شا ن يون، ئنيثاس: هاثين ئراثن مولانا، ئدّا أداون ثنيد ئرار فيساع».
4 ئجرا ؤياد كول حما أد ئصحو واوال ن نّبي ئنّان:
5 «ئنيثاسن ئ-يمزداغ ن صِهْيَوْن،
هان أݣلّيد نّون ئدّاد غورّون،
ئتواضع ئنيد خف ؤشنيض،
ممّيس ن ثغيولث».
6 داي دّون ئمحضارن سّين ݣين أينّاسن ئنّا سيدنا عيسى.
7 ژّوغرند ثاغيولث د ممّيس، ݣين ئعبان نّسن غيفسن داي ئني سيدنا عيسى غيفسن.
8 داي ئدّود يون ؤربيع ن ميّدن ئخثارن أر تسّون ئعبان نّسن ݣ-ؤبريد، بّيند ويض ئشبضان ن-ئسكلا أر تن تسّون ݣ-ؤبريد.
9 ييلي ؤوربيع نّاث ثيزوار د ونّا ثيفار لّاسغويّون أر تّينين: «لعز يي ممّيس ن داود! أمبارش أيد ئݣا ونّا دّيدّان س-ئيسم ن مولانا! د لعزّ يي ربّي ن-ئݣنوان!»
10 ألّيݣ ئكشم غر ثمدينث ن لقدس كّرن ئغويّان ݣ ثمدينث كول، أر تّينين: «ماݣ مس واد؟»
11 داي جاوبنثن ثربّاع: «واد أيد ئݣان نّبي سيدنا عيسى ئݣان زݣ ثمدينث ن نّاصرا ن تمازيرت ن لجليل».
سيدنا عيسى دا يتژّع ئعطّار زݣ ثدّارث ن ربّي
(مارقوس 11:15-19؛ لوقا 19:45-48؛ يوحنّا 2:13-22)
12 داي ئكشم سيدنا عيسى غر دّارث ن ربّي داي ئزع كول وينّا سّاغنين أر زّنزان ديݣس، ئݣلّب طبالي ن-وينّا ئتصرافن لفلوس د لكراسا ن-وينّا داي زنزان ئحمّامن.
13 داي ئنّاياسن: «ئتيارو ݣ لشثاب ثدّارث ئنو ثدّارث ن تژالّيت ئد كنّي ترورامت تݣا أم ئفري ن-ئشفّار».
14 داي دّوند غورس ئدرغالن د ئحيزان غر ثدّارث ن ربّي ئجوجّيثن.
15 ألّيݣ أنّاين يي ئخثار ن ثدّارث ن ربّي د ئسلمادن د لعولاما ن شّرع لموعجيزاث نّاݣا، د-ئشيرّان أر سغويّون ݣ ثدّارث ن-ربّي لاّ تّينين: «لعزّ يي ممّيس ن داود!» داي قلقن.
16 داي نّاناس: «ئيس تسلّيد يي مادّا تّينين ويد؟» داي ئنّياسن سيدنا عيسى: «يّيه، ئس ؤر دجّين ثقرام ݣ لشتاب ن ربّي، زݣ ؤوقمو ن-ئشيرّان د تسلمييوين أيتسّوفغث أوال ن لحمد؟»
17 فّير ن-ؤينّا ئفغ غر برّا ن ثمدينث غر ئغرم ن بيت عانيا داي ئنس دييس.
سيدنا عيسى ئنعل ثاسكلوت ن ثازارث
(مارقوس 11:12-14،20-24)
18 ݣ صباح ياغول غر ثمدينث، ئنغاث لاژ،
19 ينّاي يوث ن تسكلوت ن ثزارث خف ؤبريد، ئدّو غورس أها ؤر ديكس يوفي شا غاس أفريون، ئنّياس: «زݣ دغي ؤسار تّاروث شا ن لغلّث أبدا!» داي تقّار ثزارث نّاݣ ؤدغار.
20 أنّاين ئمحضار أينّا ئجران، رعبن، أر تّينين: «ميمش ثݣا ثزارث ألّيݣ تقّور ݣ ؤدغار؟»
21 داي ئجاوبثن سيدنا عيسى ئنّياسن: «دّيخ أداون ئنيخ لحق: مش ئلاّ غورون ليمان أها ؤر تشكّام هاثين ؤر ثنّيم أتݣيم غاس أينّا ݣيخ يي ثزارث، والاينّي مش ثنام يي عارياد مّوتّي ثاتّويث ݣ لبحر، ئدّا أد ئجرو ؤياد نّا ثنّام.
22 ئد أينّا ثتّرم س تژالّيت س ليمان ثدام أ-تّامژم».
ثانباطّ ئلّان غر سيدنا عيسى
(مارقوس 11:27-33؛ لوقا 20:1-8)
23 داي ئكشم غر ثدّارث ن ربّي أر ئسغرا، دّوند غورس ئخثار ن ثدّارث ن ربّي د-ئمغارن ن شعب، نّاناس: «ماتّا ثانباط نّاس داتݣّاث أياد؟ ماتّا واد أداشت ئشفان؟»
24 ئجاوبثن سيدنا عيسى، ئنّياسن: «أود نكّين، أد كن سالخ خف يون ن-ؤوسكّين، مش دجاوبم غيفس، أداون ئنيخ أود نكّين ماتّا ثنباط نّا س داتݣّاخ أياد؟
25 ما زݣ ديدّا ؤغبّز ن يحيى؟ ئد زݣ ئݣنّا ماد زݣ ميدّن؟ داي مشاوارن أر تّينين: مش ننّا زݣ ئݣنّا، أداخ ييني ماخ ألّيݣ ؤر ئس ثومينم؟
26 ئد مش ننّا زݣ ميدّن، نݣّد زݣ لقوم، ئيتّخ غورسن ئݣا يحيى أم يان نّبي».
27 داي جاوبن سيدنا عيسى، نّناس: «ؤور نسّين شا»، داي ئنّاياسن، أود نتّا: «أود نكّين ؤوراون تّينيخ ماتّا ثنباط نّاس دا تݣّاخ أياد».
لقيسث ن سين ن-ئشرّان
28 داي ئنّياسن سيدنا عيسى: «مايداون ئضهرن؟ لّان سين ن-ئشيرّان غر يون ن-ؤرݣاز، داي ئدّو غر أمزوارو ئنّاياس: "أممّي دّو خدم أسّاد ݣ ؤرثي نو ن دّيليث".
29 داي ئجاوبث، ئنّياس: "لا، ؤر رّيخ شا"، شوي غر ثنييرى ئندم ئدّو.
30 أها ئدّو غر ممّيس ويسّين، ئنّاياس أم ؤينّا س-ئنّا يي ومزوارو، داي ئجاوبث، ئنّاياس: "وخّا أسيدي". والاكين ؤر-ئدّي شا.
31 دغي ماݣ مس ݣ ئشيرّان سّين أيد ئݣان أينّا ئرا بّا نّس؟» نّاناس: «أمزوارو». داي ئنّاياسن سيدنا عيسى: «دّيخ أداون ئنيخ لحق: هان ئصنّاكن د تينّا يزنّون دّان أكون زوُور غر ثݣلديت ن ربّي.
32 ئيتّخ ئدّاد غورّون يحيى س-ؤبريد ن لحق، أها ؤر ئس ثومينم، ؤمن ئس ئصنّاكن د تينّا ئزنّون، ئد كنّي مغار ثنّايم ؤر ثنديمم أها ؤر ئس ثومينم.
لقيسث ن-ئفلّاحن ن-دّيليث
(مارقوس 12:1-12؛ لوقا 20:9-19)
33 «سّفلداث يي يوت ن لقيسث ياضن: ئلّا يون ن-ؤرݣاز بو واشال ئزرع يون ن-ؤرثي ن دّيليث ئسضوراس أفراݣ، داي ئݣ ديكس يوث ن لمعصرا، ئبنو يون ن لبرج يي وعسّاس ئشث يي شا ن ئفلاحن ن دّيليث ئدّو ئسافر.
34 ألّيݣ ثيوض لوقث ن لغلّث، يازن ئسمغان نّس غر ئفلاحن نّا ن دّيليث حما أداس داوين لحق نس زݣ لغلّث.
35 داي أمژن ئفلّاحن نّا ن دّيليث ئسمغان نّس، يون وثنث وايض نغانث ئد وايض رجمنث س-ئسلّيون.
36 ئكّر ديخ ألثو يازن ئسمغان ياضن ؤݣار ن-ئمزوُورا، ݣيناسن أم ؤينّا ݣان ئمزوورا.
37 غر ثنييرى يوزن غورسن ممّيس، ئيغال ئس-يدّا أتوقرن.
38 ألّيݣ أنّاين ئفلاحن ممّيس، مسوالن ݣراسن: "نّان واد أيد ئݣان أورّاث! كراث أتنّغ أها نّامژ لورث نّس!"
39 داي أمژنث سّوفغنث غر برّا ن وورثي ن دّيليث نغينث.
40 أدّاي ديعايد باب ن-ورثي ن دّيليث، ماݣ دّا أديݣ يي يفلاحن-اد؟»
41 نّناس: «أد ئنغ ئفلاحن-نّا ؤر ئحلين ݣار منغيوث، ئشف ؤرثي ن دّيليث ئ-يفلاحن ياضن شفيناس لغلّث ݣ لوقث نّس».
42 داي ئنّياسن سيدنا عيسى: «ئيس ؤر تدجيم ثقرام ݣ لشثاب ن ربّي: ئسلّي نّا ؤر رين ئبنّاين، نتّا أݣ عايدن ئݣا ئخف ن غمرث؟ ربّي أيد دّيݣان أياد، ئݣ ؤياد لعجب ݣ والّن نّخ!
43 خف ؤياد داون تّينيخ: هاثين ئقّان أداون تياكّس ثݣلديت ن ربّي ثتّونشفا يي يون ن لقوم ئتݣّان لغلّث نّس.
44 د ونّا ئتّوتّين خف ئسلّي-اد ئرّژ، ئد ونّا خف ئتّوتّي ئدّا أد تيبرش».